Nyagbe Hetsɔmi nɛ Yesu yeɔ maa pee nɔ́ ko nɛ sa kadimi. Akɛnɛ e be kɛe nɛ e ma gbo he je ɔ, e to blɔ nya nɛ́ e kɛ e bɔfo ɔmɛ maa ye Hetsɔmi niye ní ɔ konɛ e to Nyɔmtsɛ ɔ Gbɔkuɛ Niye Ní ɔ, nɛ́ ji nɔ́ ehe nɛ a ma kai daa jeha a sisi. Lɔ ɔ he ɔ, e tsɔ Petro kɛ Yohane konɛ a ya dla he nɛ a maa ye niye ní ɔ ngɛ ɔ. (Luk 22:7-13; hyɛ hɛ mi foni ɔ.) Enɛ ɔ ha nɛ wa na kaa e he hia nɛ wa dla wa he kɛ ha Kaimi ɔ nɛ maa ba nɔ ngɛ March 27 ɔ nɔ ɔ. E ngɛ heii kaa asafo ɔmɛ to nɔ nɛ maa tu Kaimi munyu ɔ, abolo ɔ kɛ wai ɔ, kɛ ní kpahi a he blɔ nya. Se kɛ̃ ɔ, mɛni wa ti nɔ fɛɛ nɔ ma nyɛ maa pee kɛ dla e he kɛ ha Kaimi ɔ?

Ha nɛ hɛ sa nɛ o ngɛ kɛ ha Yesu gbenɔ ɔ mi nɛ wa. Moo kane Kaimi ɔ he Baiblo kanemi ɔ nɛ o pue o yi mi tɛ ngɛ he. O maa na e he blɔ nya tomi ɔ ngɛ Mo Susu Ngmami ɔ He Daa Ligbi womi ɔ mi. Mawu Munyu ɔ Kasemi Womi ɔ yi 16 tu níhi nɛ ya nɔ benɛ e piɛ bɔɔ nɛ Yesu ma gbo ɔ he munyu fitsofitso. (Jehanɛ hu ɔ, moo hyɛ April 2020 Si Himi Kɛ Sɔmɔmi Ní Tsumi ɔ He Ní Kasemi Womi ɔ mi.) Wekuhi ma nyɛ maa na níhi nɛ tsɔɔ bɔ nɛ kpɔmi nɔ́ ɔ he hia ha a ngɛ Watchtower Publication Index ɔ aloo Research Guide For Jehovah’s Witnesses ɔ mi, nɛ a ma nyɛ ma susu he ngɛ a weku Mawu jami ɔ mi.

Moo fɔ nihi nine kɛ ha Kaimi ɔ. Moo ngɔ o he kɛ wo nine fɔmi womi ɔ gbami ɔ mi wawɛɛ. Mo susu nihi nɛ o ma nyɛ maa fɔ mɛ nine ɔ he. Nimli nɛ ɔmɛ a ti ni komɛ ji nihi nɛ o kpale ya slaa mɛ, nihi nɛ o kɛ mɛ kase Baiblo ɔ be ko nɛ be, nihi nɛ o le mɛ kɛ o weku li. E sa nɛ asafo mi nikɔtɔma amɛ nɛ a hyɛ nɛ a fɔ nihi nɛ a kpa fiɛɛmi kɛ asafo mi kpehi yami ɔ nine. Mo kai kaa, ke nɔ nɛ o suɔ kaa o maa fɔ lɛ nine ɔ be o kpɔ ɔ mi ɔ, o ma nyɛ maa ya WA HE SANEHI nɛ ngɛ jw.org ɔ nɔ ɔ, nɛ o ya “Kaimi” ɔ, konɛ o na be kɛ he nɛ a maa pee Kaimi ɔ ngɛ ngɛ he nɛ nɔ ɔ ngɛ ɔ.

Mɛni nɔ́ kpa ko hu wa ma nyɛ maa pee kɛ dla wa he kɛ ha Kaimi ɔ?