Yohane Sane Kpakpa a 17:1-26
17 Yesu tu munyu nɛ ɔmɛ, nɛ benɛ e wo e hɛ nɔ kɛ hyɛ hiɔwe ɔ, e de ke: “Tsaatsɛ, ngmlɛfia a su. Wo o bi ɔ hɛ mi nyami konɛ o bi ɔ hu nɛ e wo o hɛ mi nyami,
2 kaa bɔ nɛ o ha lɛ he blɔ ngɛ he lohi* tsuo a nɔ ɔ, konɛ e ha nihi tsuo nɛ o ngɔ mɛ kɛ ha lɛ ɔ neneene wami.
3 Enɛ ɔ ji neneene wami ɔ nɛ, kaa a maa hi mo anɔkuale Mawu kake pɛ ɔ lee,* kɛ nɔ nɛ o tsɔ ɔ, Yesu Kristo.
4 I wo o hɛ mi nyami ngɛ zugba a nɔ, ejakaa i gbe ní tsumi nɛ o ha mi ke ma tsu ɔ nya.
5 Enɛ ɔ he ɔ, amlɔ nɛ ɔ, Tsaatsɛ, moo ngɔ hɛ mi nyami nɛ i ngɛ ngɛ o ngɔ loko a bɔ je ɔ kɛ wo ye hɛ mi nyami ngɛ o kasa nya.
6 “I ha nɛ nihi nɛ o ngɔ mɛ kɛ ha mi ngɛ je ɔ mi ɔ le o biɛ ɔ. O níhi ji mɛ, nɛ o ngɔ mɛ kɛ ha mi, nɛ a ye o munyu ɔ nɔ.
7 Amlɔ nɛ ɔ, a ba le kaa níhi tsuo nɛ o ngɔ kɛ ha mi ɔ je o ngɔ;
8 ejakaa i ngɔ munyuhi nɛ o ngɔ ha mi ɔ kɛ ha mɛ, nɛ a kplɛɛ nɔ, nɛ a ba le kaa i ba kaa o nane mi dalɔ niinɛ, nɛ a he ye kaa mo lɛ o tsɔ mi.
9 I ngɛ bie ha mɛ; pi je ɔ nɛ i ngɛ bie ha, mohu ɔ, kɛ ha ni nɛmɛ nɛ o ngɔ mɛ kɛ ha mi ɔ, ejakaa o níhi ji mɛ;
10 nɛ níhi tsuo nɛ i ngɛ ɔ, o níhi, nɛ níhi nɛ mo hu o ngɛ ɔ, ye níhi, nɛ a wo ye hɛ mi nyami ngɛ a kpɛti.
11 “I be je ɔ mi hu, se mɛɛ lɛɛ a ngɛ je ɔ mi, nɛ i ma o ngɔ. Tsaatsɛ Klɔuklɔu, moo hyɛ a nɔ ngɛ mo nitsɛ o biɛ ɔ nɛ o kɛ ha mi ɔ he je, konɛ a pee kake* kaa bɔ nɛ wɔ hu wa pee kake* ɔ.
12 Benɛ i kɛ mɛ ngɛ ɔ, i hyɛɔ a nɔ ngɛ mo nitsɛ o biɛ ɔ nɛ o kɛ ha mi ɔ he je; nɛ i po a he piɛ nɛ a kpɛti nɔ kake po hɛ mi kpataa we kaa ja hɛ mi kpatami bi ɔ pɛ, konɛ ngmami ɔ nɛ e ba mi.
13 Se amlɔ nɛ ɔ, i ma o ngɔ, nɛ i ngɛ ní nɛ ɔmɛ dee ngɛ je ɔ mi, konɛ a ha nɛ bua jɔmi nɛ i ngɛ ɔ nɛ e pi si ngɛ mɛ nitsɛmɛ a mi.
14 I ngɔ o munyu ɔ kɛ ha mɛ, se je ɔ nyɛ mɛ, ejakaa a piɛɛ we je ɔ he, kaa bɔ nɛ imi hu i piɛɛ we je ɔ he ɔ.
15 “Tsa pi nɛ i ngɛ bie ke o je mɛ kɛ je je ɔ mi, mohu ɔ, kaa o bu a he ngɛ nɔ yayami ɔ he.
16 A piɛɛ we je ɔ he, kaa bɔ nɛ imi hu i piɛɛ we je ɔ he ɔ.
17 Moo ngɔ anɔkuale ɔ kɛ pee mɛ klɔuklɔu;* o munyu ɔ ji anɔkuale.
18 Kaa bɔ nɛ o tsɔ mi kɛ ba je ɔ mi ɔ, jã kɛ̃ nɛ imi hu i tsɔ mɛ kɛ yaa je ɔ mi.
19 Nɛ a he ɔ, i ngɛ ye he klɔuklɔu pee, konɛ mɛ hu anɔkuale nɛ e pee mɛ klɔuklɔu.
20 “Tsa pi ni nɛ ɔmɛ pɛ nɛ i ngɛ bie ha, mohu ɔ, kɛ ha nihi nɛ a maa gu a munyu nɔ kɛ ná hemi kɛ yemi ngɛ ye mi ɔ,
21 konɛ mɛ tsuo nɛ a pee kake, kaa bɔ nɛ mo, Tsaatsɛ, o kɛ mi pee kake nɛ imi hu i kɛ mo pee kake ɔ, mɛ hu a kɛ wɔ nɛ e pee kake, konɛ je ɔ nɛ e he ye kaa mo lɛ o tsɔ mi.
22 Hɛ mi nyami nɛ o ngɔ ha mi ɔ, i ngɔ kɛ ha mɛ, konɛ a pee kake kaa bɔ nɛ wɔ hu wa pee kake ɔ.
23 I kɛ mɛ pee kake, nɛ mo hu o kɛ mi pee kake, konɛ a pee kake kɛ pi si,* bɔ nɛ pee nɛ je ɔ nɛ e le kaa mo lɛ o tsɔ mi nɛ o suɔ mɛ kaa bɔ nɛ o suɔ mi ɔ.
24 Tsaatsɛ, i suɔ kaa nihi nɛ o ngɔ mɛ kɛ ha mi ɔ nɛ a piɛɛ ye he ngɛ he nɛ i ngɛ ɔ, konɛ a hi ye hɛ mi nyami ɔ nɛ o ha mi ɔ hyɛe, ejakaa o suɔ mi loko a to je ɔ sisi.
25 Tsaatsɛ Dalɔ, ngɛ anɔkuale mi ɔ, je ɔ ná we nɛ e ba le mo, se imi lɛɛ i le mo, nɛ ni nɛ ɔmɛ hu a ba ná le kaa mo lɛ o tsɔ mi.
26 I ha nɛ a le o biɛ ɔ, nɛ ma ha nɛ a maa le, konɛ suɔmi ɔ nɛ o kɛ suɔ mi ɔ nɛ e hi a mi, nɛ i kɛ mɛ nɛ pee kake.”
Sisi Ningmahi
^ Aloo “adesahi; nihi.”
^ Aloo “kaa a maa hi mo anɔkuale Mawu kake pɛ ɔ o he nile náe.”
^ Aloo “kake peemi nɛ e hi a kpɛti.”
^ Aloo “kaa bɔ nɛ kake peemi ngɛ wa kpɛti.”
^ Aloo “ha nɛ a he nɛ tsɔ; ha nɛ a je ekpa.”
^ Aloo “kake peemi nitsɛnitsɛ nɛ hi a kpɛti.”
