La 144:1-15
David la.
144 Á je Yehowa, ye Tɛsa a yi,Nɔ nɛ e tsɔseɔ ye nine kɛ haa ta a,Nɔ nɛ e tsɔseɔ ye nguɛhi kɛ haa ta hwumi ɔ.
2 Lɛ ji nɔ nɛ jeɔ suɔmi nɛ se pui kpo kɛ tsɔɔ mi kɛ nɔ nɛ poɔ ye he piɛ,Lɛ ji ye wesa he* nɛ ngɛ slɔkee kɛ ye kpɔlɔ,Ye tsɛ̃i kɛ Nɔ nɛ i saa we ngɛ e ngɔ,Nɔ nɛ baa nihi si kɛ woɔ ye sisi.
3 Oo Yehowa, mɛnɔ ji nɔmlɔ adesa nɛ o susuɔ e he,Mɛnɔ ji nɔmlɔ bi nɛ o juɛɔ e he?
4 Adesa ngɛ kaa gugwɔ mi kɔɔhiɔ kɛkɛ;E ligbi ɔmɛ ngɛ kaa nini nɛ bee.
5 Oo Yehowa, ha nɛ hiɔwe ɔ nɛ ba si* nɛ́ o kple si kɛ ba;Moo ta yoku ɔmɛ a he nɛ o ha nɛ a je lasuku.
6 Ha nɛ oslabai nɛ gba nɛ o gbɛ he nyɛli ɔmɛ kɛ fĩa;Mo tsɛ̃ o kɛ̃ɛ̃ mi bi ɔmɛ nɛ o ha nɛ a juɛmi nɛ gbɛ.
7 Kpã o nine mi kɛ je hiɔwe;Kpɔ̃ mi nɛ o he ye yi wami kɛ je nyuhi nɛ a pee hamahama a mi,Kɛ je nibwɔhi a dɛ mi,
8 Nihi nɛ a nya tuɔ lakpa munyuhi,Nɛ a woɔ a hiɔ nine nɔ kɛ kãa lakpa kita a.*
9 Oo Mawu, ma la la ehe kɛ ha mo.
Ma la yi jemi lahi* nɛ ma fia kpã nyɔngma saku kɛ to he kɛ ha mo;
10 Ma la kɛ ha nɔ nɛ haa matsɛmɛ yeɔ kunimi ɔ,*Nɔ nɛ kpɔ̃ɔ e sɔmɔlɔ David kɛ jeɔ klaate nɛ gbeɔ nɔ nya a.
11 Mo kpɔ̃ mi nɛ o he ye yi wami kɛ je nibwɔhi a dɛ mi,Nihi nɛ a nya tuɔ lakpa munyuhi,Nɛ́ a woɔ a hiɔ nine nɔ kɛ kãa lakpa kita a.
12 Kɛkɛ ɔ, wa binyumu ɔmɛ maa pee kaa tso nɛ ngɛ wae mlamlaamla,Nɛ wa biyi ɔmɛ maa pee kaa kɔ̃ nya titimahi nɛ haa matsɛ we peeɔ fɛu.
13 Wa nito he ɔmɛ ma hyi tɔtɔɔtɔ kɛ ngmɔ ní slɔɔtoslɔɔtohi tsuo;Wa to ɔmɛ nɛ a ngɛ wa nga amɛ a nɔ ɔ maa bɔ he akpehi abɔ, kɛ akpe nyɔngmahi abɔ.
14 Wa nahi nɛ a hɛɛ hɔ ɔ, haomi ko be mɛ náe, nɛ a mi hu be sanee;Nihi be ya foe ngɛ wa ma a he nya buami he ɔmɛ.
15 Nihi nɛ e baa mi jã ngɛ a blɔ fa mi ɔ ngɛ bua jɔmi!
Nihi nɛ a Mawu ji Yehowa a ngɛ bua jɔmi!
Sisi Ningmahi
^ Aloo “he nɛ ya hiɔwe.”
^ Aloo “moo dɔ hiɔwe ɔ mi.”
^ Ngɛ Hebri gbi mi ɔ, “Nɛ a hiɔ nine ji lakpa yemi hiɔ nine ɔ.”
^ Aloo “Ma fia la.”
^ Aloo “Nɔ nɛ ngɔɔ yi wami hemi ba haa matsɛmɛ ɔ.”
