Mateo Sane Kpakpa a 19:1-30
19 Benɛ Yesu tu munyu nɛ ɔmɛ ta a, e je Galilea kɛ ba Yudea huzu ɔmɛ a nya ngɛ Yɔdan Pa a se.
2 Jehanɛ hu ɔ, asafo kuu nguahi nyɛɛ e se, nɛ e tsa mɛ ngɛ lejɛ ɔ.
3 Kɛkɛ nɛ Farisi bi ɔmɛ ba e ngɔ kɛ yi mi tomi kaa a ma ba ka lɛ. A bi lɛ ke: “Anɛ mlaa ngmɛɛ blɔ kaa nyumu ma nyɛ maa da nɔ́ fɛɛ nɔ́ ko nɔ nɛ e kɛ e yo nɛ po gba mi lo?”
4 E ha mɛ heto ke: “Anɛ nyɛ kane we kaa sisije ɔ, nɔ nɛ e bɔ mɛ ɔ pee mɛ nyumu kɛ yo
5 nɛ e de ke: ‘Enɛ ɔ he je nɛ nyumu ma si e tsɛ kɛ e nyɛ, nɛ e ma ya mɛtɛ e yo he, nɛ mɛ ni enyɔ ɔmɛ a maa pee he lo kake’ ɔ lo?
6 Lɛɛ a pi ni enyɔ hu, mohu ɔ, he lo kake. Enɛ ɔ he ɔ, nɔ́ nɛ Mawu ngɔ kɛ tsa a, ko ha nɛ adesa ko nɛ e gba mi.”
7 A de lɛ ke: “Ke jã a, lɛɛ mɛni he je mɔ nɛ Mose tsɔɔ kaa nɔ ko nɛ ha e yo gba mi pomi womi nɛ e ngmɛɛ e he ɔ?”
8 E de mɛ ke: “Akɛnɛ nyɛ tsui he wa a he je nɛ Mose ha nyɛ he blɔ kaa nyɛɛ kɛ nyɛ yihi ma nyɛ maa po gba mi ɔ nɛ, se sisije ɔ, e be jã.
9 I ngɛ nyɛ dee ke, nɔ fɛɛ nɔ nɛ e kɛ e yo maa po gba mi nɛ pi ajuama bɔmi* he je, nɛ e ma ya ngɔ nɔ kpa a, e puɛ gba.”
10 Kaseli ɔmɛ de lɛ ke: “Ke kikɛ nɛ ɔ ji bɔ nɛ nyumu kɛ e yo a sane ɔ ngɛ ɔ, lɛɛ e he hia we kaa nɔ ko nɛ e sɛ gba si himi mi mɔ.”
11 E de mɛ ke: “Pi nɔ fɛɛ nɔ nɛ hiɔ si ngɛ munyu nɛ ɔ nya, ja nihi nɛ a ngɛ jamɛ a nike ní ɔ pɛ.
12 Puɛ* komɛ ngɛ nɛ jã nɛ a fɔ mɛ, nɛ puɛ komɛ hu ngɛ nɛ nimli lɛ a puɛ mɛ, nɛ puɛ komɛ hu lɛɛ, mɛ nitsɛmɛ lɛ a pee a he jã ngɛ hiɔwe Matsɛ Yemi ɔ he je. Ha nɔ nɛ e ma nyɛ maa hi si jã a, nɛ e hi si jã.”
13 Lɔ ɔ se ɔ, a ngɔ jokuɛ tsɔwi kɛ ba ha lɛ konɛ e ngɔ e nine kɛ pue a nɔ nɛ e sɔle ha mɛ, se e kaseli ɔmɛ kã a hɛ mi.
14 Se Yesu de ke: “Nyɛ ha nɛ jokuɛ tsɔwi ɔmɛ nɛ a ba ye ngɔ, nɛ nyɛ ko bɔ mɔde kaa nyɛ maa tsi mɛ blɔ, ejakaa nihi kaa jã a, a nɔ́ ji hiɔwe Matsɛ Yemi ɔ nɛ.”
15 Nɛ e ngɔ e ninehi kɛ pue a nɔ, kɛkɛ nɛ e je lejɛ ɔ.
16 Jehanɛ ɔ, hyɛ! nɔ ko ba e ngɔ nɛ e ba bi lɛ ke: “Tsɔɔlɔ, mɛni nɔ́ kpakpa nɛ e sa kaa ma pee konɛ ma ná neneene wami?”
17 E de lɛ ke: “Mɛni he je nɛ o ngɛ mi nɔ́ kpakpa he sane bie ɔ? Nɔ kake pɛ lɛ e ngɛ nɛ e ji nɔ kpakpa. Se ke o suɔ nɛ o sɛ wami mi ɔ, moo ye kita amɛ a nɔ daa.”
18 E bi lɛ ke: “Te ní nɛmɛ nɛɛ?” Yesu de lɛ ke: “E sɛ nɛ o gbe nɔmlɔ, e sɛ nɛ o puɛ gba, e sɛ nɛ o ju, e sɛ nɛ o ye lakpa odase,
19 buu o tsɛ kɛ o nyɛ, nɛ e sa nɛ o suɔ o nyɛmi kaa bɔ nɛ o suɔ o he ɔ.”
20 Niheyo ɔ de lɛ ke: “I ye enɛ ɔmɛ tsuo a nɔ; mɛni pa piɛ mi mɔ?”
21 Yesu de lɛ ke: “Ke o suɔ nɛ o ye mluku ɔ,* lɛɛ yaa jua níhi nɛ o ngɛ ɔ, nɛ o ngɔ kɛ ha ohiatsɛmɛ, nɛ o ma ná juetli ngɛ hiɔwe; konɛ o ba pee ye se nyɛɛlɔ.”
22 Benɛ niheyo ɔ nu nɔ́ nɛ ɔ, e kɛ aywilɛho je lejɛ ɔ, ejakaa e ngɛ ní babauu.
23 Kɛkɛ nɛ Yesu de e kaseli ɔmɛ ke: “I ngɛ nyɛ dee ngɛ anɔkuale mi ke, e he maa wa ha niatsɛ kaa e maa sɛ hiɔwe Matsɛ Yemi ɔ mi.
24 Jehanɛ se hu ɔ, i ngɛ nyɛ dee ke, e ngɛ gbɔjɔɔ ha afukpɔngɔ kaa e maa gu abui hɛ ngmɛ mi pe kaa niatsɛ maa sɛ Mawu Matsɛ Yemi ɔ mi.”
25 Benɛ kaseli ɔmɛ nu nɔ́ nɛ ɔ, a nya kpɛ a he wawɛɛ nitsɛ, nɛ a de ke: “Mɛnɔ po nɛ a ma nyɛ ma he e yi wami?”
26 Yesu hyɛ mɛ too nɛ e de ke: “Ngɛ nimli a blɔ fa mi ɔ, enɛ ɔ be hie peemi, se ngɛ Mawu blɔ fa mi ɔ, nɔ́ fɛɛ nɔ́ maa hi peemi.”
27 Kɛkɛ nɛ Petro he nɔ ke: “Hyɛ! Wa si níhi tsuo nɛ wa ba nyɛɛ o se; lɛɛ mɛni wa ma ná mɔ?”
28 Yesu de mɛ ke: “Ngɛ anɔkuale mi ɔ, i ngɛ nyɛ dee ke, benɛ a maa kpale bɔ níhi ekohu,* nɛ nɔmlɔ Bi ɔ maa hi si ngɛ e matsɛ sɛ nɛ hɛ mi ngɛ nyami ɔ nɔ ɔ, nyɛ nɛ nyɛ nyɛɛ ye se ɔ hu nyɛ maa hi matsɛ sɛ 12 a nɔ, nɛ nyɛ maa kojo Israel wɛtso 12 ɔmɛ.
29 Nɛ nɔ fɛɛ nɔ nɛ e si wehi aloo nyɛmimɛ nyumuhi aloo nyɛmimɛ yihi aloo tsɛ aloo nyɛ aloo bimɛ aloo zugbahi ngɛ ye biɛ ɔ he je ɔ, e ma ná kɛ bɔ he si lafa, nɛ e ma ná neneene wami hulɔ.
30 “Se hlami sɛli babauu ma ba pee sekpɛtsɛmɛ, nɛ sekpɛtsɛmɛ ma ba pee hlami sɛli.
Sisi Ningmahi
^ Hela, porneiʹa. Hyɛ Munyu Komɛ A Sisi Tsɔɔmi.
^ Aloo “nihi nɛ a puɛ mɛ aloo a ta mɛ.”
^ Aloo “hi kɛ pi si.”
^ Aloo “pee níhi ehe.”
