Yohane Sane Kpakpa a 10:1-42
10 “Niinɛ, ngɛ anɔkuale mi ɔ, i ngɛ nyɛ dee ke, nɔ nɛ e gui tsu ɔ nya kɛ sɛ we to piɛ ɔ mi, se mohu e kuɔɔ kɛ guɔ he kpa a, julɔ kɛ ní halɔ ji lɛ.
2 Se jijɔ ɔmɛ a nɔ hyɛlɔ ɔ ji nɔ nɛ e guɔ sinya a nya kɛ sɛɔ mi ɔ nɛ.
3 Agbo nya bulɔ ɔ bliɔ kɛ haa lɛ, nɛ jijɔ ɔmɛ nuɔ e gbi. E tsɛɔ e jijɔ ɔmɛ kɛ a biɛ nɛ e nyɛɛɔ a hɛ mi kɛ jeɔ kpo.
4 Ke e je lɛ nitsɛ e ní ɔmɛ tsuo kpo ɔ, e nyɛɛɔ a hɛ mi, nɛ jijɔ ɔmɛ nyɛɛɔ e se, ejakaa a le e gbi.
5 A be nubwɔ ko se nyɛɛe gblegbleegble, mohu ɔ, a maa tu fo kɛ je e he, ejakaa a li nibwɔhi a gbi.”
6 Yesu ngɔ nɔ́ he tomi nɔ́ nɛ ɔ kɛ tsu ní, se a nui nɔ́ nɛ e ngɛ mɛ dee ɔ sisi.
7 Enɛ ɔ he ɔ, Yesu de ekohu ke: “Niinɛ, ngɛ anɔkuale mi ɔ, i ngɛ nyɛ dee ke, imi ji sinya kɛ ha jijɔ ɔmɛ.
8 Nihi tsuo nɛ a ba ngɛ ye nane mi ɔ, a ji juli kɛ ní hali; se jijɔ ɔmɛ bui mɛ tue.
9 Imi ji sinya a nɛ; nɔ fɛɛ nɔ nɛ e guɔ ye mi kɛ sɛɔ mi ɔ, a ma he e yi wami, nɛ jamɛ a nɔ ɔ maa sɛ mi nɛ e maa je kpo, nɛ e ma ná ní yemi he.
10 Julɔ ɔ lɛɛ e bɛ gu, se jumi, kɛ nɔ gbemi, kɛ hɛ mi kpatami he nɛ e baa ngɛ. Imi lɛɛ i ba konɛ a nyɛ nɛ a ná wami, nɛ a ná lɛ babauu.
11 Imi ji to nɔ hyɛlɔ kpakpa a nɛ; to nɔ hyɛlɔ kpakpa a ngɔɔ e wami* kɛ fɔɔ si ngɛ jijɔ ɔmɛ a he.
12 Apaatsɛ nɛ pi to nɔ hyɛlɔ ji lɛ, nɛ pi e níhi ji jijɔ ɔmɛ ɔ lɛɛ, ke e na ogbetee nɛ e ma a, e jeɔ jijɔ ɔmɛ a he nɛ e tuɔ fo—nɛ ogbetee ɔ ba nuɔ mɛ nɛ e gbɛɛ mɛ kɛ fĩaa—
13 ejakaa apaatsɛ ji lɛ, nɛ e susuu we jijɔ ɔmɛ a he.
14 Imi ji to nɔ hyɛlɔ kpakpa a nɛ. I le ye jijɔ ɔmɛ, nɛ ye jijɔ ɔmɛ hu le mi,
15 kaa bɔ nɛ Tsɛ ɔ le mi nɛ imi hu i le Tsɛ ɔ; nɛ i ngɔɔ ye wami* kɛ fɔɔ si ngɛ jijɔ ɔmɛ a he.
16 “Nɛ i ngɛ jijɔ kpahi, mɛɛ lɛɛ a be piɛ nɛ ɔ mi; mɛ hu e sa nɛ ma ngɔ mɛ kɛ ba mi, nɛ a maa nu ye gbi, nɛ a ma ba pee to kuu kake ngɛ to nɔ hyɛlɔ kake sisi.
17 Enɛ ɔ he je nɛ Tsɛ ɔ suɔ mi ɔ nɛ, ejakaa i ngɔɔ ye wami* kɛ fɔɔ si, konɛ ye nine nɛ nyɛ nɛ e su nɔ ekohu.
18 Nɔ ko ngɔɛ ngɛ ye dɛ, mohu ɔ, imi nitsɛ lɛ i jeɔ ye tsui mi nɛ i ngɔɔ kɛ haa. I ngɛ he blɔ nɛ i ngɔɔ kɛ haa, nɛ i ngɛ he blɔ kaa i ngɔɔ ekohu. Ye nine su kita nɛ ɔ nɔ kɛ je ye Tsɛ ɔ ngɔ.”
19 Munyu nɛ ɔmɛ ha nɛ mi gbami ba Yuda bi ɔmɛ a kpɛti ekohu.
20 A kpɛti nihi fuu ngɛ dee ke: “Daimonio ngɛ e mi, nɛ e yi ngɛ puɛe. Mɛni he je nɛ nyɛ ngɛ lɛ tue bue ɔ?”
21 Ni kpahi hu de ke: “Nɔmlɔ nɛ daimonio ngɛ e mi ɔ be munyu nɛ ɔmɛ tue. Anɛ mumi yayami ma nyɛ ma bli nihi nɛ a hɛ ngmɛ yu ɔmɛ a hɛ ngmɛ lo?”
22 Jamɛ a be ɔ mi ɔ, a ngɛ Nɔ Jɔɔmi Gbijlɔ ɔ yee ngɛ Yerusalɛm. E ji ahlabata be mi,
23 nɛ Yesu ngɛ nyɛɛe ngɛ Solomon ablanaa a nɔ ngɛ sɔlemi we ɔ.
24 Kɛkɛ nɛ Yuda bi ɔmɛ ba bɔle lɛ nɛ a bɔni lɛ demi ke: “Kɛ yaa si mɛni be nɛ o ma kpa wɔ* kpa nya laami? Ke mo ji Kristo ɔ, mo gba mi kpoo nɛ o de wɔ.”
25 Yesu ha mɛ heto ke: “I de nyɛ, se nyɛ he we yi. Níhi nɛ i ngɛ tsue ngɛ ye Tsɛ ɔ biɛ mi ɔ, ní nɛ ɔmɛ yeɔ ye he odase.
26 Se nyɛ he we yi, ejakaa pi ye jijɔhi ji nyɛ.
27 Ye jijɔ ɔmɛ buɔ ye gbi tue, nɛ i le mɛ, nɛ a nyɛɛɔ ye se.
28 I haa mɛ neneene wami, nɛ a hɛ mi be kpatae kɔkɔɔkɔ, nɛ nɔ ko be mɛ kpɔ̃e ngɛ ye dɛ.
29 Nɔ́ nɛ ye Tsɛ ɔ ngɔ kɛ ha mi ɔ ji nɔ́ ko nɛ e kle pe ní kpahi tsuo, nɛ nɔ ko be nyɛe ma kpɔ̃ mɛ ngɛ ye Tsɛ ɔ dɛ.
30 I kɛ Tsɛ ɔ, nimli kake ji wɔ.*
31 Yuda bi ɔmɛ kpale kukuɔ tɛhi ekohu kaa a maa fiaa lɛ.
32 Yesu he nɔ nɛ e de mɛ ke: “I ha nɛ nyɛ na ní tsumi kpakpahi fuu nɛ a je Tsɛ ɔ ngɔ ɔ. Ní tsumi nɛ ɔmɛ a kpɛti te nɛ he lɛ nyɛ ngɛ hlae nɛ nyɛ maa fiaa mi tɛ ngɛ ɔ?”
33 Yuda bi ɔmɛ ha lɛ heto ke: “Tsa pi ní tsumi kpakpa ko he je nɛ wa ngɛ hlae nɛ wa maa fiaa mo tɛ ngɛ ɔ, mohu ɔ, musu nɛ o bɔ ɔ he je; ejakaa nɔmlɔ adesa ji mo, se o peeɔ o he kaa o ji mawu ko.”
34 Yesu ha mɛ heto ke: “Anɛ a ngmɛ ngɛ nyɛ Mlaa a mi ke, ‘I ke: “Mawuhi* ji nyɛ” lo’?
35 Ke e tsɛ nihi nɛ Mawu munyu ɔ tu munyu kɛ si mɛ ɔ ke ‘mawuhi’—se kɛ̃ ɔ, ngmami ɔ yi lakpa a—
36 anɛ nyɛ ngɛ imi nɛ Tsɛ ɔ pee mi klɔuklɔu, nɛ e tsɔ mi kɛ ba je ɔ mi ɔ dee ke, ‘O bɔ musu’ akɛnɛ i de ke, ‘Mawu bi ji mi’ ɔ he je lo?
37 Ke i tsu we ye Tsɛ ɔ ní tsumi ɔmɛ ɔ, lɛɛ nyɛ ko he mi nɛ nyɛɛ ye.
38 Se ke e ní tsumi ɔmɛ nɛ i ngɛ tsue ɔ, lɛɛ ke nyɛ he we mi yi po ɔ, nyɛ he ní tsumi ɔmɛ nɛ nyɛɛ ye mɔ, konɛ nyɛ nyɛ nɛ nyɛɛ le, nɛ nyɛɛ ya nɔ nɛ nyɛɛ le kaa Tsɛ ɔ kɛ mi pee kake, nɛ imi hu i kɛ Tsɛ ɔ pee kake.”
39 Enɛ ɔ he ɔ, a bɔ mɔde ekohu kaa a maa nu lɛ, se e je a dɛ slɔkee.
40 Nɛ e kpale po Yɔdan Pa a kɛ ho he nɛ be ko nɛ be ɔ, Yohane ngɛ nihi baptisie ngɛ ɔ ya, nɛ e ya hi lejɛ ɔ.
41 Nɛ nihi fuu ba e ngɔ nɛ a ba bɔni demi ke: “Yohane pee we okadi kake ngmelu po, se níhi tsuo nɛ Yohane de ngɛ nyumu nɛ ɔ he ɔ ji anɔkuale.”
42 Nɛ nihi fuu he lɛ ye ngɛ lejɛ ɔ.
Sisi Ningmahi
^ Aloo “susuma.”
^ Aloo “susuma.”
^ Aloo “susuma.”
^ Aloo “wa susuma.”
^ Aloo “kake peemi ngɛ wa kpɛti.”
^ Aloo “Nihi nɛ a ngɛ kaa mawu.”
