Luka Sane Kpakpa a 17:1-37
17 Lɔ ɔ se ɔ, e de e kaseli ɔmɛ ke: “Bɔ fɛɛ bɔ nɛ e ji ɔ, níhi nɛ tɔ̃tɔ̃ɔ nɔ nane maa ba. Se kɛ̃ ɔ, nɔmlɔ nɛ e nɔ lɛ níhi nɛ tɔ̃tɔ̃ɔ nɔ nane ɔ maa gu kɛ ba a, musu tloo lɛ!
2 Afani nɛ a fĩ wɛ tɛ ngɔ wo e kuɛ, nɛ a ya sake lɛ ngɔ fɔ wo ɔ mi pe nɛ e maa tɔ̃tɔ̃ ni nyafii nɛ ɔmɛ a ti nɔ kake nane.
3 Nyɛɛ hyɛ nyɛ he nɔ saminya. Ke o nyɛmi pee yayami ko ɔ, kã e hɛ mi, nɛ ke e tsake e tsui ɔ, ngɔɔ kɛ pa lɛ.
4 Ke e tɔ̃ o nɔ si kpaago ngɛ ligbi kake mi po nɛ e ba o ngɔ si kpaago nɛ e ba de mo ke, ‘I pia ye he’ ɔ, e sa nɛ o ngɔ kɛ pa lɛ.”
5 Jehanɛ ɔ, bɔfo ɔmɛ de Nyɔmtsɛ ɔ ke: “Ha wɔ hemi kɛ yemi fuu.”
6 Kɛkɛ nɛ Nyɔmtsɛ ɔ de ke: “Ke nyɛ hemi kɛ yemi ɔ klemi ngɛ kaa sinapi wu ɔ, nyɛ ma nyɛ ma de sikamino tso nɛ ɔ ke, ‘Hiaa kɛ ya ma wo ɔ mi!’ nɛ e maa bu nyɛ tue.
7 Nyɛ ti mɛnɔ lɛ ke e ngɛ nyɔguɛ ko, nɛ nyɔguɛ ɔ kɛ na kpakplaa ya hu, aloo e ya hyɛ tohi a nɔ nɛ e je ngmɔ mi kɛ ba a, e ma de nyɔguɛ ɔ ke, ‘Ba hiɛ ɔ esɔ, nɛ o ba ye ní ngɛ okplɔɔ ɔ he’?
8 Mohu ɔ, anɛ e be e nyɔguɛ ɔ dee ke, ‘To ye gbɔkuɛ niye ní he blɔ nya ha mi, nɛ o wo tade hɛ mi hami bo nɛ o ba sɔmɔ mi kɛ ya si be nɛ ma ye ní nɛ ma nu ní, nɛ ke i gbe nya loko mo hu o ma nyɛ ma ya ye ní nɛ o nu ní’ lo?
9 Tse e be nyɔguɛ ɔ si nae, ejakaa ní tsumi nɛ e ha lɛ kaa e tsu ɔ, lɔ ɔ nɛ e tsu ɔ nɛ, aloo pi jã?
10 Jã kɛ̃ nɛ ke nyɛ pee níhi tsuo nɛ a kɛ wo nyɛ dɛ kaa nyɛɛ pee ɔ, nyɛ de ke: ‘Wa ji nyɔguɛhi nɛ a he be se nami. Nɔ́ nɛ e sa kaa waa pee ɔ, lɔ ɔ nɛ wa pee ɔ nɛ.’”
11 Benɛ e ngɛ blɔ nɔ kɛ yaa Yerusalɛm ɔ, e ya gu Samaria kɛ Galilea a kpɛti.
12 Nɛ benɛ e ngɛ kɔpe ko mi sɛe ɔ, nyumuhi nyɔngma nɛ kpiti ngɛ a he kɛ lɛ ba kpe, se a da si ngɛ tsitsaa lokoo.
13 Nɛ a wo a gbi nɔ nɛ a de ke: “Yesu, Tsɔɔlɔ, naa wɔ mɔbɔ!”
14 Benɛ e na mɛ ɔ, e de mɛ ke: “Nyɛɛ ya nɛ nyɛɛ ngɔ nyɛ he kɛ ya tsɔɔ osɔfo ɔmɛ.” Kɛkɛ nɛ benɛ a pue nɔ kɛ yaa a, a he tsɔ.
15 Benɛ a kpɛti nɔ kake na kaa a tsa lɛ ɔ, e kpale e se, nɛ e kɛ gbi nɛ nya wa ngɛ Mawu hɛ mi nyami woe.
16 Nɛ e ba ngɔ e hɛ mi kɛ bu si ngɛ Yesu nane nya, nɛ e na lɛ si. Samaria no ji lɛ.
17 Yesu bi lɛ ke: “Anɛ pi nihi nyɔngma nɛ a he tsɔ ɔ lo? Ke jã a, lɛɛ jije nihi nɛɛ nɛ a piɛ ɔ ngɛ mɔ?
18 Anɛ a ti nɔ ko nɔ ko kpale we e se kɛ bɛ nɛ e ba wo Mawu hɛ mi nyami kaa nyumu nɛ ɔ nɛ e je ma kpa mi ɔ pɛ lo?”
19 Kɛkɛ nɛ e de lɛ ke: “Moo te si nɛ o ho; o hemi kɛ yemi ɔ tsa mo.”
20 Benɛ Farisi bi ɔmɛ bi lɛ kaa e tsɔɔ mɛ be nɛ Mawu Matsɛ Yemi ɔ maa ba a, e ha mɛ heto ke: “Mawu Matsɛ Yemi ɔ be bae nɛ nihi maa na lɛ heii;
21 jã kɛ̃ nɛ nihi be dee ke, ‘Hyɛ hiɛ ɔ!’ aloo ‘Hyɛ lejɛ ɔ!’ Ejakaa hyɛ! Mawu Matsɛ Yemi ɔ ngɛ nyɛ kpɛti.”
22 Jehanɛ ɔ, e de kaseli ɔmɛ ke: “Be maa ba nɛ nyɛ ma hla kaa nyɛ maa na nɔmlɔ Bi ɔ ligbi ɔmɛ a kpɛti kake, se nyɛ be nae.
23 Nɛ nihi ma de nyɛ de ke, ‘Nyɛɛ hyɛ lejɛ ɔ!’ aloo ‘Nyɛɛ hyɛ hiɛ ɔ!’ Nyɛ ko je kpo, nɛ nyɛ ko tu fo kɛ nyɛɛ a se hulɔ.
24 Ejakaa kaa bɔ nɛ oslabai gbaa kɛ jeɔ hiɔwe fã kake kɛ yaa hiɔwe fã kake ɔ, jã nɛ nɔmlɔ Bi ɔ maa pee ngɛ e ligbi ɔ mi.
25 Se kekleekle ɔ, e sa nɛ e na amanehlu babauu nɛ́ yi nɔ nɛ ɔ hu nɛ kua lɛ.
26 Jehanɛ se hu ɔ, kaa bɔ nɛ e ba ngɛ Noa ligbi ɔmɛ a mi ɔ, jã kɛ̃ nɛ e maa ya nɔ ngɛ nɔmlɔ Bi ɔ ligbi ɔmɛ a mi:
27 a ngɛ ní yee, nɛ a ngɛ ní nue, nyumuhi ngɛ yihi ngɔe, nɛ a ngɔ yihi kɛ ngɛ gba hae hluu kɛ ya si jamɛ a ligbi ɔ nɛ Noa sɛ daka a mi ɔ, nɛ Nyu Kpekpemi ɔ ba nɛ e ba kpata mɛ tsuo a hɛ mi.
28 Jã kɛ̃ nɛ kaa bɔ nɛ e ba ngɛ Lɔt ligbi ɔmɛ a mi ɔ: a ngɛ ní yee, nɛ a ngɛ ní nue, a ngɛ ní hee, nɛ a ngɛ ní juae, nɛ a ngɛ ní due, nɛ a ngɛ tsuhi mae.
29 Se ligbi ɔ nɛ Lɔt je Sodom ɔ, la kɛ sɔlfa nɛ kɛ je hiɔwe kɛ ba kpata mɛ tsuo a hɛ mi.
30 Be nɛ a ma je nɔmlɔ Bi ɔ kpo ɔ, ngɛ jamɛ a ligbi ɔ nɔ ɔ, jã pɛpɛɛpɛ nɛ e maa ba.
31 Jamɛ a ligbi ɔ, ha nɛ nɔ nɛ e ngɛ tsu yi mi se e níhi ngɛ we ɔ mi ɔ nɛ e ko kple si kɛ ba ngɔ ní ɔmɛ, nɛ jã kɛ̃ nɛ nɔ nɛ e ho ngmɔ mi ya a hu nɛ e ko kpale e se kɛ ya níhi nɛ a ngɛ se ɔmɛ a he.
32 Nyɛ kai Lɔt yo ɔ.
33 Nɔ fɛɛ nɔ nɛ e hlaa kaa e maa baa e wami* yi slɔkee ɔ, e maa laa lɛ, se nɔ fɛɛ nɔ nɛ e wami maa laa lɛ ɔ, e maa baa yi.
34 I ngɛ nyɛ dee ke: “Jamɛ a nyɔ ɔ mi ɔ, nihi enyɔ maa hi sa kake nɔ; a maa ngɔ nɔ kake kɛ ho, se a ma kua nɔ kake.
35 Yihi enyɔ maa hi nɔ́ wɛɛe ngɛ wɛ tɛ kake nɔ; a maa ngɔ nɔ kake kɛ ho, se a ma kua nɔ kake.”
36 ——
37 Enɛ ɔ he ɔ, a bi lɛ ke: “Nyɔmtsɛ, jije?” E de mɛ ke: “He nɛ nɔ gbogboe fɔɔ si ngɛ ɔ, lejɛ ɔ nɔuu nɛ kɔlehi buaa a he nya ngɛ.”
Sisi Ningmahi
^ Aloo “susuma.”
