Abɛ 5:1-23
5 Ye bi, moo bu ye juɛmi munyu ɔmɛ tue.
Moo bu ye munyu nɛ mi kuɔ ɔ tue saminya,*
2 Konɛ o nyɛ nɛ o bu nyɛmi nɛ o kɛ susuɔ nɔ́ he ɔ he,Nɛ́ o ngɔ o nya kɛ po nile he piɛ.
3 Ejakaa yo nɛ wo blɔ yaya a* nya mi munyu ngɔɔ kaa hwo,Nɛ e nya mi ngɛ tlotlootlo pe nu.
4 Se nyagbenyagbe ɔ, e dooɔ kaa agba,Nɛ e nya ba kaa klaate nya enyɔtsɛ.
5 E nane yaa gbenɔ mi.
E nane hiami ɔmɛ yaa Yɔkɔ* mi tɛɛ.
6 E susuu we wami blɔ ɔ he kulaa.
E blɔ ɔ lɔgɔ si, nɛ e li he nɛ e yaa.
7 Amlɔ nɛ ɔ, ye bimɛ, nyɛɛ bu mi tue,Nɛ nyɛ ko gba kɛ je ye munyu ɔmɛ a he.
8 Koo hɛ kɛ su yo kaa kikɛ nɛ ɔ he;Koo su e we ɔ agbo ɔ he,
9 Konɛ o ko ngɔ o hɛ mi nyami ɔ kɛ ha ni kpahi,Nɛ́ o ko na nɔ́ o wami be nɛ piɛ ɔ;
10 Konɛ nibwɔhi nɛ a ko kpɔ̃ o níhi* ngɛ o dɛ,Nɛ́ nɔ́ nɛ o gbo he dengme ɔ nɛ ko ya je nubwɔ ko we mi.
11 Ke pi jã a, o ma kɛmɛ ngɛ o wami be ɔ nyagbe,Be mi nɛ o he lo kɛ o nɔmlɔ tso ɔ gbɔjɔ
12 Nɛ́ o ma de ke: “Mɛni he je nɛ i bui tsɔsemi tue?
Mɛni he je nɛ i ngmɛ́ blɔ nɛ a kã ye hɛ mi?
13 I bui ye tsɔɔli ɔmɛ a gbi tue,Nɛ i bui a ga womi ɔ hu tue.
14 E piɛ nguɛ nya nɛ ye hɛ mi kpata pɛsɛpɛsɛNgɛ asafo ɔ tsuo hɛ mi.”*
15 Nuu mo nitsɛ o nyu tomi nɔ́ mi nyu,Kɛ nyu nɛ baa ngɛ mo nitsɛ o vu mi.
16 Anɛ e sa kaa o nyu hɛngmɛ ɔmɛ nɛ gbɛ kɛ fĩa kpo nya,Nɛ́ o nyu dɔ ɔmɛ nɛ a hi ma a he nya buami he ɔmɛ lo?
17 Ha nɛ a pee mo pɛ o níhi,Nɛ a ko pee o kɛ nibwɔhi nyɛ nɔ́.
18 Á jɔɔ mo nitsɛ o nyu hɛngmɛ ɔ,*Nɛ o kɛ o nihe mi yo ɔ nɛ nya,
19 E ngɛ kaa afugbɛ eyo saminyayoo, kɛ yoku nɔ apletsi nɛ e he ngɛ fɛu.
Ha nɛ e nyɔ ɔmɛ nɛ ha mo bua jɔmi be fɛɛ be.
Ha nɛ e suɔmi ɔ nɛ gbla mo daa.
20 Lɔ ɔ he ɔ, ye binyumu, mɛni he je nɛ e sa kaa o ná yo nɛ e wo blɔ yaya a* he akɔnɔ,Nɛ́ o fua yo nɛ e je mi bami puɛ ɔ?*
21 Ejakaa adesa blɔhi fɔɔ si ngɛ Yehowa hɛ mi;E naa adesa blɔ ɔmɛ tsuo.
22 Yiwutsotsɛ nitsɛ tɔmihi tsɔɔ lɛ klama,Nɛ lɛ nitsɛ e yayami maa fi lɛ kaa kpã.
23 Akɛnɛ e kplɛɛ we tsɔsemi nɔ he je ɔ, e ma gbo,Nɛ e maa tla blɔ ngɛ lɛ nitsɛ e kuasia jemi babauu ɔ he je.
Sisi Ningmahi
^ Ngɛ Hebri gbi mi ɔ, “Mo ta tue ha ye nɔ́ se kɔmi ɔ.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “kpɔ̃ o he wami.”
^ Ngɛ Hebri gbi mi ɔ, “Ngɛ ma a kɛ asafo ɔ kpɛti.”
^ Aloo “nyu je he ɔ.”
