1-2. Mɛni he je nɛ eko ɔ, Yesu tu munyuhi nɛ a ngma ngɛ Yohane 4:35, 36?

YESU pɔɔ blɔ hiami kɛ guɔ akoko ngmɔhi nɛ eko ɔ, kpaako a ngɛ wae ɔ mi. (Yoh. 4:3-6) Eko ɔ, ngɛ nyɔhiɔ eywiɛ se ɔ, akoko ɔ maa su e kpami be. Yesu de ke: “Nyɛ wo nyɛ hɛ nɔ nɛ nyɛɛ hyɛ ngmɔ ɔmɛ, nɛ nyɛ maa na kaa a hiɛ futaa nɛ e sa kaa a kpa a nɔ ní.” Eko ɔ, nɔ́ nɛ Yesu de nɛ ɔ maa pee e kaseli ɔmɛ nyakpɛ. (Kane Yohane 4:35, 36.) Se mɛni e ngɛ tsɔɔe?

² Ngɛ anɔkuale mi ɔ, Yesu ngɛ nihi a nya nɛ a ma bua a he munyu tue, se pi akoko nitsɛ. Mo susu nɔ́ nɛ ya nɔ ɔ he nɛ o hyɛ. E ngɛ mi kaa Yuda bi ɔmɛ kɛ Samaria bi ɔmɛ yi mohu lɛɛ, se Yesu fiɛɛ kɛ ha Samaria yo ko, nɛ yo ɔ bu lɛ tue! Ngɛ anɔkuale mi ɔ, benɛ Yesu ngɛ ngmɔ ɔ nɛ “hiɛ futaa nɛ e sa kaa a kpa a nɔ ní” ɔ he munyu tue ɔ, jamɛ a be ɔ, Samaria bi nɛ a nu Yesu he kɛ gu nɔ́ nɛ yo ɔ de mɛ ɔ nɔ ɔ ma nɛ a ba bu lɛ tue. (Yoh. 4:9, 39-42) Baiblo mi munyuhi a sisi tsɔɔmi womi ko de ngɛ sane nɛ ɔ he ke: “Bɔ nɛ ni ɔmɛ pee klaalo kaa a ma ba bu Yesu tue ɔ . . . tsɔɔ kaa niinɛ, a ngɛ kaa ngma nɛ e sa nɛ a kpa.”

3. Ke o naa nihi kaa bɔ nɛ Yesu naa mɛ ɔ, kɛ lɔ ɔ ma ha nɛ o fiɛɛmi ní tsumi ɔ nɛ nu tso ha kɛɛ?

³ Kɛ o peeɔ o ní ngɛ nihi nɛ o fiɛɛɔ sane kpakpa a kɛ haa mɛ ɔ a he ha kɛɛ? Anɛ o naa mɛ kaa ngma nɛ a hiɛ futaa nɛ e sa nɛ a kpa lo? Ke jã a, lɛɛ o maa pee níhi etɛ nɛ nyɛɛ se nɛ ɔ. Kekleekle ɔ, o kɛ oya yemi maa fiɛɛ. Ní kpami be pi, lɔ ɔ he ɔ, e sɛ nɛ waa to tsle. Enyɔne ɔ, o bua maa jɔ ke o na kaa nihi ngɛ sane kpakpa a tue bue. Baiblo ɔ de ke: ‘Nihi nyaa ke a ngɛ ní kpae.’ (Yes. 9:3) Etɛne ɔ, o maa na nihi kaa a ji nihi nɛ a ma nyɛ ma ba pee Yesu kaseli, nɛ lɔ ɔ  ma ha nɛ o tsake o munyu ɔ hɛ mi konɛ nihi a bua nɛ jɔ he.

4. Mɛni wa maa kase ngɛ bɔfo Paulo he ngɛ ní kasemi nɛ ɔ mi?

⁴ Eko ɔ, Yesu se nyɛɛli ɔmɛ ekomɛ ma susu kaa Samaria bi ɔmɛ be nyɛe maa pee Yesu kaseli, se Yesu pee we jã, mohu ɔ, e na mɛ kaa nihi nɛ a ma nyɛ ma ba pee e kaseli. E sa nɛ wɔ hu waa na nihi nɛ a ngɛ wa zugba kpɔ ɔmɛ a mi ɔ kaa a ma nyɛ ma ba pee Kristo kaseli. Bɔfo Paulo pee enɛ ɔ he nɔ hyɛmi nɔ́ kɛ ha wɔ. Mɛni wa ma nyɛ maa kase ngɛ mi? Ngɛ ní kasemi nɛ ɔ mi ɔ, wa maa na (1) bɔ nɛ bɔfo Paulo kase nihi nɛ e fiɛɛ kɛ ha mɛ ɔ a hemi kɛ yemi ɔ he ní ha, (2) bɔ nɛ e susu níhi nɛ nihi a bua jɔ he ha a he, kɛ (3) bɔ nɛ e na nihi kaa a ma nyɛ ma ba pee Yesu kaseli ha.

5. Mɛni he je nɛ Paulo nyɛ nɛ e nu nihi nɛ a bu lɛ tue ngɛ kpe he ɔ sisi ɔ?

⁵ Behi fuu ɔ, Paulo fiɛɛɔ ngɛ Yuda bi a kpe hehi. Kaa nɔ hyɛmi nɔ́ ɔ, Paulo “kɛ mɛ ya susu níhi nɛ a ngɛ Ngmami ɔ mi ɔmɛ a he he jɔɔmi ligbi etɛ sɔuu” ngɛ kpe he ɔ nɛ ngɛ Tesalonika a. (Níts. 17:1, 2) Paulo yi gbeye kaa e maa ya kpe he ɔ, ejakaa Yuda no ji lɛ. (Níts. 26:4, 5) Paulo nu Yuda bi ɔmɛ sisi saminya, enɛ ɔ he ɔ, e nyɛ fiɛɛ kɛ ha mɛ nɛ e yi gbeye.​—Filip. 3:4, 5.

6. Mɛni blɔ nɔ nɛ nihi nɛ a ngɛ Atene jua a nɔ ɔ je ekpa ngɛ nihi nɛ Paulo fiɛɛ ha mɛ ngɛ kpe he ɔ a he?

⁶ Benɛ nihi wa Paulo yi mi nɛ a fiee lɛ kɛ je Tesalonika kɛ Beroya a, e ho Atene ya. Ngɛ lejɛ ɔ hu ɔ, “e kɛ Yuda bi ɔmɛ kɛ ni kpahi nɛ a jaa Mawu ɔ bɔni níhi a he susumi ngɛ kpe he ɔ.” (Níts. 17:17) Benɛ Paulo ya fiɛɛ ha nihi ngɛ jua nɔ ɔ, nihi nɛ a bu lɛ tue ngɛ lejɛ ɔ je ekpa kulaa ngɛ nihi nɛ a bu lɛ tue ngɛ kpe he ɔ a he. Nihi nɛ a bu Paulo tue ɔ a kpɛti ni komɛ ji je mi ní leli kɛ ma je li nɛ mɛɛ a buɔ e sɛ gbi ɔ kaa e ji “tsɔɔmi ehe” ɔ. A de lɛ ke: “O ha nɛ wa tuehi ngɛ ní ehehi nue.”​—Níts. 17:18-20.

7. Ngɛ Ní Tsumi 17:22, 23 ɔ nya a, kɛ Paulo tsake e munyu ɔ hɛ mi ha kɛɛ?

⁷ Kane Ní Tsumi 17:22, 23. Blɔ nɔ nɛ Paulo gu kɛ fiɛɛ ha Ma Je Li nɛ a ngɛ Atene ɔ ngɛ slɔɔto ngɛ blɔ nɔ nɛ e gu kɛ fiɛɛ ha Yuda bi nɛ a ngɛ kpe he ɔ he. Eko ɔ, Paulo bi e he ke, ‘Mɛni nɛ nihi nɛ a ngɛ Atene ɔ heɔ yeɔ?’ E to níhi nɛ ngɛ ma a mi ɔ a he hɛ saminya, nɛ e kadi níhi nɛ nihi jaa a. Lɔ ɔ se ɔ, Paulo da níhi nɛ a bua jɔ he ɔ nɔ kɛ tsɔɔ mɛ anɔkuale nɛ ngɛ Ngmami ɔ mi ɔ. Baiblo mi munyuhi a sisi  tsɔɔlɔ ko de ke, “Akɛnɛ Paulo ji Yuda no Kristofo no he je ɔ, e yɔse kaa Hela bi ɔmɛ ja we ‘anɔkuale’ Mawu nɛ Yuda bi kɛ Kristofohi jaa a, se e bɔ mɔde nɛ e tsɔɔ Atene bi ɔmɛ kaa Mawu nɛ e ngɛ e he munyu tue ɔ ji Mawu nɛ ngɛ niinɛ nɛ a le lɛ.” Enɛ ɔ ha nɛ Paulo tsake e munyu ɔ hɛ mi. E de Atene bi ɔmɛ kaa sɛ gbi nɛ e ngɛ fiɛɛe ɔ je “Mawu Ko Nɛ A Li Lɛ” nɛ a ngɛ mɔde bɔe kaa a ma ja lɛ ɔ ngɔ. Ma Je Li ɔmɛ li Ngmami ɔ mi mohu lɛɛ, se Paulo kɔni gbo we ngɛ a he. Mohu ɔ, e na mɛ kaa a ji ngma nɛ a hiɛ futaa nɛ e sa nɛ a kpa, nɛ enɛ ɔ ha nɛ e tsake sane kpakpa a nɛ e ngɛ fiɛɛe ɔ hɛ mi.

8. (a) Kɛ o ma plɛ kɛ le jami nɛ nihi nɛ a ngɛ o zugba kpɔ ɔ mi ɔ ngɛ mi ha kɛɛ? (b) Ke nɔ ko de kaa e ngɛ jami ko mi momo ɔ, kɛ o ma ha lɛ heto ha kɛɛ?

⁸ E sa nɛ waa to níhi a he hɛ kaa bɔ nɛ Paulo pee ɔ. Mo kadi níhi nɛ ma ha nɛ o le níhi nɛ nihi nɛ a ngɛ o zugba kpɔ ɔ mi ɔ heɔ yeɔ. Mɛni ji ní komɛ nɛ wetsɛ ɔ kɛ dla e we mi loo e lɔle he? Anɛ e biɛ, e he dlami, e tade womi, kɛ e munyu tumi po tsɔɔ jami mi nɛ e ngɛ lo? Eko ɔ, lɛ nitsɛ e de mo kaa e ngɛ jami ko mi. Benɛ nyɛmiyo ko nɛ a tsɛɛ lɛ ke Flutura nɛ e ji blɔ gbalɔ klɛdɛɛ ɔ kɛ nyagba nɛ ɔ eko kpe ɔ, e de ke, “I bɛ hiɛ ɔ kaa ma ba ngɔ ye jami ɔ kɛ nyɛ o nɔ, mohu ɔ, i ba konɛ i kɛ mo nɛ ba susu munyu nɛ ɔ he . . . ”

9. Mɛni o ma nyɛ maa da nɔ kɛ ye nɔ ko nɛ e ngɛ jami ko mi ɔ odase?

⁹ Mɛni sanehi nɛ o kɛ nɔ ko nɛ e ngɛ jami ko mi ɔ ma nyɛ ma susu he? Bɔɔ mɔde nɛ o le níhi nɛ o kɛ lɛ kpa gbi ngɛ he. Eko ɔ, e jaa Mawu kake pɛ, e kplɛɛ nɔ kaa Yesu ji adesahi a Yi Wami Helɔ, aloo eko ɔ, e he ye kaa wa ngɛ be yaya nɛ e be kɛe nɛ e se maa po ɔ mi. Moo da níhi nɛ e heɔ yeɔ nɛ o kɛ lɛ kpa gbi ngɛ he ɔ nɔ kɛ ye lɛ odase ngɛ blɔ nɛ e maa ta e tsui he ɔ nɔ.

10. Mɛni e sa kaa waa bɔ mɔde nɛ waa pee, nɛ mɛni he je?

¹⁰ Nɔ́ nɛ e sa nɛ e hi wa juɛmi mi ji kaa pi níhi tsuo nɛ jami ɔmɛ tsɔɔ ɔ nɛ jami mi bi ɔmɛ heɔ yeɔ. Lɔ ɔ he ɔ, ke o le jami nɛ nɔ ko ngɛ mi po ɔ, bɔɔ mɔde nɛ o le níhi nɛ lɛ nitsɛ hu e heɔ yeɔ. Blɔ gbalɔ klɛdɛɛ ko nɛ je Australia nɛ a tsɛɛ lɛ ke David ɔ de ke, “Mwɔnɛ ɔ, nihi fuu ngɔɔ je mi nile kɛ futuɔ níhi nɛ a jami ɔmɛ tsɔɔ ɔ.” Donalta nɛ je Albania a hu de ke, “Nihi nɛ waa kɛ kpeɔ ngɛ fiɛɛmi mi ɔ a ti ni komɛ deɔ ke a ngɛ jami ko mi, se pee se ɔ, a kpale deɔ ke a he we yi kaa Mawu ngɛ niinɛ.” Ma se sane kpakpa fiɛɛlɔ ko nɛ ngɛ Argentina a tsɔɔ kaa ni komɛ deɔ ke Mawu ji  Triniti, se eko ɔ, ngɛ a tsui mi ɔ, a he we yi kaa Tsɛ ɔ, Bi ɔ, kɛ mumi klɔuklɔu ɔ lɛ bla kɛ pee Mawu kake. E de ke, “Enɛ ɔ nɛ i le ɔ ha nɛ e he wɛ kaa ma na nɔ́ ko nɛ ma da nɔ kɛ ye nɔ ko odase.” Lɔ ɔ he ɔ, bɔɔ mɔde nɛ o le nɔ́ tutuutu nɛ nihi heɔ yeɔ. Kɛkɛ ɔ, kaa bɔ nɛ Paulo pee ɔ, mo hu o ma nyɛ ma “plɛ níhi tsuo kɛ ha nimli slɔɔtoslɔɔtohi tsuo.”​—1 Kor. 9:19-23.

11. Ngɛ Ní Tsumi 14:14-17 ɔ nya a, mɛni blɔ nɔ nɛ Paulo fiɛɛ sɛ gbi ɔ kɛ tsɔɔ nihi nɛ a ngɛ Listra a ngɛ blɔ nɛ maa ta a tsui he ɔ nɔ?

¹¹ Kane Ní Tsumi 14:14-17. Paulo susu níhi nɛ e tue buli ɔmɛ a bua jɔ he ɔ he, nɛ e tsake e munyu ɔ hɛ mi. Kaa nɔ hyɛmi nɔ́ ɔ, nihi nɛ e fiɛɛ kɛ ha mɛ ngɛ Listra a le Ngmami ɔ mi bɔɔ, loo a li mi nɔ́ ko kulaa. Lɔ ɔ he ɔ, Paulo kɛ mɛ tu munyu ngɛ blɔ nɛ a maa nu sisi ɔ nɔ. E tu be nɛ a kpaa ní kɛ bua jɔmi nɛ a náa ngɛ si himi mi ɔ he munyu. Bɔfo Paulo ngɔ munyuhi kɛ nɔ hyɛmi níhi nɛ e tue buli ɔmɛ ma nyɛ maa nu sisi kɛ tsu ní.

12. Kɛ o ma plɛ kɛ le nɔ́ nɛ nɔ ko bua jɔ he nɛ o tsake o munyu ɔ hɛ mi ha kɛɛ?

¹² Mo kɔ nɔ́ se konɛ o le níhi nɛ nihi nɛ a ngɛ o zugba kpɔ ɔ mi ɔ a bua jɔ he, nɛ́ o tsake o munyu ɔ hɛ mi. Ke o yaa su nɔ ko he, aloo o yaa sɛ e we mi ɔ, kɛ o ma plɛ kɛ le níhi nɛ e bua jɔ he ha kɛɛ? Moo to níhi a he hɛ. Eko ɔ, e ngɛ abɔɔ ko mi dlae, e ngɛ womi ko kanee, e ngɛ lɔle dlae, aloo e ngɛ nɔ́ kpa ko pee. Ke e maa hi ɔ, moo da nɔ́ nɛ e ngɛ pee ɔ nɔ nɛ o kɛ lɛ nɛ je ní sɛɛmi sisi. (Yoh. 4:7) Eko ɔ, tade nɛ nɔ ko wo ɔ ma nyɛ maa tsɔɔ ma nɛ e je mi, ní nɛ e tsuɔ, aloo bɔɔlu fiami kuu nɛ e bua jɔ he. Nyɛminyumu ko nɛ a tsɛɛ lɛ ke Gustavo de ke: “I na la polɔ ko nɛ e he biɛ ɔ foni ngɛ niheyo ko nɛ e ye jeha 19 ɔ tade nɔ, nɛ i da lɔ ɔ nɔ nɛ i kɛ lɛ je ní sɛɛmi sisi. I bi niheyo ɔ tade ɔ he sane, nɛ e tsɔɔ nɔ́ he je nɛ e bua jɔ la polɔ nɛ ngɛ tade ɔ nɔ ɔ he. Kɛ gu ní sɛɛmi nɛ ɔ nɔ ɔ, i kɛ lɛ je Baiblo ɔ kasemi sisi, nɛ amlɔ nɛ ɔ, e ba pee Yehowa Odasefo no.”

13. Ke o suɔ nɛ o kɛ nɔ ko nɛ je Baiblo ɔ kasemi sisi ɔ, mɛni o ma nyɛ ma de nɔ ɔ konɛ e bua nɛ jɔ he?

 ¹³ Ke o suɔ nɛ o kɛ nɔ ko nɛ je Baiblo ɔ kasemi sisi ɔ, mo ha nɛ o munyu ɔ nɛ ta e tsui he, nɛ o tsɔɔ lɛ bɔ nɛ ní kasemi ɔ maa ye bua lɛ ha. (Yoh. 4:13-15) Kaa nɔ hyɛmi nɔ́ ɔ, yo ko nɛ e bua jɔ munyu ɔ he ɔ fɔ nyɛmiyo ko nɛ a tsɛɛ lɛ ke Poppy ɔ nine kɛ ba e we mi. Benɛ Poppy sɛ yo ɔ tsu ɔ mi nɛ e na yi jemi womi ko ngɛ gbogbo ɔ he nɛ tsɔɔ kaa yo ɔ ji nilelɔ ɔ, e da lɔ ɔ nɔ kɛ tsɔɔ yo ɔ kaa Baiblo ɔ nɛ waa kɛ nihi kaseɔ kɛ asafo mi kpehi nɛ wa yaa a haa nɛ wa náa tsɔsemi. Yo ɔ kplɛɛ nɔ kaa a kɛ lɛ nɛ kase Baiblo ɔ, nɛ e ya asafo mi kpe e nɔ jena a, nɛ pee se ɔ, e ya kpɔ mi kpe hulɔ. Jeha kake se ɔ, e ha nɛ a baptisi lɛ. Enɛ ɔ he ɔ, mo bi o he ke: ‘Mɛni nɛ nihi nɛ i kpale kɛ yaa slaa mɛ ɔ a bua jɔ he? Ma nyɛ ma tsɔɔ mɛ bɔ nɛ waa kɛ nihi kaseɔ Baiblo ɔ ha ngɛ blɔ nɛ a bua maa jɔ he ɔ nɔ lo?’

14. Mɛni o maa pee konɛ ní nɛ o kɛ o Baiblo kaseli ɔmɛ a ti nɔ fɛɛ nɔ maa kase ɔ nɛ ta a tsui he?

¹⁴ Ke o kɛ nɔ ko je Baiblo ɔ kasemi sisi ɔ, mo dla o he kɛ ha ní kasemi ɔ eko fɛɛ eko, nɛ́ o susu he nɛ a tsɔse nɔ ɔ ngɛ, kɛ níhi nɛ e bua jɔ he ɔ he. Ke o ngɛ o he dlae ɔ, moo hla ngmamihi nɛ o maa suɔ nɛ nyɛɛ kane, videohi nɛ o ma je, kɛ nɔ́ he tomi níhi nɛ o kɛ ma tsu ní kɛ tsɔɔ Baiblo ɔ mi anɔkualehi a mi. Mo bi o he ke, ‘Mɛni tutuutu nɛ Baiblo kaselɔ ɔ bua maa jɔ he nɛ maa ta e tsui he?’ (Abɛ 16:23) Yo ko nɛ ngɛ Albania nɛ nyɛmiyo blɔ gbalɔ ko nɛ a tsɛɛ lɛ ke Flora kɛ lɛ kase Baiblo ɔ de ke, “I be nyɛe ma kplɛɛ tsɔɔmi nɛ kɔɔ gbogboehi a si tlemi ɔ he ɔ nɔ.” Se Flora nyɛ we yo ɔ nɔ kaa e kplɛɛ nɔ doo. Flora de ke, “I yɔse kaa loko e maa kplɛɛ tsɔɔmi nɛ ɔ nɔ ɔ, kekleekle ɔ, e he hia nɛ e le Mawu, nɔ nɛ wo gbogboehi a si tlemi ɔ he si ɔ.” Kɛ je lɔ ɔ se ɔ, ke a ngɛ ní ɔ kasee ɔ, Flora maa Yehowa suɔmi ɔ, e nile kɛ e he wami ɔ nɔ mi. Pee se ɔ, e Baiblo kaselɔ ɔ ba he gbogboehi a si tlemi ɔ ye wawɛɛ. Amlɔ nɛ ɔ, e ba pee Yehowa Odasefo no nɛ ngɛ kã.

15. Ngɛ Ní Tsumi 17:16-18 ɔ nya a, mɛni suhi Atene bi ɔmɛ je kpo nɛ́ hao Paulo, se mɛni he je nɛ e ya nɔ nɛ e fiɛɛ kɛ ha mɛ ɔ?

¹⁵ Kane Ní Tsumi 17:16-18. Atene bi ɔmɛ a bua jɔ wɔ jami he, a kɛ a he woɔ ajuama bɔmi mi, nɛ a bua jɔ je mi nile he, se Paulo ya nɔ nɛ e fiɛɛ kɛ ha mɛ ngɛ jɛmihi tsuo nɛ a jɛ lɛ ɔ se. E ngɛ mi kaa sa a, Paulo “ji musu bɔlɔ kɛ yi mi walɔ kɛ nɔ builɔ” mohu lɛɛ, se e ba pee Kristofo no. (1 Tim. 1:13) Kaa bɔ nɛ Yesu na Paulo kaa nɔ ko nɛ ma nyɛ ma ba pee e kaselɔ ɔ, jã nɔuu nɛ Paulo hu na Atene bi ɔmɛ kaa a ma nyɛ ma ba pee kaseli. Nɛ e ba mi jã hu niinɛ.​—Níts. 9:13-15; 17:34.

16-17. Mɛni tsɔɔ kaa nimli slɔɔtoslɔɔtohi ma nyɛ ma ba pee Kristo kaseli? Mo ha enɛ ɔ he nɔ hyɛmi nɔ́.

¹⁶ Ngɛ kaseli ɔmɛ a be ɔ mi ɔ, nihi babauu nɛ a je he slɔɔtohi ba pee Yesu kaseli. Benɛ Paulo ngma sɛ womi kɛ mane Kristofohi nɛ a ngɛ Korinto ngɛ Hela a, e tsɔɔ kaa loko a ti ni komɛ ma ba pee Kristofohi ɔ, a ji ojo fiali, nɛ ni komɛ hu kɛ a he wo je mi bami yaya mi. Nɛ e kɛ piɛɛ he ke: “Jã ji bɔ nɛ nyɛ ti ni komɛ ngɛ. Se a fɔ nyɛ he nɛ nyɛ he tsɔ.” (1 Kor. 6:9-11) Ke mo ɔ, anɛ o ma nyɛ ma ná nɔ mi mami kaa nimli nɛ ɔmɛ ma nyɛ tsake ba pee kaseli lo?

¹⁷ Mwɔnɛ ɔ, nihi babauu pee klaalo kaa a maa pee tsakemihi nɛ sa konɛ a ba  pee Yesu kaseli. Kaa nɔ hyɛmi nɔ́ ɔ, blɔ gbalɔ klɛdɛɛ ko nɛ a tsɛɛ lɛ ke Yukina nɛ e je Australia a na kaa nihi slɔɔtoslɔɔtohi ma nyɛ maa kplɛɛ Baiblo ɔ mi sɛ gbi ɔ nɔ. Ligbi ko ɔ, e na yo ko ngɛ ní tsumi he ko nɛ e tattoo e he, nɛ e tadehi nɛ e wo ɔ hu kle ngɛ e he. Yukina de ke, “Sisije ɔ, e he wa ha mi kaa ma su e he, se kɛ̃ ɔ, i kɛ lɛ sɛɛ ní. Ngɛ ní sɛɛmi ɔ mi ɔ, i ba na kaa e bua jɔ Baiblo ɔ he wawɛɛ, nɛ tattoo komɛ nɛ ngɛ e nine he ɔ ji La womi ɔ mi kuku komɛ!” Yo ɔ bɔni Baiblo ɔ kasemi, nɛ e bɔni asafo mi kpehi yami. *

18. Mɛni he je nɛ e sɛ nɛ waa kojo nihi ɔ?

¹⁸ Anɛ akɛnɛ Yesu hyɛ blɔ kaa nihi babauu maa nyɛɛ e se ɔ he je nɛ e de ke ngmɔ ɔ hiɛ futaa, nɛ e sa nɛ a kpa nɔ ní ɔ lo? Dɛbi. Ngmami ɔ tsɔɔ kaa nihi bɔɔ pɛ nɛ a ma ná Yesu mi hemi kɛ yemi. (Yoh. 12:37, 38) Nɛ Yesu ngɛ nyɛmi nɛ e kɛ leɔ nɔ́ nɛ ngɛ nɔ ko tsui mi. (Mat. 9:4) Se loloolo ɔ, e ngɔ e juɛmi kɛ ma nihi bɔɔ nɛ a ma ná e mi hemi kɛ yemi ɔ a nɔ, nɛ e kɛ kã fiɛɛ kɛ tsɔɔ nɔ fɛɛ nɔ. Anɛ e sɛ nɛ wɔ nɛ wa be nyɛe maa le níhi nɛ ngɛ nihi a tsui mi ɔ kɛ kã nɛ fiɛɛ kɛ ha nihi nɛ a ngɛ wa zugba kpɔ ɔ mi, nɛ́ wa ko kojo mɛ lo? E sa nɛ waa na su kpakpahi nɛ nihi ngɛ nɛ tsɔɔ kaa a ma nyɛ ma ba pee kaseli. Marc nɛ e ji ma se sane kpakpa fiɛɛlɔ ngɛ Burkina Faso ɔ de ke: “Nihi nɛ i le kaa a maa ya a hɛ mi ɔ kpaa Baiblo ɔ kasemi. Se nihi nɛ i susu kaa a be tsakemi pee ɔ mohu yaa a hɛ mi wawɛɛ. Enɛ ɔ he ɔ, i ba na kaa e sa nɛ wa ha nɛ Yehowa mumi ɔ nɛ kudɔ wɔ.”

19. Kɛ e sa nɛ waa na nihi nɛ a ngɛ wa zugba kpɔ ɔ mi ɔ ha kɛɛ?

¹⁹ Sisije ɔ, eko ɔ, e maa pee wɔ kaa nihi nɛ a ngɛ wa zugba kpɔ ɔ mi ɔ be kaa ngmɔ nɛ hiɛ futaa nɛ e sa nɛ a kpa nɔ ní. Se mo kai nɔ́ nɛ Yesu de e kaseli ɔmɛ ɔ. Ngmɔ ɔmɛ hiɛ futaa, nɛ tsɔɔ kaa e sa nɛ a kpa a nɔ ní. Nihi ma nyɛ ma tsake nɛ a ba pee Kristo kaseli. Yehowa naa nihi nɛ a ma nyɛ ma ba pee Kristo kaseli ɔ kaa a ji “níhi nɛ a he jua wa.” (Hag. 2:7) Ke wa naa nihi kaa bɔ nɛ Yehowa kɛ Yesu naa mɛ ɔ, lɔ ɔ maa ye bua wɔ nɛ wa maa le he nɛ a tsɔse mɛ ngɛ kɛ níhi nɛ a bua jɔ he. Wa be mɛ nae kaa a ji nibwɔhi, mohu ɔ, wa maa na mɛ kaa nihi nɛ a ma nyɛ ma ba pee nyɛmimɛ nyumuhi kɛ yihi.