1-2. Kaa bɔ nɛ wa na ngɛ Angelito níhi a si kpami ɔ mi ɔ, mɛni e sa nɛ wa ti nɔ fɛɛ nɔ nɛ pee?

O FƆLI ji Yehowa Odasefohi lo? Ke jã a, lɛɛ mo kadi kaa o be nyɛe maa pee Yehowa huɛ akɛnɛ o fɔli ɔmɛ ji Yehowa huɛmɛ ɔ he je. Ke wa fɔli ɔmɛ sɔmɔɔ Yehowa jio, a sɔmɔ we lɛ jio, e sa nɛ wa ti nɔ fɛɛ nɔ nɛ e ha nɛ huɛ bɔmi nɛ hi e kɛ Yehowa a kpɛti.

² Nyɛ ha nɛ wa susu nyɛminyumu ko nɛ a tsɛɛ lɛ Angelito níhi a si kpami he nɛ waa hyɛ. E je weku nɛ a sɔmɔɔ Yehowa mi. Se benɛ e wɛ ɔ, e nui he kaa huɛ bɔmi ko ngɛ e kɛ Mawu a kpɛti. E de ke, “I ngɛ Yehowa sɔmɔe akɛnɛ ye weku ɔ ngɛ lɛ sɔmɔe ɔ he je.” Se Angelito to kaa e maa ngɔ be babauu kɛ kane Baiblo ɔ, nɛ́ e pue e yi mi tɛ ngɛ he, nɛ e pee jã hulɔ. Jehanɛ hu ɔ, e bɔni sɔlemi ha Yehowa be fɛɛ be. Mɛni je mi kɛ ba? Angelito de ke, “I ba na kaa nɔ́ pɛ nɛ maa ye bua mi nɛ ma nyɛ ma hɛ kɛ su Yehowa nɛ ji ye Tsɛ nɛ ngɛ suɔmi ɔ he ji kaa imi nitsɛ ma le lɛ.” Angelito níhi a si kpami ɔ ha nɛ wa susuɔ sane bimi nɛ ɔmɛ a he: Mɛni slɔɔto nɛ ngɛ Yehowa he nile nɛ wa ma ná kɛ Yehowa nɛ wa maa le lɛ saminya a mi? Nɛ mɛni blɔ nɔ wa maa gu kɛ le Yehowa?

3. Mɛni slɔɔto lɛ ngɛ Yehowa he nile nɛ nɔ ko ma ná kɛ lemi nɛ nɔ ko maa le lɛ saminya a kpɛti?

³ Ke wa le Mawu biɛ, aloo wa le ní komɛ nɛ Mawu de aloo e pee ɔ, wa ma nyɛ ma de ke wa le Mawu. Se lɔ ɔ tsɔɔ we kaa wa le lɛ saminya. Ke wa suɔ nɛ waa le Yehowa saminya a, e sa nɛ wa he be kɛ kase e he ní, nɛ waa kase e su kpakpa amɛ a he ní. Ja jã loko wa maa nu nɔ́ he je nɛ e deɔ ní komɛ, nɛ́ e peeɔ ní komɛ ɔ a sisi. Nɛ lɔ ɔ maa ye bua wɔ  nɛ wa maa le kaa e bua jɔ wa susumihi, yi mi kpɔhi nɛ wa mwɔɔ, kɛ wa ní peepeehi a he loo e bua jɔɛ he. Ke wa le Yehowa suɔmi nya ní ɔ, e sa nɛ waa pee.

4. Kɛ Baiblo mi nɔ hyɛmi ní komɛ nɛ wa maa kase ɔ maa ye bua wɔ ha kɛɛ?

⁴ Ni komɛ maa ye wa he fɛu akɛnɛ wa suɔ nɛ wa sɔmɔ Yehowa a he je, nɛ ke waa kɛ Yehowa we bi bɔni bɔmi ɔ, eko ɔ, a maa te si kɛ wo wɔ. Se kɛ̃ ɔ, ke wa ngɔ wa hɛ kɛ fɔ Yehowa nɔ ɔ, e be wɔ kuae gblegbleegble. Lɔ ɔ mohu ma ha nɛ huɛ bɔmi nɛ ma nyɛ maa hi si kɛ ya neneene ma ba hi waa kɛ Mawu wa kpɛti. Anɛ wa ma nyɛ maa le Yehowa saminya lo? Ee. Nɔ hyɛmi nɔ́ nɛ Mose kɛ Matsɛ David nɛ a ji adesahi nɛ a yi mluku ɔ pee ɔ tsɔɔ kaa wa ma nyɛ maa pee jã. Ke wa ngɛ a sane ɔ he susue ɔ, wa maa na sane bimi enyɔ nɛ ɔmɛ a heto: Mɛni blɔ nɔ a gu kɛ le Yehowa? Nɛ mɛni wa ma nyɛ maa kase ngɛ a nɔ hyɛmi ní ɔmɛ a mi?

5. Mɛni nɛ Mose hla kaa e maa pee?

⁵ Mose kɛ níhi nɛ e kase ɔ tsu ní. Benɛ Mose ye jeha 40 ɔ, e hla kaa e kɛ Hebri bi, nɛ a ji Mawu we bi ɔ maa bɔ mohu pe nɛ nihi maa le lɛ kaa “Farao biyo ɔ binyumu.” (Heb. 11:24) Mose kua he blɔ ngua nɛ ɔ. Benɛ Mose fĩ Israel bi ɔmɛ nɛ ji Hebri bi ɔmɛ a se ɔ, e le kaa Farao mi mi ma fu wawɛɛ nitsɛ, ejakaa Farao ji matsɛ ko nɛ ngɛ he wami wawɛɛ, nɛ Ijipt bi ɔmɛ naa lɛ kaa e ji mawu, se Mose pee jã. Enɛ ɔ tsɔɔ kaa Mose ngɛ hemi kɛ yemi nɛ mi wa! Mose ngɔ e hɛ kɛ fɔ Yehowa nɔ. Hɛ kɛ nɔ fɔmi nɛ e ngɛ ngɛ Yehowa mi ɔ lɛ ha nɛ huɛ bɔmi kpakpa hi e kɛ Yehowa a kpɛti e wami be tsuo.​—Abɛ 3:5.

6. Mɛni wa ma nyɛ maa kase ngɛ Mose nɔ hyɛmi nɔ́ ɔ mi?

⁶ Mɛni wa kaseɔ ngɛ mi? Kaa bɔ nɛ Mose pee ɔ, e sa nɛ wɔ tsuo waa mwɔ yi mi kpɔ ko: Anɛ wa maa hla kaa wa ma sɔmɔ Mawu nɛ waa kɛ e we bi nɛ bɔ lo? Eko ɔ, e ma bi nɛ waa kɛ ní komɛ nɛ sã afɔle konɛ wa nyɛ nɛ wa sɔmɔ Mawu, nɛ eko ɔ, nihi nɛ a li Yehowa a hu maa te si kɛ wo wɔ. Se ke wa ngɔ wa hɛ kɛ fɔ wa hiɔwe Tsɛ ɔ nɔ ɔ, wa ma nyɛ ma ná nɔ mi mami kaa e maa ye bua wɔ!

7-8. Mɛni nɛ Mose ya nɔ nɛ e kase?

⁷ Mose ya nɔ nɛ e kase Yehowa su kpakpa amɛ a he ní nɛ e pee e suɔmi nya ní. Kaa nɔ hyɛmi nɔ́ ɔ, benɛ Yehowa de Mose kaa e ya nyɛɛ Israel bi ɔmɛ a hɛ mi kɛ je Ijipt ɔ, e he we e he yi, nɛ e de Yehowa si abɔ kaa e he sui. Se Mawu mi mi sa lɛ ngɛ Mose he, nɛ e ye bua lɛ. (2 Mose 4:10-16) Enɛ ɔ ye bua Mose nɛ e nyɛ nɛ e kɛ kojomi sɛ gbihi nɛ a nya wa ya ha Farao. Lɔ ɔ se ɔ, Mose na bɔ nɛ Yehowa kɛ e he wami ɔ tsu ní ha kɛ he Israel bi ɔmɛ a yi wami, nɛ́ e kpata Farao kɛ e ta buli ɔmɛ a hɛ mi ngɛ Wo Tsu ɔ mi ɔ.​—2 Mose 14:26-31; La 136:15.

⁸ Benɛ Mose nyɛɛ Israel bi ɔmɛ a hɛ mi kɛ je Ijipt se ɔ, Israel bi ɔmɛ tu níhi a he munyu nyanyaanya. Se kɛ̃ ɔ, Mose na bɔ nɛ Yehowa to e tsui si nɛ e kɛ Israel bi nɛ e ya kpɔ̃ mɛ ngɛ nyɔguɛ tso mi ɔ hi si ha. (La 78:40-43) Jehanɛ hu ɔ, Mose de Yehowa kaa e ko kpata Israel bi ɔmɛ a hɛ mi, nɛ niinɛ hu ɔ, Yehowa kpataa we a hɛ mi. Enɛ ɔ ha nɛ Mose na bɔ nɛ Yehowa baa e he si ha nitsɛnitsɛ.​—2 Mose 32:9-14.

9. Ngɛ Hebri Bi 11:27 ɔ nya a, kɛ huɛ bɔmi nɛ ngɛ Mose kɛ Yehowa a kpɛti ɔ mi wa ha kɛɛ?

⁹ Benɛ Israel bi ɔmɛ je Ijipt se ɔ, huɛ  bɔmi nɛ ngɛ Mose kɛ Yehowa a kpɛti ɔ mi ba wa wawɛɛ, nɛ e ba pee kaa nɔ́ nɛ Mose naa e hiɔwe Tsɛ ɔ hɛ mi kɛ hɛ mi. (Kane Hebri Bi 11:27.) Baiblo ɔ tsɔɔ bɔ nɛ huɛ bɔmi nɛ ngɛ Mose kɛ Yehowa a kpɛti ɔ mi wa ha. Baiblo ɔ de ke: ‘Yehowa kɛ Mose tu munyu hɛ mi kɛ hɛ mi kaa bɔ nɛ nɔ kɛ e huɛ tuɔ munyu ɔ.’​—2 Mose 33:11.

10. Ke wa maa le Yehowa saminya a, mɛni e sa nɛ waa pee?

¹⁰ Mɛni wa kaseɔ ngɛ mi? Ke wa maa le Yehowa saminya a, e ma bi nɛ waa kase e su kpakpa amɛ a he ní, nɛ́ waa pee e suɔmi nya ní hulɔ. Yehowa suɔmi nya ní ji kaa “a he nimli slɔɔtohi tsuo a yi wami nɛ a ba ná anɔkuale ɔ he nile nitsɛnitsɛ ɔ.” (1 Tim. 2:3, 4) Blɔ kake nɛ wa ma nyɛ maa gu nɔ kɛ pee Yehowa suɔmi nya ní ji kaa wa maa tsɔɔ nihi Yehowa he ní.

11. Ke wa ngɛ nihi Yehowa he ní tsɔɔe ɔ, kɛ lɔ ɔ haa nɛ wa leɔ lɛ saminya ha kɛɛ?

¹¹ Behi fuu ɔ, ke wa ngɛ nihi Yehowa he ní tsɔɔe ɔ, lɔ ɔ haa nɛ wɔ nitsɛmɛ hu wa leɔ Yehowa wawɛɛ. Kaa nɔ hyɛmi nɔ́ ɔ, ke Yehowa ye bua wɔ nɛ wa na tsui kpakpatsɛmɛ ɔ, lɔ ɔ haa nɛ wa naa heii kaa Yehowa mi mi sãa lɛ ngɛ nihi a he. (Yoh. 6:44; Níts. 13:48) Ke wa na kaa wa Baiblo kaseli pee tsakemihi ngɛ a si himi mi nɛ a wo su ehe ɔ, lɔ ɔ haa nɛ wa naa kaa Mawu Munyu ɔ ngɛ he wami. (Kol. 3:9, 10) Nɛ ke wa na bɔ nɛ Mawu haa nihi nɛ a ngɛ wa zugba kpɔ ɔ mi ɔ he blɔ slɔɔtohi konɛ a kɛ kase e he ní nɛ a he a yi wami ɔ, lɔ ɔ hu haa nɛ wa naa kaa e toɔ e tsui si.​—Rom. 10:13-15.

12. Ngɛ 2 Mose 33:13 ɔ nya a, mɛni nɛ Mose bi, nɛ mɛni he je?

¹² Mose na huɛ bɔmi nɛ ngɛ e kɛ Yehowa a kpɛti ɔ kaa nɔ́ ko nɛ he jua wa. Mawu ye bua Mose nɛ e pee ní nguanguahi mohu lɛɛ, se loloolo ɔ, Mose je bumi mi nɛ e bi Yehowa kaa e ha nɛ e le lɛ saminya. (Kane 2 Mose 33:13.) Benɛ Mose bi Yehowa nɔ́ nɛ ɔ, jamɛ a be ɔ mi ɔ, e ye jeha 80 kɛ se, se e le kaa loloolo ɔ, e sa nɛ e kase e hiɔwe Tsɛ ɔ he ní babauu.

13. Mɛni ji nɔ́ kake nɛ wa ma nyɛ maa pee kɛ tsɔɔ kaa wa naa huɛ bɔmi nɛ ngɛ waa kɛ Mawu wa kpɛti ɔ kaa e he jua wa?

¹³ Mɛni wa kaseɔ ngɛ mi? Wa ngɛ Yehowa sɔmɔe jehahi babauu jio, jehahi bɔɔ ko jio, e sɛ nɛ waa na huɛ bɔmi nɛ ngɛ waa kɛ Yehowa wa kpɛti ɔ kaa nɔ́ ko kɛkɛ. Nɔ́ kake nɛ wa ma nyɛ maa pee kɛ tsɔɔ kaa wa naa huɛ bɔmi nɛ ngɛ waa kɛ Mawu wa kpɛti ɔ kaa e he jua wa ji kaa waa kɛ lɛ maa sɛɛ ní ngɛ sɔlemi mi.

14. Mɛni he je nɛ sɔlemi yeɔ bua wɔ wawɛɛ konɛ wa nyɛ nɛ waa kase Mawu he ní babauu ɔ?

¹⁴ Ke huɛ bɔmi kpakpa maa hi o kɛ nɔ ko nyɛ kpɛti ɔ, jã nyɛ pɔɔ ní sɛɛmi. Lɔ ɔ he ɔ, ke o suɔ nɛ huɛ bɔmi kpakpa nɛ hi o kɛ Mawu nyɛ kpɛti ɔ, lɛɛ moo pɔ sɔlemi, nɛ o ko ye gbeye kaa o ma de lɛ o tsui mi sanehi tsuo. (Efe. 6:18) Nyɛmiyo ko nɛ a tsɛɛ lɛ ke Krista nɛ e ngɛ Turkey ɔ de ke: “Be fɛɛ be nɛ ma de Yehowa ye tsui mi sanehi nɛ ma na kaa e ye bua mi ɔ, e haa nɛ suɔmi nɛ i ngɛ kɛ ha lɛ ɔ mi waa, nɛ hɛ kɛ nɔ fɔmi nɛ i ngɛ ngɛ e mi ɔ hu mi waa. Bɔ nɛ Yehowa ha ye sɔlemihi a heto ha a yeɔ bua mi nɛ i naa lɛ kaa ye Tsɛ kɛ ye Huɛ.”

15. Kɛ Yehowa kale Matsɛ David ha kɛɛ?

¹⁵ A fɔ Matsɛ David ngɛ ma ko nɛ e mi bi ɔmɛ jaa Yehowa Mawu ɔ mi. Se pi jami nɛ David weku li ɔmɛ jaa Yehowa a he je nɛ lɛ hu e ja lɛ. Lɛ nitsɛ nɛ e ha nɛ huɛ  bɔmi hi e kɛ Mawu a kpɛti, nɛ Yehowa hu suɔ lɛ wawɛɛ nitsɛ. Yehowa nitsɛ de ngɛ David he kaa e ji “nyumu nɛ [e] tsui kplɛɛ e nɔ.” (Níts. 13:22) Mɛni ha nɛ huɛ bɔmi kpakpa hi David kɛ Yehowa a kpɛti ɔ?

16. Mɛni nɛ David kase ngɛ Yehowa he kɛ gu adebɔ níhi a nɔ?

¹⁶ David kase Yehowa he ní kɛ gu adebɔ níhi a nɔ. Benɛ David ji jokuɛyo ɔ, e kɛ be babauu hyɛɛ e tsɛ tohi a nɔ ngɛ nga nɔ. Eko ɔ, jamɛ a be ɔ nɛ e bɔni e yi mi tɛ puemi ngɛ Yehowa adebɔ ní ɔmɛ a he. Kaa nɔ hyɛmi nɔ́ ɔ, eko ɔ, ke David wo e yi nɔ gbɔkuɛ nɛ e hyɛ hiɔwe ɔ, e naa dodoehi akpehi abɔ. Se pi lɔ ɔ pɛ, eko ɔ, e susuɔ Nɔ nɛ bɔ dodoe nɛ ɔmɛ ɔ su kpakpa amɛ a he. Yehowa mumi ɔ ye bua David nɛ e ngma ke: “Mawu nibɔ níhi nɛ ngɛ hiɔwe ngɛ e yi jee, nɛ a ngɛ e nine nya ní tsumi kpo jee.” (La 19:1, 2) Benɛ David susu bɔ nɛ a bɔ adesahi ha a he ɔ, e na bɔ nɛ Yehowa le ní ha. (La 139:14) Benɛ e pue e yi mi tɛ ngɛ Yehowa ní tsumi ɔmɛ a he ɔ, e na kaa e ba si kulaa.​—La 139:6.

17. Ke wa pue wa yi mi tɛ ngɛ adebɔ níhi a he ɔ, mɛni wa ma nyɛ maa kase?

¹⁷ Mɛni wa kaseɔ ngɛ mi? Mo ná be kɛ hyɛ níhi nɛ a ngɛ fɛu nɛ Yehowa bɔ ɔ nɛ o bua nɛ jɔ a he! Daa ligbi ɔ, mo pue o yi mi tɛ ngɛ adebɔ níhi kaa tsohi, lohwehi kɛ nimli a he, ejakaa ní nɛ ɔmɛ maa ye bua mo nɛ o kase Yehowa he ní. Jã peemi ma ha nɛ daa ligbi ɔ, o kase o Tsɛ nɛ ngɛ suɔmi ɔ he ní babauu. (Rom. 1:20) Nɛ suɔmi nɛ o ngɛ kɛ ha lɛ ɔ mi maa hi wae daa ligbi.

18. Ngɛ La 18 ɔ nya a, mɛni nɛ David yɔse?

¹⁸ David yɔse kaa Yehowa ngɛ lɛ ye buae. Kaa nɔ hyɛmi nɔ́ ɔ, benɛ David po e tsɛ to ɔmɛ a he piɛ ngɛ jata kɛ osisiblisi he ɔ, David yɔse kaa Yehowa lɛ ye bua lɛ kɛ gbe lohwe awi yeli enyɔ nɛ ɔmɛ. Benɛ David gbe Goliat nɛ e ji oblai ɔ, e na heii kaa Yehowa lɛ ngɛ lɛ blɔ tsɔɔe. (1 Sam. 17:37) Nɛ benɛ e tu Matsɛ Saul nɛ e ngɛ e he hunga jee ɔ nya fo ɔ, e na kaa Yehowa lɛ he e yi wami. (La 18) Kaa David woɔ e he nɔ ɔ, jinɛ e ko susu kaa lɛ nitsɛ e he wami nya nɛ e pee ní nɛ ɔmɛ. Se David baa e he si, lɔ ɔ he ɔ, e nyɛ nɛ e yɔse kaa Yehowa nine ngɛ nɔ́ ɔ mi.​—La 138:6.

19. Mɛni wa ma nyɛ maa kase ngɛ David nɔ hyɛmi nɔ́ ɔ mi?

¹⁹ Mɛni wa kaseɔ ngɛ mi? Bimi nɛ wa ma bi Yehowa kaa e ye bua wɔ ɔ kɛkɛ pi, e sa nɛ waa pee babauu pe jã. E sa nɛ waa bɔ mɔde nɛ waa le be nɛ e yeɔ bua wɔ, kɛ blɔ nɔ nɛ e guɔ kɛ peeɔ jã a hulɔ. Ke wa ba wa he si, nɛ wa nu sisi kaa wa be nyɛe maa pee nɔ́ fɛɛ nɔ́ ɔ, lɔ ɔ ma ha nɛ waa na kaa Yehowa peeɔ níhi nɛ wa nyɛ we peemi ɔ kɛ haa wɔ. Nɛ be fɛɛ be nɛ wa maa na kaa Yehowa ye bua wɔ ngɛ nɔ́ ko mi ɔ, lɔ ɔ haa nɛ huɛ bɔmi nɛ ngɛ waa kɛ lɛ wa kpɛti ɔ mi waa. Nyɛminyumu ko nɛ a tsɛɛ lɛ ke Isaac nɛ e ngɛ Fiji nɛ e ngɛ Yehowa sɔmɔe jehahi babauu ji nɛ ɔ naa munyu nɛ ɔ kaa e ji anɔkuale. E de ke: “Ke i hyɛ níhi nɛ ya nɔ ngɛ ye si himi mi ɔ, i naa bɔ nɛ Yehowa ye bua mi ha kɛ je benɛ i bɔni Baiblo ɔ kasemi kɛ ba si amlɔ nɛ ɔ. Enɛ ɔ he ɔ, i naa kaa i hɛ kɛ su Yehowa he wawɛɛ.”

20. Mɛni wa ma nyɛ maa kase ngɛ huɛ bɔmi kpakpa nɛ ngɛ David kɛ Mawu a kpɛti ɔ mi?

²⁰ David kase Yehowa su ɔmɛ. Benɛ Yehowa bɔ wɔ ɔ, e ha wɔ nyɛmi nɛ ma ha nɛ waa kase e su ɔmɛ. (1 Mose 1:26) Ke wa ya nɔ nɛ wa kase Yehowa su ɔmɛ a he ní ɔ, lɔ ɔ maa ye bua wɔ konɛ waa ya nɔ nɛ waa  kase lɛ saminya. Akɛnɛ David le e hiɔwe Tsɛ ɔ saminya he je ɔ, e nyɛ nɛ e je Yehowa su ɔmɛ kpo ngɛ bɔ nɛ e kɛ ni kpahi hi si ha a mi. Nyɛ ha nɛ waa hyɛ nɔ hyɛmi nɔ́ kake. David pee yayami kɛ si Yehowa benɛ e kɛ Batsheba puɛ gba, nɛ e ha nɛ a gbe Batsheba huno ɔ. (2 Sam. 11:1-4, 15) Se akɛnɛ David ji nɔ ko nɛ e naa ni kpahi mɔbɔ he je ɔ, Yehowa hu na lɛ mɔbɔ. Akɛnɛ huɛ bɔmi kpakpa ngɛ David kɛ Yehowa a kpɛti he je ɔ, Israel bi ɔmɛ ba suɔ e sane wawɛɛ. Nɛ Yehowa hu na lɛ kaa nɔ ko nɛ e pee nɔ hyɛmi nɔ́ kpakpa nɛ e sa kaa Israel matsɛmɛ kpahi nɛ a kase lɛ.​—1 Ma. 15:11; 2 Ma. 14:1-3.

21. Kaa bɔ nɛ Efeso Bi 4:24 kɛ 5:1 ɔ tsɔɔ ɔ, ke wa ‘kase Mawu’ ɔ, mɛni se wa ma ná?

²¹ Mɛni wa kaseɔ ngɛ mi? E sa nɛ waa ‘kase Mawu.’ Ke wa pee jã a, wa náa he se. Se pi lɔ ɔ pɛ, e haa nɛ wa leɔ Mawu hulɔ. Ke wa kase Mawu su kpakpa amɛ ɔ, lɔ ɔ hu tsɔɔ kaa wa ji e bimɛ.​—Kane Efeso Bi 4:24; 5:1.

22-23. Ke waa kɛ níhi nɛ wa kase ngɛ Yehowa he ɔ tsu ní ɔ, mɛni maa je mi kɛ ba?

²² Kaa bɔ nɛ wa sɛ hlami na a, wa ma nyɛ maa kase Yehowa he ní kɛ gu adebɔ níhi kɛ e Munyu nɛ ji Baiblo ɔ nɔ. Baiblo ɔ tu nɔ hyɛmi ní kpakpahi nɛ Mawu sɔmɔli anɔkualetsɛmɛ kaa Mose kɛ David kɛ ni kpahi pee nɛ wa ma nyɛ maa kase ɔ he munyu. Yehowa pee e blɔ fa mi nɔ́ kɛ ye bua wɔ. E sa nɛ wɔ hu waa bɔ mɔde nɛ waa kase e he ní bɔ nɛ wa ma nyɛ.

²³ Wa maa ya nɔ maa kase Yehowa he ní daa. (Fiɛlɔ 3:11) Se oti ɔ ji, pi níhi abɔ nɛ wa le ngɛ Yehowa he ɔ nɛ he hia, se mohu ɔ, nɔ́ nɛ waa kɛ níhi nɛ wa le ɔ tsuɔ ɔ lɛ hia. Ke waa kɛ níhi nɛ wa le ɔ tsu ní, nɛ wa bɔ mɔde kaa wa maa kase wa Tsɛ nɛ ngɛ suɔmi ɔ, e maa ya nɔ maa hɛ kɛ su wa he. (Yak. 4:8) Mawu ha nɛ wa ná nɔ mi mami kɛ gu e Munyu ɔ nɔ kaa e be nihi nɛ a ngɛ e se blɔ hlae ɔ kuae gblegbleegble.