Nihi fuu ngɛ je ɔ mi ɔ nuɔ he kaa e piɛ mɛ pɛ, nɛ a nuɔ he kaa huɛ bɔmi ko be a kɛ ni kpahi a kpɛti. Ni komɛ nɛ a hyɛɛ nɔmlɔ tso mi he wami nami nɔ ɔ tsɔɔ kaa ke nɔ ko yeɔ bua ni kpahi ɔ, lɔ ɔ ma ha nɛ e be he nue tsɔ kaa e piɛ lɛ pɛ.

•   “Ke wa yeɔ bua nihi nɛ a hia yemi kɛ buami ɔ, e ma ha nɛ wa ma ná bua jɔmi ngɛ si himi mi, nɛ e maa ye bua wɔ konɛ wa ko nu he tsɔ kaa e piɛ wɔ pɛ, nɛ e be hae nɛ waa nu he kaa huɛ bɔmi ko be waa kɛ ni kpahi wa kpɛti.”​—U.S. National Institutes of Health.

 Baiblo ɔ tsɔɔ wɔ níhi nɛ wa ma nyɛ maa pee kɛ ye bua ni kpahi. Ke waa kɛ ga womi nɛ e kɛ ha wɔ ɔ tsuɔ ní ɔ, lɔ ɔ maa ye bua wɔ nɛ wa be he nuɔ tsɔ kaa e piɛ wɔ pɛ.

 Mo je mi mi jɔmi kpo. Moo to blɔ nya konɛ o ná be kɛ ha ni kpahi nɛ o kɛ mɛ nɛ sɛɛ ní hɛ mi kɛ hɛ mi. Moo je o tsui mi nɛ o kɛ nihi nɛ dla níhi nɛ o ngɛ ɔ. Ke o peeɔ jã a, lɔ ɔ ma ha nɛ́ á je hɛsa kpo, nɛ enɛ ɔ ma ha nɛ nyɛ ma ba pee huɛmɛ.

•   Baiblo sisi tomi mlaa: “Nyɛɛ ya nɔ nɛ nyɛ ha, nɛ nihi ma ha nyɛ.”​—Luka 6:38.

 Ngɔɔ o be kɛ ye bua ni kpahi. Mo hlá blɔhi a nɔ nɛ o maa gu kɛ ye bua nihi nɛ a kɛ si fɔfɔɛ nɛ mi wa ngɛ kpee. Moo bu mɛ tue saminya nɛ o nu he ha mɛ, aloo moo pee níhi kɛ ye bua mɛ konɛ si himi ɔ nɛ pee gbɔjɔɔ bɔɔ ha mɛ.

•   Baiblo sisi tomi mlaa: “Huɛ peeɔ klaalo kaa e maa ye bua ngɛ si fɔfɔɛ fɛɛ si fɔfɔɛ mi.”​—Abɛ 17:17, Contemporary English Version.

 Ke o suɔ nɛ o le babauu kɛ kɔ blɔ nɔ nɛ o maa gu kɛ ha nɛ huɛ bɔmi kpakpa nɛ hi o kɛ ni kpahi nyɛ kpɛti ɔ he ɔ, moo kane munyu nɛ ji “Family Life and Friendships.”