Aywilɛho sane ji kaa benɛ i ye maa pee jeha 13 ɔ, huɛ bɔmi kpakpa nɛ ngɛ i kɛ Yehowa wa kpɛti ɔ bɔni puɛmi. I naa kaa ye sukuu bi ɔmɛ peeɔ nɔ́ fɛɛ nɔ́ nɛ a suɔ, se imi lɛɛ i nuɔ he kaa nɔ́ ko ngɛ mi bɔe. I naa mlaahi nɛ ye fɔli ɔmɛ woɔ mi, kɛ Baiblo sisi tomi mlaahi kaa a ngɛ kpɛii tsɔ. I naa Mawu jami mi ní peepeehi kaa ní tsumi nɛ he wa. I he ye kaa Yehowa ngɛ, se i nui he kaa i hɛ kɛ su e he haa.

I kpa we fiɛɛmi, se i kɛ ye nyɛmi tsuo tsu we fiɛɛmi ní tsumi ɔ. I dla we ye he loko i yaa fiɛɛmi, enɛ ɔ he ɔ, e yee ha mi kaa ma je ní sɛɛmi sisi, nɛ ke i nyɛ je sisi po ɔ, e yee ha mi kaa ma tsa nɔ. Enɛ ɔ he ɔ, i pee we kpale ya slaa, loo Baiblo mi ní kasemi, nɛ enɛ ɔ ha nɛ ye bua jɔɛ fiɛɛmi ní tsumi ɔ he kulaa. Ke pee ɔ, i biɔ ye he ke, ‘Kɛ e maa pee kɛɛ nɛ nɔ ko maa fiɛɛ otsi fɛɛ otsi, kɛ nyɔhiɔ fɛɛ nyɔhiɔ?’

Benɛ i ye jeha 17 ɔ, i suɔ nɛ ma hi ye dɛ he, lɔ ɔ he ɔ i muɔɔ ye níhi nɛ i hia kɛ ho Australia ya. Ye fɔli ɔmɛ ye aywilɛho wawɛɛ benɛ i yaa a. A hao, se a susu kaa ma ya nɔ nɛ ma sɔmɔ Yehowa ngɛ he nɛ i yaa a.

 Kã nɛ i kɛ sɔmɔɔ Yehowa ngɛ Australia a ba si kulaa pe sa a po. I pɔɛ asafo mi kpehi yami. I kɛ nihewi kɛ yihewi nɛ mɛ hu a ngɛ kaa imi ɔ bɔni bɔmi. A maa ya asafo mi kpe gbɔkuɛ nɛ ɔ, kɛkɛ hwɔɔ a maa ya hɛja jemi hehi nɛ a ma ya nu da nɛ a maa do. Ke i hyɛ ye se ɔ, i naa kaa ye nane kake ngɛ asafo ɔ mi, nɛ kake hu ngɛ je ɔ mi. Ye he jɔɛ mi ngɛ asafo ɔ mi, nɛ ye he jɔɛ mi ngɛ je ɔ mi hulɔ.

Maa pee jeha enyɔ se ɔ, i kɛ nyɛmiyo ko kpe. Nyɛmiyo nɛ ɔ ha nɛ i bɔni ye je mi bami he susumi, se e li po kaa e ngɛ nɔ́ ko kaa jã pee. I kɛ yihewi eywiɛ nɛ a sɛ we gba si himi mi lɛ ngɛ we mi. Wa fɔ kpɔ mi nɔ hyɛlɔ ko kɛ e yo Tamara nine konɛ a ba ye otsi ngɛ wa ngɔ. Ke e huno ɔ ngɛ asafo mi níhi a he ní tsue ɔ, Tamara kɛ wɔ sɛɛɔ ní, nɛ wa muɔɔ. Ye bua jɔ enɛ ɔ he wawɛɛ. E baa e he si, nɛ e yi kaa o kɛ lɛ maa sɛɛ ní. E peeɔ mi nyakpɛ kaa nɔ ko nɛ e hɛ dɔɔ ngɛ Mawu jami mi níhi a he ɔ he ma nyɛ maa hi bua jɔmi kikɛ.

Tamara ngɛ kã wawɛɛ. Bɔ nɛ e suɔ anɔkuale ɔ kɛ kã nɛ e kɛ tsuɔ fiɛɛmi ní tsumi ɔ náa nɔ nɔ he wami wawɛɛ. E suɔ nɛ e kɛ e nyɛmi tsuo nɛ sɔmɔ Yehowa, se imi lɛɛ ye bua jɔɛ, ejakaa i kɛ ye nyɛmi tsuo sɔmɔ we Yehowa. E ní peepee kɛ bua jɔmi nitsɛnitsɛ nɛ e ngɛ ɔ ná ye nɔ he wami wawɛɛ. E nɔ hyɛmi nɔ́ ɔ ha nɛ i susu Baiblo mi anɔkuale nɛ he hia wawɛɛ nɛ ɔ he: Yehowa suɔ nɛ waa kɛ “bua jɔmi” kɛ “bua jɔmi lahi” nɛ sɔmɔ lɛ.​—La 100:2.

I suɔ nɛ ma ná bua jɔmi nɛ Tamara ngɛ ɔ eko, se loko ma ná jamɛ a bua jɔmi ɔ, e sa nɛ ma pee tsakemi nguanguahi ngɛ ye si himi mi. E he be mohu lɛɛ, se i bɔni tsakemi peemi bɔɔbɔɔbɔɔ. I dlaa ye he loko i yaa fiɛɛmi, nɛ i pɔɔ blɔ gbali a wami ní tsumi ɔ tsumi. Enɛ ɔ nɛ i peeɔ ɔ yeɔ bua mi nɛ i yi gbeye tsɔ, nɛ i nyɛɔ peeɔ kã. Akɛnɛ i kɛ Baiblo ɔ pɔɔ ní tsumi ngɛ fiɛɛmi mi he je ɔ, e ha nɛ ye bua ba jɔ fiɛɛmi ní tsumi ɔ he wawɛɛ. E kɛ we nɛ i bɔni blɔ gbali a wami ní tsumi ɔ tsumi daa nyɔhiɔ.

 I kɛ huɛmɛ nɛ e slo a jeha nɛ a bɔɔ a he mɔde ngɛ asafo ɔ mi, nɛ a bua jɔ sɔmɔmi nɛ a kɛ ngɛ Yehowa hae ɔ he ɔ bɔni bɔmi. A nɔ hyɛmi nɔ́ kpakpa a ye bua mi nɛ i bɔni níhi nɛ i kɛ yeɔ kekle blɔ he ngɛ ye si himi mi ɔ a he susumi ekohu, nɛ i kaneɔ Baiblo ɔ daa ligbi. Ye bua ngɛ fiɛɛmi ní tsumi ɔ he jɔe wawɛɛ, nɛ i ba pee daa blɔ gbalɔ. Ngɛ jeha babauu nɛ be ɔ tsuo mi ɔ, kpaako ye bua jɔɔ, nɛ i nuɔ he kaa ye he jɔ mi ngɛ asafo ɔ mi.

Jeha kake se ɔ, i kɛ nyɛminyumu ko nɛ a tsɛɛ lɛ ke Alex nɛ e mi mi jɔ, nɛ́ e yeɔ anɔkuale ɔ kpe. E suɔ Yehowa kɛ fiɛɛmi ní tsumi ɔ. Jamɛ a be ɔ, e ji asafo mi sɔmɔlɔ, nɛ e tsu blɔ gbami ní tsumi ɔ jeha ekpa. Jehanɛ hu ɔ, Alex ya sɔmɔ ngɛ Malawi be bɔɔ ko ngɛ he nɛ fiɛɛli fuu a he hia ngɛ. E kɛ ma se sane kpakpa fiɛɛli nɛ a peeɔ nɔ hyɛmi nɔ́ kpakpa a bɔ. Enɛ ɔ wo lɛ he wami nɛ e ya nɔ nɛ e ngɔ Matsɛ Yemi ɔ kɛ ye kekle blɔ he.

Ngɛ jeha 2003 ɔ mi ɔ, i kɛ Alex sɛ gba si himi mi, nɛ wa tsa be tsuo sɔmɔmi ní tsumi ɔ nɔ. Wa kase ní kpakpahi fuu, nɛ Yehowa jɔɔ wɔ ngɛ blɔhi fuu a nɔ.

Ngɛ jeha 2009 ɔ mi ɔ, a fɔ wɔ nine kaa wa ya sɔmɔ kaa ma se sane kpakpa fiɛɛli ngɛ Timor-Leste, nɛ ji ma nyafii ko nɛ ngɛ Indonesia zugba kpɔ nɛ nyu bɔle lɛ ɔ mi. Wa nya kpɛ wa he, wa bua jɔ, se ngɛ jamɛ a be ɔ mi nɔuu ɔ, wa ye gbeye. Nyɔhiɔ enuɔ se ɔ, wa ya su Timor-Leste ma ngua nɛ ji Dili ɔ mi.

E he ba hia nɛ waa pee tsakemi nguahi ngɛ wa si himi mi. E he ba hia nɛ waa kase kusumi ehe, gbi ehe, waa ye niye ní ehe nɛ waa pee níhi ngɛ blɔ slɔɔtohi a nɔ. Ke wa ya fiɛɛmi ɔ, wa naa nihi nɛ a ngɛ ohia futaa yee, nihi nɛ a ya sukuu bɔɔ loo a yɛ kulaa kɛ nihi nɛ a hao wawɛɛ. Wa naa nihi fuu nɛ a be nɔmlɔ tso mi he wami,  kɛ nihi nɛ a hao ngɛ tahi kɛ basabasa peemi nɛ yaa nɔ ɔ he je. *

Fiɛɛmi ní tsumi ɔ ya nɔ saminya! Kaa nɔ hyɛmi nɔ́ ɔ, be ko ɔ, i kɛ jokuɛ yoyo ko nɛ a tsɛɛ lɛ ke Maria * nɛ e ye jeha 13 ɔ kpe. E yayo gbo jehahi bɔɔ nɛ be ɔ, nɛ e pɔɛ e papaa nami. Kaa bɔ nɛ e ji ngɛ Maria juami bi fuu a blɔ fa mi ɔ, lɛ hu e li nɔ́ nɛ e ngɛ hlae ngɛ si himi mi. I kai kaa be ko ɔ, e fo ya benɛ e ngɛ mi bɔ nɛ e nuɔ he ha a dee ɔ. Se i nui nɔ́ nɛ e ngɛ dee ɔ sisi, ejakaa i nyɛ we nɛ ma tu e je gbi ɔ saminya lolo. I sɔle ha Yehowa konɛ e ye bua mi nɛ ma nyɛ ma wo lɛ he wami. Kɛkɛ nɛ i bɔni ngmamihi nɛ maa wo e bua a kanemi kɛ tsɔɔ lɛ. Jeha bɔɔ komɛ a se ɔ, i na kaa anɔkuale ɔ ha nɛ Maria ní peepee, e he dlami, kɛ e si himi tsake. E ha nɛ a baptisi lɛ, nɛ amlɔ nɛ ɔ, e kɛ nihi kaseɔ Baiblo ɔ. Mwɔnɛ ɔ, Maria ngɛ weku ngua nɛ mɛ tsuo a sɔmɔɔ Yehowa, nɛ e nuɔ he kaa a suɔ lɛ.

Yehowa ngɛ fiɛɛmi ní tsumi ɔ nɔ jɔɔe ngɛ Timor-Leste. E ngɛ mi kaa jeha nyɔngma nɛ be ɔ nɛ a baptisi fiɛɛli ɔmɛ a kpɛti nihi fuu mohu lɛɛ, se a kpɛti nihi fuu ngɛ sɔmɔe kaa blɔ gbali, asafo mi sɔmɔli loo asafo mi nikɔtɔmahi. A kpɛti ni komɛ hu ngɛ sɔmɔe ngɛ gbi sisi tsɔɔmi he nɛ be Betel ɔ, nɛ a ngɛ níhi a sisi tsɔɔe kɛ ya gbihi nɛ a tuɔ ngɛ ma a mi ɔ a mi. Be fɛɛ be nɛ ma na mɛ nɛ a ngɛ lae ngɛ asafo mi kpe sisi kɛ a nya he muɔ ɔ, ye bua jɔɔ wawɛɛ. Ye bua jɔɔ hu kaa a ngɛ a hɛ mi yae ngɛ mumi mi.

Si himi ngɛ Timor-Leste ɔ je ekpa kulaa ngɛ si himi ngɛ Australia a he, se wa bua jɔɔ wawɛɛ. Be komɛ ɔ, a buaa wa nya fuu kɛ woɔ lɔle mi, nɛ a ngɔɔ lo gbigblihi kɛ ngmɔ níhi hu kɛ piɛɛɔ wa he ngɛ lɔle ɔ mi. Ngɛ ligbi komɛ hu a nɔ ɔ, waa kɛ nihi kaseɔ ní ngɛ we tsɔwihi nɛ a mi dɔɔ la, nɛ a wui zugba a simiti, nɛ́ kungwɔhi ngɛ tee ngɛ we ɔ mi ɔ a mi. E ngɛ mi kaa waa kɛ nyagbahi kpeɔ mohu lɛɛ, se i pɔɔ demi ke, ‘Ye bua jɔ si himi ngɛ lejɛ ɔ he wawɛɛ!’

Ke i hyɛ ye se ɔ, i naa kaa i kɛ nyagbahi kpe wawɛɛ benɛ i ma a, se ye bua jɔ kaa ye fɔli ɔmɛ pee nɔ́ fɛɛ nɔ́ nɛ a ma nyɛ kɛ tsɔɔ mi Yehowa he ní, nɛ a ye bua mi. Abɛ 22:6 ba mi ngɛ ye blɔ fa mi. Ye papaa kɛ ye yayo bua jɔ i kɛ Alex he wawɛɛ; a bua jɔ kaa Yehowa kɛ wɔ ngɛ ní tsue. Kɛ je 2016 mi kɛ ma a, i kɛ Alex ngɛ kpɔ mi nɔ hyɛmi ní tsumi ɔ tsue ngɛ zugba kpɔhi nɛ a ngɛ Australasia asafo ɔ ní tsumi kɔni ɔ sisi ɔ mi.

E he wa ha mi kaa ma he ye kaa be ko nɛ be ɔ, ye bua jɔɛ fiɛɛmi ní tsumi ɔ he. Se amlɔ nɛ ɔ lɛɛ, ye bua jɔ fiɛɛmi ní tsumi ɔ he wawɛɛ! I ba yɔse kaa ke i kɛ nyagbahi ngɛ kpee ngɛ si himi mi po ɔ, ye tsui tsuo nɛ ma kɛ sɔmɔ Yehowa a ma ha nɛ ma ná bua jɔmi nitsɛnitsɛ ngɛ si himi mi. Ngɛ anɔkuale mi ɔ, jeha 18 nɛ be nɛ i kɛ Alex pee kake kɛ ngɛ Yehowa sɔmɔe ɔ ji be nɛ i ná bua jɔmi pe kulaa ngɛ si himi mi. Kpaako i na anɔkuale nɛ ngɛ nɔ́ nɛ la polɔ David de Yehowa a mi. E de ke: “Nihi tsuo nɛ ba saa we ngɛ o ngɔ ɔ, ha nɛ a nya, nɛ a la kɛ bua jɔmi daa. . . . Ni nɛmɛ nɛ suɔ mo ɔ, a na bua jɔmi ngɛ o mi.​—La 5:11.