La 72:1-20
La nɛ ɔ kɔɔ Salomo he.
72 Oo Mawu, ngɔɔ o kojomi ɔmɛ kɛ ha matsɛ ɔ,Nɛ́ o ngɔ o dami ɔ kɛ dloo matsɛ ɔ binyumu ɔ.
2 É fã o we bi ɔmɛ a he ngɛ dami nya,Nɛ́ e kɛ dami sane yemi nɛ fã nihi nɛ a ní ngɛ mɔbɔ ɔ a he.
3 Yoku ɔmɛ nɛ á ngɔ tue mi jɔmi kɛ ba ha ni ɔmɛ,Nɛ kpongu ɔmɛ nɛ a ngɔ dami kɛ ba.
4 É fã ni ɔmɛ a kpɛti nihi nɛ a ní ngɛ mɔbɔ ɔ a he,*É he ohiatsɛ bimɛ a yi wami,Nɛ e kpata ojo fialɔ hɛ mi.
5 Be abɔ nɛ pu ngɛ nɛ ɔ, a maa ye mo gbeye,Be abɔ nɛ nyɔhiɔ ɔ hu ngɛ nɛ ɔ, a maa ye mo gbeyeYi nɔhi tsuo.
6 E maa pee kaa hiɔmi nɛ nɛɔ pueɔ nga nɛ a poo nɔ ɔ nɔ,Kaa hiɔmi nɛ nɛɛ pueɔ zugba a nɔ.
7 Ngɛ e ligbi ɔmɛ a mi ɔ, dalɔ maa bɔ,*Nɛ tue mi jɔmi maa hi he fɛɛ he kɛ yaa si nyɔhiɔ be si hie hu.
8 E maa ye nihi a nɔ* kɛ je wo nya hiɛ kɛ ya si wo nya hiɛ,Kɛ je Pa* a nya kɛ ya si zugba a nyagbe he ɔmɛ hulɔ.
9 Nga kplanaa nɔ bi ɔmɛ ma kplã si ngɛ e hɛ mi,Nɛ e he nyɛli ɔmɛ a nya ma wu zu.
10 Tarshish matsɛmɛ ɔmɛ kɛ zugba kpɔhi nɛ nyu bɔle mɛ ɔ a nɔ matsɛmɛ ɔmɛ maa wo tó.
Sheba kɛ Seba matsɛmɛ ɔmɛ maa ngɔ nike níhi kɛ ba.
11 Matsɛmɛ ɔmɛ tsuo ma kplã si ngɛ e hɛ mi,Nɛ je ma amɛ tsuo ma sɔmɔ lɛ.
12 Ejakaa e ma kpɔ̃ ohiatsɛ nɛ foɔ ya kɛ biɔ yemi kɛ buami ɔ,Kɛ nɔ nɛ e ní ngɛ mɔbɔ, kɛ nɔ fɛɛ nɔ nɛ be yemi kɛ bualɔ ɔ.
13 E mi mi maa sã lɛ ngɛ nɔ nɛ e ní ngɛ mɔbɔ kɛ ohiatsɛ he,Nɛ e ma he ohiatsɛmɛ a* yi wami.
14 E ma kpɔ̃ mɛ* kɛ je yi mi wami kɛ basabasa peemi mi,Nɛ a muɔ he jua maa wa ngɛ e hɛ mi.
15 É hi wami mi nɛ a ngɔ Sheba sika tsu ba ha lɛ.
Á sɔle ha lɛ be fɛɛ be,Nɛ a jɔɔ lɛ ligbi ɔ tsuo.
16 Ngma maa ba babauu ngɛ zugba a nɔ;Yoku ɔmɛ a nɔ ma hyi tɔ kɛ ngma.
E tso yiblii maa ba kaa Lebanon nɔ́ ɔ,Nɛ ma amɛ a mi ma hyi tɔ kɛ nimli kaa nga.
17 E biɛ nɛ hi si kɛ ya neneene,Nɛ́ e biɛ nɛ pɛ be abɔ nɛ pu ngɛ ɔ.
Nihi nɛ́ a gu e nɔ kɛ ná jɔɔmi ha a he;Je mahi tsuo nɛ́ a tsɛ lɛ ke bua jɔmi.
18 A je Yehowa Mawu, Israel Mawu ɔ yi,Nɔ nɛ lɛ pɛ lɛ e peeɔ nyakpɛ níhi ɔ.
19 A je e biɛ nɛ hɛ mi ngɛ nyami ɔ yi kɛ ya neneene,Nɛ e hɛ mi nyami ɔ nɛ hyi zugba a nɔ tsuo.
Amen, Amen.
20 David, Yese* binyumu ɔ sɔlemi ɔmɛ a nyagbe ji nɛ ɔ nɛ.
Sisi Ningmahi
^ Ngɛ Hebri gbi mi ɔ, “E kojo ni ɔmɛ a kpɛti nihi nɛ a ní ngɛ mɔbɔ ɔ.”
^ Ngɛ Hebri gbi mi ɔ, “dalɔ ma tsɛ̃.”
^ Aloo “E ma ba ná sisi bimɛ.”
^ Nɛ ji Yufrate Pa a.
^ Aloo “a klaa.”
^ Aloo “a klaa.”
^ Aloo “Ishai.”
