1. Mɛni ji ní komɛ nɛ a he hia nɛ nihewi kɛ yihewi nyɛ nɛ a pee momo?

 DAA jeha a, a baptisiɔ nihewi kɛ yihewi akpehi abɔ. Anɛ mo hu a baptisi mo lo? Ke jã lɛɛ o nyɛmimɛ nyumuhi kɛ yihi nɛ a ngɛ asafo ɔ mi ɔ a bua jɔ kaa a baptisi mo, nɛ Yehowa hu bua jɔ! (Abɛ 27:11) Mo susu ní komɛ nɛ a he hia nɛ o nyɛ nɛ o pee momo ɔ he nɛ o hyɛ. Kaa nɔ hyɛmi nɔ́ ɔ, eko ɔ, o kɛ jeha babauu kase Baiblo ɔ saminya, nɛ níhi nɛ o kase ɔ ha nɛ o ná nɔ mi mami kaa Baiblo ɔ ji Mawu Munyu niinɛ. Enɛ ɔ ha nɛ o ba le nɔ nɛ ji Baiblo ɔ Ngmalɔ, nɛ o ná suɔmi nɛ mi wa kɛ ha lɛ. Akɛnɛ suɔmi nɛ o ngɛ kɛ ha Yehowa a mi wa wawɛɛ he je ɔ, o jɔɔ o wami nɔ kɛ ha lɛ nɛ o ha nɛ a baptisi mo. Yi mi kpɔ nɛ o mwɔ nɛ ɔ se be!

2. Mɛni he wa ma susu ngɛ ní kasemi nɛ ɔ mi?

 ² Atsinyɛ jemi ko be he kaa loko o maa jɔɔ o wami nɔ kɛ ha Yehowa a, o kɛ kahi fuu kpe, enɛ ɔ he ɔ, o ná we lɛ gbɔjɔɔ kaa o maa ye Yehowa anɔkuale. Se benɛ o ngɛ wae ɔ hu ɔ, o kɛ ka ehehi maa kpe. Satan maa bɔ mɔde kaa e ma ha nɛ suɔmi nɛ o ngɛ kɛ ha Yehowa nya nɛ ba si, konɛ o kpa Yehowa sɔmɔmi. (Efe. 4:14) Se e sɛ nɛ o ngmɛ blɔ nɛ e ba jã. Mɛni maa ye bua mo konɛ o ya nɔ nɛ o ye Yehowa anɔkuale, nɛ o ye si nɛ o wo Yehowa kaa o ma sɔmɔ lɛ ɔ nɔ? E sa nɛ o bɔ mɔde wawɛɛ nɛ o ‘ya o hɛ mi’ konɛ o pee Kristofo no nɛ e nane pi si. (Heb. 6:1) Se mɛni blɔ nɔ o maa gu kɛ pee jã?

3. Mɛni ji ní komɛ nɛ e sa nɛ Kristofohi nɛ a ya nɔ nɛ a pee ngɛ a baptisimi se?

³ Ngɛ wa baptisimi se ɔ, e sa nɛ wɔ tsuo waa kɛ kɔkɔ bɔmi nɛ bɔfo Paulo kɛ ha Kristofohi nɛ a ngɛ Efeso ɔ nɛ tsu ní. E wo mɛ he wami kaa a pee Kristofohi nɛ a “wa.” (Efe. 4:13) Enɛ ɔ tsɔɔ kaa e sa nɛ a bɔ mɔde nɛ a ‘ya a hɛ mi.’ Paulo ngɔ bɔ nɛ e sa nɛ Kristofohi nɛ́ a wa ngɛ mumi mi ha a kɛ to bɔ nɛ jokuɛwi waa ha a he. Ke a fɔ bimwɔyo ɔ, e fɔli suɔ lɛ nɛ a bua jɔɔ e he. Se bimwɔyo ɔ be jã hie daa. Ke e ngɛ wae ɔ, e ma kpa “jokuɛwi a ní peemi.’’ (1 Kor. 13:11) Jã nɔuu nɛ e ji ngɛ Kristofohi hu a blɔ fa mi. Ngɛ wa baptisimi se ɔ, e sa nɛ waa ya nɔ nɛ waa wa ngɛ mumi mi. Nyɛ ha nɛ wa susu ní komɛ nɛ maa ye bua wɔ nɛ wa nyɛ nɛ waa pee jã a he.

4. Mɛni ma nyɛ maa ye bua mo konɛ o ya o hɛ mi ngɛ mumi mi? Moo tsɔɔ nya. (Filipi Bi 1:9)

⁴ Mo ná suɔmi nɛ mi wa kɛ ha Yehowa. E ji anɔkuale kaa o ngɛ suɔmi nɛ mi wa kɛ ha Yehowa momo. Se o ma nyɛ ma ha nɛ suɔmi nɛ o ngɛ kɛ ha lɛ ɔ mi nɛ wa wawɛɛ. Kɛ gu mɛni blɔ nɔ? Bɔfo Paulo tsɔɔ blɔ kake nɔ nɛ wa ma nyɛ maa gu kɛ pee jã ngɛ Filipi Bi 1:9. (Kane.) Paulo sɔle konɛ suɔmi nɛ Filipi bi ɔmɛ ngɛ ɔ, nɛ e “hiɛ kɛ be nɔ babauu nitsɛ pe kekle ɔ.” Mɛni blɔ nɔ wɔ hu wa maa gu kɛ pee jã? Wa ma nyɛ maa pee ja kɛ gu “nile nitsɛnitsɛ kɛ nɔ́ se kɔmi nɛ pi si” nɛ wa ma ná a nɔ. Ke wa ya nɔ nɛ wa le Yehowa a, suɔmi nɛ wa ngɛ kɛ ha lɛ ɔ mi maa wa, nɛ wa bua maa jɔ e su kpakpa amɛ kɛ blɔhi a nɔ nɛ e guɔ kɛ peeɔ e ní ɔ a he. Jehanɛ hu ɔ, wa maa suɔ nɛ waa pee níhi nɛ maa sa e hɛ mi, nɛ wa be suɔe kaa wa maa pee nɔ́ ko nɛ maa dɔ lɛ. Wa bɔɔ mɔde kaa wa maa le nɔ́ nɛ e ngɛ hlae nɛ waa pee, kɛ blɔ nɔ nɛ wa maa gu kɛ pee jã.

5-6. Mɛni wa ma nyɛ maa pee konɛ suɔmi nɛ wa ngɛ kɛ ha Yehowa a mi nɛ wa? Moo tsɔɔ nya.

⁵ Yesu kase Yehowa su ɔmɛ saminya, enɛ ɔ he ɔ, ke wa le Yesu saminya a, lɔ ɔ maa ye bua wɔ konɛ waa suɔ Yehowa wawɛɛ. (Heb. 1:3) Blɔ nɛ e hi pe kulaa nɛ wa maa gu nɔ kɛ kase Yesu ji kaa wa maa kase Sane Kpakpa eywiɛ ɔmɛ. Ke o nyɛ we nɛ o kane Baiblo ɔ daa ligbi ɔ, lɛɛ e maa hi wawɛɛ kaa o kɛ Sane Kpakpa eywiɛ ɔmɛ nɛ kɔɔ Yesu he ɔ maa je sisi. Nɛ ke o ngɛ jã pee ɔ, moo bɔ mɔde nɛ o kadi su kpakpahi nɛ e ngɛ ɔ. E yi kɛ ha nihi kaa a maa hɛ kɛ su Yesu he. E suɔ jokuɛwi a sane nɛ e gblaa mɛ kɛ baa e ngɔ. (Maak. 10:13-16) Akɛnɛ Yesu he jɔ nɛ nihi nyɛɔ hɛɛ kɛ suɔ e he he je ɔ, e kaseli ɔmɛ nyɛɔ nɛ a deɔ lɛ bɔ nɛ a ngɛ he nue ha. (Mat. 16:22) Enɛ ɔ tsɔɔ kaa Yesu kase e hiɔwe Tsɛ ɔ. Wa ma nyɛ maa hɛ kɛ su Yehowa he. Wa ma nyɛ maa gu sɔlemi nɔ kɛ hɛ kɛ su e he. Ke wa ngɛ sɔlee ɔ, wa ma nyɛ ma de lɛ nɔ́ fɛɛ nɔ́ nɛ ngɛ wa tsui mi. Wa ngɛ nɔ mi mami kaa e maa bu wɔ tue. E suɔ wɔ, nɛ e susuɔ wa he.​—1 Pet. 5:7.

⁶ Yesu nuɔ nɔ́ he ha nihi. Bɔfo Mateo de ke: “Benɛ e na asafo ku ɔmɛ ɔ, a he pee lɛ mɔbɔ ejakaa a plaa mɛ nɛ a gbɛ fia kaa jijɔhi nɛ a be hyɛlɔ.” (Mat. 9:36) Kɛ Yehowa nu he ha kɛɛ? Yesu de ke: “Ye Tsɛ nɛ ngɛ hiɔwe ɔ sume kaa ni nyafii nɛ ɔmɛ a kpɛti nɔ kake hɛ mi nɛ kpata.” (Mat. 18:14) Munyu nɛ ɔ woɔ wa bua wawɛɛ! Ke wa ya nɔ nɛ wa le Yesu saminya a, suɔmi nɛ wa ngɛ ha Yehowa a hu mi maa wa.

7. Ke o kɛ Kristofohi nɛ a nane pi si ɔ bɔ ɔ, kɛ e maa ye bua mo ha kɛɛ?

⁷ Ke o kɛ nyɛmimɛ nɛ a nane pi si ngɛ Mawu jami mi nɛ a ngɛ o we asafo ɔ mi ɔ bɔɔ ɔ, e ma nyɛ maa ye bua mo nɛ o kase blɔ nɔ nɛ o maa gu kɛ je suɔmi kpo. Jehanɛ hu ɔ, e maa ye bua mo nɛ o maa pee Kristofo no nɛ e nane pi si. Nyɛmimɛ nɛ ɔmɛ ngɛ bua  jɔmi ngɛ si himi mi. A pia we a he kaa a mwɔ a yi mi kpɔ kaa a ma sɔmɔ Yehowa. O ma nyɛ ma bi mɛ nɛ a de mo níhi a si kpami komɛ nɛ a ná ngɛ Yehowa sɔmɔmi mi. Nɛ ke e he ba hia nɛ o mwɔ yi mi kpɔ ko nɛ he hia wawɛɛ ɔ, mo bi mɛ ga womi. Mo kai kaa, “he nɛ ga woli hiɛ ngɛ ɔ, tue mi jɔmi ngɛ lejɛ ɔ.”​—Abɛ 11:14.

8. Ke o yi mi pee mo enyɔɔnyɔ ngɛ nɔ́ ko nɛ Baiblo ɔ de ɔ he ɔ, mɛni o ma nyɛ maa pee?

⁸ Ko ha nɛ o yi mi nɛ pee mo enyɔɔnyɔ. Kaa bɔ nɛ wa susu he ngɛ  kuku 2 ɔ mi ɔ, Satan maa bɔ mɔde kaa e maa tsi o nya konɛ o ko ya o hɛ mi ngɛ mumi mi hu. Blɔ kake nɔ nɛ e ma nyɛ maa gu kɛ pee jã ji kaa, e ma ha nɛ o yi mi nɛ pee mo enyɔɔnyɔ ngɛ Baiblo ɔ mi anɔkualehi nɛ o ngɛ kasee ɔ ekomɛ a he. Kaa nɔ hyɛmi nɔ́ ɔ, eko ɔ, nihi maa suɔ kaa a ma plɛ o yi mi konɛ o he bilemi tsɔɔmi ɔ nɛ o ye, nɛ o susu kaa pi Mawu nɛ e bɔ wɔ. Eko ɔ, benɛ o ji jokuɛ ɔ, o li bilemi tsɔɔmi ɔ he nɔ́ ko, se amlɔ nɛ ɔ, a bɔni mo tsɔɔmi ngɛ sukuu. Eko ɔ, nɔ́ nɛ o tsɔɔli ɔmɛ deɔ ngɛ bilemi tsɔɔmi ɔ he ɔ ma ná o nɔ he wami nɛ o ma susu kaa sisi numi ngɛ he. Se eko ɔ, a hla we níhi a mi kɛ ya tsitsaa konɛ a na kaa Bɔlɔ ko ngɛ niinɛ. Mo kai sisi tomi mlaa nɛ ngɛ Abɛ 18:17 ɔ. E de ke: “Ke nɔ ko sɛ hlami kɛ jaje e sane ɔ, e peeɔ kaa nɔ́ nɛ e sane da kɛ yaa si e nyɛmi ɔ ma bɔni lɛ munyu bimi, loko anɔkuale ɔ maa je kpo.” E sa nɛ o he be kɛ kase Mawu Munyu nɛ ji Baiblo ɔ saminya mohu pe nɛ o ma he munyuhi nɛ a tuɔ ngɛ sukuu ɔ ye. Mo hla níhi a mi ngɛ wa womi ɔmɛ a mi, nɛ́ o kɛ nyɛmimɛ nɛ be ko nɛ be ɔ, a he bilemi tsɔɔmi ɔ ye ɔ nɛ sɛɛ ní. Mo bi mɛ nɔ́ nɛ ha nɛ a ba he ye kaa Bɔlɔ ko ngɛ nɛ́ e suɔ wɔ ɔ. Ní sɛɛmi kaa jã a woɔ nɔ he wami, nɛ e maa ye bua wɔ konɛ waa na odasehi nɛ maa nɔ mi kaa niinɛ Bɔlɔ ko ngɛ.

9. Mɛni o kase ngɛ Melissa níhi a si kpami ɔ mi?

⁹ Benɛ nyɛmiyo ko nɛ a tsɛɛ lɛ ke Melissa a pee níhi a mi hlami kɛ kɔ adebɔ níhi a he ɔ, e ná he se wawɛɛ. * E de ke: “Bɔ nɛ a tsɔɔ bilemi sane ɔ mi ha ngɛ sukuu ɔ ma nyɛ ma plɛ o yi mi. Sisije ɔ, ye juɛmi pee mi enyɔɔnyɔ nɛ e ye ha mi kaa ma hla níhi a mi. I ye gbeye kaa ke i hla níhi a mi ɔ, lɔ ɔ ma ha nɛ ma he bilemi tsɔɔmi ɔ ye. Se Yehowa suɔ nɛ waa na odase nɛ tsɔɔ kaa nɔ́ nɛ wa heɔ yeɔ ɔ ji anɔkuale.  Enɛ ɔ he je ɔ, i je sisi nɛ i bɔni níhi a mi hlami. I kane womi nɛ ji Is There a Creator Who Cares About You? kɛ womiyo nɛ ji Was Life Created? kɛ The Origin of Life​—Five Questions Worth Asking. Womi nɛ ɔmɛ ji nɔ́ nɛ ye kɛ bua mi. I ná nɛ i je sisi mla.”

10-11. Mɛni ma nyɛ maa ye bua mo konɛ o je mi bami he nɛ tsɔ? (1 Tɛsalonika Bi 4:3, 4)

¹⁰ Mo kua je mi bami yaya. Ke o ji niheyo loo yiheyo nɛ o yi jeha 20 lolo ɔ, o bɔmi nami he numi nya ma nyɛ maa wa, nɛ o juami bi ma nyɛ maa nyɛ o nɔ kaa o ngɔ o he kɛ wo bɔmi nami mi. Satan maa suɔ nɛ o ngɔ o he kɛ wo ní peepee nɛ ɔ mi. Se mɛni ma nyɛ maa ye bua mo konɛ o nyɛ nɛ o da ka nɛ ɔ nya? (Kane 1 Tɛsalonika Bi 4:3, 4.) Ke o ngɛ sɔlee ɔ, de Yehowa bɔ nɛ o ngɛ he nue ha tutuutu, nɛ o de lɛ konɛ e ye bua mo. (Mat. 6:3) Mo kai kaa Yehowa suɔ nɛ e ye bua mo, se pi nɛ e bu mo fɔ. (La 103:13, 14) Baiblo ɔ hu ma nyɛ maa ye bua mo. E he wa ha Melissa nɛ wa tu e he munyu kɛ sɛ hlami ɔ kaa e ma kpa ní yayamihi a he susumi. E de ke: “Baiblo ɔ nɛ i kaneɔ daa ligbi ɔ ye bua mi nɛ i nyɛ da susumihi nɛ dɛ nɛ i ná a nya. E kaiɔ mi kaa Yehowa nɔ́ ji mi, nɛ i suɔ nɛ ma sɔmɔ lɛ ye wami be tsuo.”​—La 119:9.

¹¹ Koo bɔ mɔde kaa o ma tsu nyagbahi nɛ o kɛ kpeɔ ɔ he ní ngɛ o dɛ he. O kɛ o fɔli nɛ sɛɛ nyagba a he ní. E be gbɔjɔɔ kaa o kɛ nɔ ko maa sɛɛ o laami mi sanehi, se e he hia wawɛɛ kaa o maa pee jã. Melissa de ke: “I sɔle konɛ ma ná kã, nɛ lɔ ɔ se ɔ, i kɛ ye papaa sɛɛ ye nyagba a he ní. Benɛ i pee jã se ɔ, e ngɛ kaa nɔ́ nɛ tlomi ko je ye kuɛ nɔ. I le kaa Yehowa bua jɔ nɔ́ nɛ i pee ɔ he.”

12. Mɛni blɔ nɔ o maa gu kɛ mwɔ yi mi kpɔhi nɛ da?

¹² Mo ha nɛ Baiblo mi sisi tomi mlaahi nɛ kudɔ mo. Ke o ngɛ wae ɔ, o fɔli ɔmɛ maa ngmɛ mo blɔ konɛ mo nitsɛ o mwɔ yi mi kpɔhi. Se ke a ngmɛ mo blɔ po ɔ, loloolo ɔ, níhi fuu ngɛ nɛ o li. Mɛni maa ye bua mo konɛ o ko mwɔ yi mi kpɔ nɛ ma puɛ huɛ bɔmi nɛ ngɛ o kɛ Yehowa nyɛ kpɛti ɔ? (Abɛ 22:3) Nyɛmiyo ko nɛ a tsɛɛ lɛ ke Kari ɔ tsɔɔ nɔ́ nɛ ye bua lɛ nɛ e nyɛ nɛ e mwɔ yi mi kpɔhi nɛ da. E ba yɔse kaa e he hia we nɛ a wo Kristofo no nɛ e nane pi si ɔ mlaa ngɛ nɔ́ fɛɛ nɔ́ nɛ e maa pee ngɛ e si himi mi ɔ he. E de ke: “E he ba hia nɛ ma nu Baiblo mi sisi tomi mlaa amɛ a sisi mohu pe nɛ ma na mɛ kaa a ji mlaahi kɛkɛ.” Ke o ngɛ Baiblo ɔ kanee ɔ, mo bi o he ke: ‘Mɛni kuku nɛ ɔ tsɔɔ mi kɛ kɔ Yehowa susumi he? Anɛ sisi tomi mlaa ko ngɛ mi nɛ maa ye bua mi nɛ ma pee nɔ́ nɛ da lo? Nɛ ke i kɛ tsu ní ɔ, kɛ ma ná he se ha kɛɛ?’ (La 19:7; Yes. 48:17, 18) Ke o kaneɔ Baiblo ɔ nɛ o pueɔ o yi mi tɛ ngɛ sisi tomi mlaahi nɛ ngɛ mi ɔ he ɔ, e be yee ha mo kaa o maa mwɔ yi mi kpɔhi nɛ maa sa Yehowa hɛ mi. Benɛ o nile mi ngɛ kuɔe nɛ o ngɛ o hɛ mi yae ɔ, o ma ba yɔse kaa o hia we mlaa ngɛ nɔ́ fɛɛ nɔ́ nɛ o maa pee ngɛ o si himi mi ɔ he ejakaa o ba le Yehowa susumi ngɛ sanehi a he.

13. Kɛ huɛmɛ kpakpahi ma nyɛ ma ná o nɔ he wami ha kɛɛ? (Abɛ 13:20)

¹³ Moo hla huɛmɛ nɛ a suɔ Yehowa. Kaa bɔ nɛ wa de kɛ sɛ hlami ɔ, nihi nɛ o kɛ mɛ maa bɔ ɔ ma nyɛ maa ye bua mo nɛ o pee Kristofo no nɛ e nane pi si. (Kane Abɛ 13:20.) Be ko ɔ, bua jɔmi nɛ nyɛmiyo ko nɛ a tsɛɛ lɛ ke Sara a ngɛ ɔ nya ba si. Se nɔ́ ko ya nɔ ngɛ e si himi mi, nɛ lɔ ɔ ha nɛ e ná bua jɔmi ekohu. Sara de ke: “I ná huɛmɛ kpakpahi ngɛ be nɛ sa mi. I kɛ nyɛmiyo wayoo ko blaa kɛ kaseɔ Hwɔɔmi Mɔ ɔ daa otsi. Ye huɛ kpa ko hu ye bua mi nɛ i bɔni sanehi a heto hami ngɛ asafo mi kpehi a sisi. Nɔ́ nɛ a pee ɔ ná ye nɔ he  wami, lɔ ɔ he ɔ, i kɛ dɛ he ní kasemi kɛ sɔlemi fiɛ we kulaa. Enɛ ɔ ha nɛ huɛ bɔmi nɛ ngɛ i kɛ Yehowa wa kpɛti ɔ mi ba wa, nɛ i ná bua jɔmi ekohu.”

14. Mɛni blɔ nɔ nɛ Julien gu kɛ ná huɛmɛ kpakpahi?

¹⁴ Mɛni blɔ nɔ o maa gu kɛ ná huɛmɛ kpakpahi? Julien nɛ amlɔ nɛ ɔ e ngɛ sɔmɔe kaa asafo mi nɔkɔtɔma a de ke: “Benɛ i wɛ ɔ, i kɛ nihi nɛ i kɛ mɛ yaa fiɛɛmi ɔ peeɔ huɛ. Huɛmɛ nɛ ɔmɛ ngɛ kã wawɛɛ. A ye bua mi nɛ i na kaa bua jɔmi ngɛ fiɛɛmi ní tsumi ɔ mi. Enɛ ɔ ha nɛ i kɛ ma ye hɛ mi kaa ma tsu be tsuo sɔmɔmi ní tsumi ɔ. I ba yɔse kaa ye juami bi pɛ nɛ i kɛ mɛ bɔɔ ɔ ha nɛ i be huɛmɛ kpakpahi fuu. Amlɔ nɛ ɔ, i ngɛ sɔmɔe ngɛ Betel, nɛ i ngɛ huɛmɛ kpakpahi ngɛ lejɛ ɔ. Nɔ hyɛmi nɔ́ kpakpa nɛ a peeɔ ɔ ye bua mi nɛ i hla hɛja jemi nɛ sa, nɛ i hɛ kɛ su Yehowa he.”

15. Mɛni kɔkɔ bɔmi nɛ kɔɔ huɛ bɔmi he nɛ Paulo kɛ ha Timoteo? (2 Timoteo 2:20-22)

¹⁵ Mɛni nɛ e sa nɛ o pee ke o yɔse kaa nyɛmi ko ngɛ asafo ɔ mi nɛ ke o kɛ lɛ bɔ ɔ, e ma ha nɛ huɛ bɔmi nɛ ngɛ o kɛ Yehowa nyɛ kpɛti ɔ ma puɛ? Paulo le kaa Kristofohi komɛ nɛ a hi si ngɛ kaseli ɔmɛ a be ɔ mi ɔ bɛ a je mi kaa Kristofohi, enɛ ɔ he ɔ, e bɔ Timoteo kɔkɔ kaa e yu e he ngɛ a he. (Kane 2 Timoteo 2:20-22.) Huɛ bɔmi nɛ ngɛ waa kɛ Yehowa wa kpɛti ɔ he jua wa saminya. Wa bɔ wa he mɔde wawɛɛ loko wa nyɛ hɛ kɛ su Yehowa he, enɛ ɔ he ɔ, e sɛ nɛ wa ha nɛ nɔ́ ko nɛ e puɛ huɛ bɔmi nɛ ngɛ waa kɛ Yehowa wa kpɛti ɔ.​—La 26:4.

16. Mɛni otihi nɛ e sa kaa o kɛ ma o hɛ mi?

¹⁶ Ngɔɔ otihi nɛ a he hia kɛ ma o hɛ mi. Ngɔɔ otihi nɛ maa wo o hemi kɛ yemi ɔ mi he wami nɛ ma ha nɛ o pee Kristofo no nɛ e nane pi si kɛ ma o hɛ mi. (Efe. 3:16) Kaa nɔ hyɛmi nɔ́ ɔ, o kɛ ma nyɛ maa pee oti kaa o maa kase ní ngɛ o dɛ he, nɛ́ o kane Baiblo ɔ daa ligbi. (La 1:2, 3) Jehanɛ hu ɔ, o kɛ ma nyɛ maa pee oti kaa o maa sɔle be fɛɛ be kɛ je o tsui mi. Eko ɔ, e he maa hia nɛ o hyɛ níhi nɛ o kɛ jeɔ o hɛja a saminya, nɛ o kɛ o be hu nɛ tsu ní saminya. (Efe. 5:15, 16) Ke Yehowa na kaa o ngɛ mɔde bɔe konɛ o ya o hɛ mi ɔ, e bua maa jɔ wawɛɛ.

17. Ke o ye bua ni kpahi ɔ, kɛ o ma ná he se ha kɛɛ?

 ¹⁷ Ke o ye kɛ bua nihi ɔ, lɔ ɔ ma ha nɛ o maa wa ngɛ mumi mi. Yesu de ke: “Bua jɔmi babauu ngɛ nɔ́ hami mi pe nɔ́ ngɔmi.” (Níts. 20:35) Ke o ngɔ o be kɛ o he wami kɛ ye bua ni kpahi ɔ, o ma ná bua jɔmi wawɛɛ. Kaa nɔ hyɛmi nɔ́ ɔ, o kɛ ma nyɛ maa pee oti kaa o maa ye bua nihi nɛ a wa ngɛ jeha mi loo nihi nɛ a be he wami nɛ a ngɛ o we asafo ɔ mi ɔ. Eko ɔ, o ma nyɛ ma ya he ní ha mɛ aloo o ma nyɛ maa ye bua mɛ konɛ a le bɔ nɛ a kɛ a fon loo tablɛti ɔmɛ ma tsu ní ha. Ke o ji nyumu ɔ, o kɛ ma nyɛ maa ma o hɛ mi kaa o maa pee asafo mi sɔmɔlɔ nɛ o kɛ ye bua nyɛmimɛ ɔmɛ. (Filip. 2:4) Blɔ kpa nɛ o ma nyɛ maa gu nɔ kɛ je suɔmi kpo ji kaa o maa fiɛɛ Matsɛ Yemi ɔ he sane kpakpa a kɛ tsɔɔ ni kpahi. (Mat. 9:36, 37) Nɛ ke e maa hi ɔ, o kɛ ma nyɛ maa pee oti ngɛ o si himi mi kaa o kɛ o he maa wo be tsuo sɔmɔmi ní tsumi ɔ mi.

18. Kɛ be tsuo sɔmɔmi ní tsumi ɔ maa ye bua mo ha kɛɛ konɛ o nyɛ nɛ o tsu babauu ngɛ Yehowa sɔmɔmi mi?

¹⁸ Ke o kɛ o he wo be tsuo sɔmɔmi ní tsumi ɔ mi ɔ, lɔ ɔ maa ye bua mo konɛ o ná he blɔhi fuu kɛ tsu babauu ngɛ Yehowa sɔmɔmi mi. Ke o ji blɔ gbalɔ ɔ, o ma nyɛ ma ná he blɔ kɛ ya Sukuu Kɛ Ha Matsɛ Yemi Sane Kpakpa Fiɛɛli ɔ eko. Jehanɛ se hu ɔ, o ma nyɛ ma ná he blɔ kɛ ya sɔmɔ ngɛ Betel aloo o ma nyɛ maa ye bua kɛ ma asafo ɔ tsuhi. Nyɛmiyo wayoo ko nɛ a tsɛɛ lɛ ke Kaitlyn nɛ e ji blɔ gbalɔ ɔ de ke: “Nyɛmimɛ nɛ a nane pi nɛ i kɛ mɛ yaa fiɛɛmi ɔ ye bua mi nɛ i hɛ kɛ su Yehowa he ngɛ ye baptisimi se. A nɔ hyɛmi nɔ́ ɔ ye kɛ bua mi nɛ i kase Baiblo ɔ wawɛɛ, nɛ i ya ye hɛ mi ngɛ ní tsɔɔmi mi.”

19. Ke o ya o hɛ mi ngɛ mumi mi ɔ, mɛni ji jɔɔmihi nɛ o ma ná?

¹⁹ Ke o ya o hɛ mi ngɛ mumi mi ɔ, Yehowa maa jɔɔ mo babauu. O be o be puɛe ngɛ níhi nɛ a he hia we tsɔ ɔ a he. (1 Yoh. 2:17) Enɛ ɔ ma ha nɛ o mwɔ yi mi kpɔhi nɛ da nɛ o be o he piae kɔkɔɔkɔ. Jehanɛ hu ɔ, o ma ná bua jɔmi nɛ o maa ye manye. (Abɛ 16:3) O nɔ hyɛmi nɔ́ kpakpa a maa wo nyɛmimɛ nyumuhi kɛ yihi tsuo he wami. (1 Tim. 4:12) Ke o ya nɔ nɛ o bu Yehowa tue nɛ o ha nɛ huɛ bɔmi nɛ ngɛ o kɛ lɛ nyɛ kpɛti ɔ mi wa a, lɔ ɔ ma ha nɛ o ma ná tue mi jɔmi kɛ bua jɔmi.​—Abɛ 23:15, 16.