1. Mɛni nɛ Yehowa kɛ wo fɔli a dɛ?

YEHOWA bɔ Adam kɛ Hawa kɛ suɔmi ɔ kaa a fɔ bimɛ. Baiblo ɔ de ke: ‘Bimɛ ji weto ní nɛ Yehowa haa nɔ.’ (La 127:3) Mɛni enɛ ɔ tsɔɔ? Ngɔɔ lɛ kaa o huɛ ko nɛ nyu bi ngɛ o kɛ lɛ nyɛ kpɛti ha mo sika fuu ko ke o hyɛ nɔ ha lɛ. Kɛ o maa nu he ha kɛɛ? Eko ɔ, o bua maa jɔ kaa e he mo ye. Se eko ɔ, o maa ye tsui ngɛ blɔ nɔ nɛ o maa gu kɛ hyɛ sika a nɔ saminya konɛ e ko laa a he. Yehowa nɛ ji wa huɛ nitsɛ pe kulaa a ha fɔli nɔ́ ko nɛ he jua wa kulaa pe sika kaa a hyɛ nɔ. E ha fɔli ní tsumi kaa a hyɛ a bimɛ a nɔ saminya, nɛ a ha nɛ a bua nɛ jɔ.

2. Mɛni sane bimihi nɛ wa ma susu a he?

² Mɛnɔ nɛ e sa nɛ e mwɔ yi kpɔ ke ji huno ko kɛ e yo ma fɔ? Nɛ mɛnɔ nɛ e sa nɛ e tsɔɔ be nɛ a fɔ? Mɛni fɔli ma nyɛ maa pee kɛ ye bua a bimɛ konɛ a ná si himi kpakpa? Nyɛ ha nɛ wa susu sisi tomi mlaa ko nɛ ngɛ Mawu Munyu ɔ mi ɔ he nɛ waa hyɛ. E ma nyɛ maa ye bua Kristofohi nɛ a sɛ gba si himi mi ɔ konɛ a mwɔ yi mi kpɔ nɛ da.

3. (a) Ke nyumu kɛ yo sɛ gba si himi mi ɔ, mɛnɔmɛ nɛ e sa nɛ a mwɔ yi mi kpɔ kaa a fɔ loo a ko fɔ? (b) Mɛni Baiblo sisi tomi mlaa nɛ e sa kaa nihi nɛ a sɛ gba si himi mi ɔ a huɛmɛ kɛ a weku li nɛ a kai?

³ Ngɛ ma komɛ a nɔ ɔ, ke nyumu kɛ yo sɛ gba si himi mi ehe ɔ, nihi fuu hyɛɛ blɔ kaa a maa je fɔmi sisi nɔuu. Eko ɔ, a weku li kɛ ni kpahi maa bɔ mɔde kaa a maa nyɛ a nɔ kaa a fɔ. Nyɛminyumu ko nɛ a tsɛɛ lɛ ke Jethro nɛ e ngɛ Asia a  de ke, “Ni komɛ nɛ a ngɛ bimɛ ngɛ asafo ɔ mi ɔ nyɛɔ nyumu kɛ yo nɛ a sɛ gba si himi mi ehe ɔ a nɔ kaa a fɔ bimɛ.” Jeffrey nɛ lɛ hu e ngɛ Asia a de ke, “Ni komɛ deɔ nyumu kɛ yo nɛ a sɛ gba si himi mi ehe ɔ kaa ke a fɔ we, nɛ a bwɔ ɔ, a be nɔ ko nae nɛ maa hyɛ a nɔ.” Se nihi nɛ a sɛ gba si himi mi ɔ nɛ e sa nɛ a mwɔ a yi mi kpɔ kaa a ma fɔ loo a be fɔe. A blɔ nya ní tsumi ji lɔ ɔ nɛ. (Gal. 6:5, sisi ningma) Ngɛ anɔkuale mi ɔ, nyumu kɛ yo nɛ a sɛ gba si himi mi ɔ, a weku li kɛ a huɛmɛ suɔ nɛ a bua nɛ jɔ. Se e sa nɛ weku li kɛ huɛmɛ nɛ ɔmɛ nɛ a kai kaa nihi nɛ a sɛ gba si himi mi ɔ pɛ nɛ e sa nɛ a mwɔ a yi mi kpɔ kaa a ma fɔ loo a be fɔe.​—1 Tɛs. 4:11.

4-5. Mɛni níhi enyɔ e sa kaa nyumu kɛ yo nɛ a sɛ gba si himi mi ɔ nɛ a susu he, nɛ mɛni be nɛ e sa kaa a susu jamɛ a ní ɔmɛ a he? Moo tsɔɔ nya.

⁴ Ke nyumu kɛ yo nɛ a sɛ gba si himi mi ɔ to kaa a ma fɔ bimɛ ɔ, e sa nɛ a susu sane bimi enyɔ nɛ a he hia nɛ ɔmɛ a he: Kekleekle ɔ, mɛni be nɛ a suɔ kaa a fɔ bimɛ? Enyɔne ɔ, bimɛ enyɛmɛ nɛ a suɔ nɛ a fɔ? Mɛni be nɛ e sa kaa nihi nɛ a sɛ gba si himi mi ɔ nɛ a susu sane bimi nɛ ɔmɛ a he? Nɛ mɛni he je nɛ sane bimi enyɔ nɛ ɔmɛ a he hia?

⁵ Behi fuu ɔ, e sa nɛ nyumu kɛ yo nɛ a suɔ nɛ a sɛ gba si himi mi ɔ nɛ a susu bi fɔmi he loko a sɛ gba si himi mi. Mɛni he je? Ejakaa e he hia wawɛɛ kaa ni enyɔ ɔmɛ tsuo a juɛmi nɛ pee kake ngɛ munyu nɛ ɔ he. Jehanɛ hu ɔ, e sa nɛ a hyɛ kaa a ma nyɛ ma tsu blɔ nya ní tsumi nɛ ɔ he ní lo. Nyumuhi kɛ yi komɛ hu nɛ a sɛ gba si himi mi ɔ to kaa a maa mlɛ maa pee jeha kake loo enyɔ loko a fɔ bimɛ, ejakaa ke a ná nɛ a fɔ pɛ ɔ, e ma bi nɛ a ná be babauu kɛ hyɛ jokuɛ ɔmɛ a nɔ. A susuɔ kaa lɔ ɔ ma ha nɛ a ná be kɛ ha a he nɛ a le a sibi saminya.​—Efe. 5:33.

6. Akɛnɛ wa ngɛ behi nɛ a mi wa mi he je ɔ, mɛni yi mi kpɔ nɛ hunohi kɛ yigbayi komɛ mwɔ?

⁶ Kristofohi komɛ hla kaa a maa kase nɔ hyɛmi nɔ́ nɛ Noa binyumu etɛ ɔmɛ kɛ a yi ɔmɛ pee ɔ. Benɛ Noa binyumu ɔmɛ sɛ gba si himi mi ɔ, a fɔ we amlɔ nɔuu. (1 Mose 6:18; 9:18, 19; 10:1; 2 Pet. 2:5) Yesu ngɔ wa be nɛ ɔ kɛ to “Noa ligbi ɔmɛ” a he, nɛ atsinyɛ jemi ko be he kaa wa ngɛ “behi nɛ a mi wa nɛ a nya dami [yee]” ɔ mi. (Mat. 24:37; 2 Tim. 3:1) Enɛ ɔ he ɔ, hunohi kɛ yigbayi komɛ to kaa a maa tsɛ̃ bi fɔmi kɛ ya se konɛ a ná be fuu kɛ tsu fiɛɛmi ní tsumi ɔ.

7. Kɛ sisi tomi mlaa nɛ ngɛ Luka 14:28, 29 kɛ Abɛ 21:5 ɔ maa ye bua nyumu kɛ yo nɛ a sɛ gba si himi mi ɔ ha kɛɛ?

 ⁷ Ke nihi nɛ a sɛ gba si himi mi ɔ to kaa a ma fɔ, nɛ a ngɛ bimɛ abɔ nɛ a ma fɔ ɔ he susue ɔ, nyumu kɛ yo nɛ a le ní ɔ hiɔ si nɛ a ‘buu nya’ nɛ a hyɛɛ kaa a ma nyɛ maa hyɛ mɛ lo. (Kane Luka 14:28, 29.) Fɔli komɛ nɛ a kɛ be babauu tsɔse a bimɛ ɔ tsɔɔ kaa bimɛ a tsɔsemi biɔ sika. Se pi lɔ ɔ pɛ, e biɔ be kɛ he wami hulɔ. Enɛ ɔ he ɔ, e he hia nɛ nihi nɛ a sɛ gba si himi mi ɔ nɛ a susu sane bimihi nɛ nyɛɛ se nɛ ɔmɛ a he: ‘Anɛ wɔ ni enyɔ ɔmɛ tsuo wa ma tsu ní kɛ hyɛ weku ɔ nɔ lo? Anɛ wɔ tsuo wa hɛɛ juɛmi kake ngɛ níhi nɛ wa weku ɔ hia a he lo? Ke wɔ tsuo wa ma tsu ní ɔ, lɛɛ mɛnɔ nɛ maa hyɛ wa bimɛ ɔmɛ a nɔ? Mɛnɔ lɛ wa suɔ kaa e ná jokuɛ ɔmɛ a susumi kɛ a ní peepeehi a nɔ he wami?’ Ke nyumu kɛ yo nɛ a sɛ gba si himi mi ɔ susu sane bimi nɛ ɔmɛ a he ɔ, lɔ ɔ tsɔɔ kaa a kɛ munyuhi nɛ ngɛ Abɛ 21:5 ɔ (Kane.) ngɛ ní tsue.

8. Mɛni nyagbahi nɛ e sa kaa nihi nɛ a sɛ gba si himi mi ɔ nɛ a hyɛ blɔ, nɛ mɛni nɛ nyumu nɛ suɔ e yo ɔ maa pee?

⁸ E sa nɛ tsɛ ɔ kɛ nyɛ ɔ tsuo nɛ a ná be kɛ ha a bi ɔ, nɛ́ a kɛ a he wami tsuo nɛ ye bua lɛ. Lɔ ɔ he ɔ, ke e ba kaa fɔli ɔmɛ fɔ a bimɛ ɔmɛ a se mlamlaamla a, eko ɔ, e he maa wa ha fɔli ɔmɛ kaa a ma ná be kɛ ha jokuɛ ɔmɛ tsuo. Fɔli komɛ nɛ a ngɛ bimɛ fuu ɔ tsɔɔ kaa a na we lɛ gbɔjɔɔ. Nɛ eko ɔ, binyɛmɛ komɛ po ná we be kɛ jɔɔ a he. Pɔ tɔɔ a he wawɛɛ nitsɛ, enɛ ɔ he ɔ, a nyɛ we nɛ a kaseɔ ní, a nyɛ we nɛ a sɔleɔ, nɛ a nyɛ we nɛ a kɛ a he woɔ fiɛɛmi ní tsumi ɔ mi be fɛɛ be. Nyagba kpa ko hu nɛ a kɛ kpeɔ ji kaa ke a ya asafo mi kpe ɔ, a nyɛ we nɛ a buɔ ní peemi ɔ tue saminya konɛ a ná he se. Se huno nɛ suɔ e yo ɔ maa bɔ mɔde kaa e maa ye bua e yo ɔ kɛ hyɛ jokuɛ ɔmɛ a nɔ ngɛ Matsɛ Yemi Asa a nɔ kɛ we mi tsuo. Kaa nɔ hyɛmi nɔ́ ɔ, e ma nyɛ maa ye bua e yo ɔ kɛ tsu we mi ní tsumihi. E maa bɔ mɔde wawɛɛ kaa e ma ha nɛ a pee Weku Mawu Jami be fɛɛ be. Nɛ e kɛ e weku ɔ ma bla kɛ ya fiɛɛmi be fɛɛ be.

9-10. Mɛni nɛ e he hia nɛ fɔli nɛ a pee konɛ a nyɛ nɛ a ye bua a bimɛ?

⁹ Mɛni ji ní komɛ nɛ fɔli ma nyɛ maa pee kɛ ye bua a bimɛ konɛ a suɔ Yehowa? Mɛni fɔli ma nyɛ maa pee kɛ po a bimɛ a he piɛ ngɛ je mi bami yaya he? Nyɛ ha nɛ wa susu ní komɛ nɛ fɔli ma nyɛ maa pee ɔ he.

 ¹⁰ Nyɛɛ sɔle kɛ bi Yehowa yemi kɛ buami. Mo susu nɔ hyɛmi nɔ́ kpakpa nɛ Samson fɔli nɛ ji Manoa kɛ e yo ɔ pee ɔ he nɛ o hyɛ. Benɛ Manoa ná le kaa e yo ɔ hɛɛ hɔ ɔ, e kpa Yehowa pɛɛ konɛ e tsɔɔ mɛ blɔ nɔ nɛ a maa gu kɛ tsɔse a bi ɔ.

11. Kaa bɔ nɛ a tsɔɔ ngɛ Manyadali 13:8 ɔ, mɛni blɔ nɔ fɔli maa gu kɛ kase Manoa nɔ hyɛmi nɔ́ ɔ?

¹¹ Nihad kɛ e yo Alma nɛ a je Bosnia and Herzegovina a kase nɔ́ ko ngɛ Manoa nɔ hyɛmi nɔ́ ɔ mi. A de ke: “Kaa bɔ nɛ Manoa pee ɔ, wɔ hu wa kpa Yehowa pɛɛ nɛ e tsɔɔ wɔ nɔ́ nɛ wa maa pee konɛ waa pee fɔli kpakpa. Nɛ Yehowa gu Ngmami ɔ, Baiblo kasemi níhi, asafo mi kpehi kɛ kpokpa nɔ kpehi a nɔ kɛ ha wa sɔlemi ɔ heto.”​—Kane Manyadali 13:8.

12. Mɛni nɔ hyɛmi nɔ́ nɛ Yosɛf kɛ Maria pee ha a bimɛ ɔmɛ?

¹² Nyɛɛ pee nɔ hyɛmi nɔ́ kpakpa. O ní peepee ma nyɛ ma ná o bimɛ a nɔ he wami wawɛɛ pe o munyu tutui. Wa ma nyɛ ma de ke Yosɛf kɛ Maria pee nɔ hyɛmi nɔ́ kpakpa kɛ ha Yesu kɛ a bimɛ kpa amɛ. Yosɛf tsu ní wawɛɛ kɛ hyɛ e weku ɔ nɔ. Se pi lɔ ɔ pɛ, e ye bua mɛ konɛ a bua nɛ jɔ mumi mi níhi a he. (5 Mose 4:9, 10) E ngɛ mi kaa Mlaa a tsɔɔ we kaa “daa jeha a,” e sa nɛ e kɛ e weku ɔ nɛ ya Yerusalɛm nɛ a ya ye He Tsɔmi gbijlɔ ɔ mohu lɛɛ, se e pee jã. (Luka 2:41, 42) Eko ɔ, bitsɛmɛ komɛ nɛ a hi si ngɛ jamɛ a be ɔ mi ɔ susu kaa blɔ hiami kaa jã a ma ha nɛ pɔ maa tɔ a weku ɔ he, nɛ e maa ngɔ a be fuu kɛ a sika hulɔ. Se e ngɛ heii kaa Yosɛf bua jɔ mumi mi níhi a he, nɛ e ye bua e bimɛ ɔmɛ, nɛ mɛ hu a pee jã. Maria hu le Ngmami ɔ mi saminya. E kɛ e munyu tutui kɛ e ní peepee tsɔɔ e bimɛ ɔmɛ kaa a bua nɛ jɔ Mawu Munyu ɔ he.

13. Ngɛ mɛni blɔ nɔ nɛ fɔli komɛ kase Yosɛf kɛ Maria a nɔ hyɛmi nɔ́ ɔ?

¹³ Nihad kɛ Alma nɛ wa tu a he munyu kɛ sɛ hlami ɔ suɔ kaa a kase Yosɛf kɛ Maria a nɔ hyɛmi nɔ́ ɔ. Ngɛ mɛni blɔ nɔ nɛ lɔ ɔ ye bua mɛ nɛ a nyɛ nɛ a tsɔse a binyumu ɔ konɛ e suɔ Yehowa nɛ e ja lɛ? A de ke, “Waa kɛ wa je mi bami tsɔɔ wa binyumu ɔ se nami nɛ ngɛ Yehowa sisi tomi mlaahi nɛ nɔ ko kɛ ma tsu ní ɔ he.” Nihad de ke, “Moo ba o je mi kaa bɔ nɛ o suɔ nɛ o bi ɔ nɛ ba e je mi ɔ.”

14. Mɛni he je nɛ e sa kaa fɔli nɛ a le nihi nɛ a bimɛ kɛ ngɛ bɔe ɔ?

¹⁴ Nyɛɛ ye bua nyɛ bimɛ ɔmɛ konɛ a hla huɛmɛ kpakpahi. E sa nɛ binyɛ ɔ kɛ bitsɛ ɔ tsuo nɛ a le nihi nɛ a bimɛ ɔmɛ kɛ ngɛ bɔe kɛ nɔ́ nɛ a ngɛ pee. Enɛ ɔ biɔ nɛ fɔli nɛ a le nihi nɛ a bimɛ ɔmɛ kɛ sɛɛɔ ní ngɛ Intanɛti ɔ kɛ mobile fon nɔ. Jamɛ a huɛ bɔmi ɔ ma nyɛ ma ná o bimɛ ɔmɛ a susumi kɛ a ní peepee nɔ he wami.​—1 Kor. 15:33.

15. Mɛni nɛ fɔli ma nyɛ maa kase ngɛ Jessie nɔ hyɛmi nɔ́ ɔ mi?

¹⁵ Ke fɔli li bɔ nɛ a kɛ kɔmpiuta kɛ mobile fon tsuɔ ní ha saminya po ɔ, mɛni a ma nyɛ maa pee? Bitsɛ ko nɛ a tsɛɛ lɛ ke Jessie nɛ e ngɛ Philippines ɔ de ke: “Wa li bɔ nɛ a kɛ kɔmpiuta klamahi tsuɔ ní ha saminya. Se kɛ̃ ɔ, wa nyɛ nɛ wa tsɔɔ wa bimɛ ɔmɛ oslaahi nɛ ngɛ kɔmpiuta klamahi kɛ ní tsumi he.” E ngɛ mi kaa Jessie li bɔ nɛ a kɛ kɔmpiuta klamahi tsuɔ ní kpakpa ko mohu lɛɛ, se e tsi we e bimɛ ɔmɛ a nya kaa a ko ngɔ kɛ tsu ní. E de ke: “I woɔ ye bimɛ ɔmɛ he wami kaa a kɛ kɔmpiuta klama amɛ nɛ kase gbi kpa, a kɛ dla a he kɛ ha asafo mi kpe, nɛ a kɛ kane Baiblo ɔ be fɛɛ be.” Ke o ji fɔlɔ ɔ, anɛ o kane ga womi nɛ a kɛ ha  ngɛ sɛ gbi kɛ fonihi nɛ a kɛ maneɔ ngɛ Intanɛti ɔ nɔ nɛ ngɛ “Nihewi Kɛ Yihewi” blɔ he ɔ ngɛ jw.org^® ɔ, nɛ o kɛ o bimɛ susu he lo? Anɛ o kɛ mɛ susu videohi nɛ ji O Fon Kɛ O Tablɛti Ɔmɛ Lɛ Kudɔɔ Mo Loo Mo Nɛ O Kudɔɔ Mɛ? kɛ O Kɛ Intanɛti Nɔ Huɛ Bɔmi Hehi Nɛ Tsu Ní Ngɛ Nile Mi ɔ he lo? * Ke o ngɛ o bimɛ ɔmɛ bɔ nɛ a kɛ kɔmpiuta klamahi ma tsu ní ha a tsɔɔe ɔ, ní nɛ ɔmɛ maa ye bua wawɛɛ.​—Abɛ 13:20.

16. Mɛni nɛ fɔli fuu pee, nɛ mɛni je mi kɛ ba?

¹⁶ Fɔli fuu bɔɔ mɔde kaa a maa to blɔ nya konɛ a bimɛ nɛ a kɛ Mawu sɔmɔli nɛ a peeɔ nɔ hyɛmi nɔ́ kpakpa a nɛ bɔ. Kaa nɔ hyɛmi nɔ́ ɔ, behi fuu ɔ, N’Déni kɛ e yo Bomine nɛ a ngɛ Côte d’Ivoire haa nɛ kpɔ mi nɔ hyɛlɔ ɔ ba hiɔ a we ɔ mi. N’Déni de ke: “Enɛ ɔ ye bua wa binyumu ɔ nɛ e je blɔ gbami ní tsumi ɔ sisi, nɛ amlɔ nɛ ɔ, e ngɛ sɔmɔe kaa kpɔ mi nɔ hyɛlɔ nane mi dalɔ.” Anɛ o ma nyɛ maa to blɔ nya ko kaa jã kɛ ha o bimɛ lo?

17-18. Mɛni be nɛ e sa nɛ fɔli nɛ a bɔni a bimɛ tsɔsemi?

¹⁷ Nyɛɛ je bimɛ ɔmɛ a tsɔsemi sisi mla. Ke fɔli je a bimɛ a tsɔsemi sisi mla a, e maa ye bua wawɛɛ nitsɛ. (Abɛ 22:6) Nyɛ ha nɛ wa susu Timoteo nɛ pee se ɔ e kɛ Paulo hia blɔ ɔ he nɛ waa hyɛ. Timoteo yayo Yunis kɛ e na Lɔis tsɔse lɛ “kɛ je [e] bimwɔyo mi tɔɔ.”​—2 Tim. 1:5; 3:15.

¹⁸ Jean-Claude kɛ e yo Peace nɛ mɛ hu a ngɛ Côte d’Ivoire a nyɛ nɛ a tsɔse a bimɛ ekpa amɛ tsuo nɛ a suɔ Yehowa, nɛ a ngɛ lɛ sɔmɔe. Mɛni lɛ ye bua mɛ nɛ a ye manye? A kase Yunis kɛ Lɔis a nɔ hyɛmi nɔ́ ɔ. A de ke, “Wa bɔni wa bimɛ ɔmɛ Mawu Munyu ɔ tsɔɔmi kɛ je a bimwɔyo mi.”​—5 Mose 6:6, 7.

19. Ke a ke fɔli nɛ a tsɔɔ a bimɛ Mawu Munyu ɔ, mɛni e tsɔɔ?

¹⁹ Ke a ke nyɛɛ “tsɔɔ” nyɛ bimɛ Yehowa Munyu ɔ, mɛni e tsɔɔ? E tsɔɔ kaa nyɛ maa tsɔɔ mɛ ní, nɛ́ nyɛɛ tĩ mi si abɔ konɛ a hɛ ko je nɔ. Loko fɔli ma nyɛ maa pee jã a, ja a ná be fuu kɛ ha a bimɛ ɔmɛ. Be komɛ ɔ, fɔli a kɔni mi ma nyɛ ma jɔ̃ ke e ba kaa a ngɛ nɔ́ kake mi tie kpamisaa kɛ  tsɔɔ a bimɛ. Se e sa nɛ fɔli nɛ a nu sisi kaa enɛ ɔ lɛ maa ye bua a bimɛ ɔmɛ konɛ a nu Mawu Munyu ɔ sisi nɛ a kɛ tsu ní.

20. Moo tsɔɔ bɔ nɛ fɔli kɛ La 127:4 ɔ ma nyɛ ma tsu ní ha ke a ngɛ a bimɛ tsɔsee.

²⁰ Nyɛɛ kɛ hɛ si kami nɛ tsu ní. La 127 ɔ ngɔ bimɛ kɛ to kɛ̃ɛ̃ mi bihi a he. (Kane La 127:4.) Kaa bɔ nɛ e slo kɛ̃ɛ̃ mi bi fɛɛ kɛ̃ɛ̃ mi bi kɛ e klemi kɛ níhi nɛ a kɛ pee ɔ, jã nɔuu kɛ̃ nɛ jokuɛ fɛɛ jokuɛ je ekpa. Enɛ ɔ he ɔ, e sa nɛ fɔli nɛ a le bɔ nɛ a ma tsɔse a bimɛ ɔmɛ a ti nɔ fɛɛ nɔ ha. Fɔli komɛ nɛ a ngɛ wa be nɛ ɔ mi Israel nɛ a nyɛ nɛ a tsɔse a bimɛ enyɔ nɛ a ngɛ Yehowa sɔmɔe ɔ tsɔɔ nɔ́ nɛ ye bua mɛ. A de ke, “Waa kɛ wa bimɛ ɔmɛ kaseɔ Baiblo ɔ ngɛ be ekpaekpa mi.” Se weku yi fɛɛ weku yi maa hyɛ nɔ́ nɛ maa ye bua e bimɛ ɔmɛ.

21. Mɛni yemi kɛ buami nɛ fɔli ma nyɛ maa hyɛ blɔ kaa Yehowa kɛ ma ha mɛ?

²¹ Be komɛ ɔ, nyagbahi nɛ fɔli kɛ kpeɔ ɔ ma nyɛ ma ha nɛ bimɛ ɔmɛ a tsɔsemi he nɛ wa ha mɛ. Se bimɛ ji nike ní nɛ je Yehowa ngɔ, enɛ ɔ he ɔ, Yehowa pee klaalo kaa e maa ye bua fɔli. E buɔ fɔli a sɔlemi tue. E guɔ Baiblo ɔ, asafo womihi, kɛ fɔli kpahi nɛ a ngɛ asafo ɔ mi ɔ a nɔ hyɛmi nɔ́ kpakpa kɛ a ga womi nɔ kɛ haa a sɔlemihi a heto.

22. Mɛni ji ní kpakpahi nɛ fɔli kɛ ma nyɛ ma ha a bimɛ ɔ ekomɛ?

²² A deɔ ke bimɛ a tsɔsemi ji jeha 20 ní tsumi. Se ngɛ anɔkuale mi ɔ, fɔli a ní tsumi bɛ nyagbe gblee. Ní kpakpahi nɛ fɔli kɛ ma nyɛ ma ha a bimɛ ɔ ekomɛ ji suɔmi kpo nɛ a ma je kɛ tsɔɔ mɛ, be nɛ a ma ná kɛ ha mɛ, kɛ Baiblo ɔ nɛ a kɛ ma tsɔse mɛ. E slo bɔ nɛ jokuɛ fɛɛ jokuɛ maa pee e ní ha ngɛ tsɔsemi nɛ a kɛ ma ha lɛ ɔ he. Se fɔli fuu nɛ a suɔ Yehowa a nyɛ nɛ a tsɔse a bimɛ saminya. Nɛ bimɛ nɛ ɔmɛ nuɔ he kaa bɔ nɛ Joanna Mae nɛ e je Asia a nu he ɔ. E de ke: “Ke i kai tsɔsemi nɛ ye fɔli kɛ ha mi ɔ, ye bua jɔɔ wawɛɛ kaa a ye bua mi nɛ i ba suɔ Yehowa. Pi wami mi kɛkɛ nɛ a kɛ mi ba, a ha nɛ ye si himi pee kpakpa hulɔ.” (Abɛ 23:24, 25) Wa nyɛmimɛ nyumuhi kɛ yihi ayɔhi abɔ hu nuɔ he jã.