“E ngɛ mi kaa COVID-19 hiɔ ɔ pee we oslaa hu kaa kekle ɔ ngɛ je ɔ mi tsuo mohu lɛɛ, se lɔ ɔ tsɔɔ we kaa COVID-19 hiɔ ɔ se po ngɛ je kɛ wɛ. E sa nɛ waa hyɛ blɔ kaa hiɔ kpa ko ma nyɛ maa ba hwɔɔ se, nɛ e sa nɛ wa dla wa he kɛ to.”​—Dr. Tedros nɛ e ji World Health Organization ɔ hɛ mi nyɛɛlɔ nɔkɔtɔma, May 22, 2023.

 COVID-19 hiɔ ɔ nɛ ba a ha nɛ nihi babauu kɛ nɔmlɔ tso he wami nami he nyagbahi kɛ juɛmi mi nyagbahi ngɛ kpee. Anɛ ma nɔ yeli kɛ blɔ nya tomihi nɛ a hyɛɛ nihi a nɔmlɔ tso mi he wami nami nɔ ɔ ma nyɛ ma tsu hiɔ kpahi nɛ ma nyɛ maa ba a he ní lo? Nɛ anɛ a ma nyɛ ma tsu hiɔhi nɛ ngɛ adesahi a nya gbae amlɔ nɛ ɔ po he ní lo?

 Baiblo ɔ tsɔɔ wɔ nɔ yemi nɛ ma nyɛ ma ha nɛ wa ná nɔmlɔ tso mi he wami kpakpa. E de ke, “Mawu nɛ ngɛ hiɔwe ɔ maa to matsɛ yemi [loo nɔ yemi] ko sisi.” (Daniel 2:44) Ngɛ nɔ yemi nɛ ɔ sisi ɔ, “nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’” (Yesaya 33:24) Nɔ fɛɛ nɔ ma ná nɔmlɔ tso mi he wami kpakpa, nɛ e maa hi he wami kaa bɔ nɛ e ngɛ ngɛ e niheyo loo e yiheyo be mi ɔ.​—Hiob 33:25.