La 64:1-10
-
He piɛ pomi ngɛ tuami be mi
-
“Mawu ma tsɛ̃ mɛ kɛ̃ɛ̃” (7)
-
Kɛ ha la nɔ hyɛlɔ ɔ. La nɛ David po.
64 Oo Mawu, ke i ngɛ mo pɛɛ kpae ɔ, moo bu ye gbi tue.
He nyɛli ngɛ ye he gbeye woe, lɔ ɔ he ɔ, moo po ye wami he piɛ kɛ je a he.
2 Moo bu ye he ngɛ ye yi nɔ nɛ yiwutsotsɛmɛ ngɛ soe ɔ he,Ngɛ yayami peeli babauu ɔ a he.
3 A duɔ a lilɛ nya kaa klaate;A peeɔ a munyuhi nɛ yeɔ nɔ awi ɔ klaalo kaa kɛ̃ɛ̃ mi bihi,
4 Konɛ a tsɛ̃ nɔ nɛ sane ko be e he ɔ kɛ je a laami he ɔmɛ;A tsɛ̃ɔ lɛ si kake too, nɛ a yi gbeye.
5 A ngmɛɛ we a yi mi tomi yayami ɔ he;*A susuɔ bɔ nɛ a maa laa a klama amɛ a nɔ ha a he.
A deɔ ke: “Mɛnɔ maa na?”
6 A hlaa blɔ ehehi nɛ a maa gu nɔ kɛ pee ní yayamihi;A kɛ hɛ mi tɛmi toɔ ga ngɛ laami mi;A ti nɔ fɛɛ nɔ tsui mi susumi ɔ, nɔ ko nɔ ko li.
7 Se Mawu ma tsɛ̃ mɛ kɛ̃ɛ̃;Kɛ̃ɛ̃ mi bi maa plaa mɛ tlukaa.
8 Mɛ nitsɛmɛ a nya mi munyu* ma ha nɛ a hɛ mi nɛ kpata;Nihi tsuo nɛ maa na a ma mimiɛ a yi.
9 Kɛkɛ ɔ, nihi tsuo maa ye gbeye,Nɛ a maa jaje nɔ́ nɛ Mawu pee ɔ,Nɛ a ma kɔ níhi nɛ e pee ɔ se.
10 Dalɔ ma nya ngɛ Yehowa mi, nɛ e maa sa we ngɛ e ngɔ;Nihi nɛ a da ngɛ a tsui mi ɔ ma ná bua jɔmi wawɛɛ.*
Sisi Ningmahi
^ Aloo “A woɔ a sibi he wami konɛ a pee nɔ́ yaya.”
^ Ngɛ Hebri gbi mi ɔ, “a lilɛ.”
^ Aloo “maa fĩa.”
