Maako Sane Kpakpa a 4:1-41
4 Jehanɛ ɔ, e bɔni ní tsɔɔmi ngɛ he ko nɛ e kɛ wo ɔ nya kɛ we, nɛ asafo kuu ngua nitsɛnitsɛ ba bua wo e he. Lɔ ɔ he ɔ, e ya sɛ lɛ ko mi nɛ e hi si ngɛ mi ngɛ wo ɔ nɔ, se asafo kuu ɔ tsuo pueɔ si ngɛ wo ɔ nya.
2 Nɛ e ngɔ nɔ́ he tomi níhi kɛ bɔni mɛ níhi fuu tsɔɔmi, nɛ be mi nɛ e ngɛ ní ɔ tsɔɔe ɔ, e de mɛ ke:
3 “Nyɛɛ bu tue. Hyɛ! Ní dulɔ ɔ je kpo konɛ e ya du ní.
4 Benɛ e ngɛ ní ɔ due ɔ, wu ɔmɛ ekomɛ ya pue blɔ ɔ he, nɛ lohwe pɛlitsɛmɛ ba nɛ a ba ye.
5 Ekomɛ hu ya pue tɛ sa nɔ he nɛ zu fuu be, nɛ a puɛ mla, ejakaa zu ɔ mi kuɔ we.
6 Se benɛ pu ɔ je ɔ, e sãa mɛ nɛ a gbo, ejakaa a be sipoku.
7 Wu ɔmɛ ekomɛ ya pue miohi a mi, nɛ mio ɔmɛ wa nɛ a mia mɛ, nɛ a wui yiblii.
8 Se ekpa komɛ hu ya pue zu nɛ hi ɔ nɔ, nɛ benɛ a ngɛ wae nɛ a ngɛ klee ɔ, a bɔni yiblii womi, nɛ a wo kɛ bɔ he si 30, 60, kɛ 100.”
9 Lɔ ɔ se ɔ, e de hu ke: “Ha nɔ nɛ e ngɛ tue nɛ e kɛ maa bu tue ɔ, nɛ e bu tue.”
10 Jehanɛ ɔ, benɛ e piɛ lɛ pɛ ɔ, nihi nɛ a ngɛ e ngɔ ɔ kɛ Ni Nyɔngma Kɛ Enyɔ ɔmɛ bɔni lɛ nɔ́ he tomi ní ɔmɛ a he sane bimi.
11 E de mɛ ke: “Nyɛɛ lɛɛ a ngɔ Mawu Matsɛ Yemi ɔ he laami sane nɛ e ngɛ klɔuu ɔ kɛ ha nyɛ, se nihi nɛ a ngɛ se ɔ lɛɛ, a naa níhi tsuo kaa a ji nɔ́ he tomi níhi kɛkɛ,
12 konɛ hyɛmi lɛɛ a hi hyɛe, se a ko na, nɛ numi lɛɛ a hi nue, se a ko nu sisi; jã kɛ̃ nɛ a be a se kpalee gblegbleegble konɛ a ngɔ a he yayamihi kɛ pa mɛ.”
13 Jehanɛ se hu ɔ, e de mɛ ke: “Nyɛ nui nɔ́ he tomi nɔ́ nɛ ɔ sisi, lɛɛ kɛ nyɛ maa pee kɛɛ nɛ nyɛ maa nu nɔ́ he tomi ní kpa amɛ tsuo a sisi mɔ?
14 “Ni dulɔ ɔ duɔ munyu ɔ.
15 Enɛ ɔ he ɔ, ní nɛmɛ nɛ a ya pue blɔ ɔ he he nɛ a du munyu ɔ ngɛ ɔ ji nihi nɛ ke a nu munyu ɔ nɔuu pɛ ɔ, Satan baa nɛ e ba jeɔ munyu ɔ nɛ a du ngɛ a mi ɔ kɛ yaa a nɛ.
16 Jã kɛ̃ nɛ ní nɛmɛ nɛ a du ngɛ tɛ sa nɔ ɔ hu ngɛ; mɛ ji nihi nɛ ke a nu munyu ɔ nɔuu pɛ ɔ, a kɛ bua jɔmi kplɛɛɔ nɔ.
17 A be sipoku ngɛ mɛ nitsɛmɛ a mi, se a hiɔ si be bɔɔ; ke amanehlu aloo yi mi wami te si ngɛ munyu ɔ he ɔ, kɛkɛ a nane tɔ̃tɔ̃.
18 Ekpa komɛ hu ngɛ nɛ a du mɛ ngɛ miohi a mi. Mɛ ji nihi nɛ a nuɔ munyu ɔ,
19 se níhi a blɔ nya tomi* nɛ ɔ mi yeyeeye peemi kɛ ní nami nɛ sisiɔ nɔ kɛ ní kpahi tsuo a he akɔnɔ sɛɔ a mi nɛ a miaa munyu ɔ, nɛ e wui yiblii ɔ nɛ.
20 Nyagbe ɔ, ní nɛmɛ nɛ a du ngɛ zu nɛ hi ɔ mi ɔ ji nihi nɛ a buɔ munyu ɔ tue nɛ a kplɛɛɔ nɔ nɛ a woɔ yiblii ɔ nɛ—a woɔ kɛ bɔɔ he si 30, 60, kɛ 100.”
21 E de mɛ hu ke: “Tse a je we kane kpo kɛ mɛ kusii* sisi aloo sa tso sisi? Anɛ ke a je lɛ kpo ɔ, pi kane tso nɔ nɛ a kɛ ba maa lo?
22 Ejakaa nɔ́ ko be nɛ a ngɔ kɛ laa nɛ a be lɛ kpo jee; nɔ́ ko be nɛ a laa nɔ saminya nɛ e be kpo jee nɛ nihi nɛ a na.
23 Nɔ fɛɛ nɔ nɛ e ngɛ tue nɛ e kɛ maa bu tue ɔ, ha nɛ e bu tue.”
24 Jehanɛ hu ɔ, e de mɛ ke: “Nyɛɛ bu nɔ́ nɛ nyɛ ngɛ nue ɔ tue saminya. Susumi nɔ́ nɛ nyɛɛ kɛ susuɔ kɛ haa nihi ɔ, nyɛ hu lɔ ɔ nɔuu nɛ a kɛ ma susu ngɔ ha nyɛ, ee, a maa ngɔ babauu kɛ piɛɛ he ha nyɛ.
25 Ejakaa nɔ fɛɛ nɔ nɛ e ngɛ nɔ́ ko ɔ, a ma ha lɛ fuu ngɔ piɛɛ he, se nɔ fɛɛ nɔ nɛ e be nɔ́ ko ɔ, nɔ́ nɛ e ngɛ ɔ po a ma kpɔ̃ ngɛ e dɛ.”
26 Kɛkɛ nɛ e ya nɔ nɛ e de ke: “Enɛ ɔ he ɔ, Mawu Matsɛ Yemi ɔ ngɛ kaa benɛ nyumu ko ya fĩa wu ngɛ zugba nɔ.
27 E hwɔɔ si nyɔ mi nɛ ke je na a, e teɔ si, nɛ wu ɔmɛ puɛɔ nɛ a waa—bɔ nɛ e plɛɔ nɛ e baa lɛ jã a lɛɛ e li.
28 Zugba a nitsɛ wo yiblii bɔɔbɔɔbɔɔ, kekleekle ɔ, tso ɔ, lɔ ɔ se ɔ, e yi ɔ, nɛ nyagbe ɔ, ngma a nitsɛnitsɛ ngɛ tso ɔ yi mi.
29 Se ke e wa a, e ngɔɔ e ní kpami ha a kɛ yaa mi, ejakaa ní kpami be su.”
30 Nɛ e ya nɔ nɛ e de ke: “Mɛni he nɛ a kɛ Mawu Matsɛ Yemi ɔ ma nyɛ maa to, aloo mɛni nɔ́ he tomi nɔ́ nɛ waa kɛ ma nyɛ maa tsɔɔ nya?
31 E ngɛ kaa sinapi wu nɛ benɛ a ya du ngɛ zu mi ɔ, e ji wuhi nɛ a ngɛ zugba a nɔ ɔmɛ a kpɛti nyafii pe kulaa.
32 Se ke a du ɔ, e waa nɛ e ba peeɔ agbo pe tsohi tsuo nɛ a yeɔ a ba a, nɛ e tsɛ̃ɛ kɔni nguanguahi, nɛ hiɔwe lohwe pɛlitsɛmɛ nyɛɔ nɛ a náa hwɔ he ngɛ e hɔ ɔ mi.”
33 Benɛ e kɛ mɛ ngɛ munyu tue ɔ, e ngɔ nɔ́ he tomi níhi fuu kaa kikɛ kɛ tsu ní, bɔ nɛ a ma nyɛ maa bu tue.
34 Niinɛ, e de we mɛ nɔ́ ko nɛ e kɛ nɔ́ he tomi nɔ́ tsu we ní, se ke e piɛ e kɛ e kaseli ɔmɛ pɛ ɔ, e tsɔɔ mɛ níhi tsuo a sisi.
35 Nɛ ngɛ jamɛ a ligbi ɔ nɔ ɔ, benɛ e su gbɔkuɛ ɔ, e de mɛ ke: “Nyɛ ha nɛ waa po mi kɛ ya wo ɔ se je.”
36 Lɔ ɔ he ɔ, benɛ a wo asafo kuu ɔ blɔ se ɔ, a ngɔ Yesu kɛ ho ngɛ lɛ ɔ mi kaa bɔ nɛ e ngɛ ɔ, nɛ lɛ kpahi hu piɛɛ e he.
37 Kɛkɛ nɛ kɔɔhiɔ nɛ nya wa ko bɔni fiami, nɛ oslɔke ɔmɛ ngɛ kue kɛ ngɛ lɛ ɔ fiae, nɛ nyu ngɛ lɛ ɔ mi sɛe, nɛ e miɔ nɛ e ma hyi.
38 Se e tslɔ sɔnue kɛ hwɔɔ si ngɛ lɛ ɔ supa je. Enɛ ɔ he ɔ, a tsɛ̃ɛ lɛ nɛ a bi lɛ ke: “Tsɔɔlɔ, nɛ wa hɛ mi miɔ nɛ e ma kpata nɛ ɔ, pi o kɔmɔ lo?”
39 Kɛkɛ nɛ e te si nɛ e nga kɔɔhiɔ ɔ yi nɛ e de wo ɔ ke: “Hɛ! Pee dii!” Kɛkɛ nɛ kɔɔhiɔ jɔɔ fiami, nɛ lejɛ ɔ jɔ dii nitsɛnitsɛ.
40 Enɛ ɔ he ɔ, e bi mɛ ke: “Mɛni he je nɛ nyɛ ngɛ gbeye yee* wawɛɛ ɔ? Anɛ loloolo ɔ, nyɛ be hemi kɛ yemi lo?”
41 Se a he mi po, nɛ a de a sibi ke: “Mɛnɔ po ji nɛ ɔ? Wo kɛ kɔɔhiɔ po buɔ lɛ tue.”
