1-2. Ke a baptisi wɔ po ɔ, mɛni nɛ e sa nɛ waa ya nɔ nɛ waa pee? Moo tsɔɔ nya.

 SI ENYƐMƐ nɛ o dlaa o we ɔ mi? Atsinyɛ jemi ko be he kaa loko o ma ya hi lejɛ ɔ, kekleekle ɔ, o dla lejɛ ɔ saminya. Se ke lɔ ɔ se ɔ, o dla we o we ɔ mi hu ɔ, mɛni maa ba? Kaa bɔ nɛ o le ɔ, e be kɛe nɛ we ɔ mi maa sɛ mu ekohu. Ja o dlaa o we ɔ mi be fɛɛ be loko we ɔ mi ma tsɔ.

² Jã kɛ̃ nɛ e sa nɛ waa ya nɔ nɛ waa pee tsakemi ngɛ wa susumi kɛ suhi nɛ wa ngɛ ɔ a he. Ngɛ anɔkuale mi ɔ, loko wa ma ha nɛ a baptisi wɔ ɔ, wa bɔ mɔde wawɛɛ nɛ wa pee tsakemihi nɛ a he hia ngɛ wa si himi mi bɔ nɛ pee nɛ “wa fɔ he lo mi kɛ mumi mi mu fɛɛ mu ngɛ wa he.” (2 Kor. 7:1) E sa nɛ waa kɛ ga nɛ bɔfo Paulo wo kaa ‘waa ya nɔ nɛ wa ha nɛ a pee wɔ ehe’ ɔ nɛ tsu ní. (Efe. 4:23) Mɛni he je nɛ e sa nɛ waa ya nɔ nɛ waa pee tsakemi ɔ? Ejakaa je ɔ ma nyɛ ma ná wa nɔ he wami nɛ wa he be tsɔe ngɛ Yehowa hɛ mi. Loko wa ní peepee maa sa Yehowa hɛ mi daa a, e sa nɛ be fɛɛ be ɔ, waa hyɛ wa susumi, wa suhi kɛ níhi nɛ wa bua jɔ he ɔ saminya.

3. Mɛni nɛ wa ‘juɛmi nɛ wa ma tsake’ ɔ tsɔɔ? (Roma Bi 12:2)

³ Mɛni nɛ e sa kaa waa pee konɛ wa tsake wa juɛmi loo wa tsake bɔ nɛ wa susuɔ níhi a he ha a? (Kane Roma Bi 12:2.) Wa ‘juɛmi nɛ wa ma tsake’ ɔ tsɔɔ we kɛkɛ kaa wa maa pee ní kpakpahi ngɛ wa si himi mi. E sa nɛ waa le bɔ nɛ wa ngɛ ha saminya, nɛ waa pee tsakemihi nɛ he hia kaa waa pee ɔ, konɛ wa nyɛ nɛ waa kɛ Yehowa blɔ tsɔɔmihi nɛ  tsu ní saminya. E sa nɛ waa pee jã daa, tsa pi si kake pɛ.

4. Mɛni wa ma nyɛ maa pee konɛ je ɔ susumi nɛ ko ná wa nɔ he wami?

⁴ Ke wa ye mluku ɔ, wa ma nyɛ maa pee níhi nɛ maa sa Yehowa hɛ mi be fɛɛ be. Se amlɔ nɛ ɔ, e sa nɛ waa bɔ mɔde wawɛɛ konɛ waa ya nɔ nɛ waa pee nɔ́ nɛ Yehowa suɔ. Ngɛ Roma Bi 12:2 ɔ, Paulo tsɔɔ kaa e sa nɛ wa tsake wa juɛmi konɛ wa nyɛ nɛ waa le nɔ́ nɛ Mawu suɔ kaa waa pee. Nɛ tsɔɔ kaa e sɛ nɛ wa ha nɛ Satan je yaya nɛ ɔ nɛ kudɔ wɔ. Mohu ɔ, e sa nɛ waa kpa wa mi, nɛ́ waa hyɛ kaa otihi nɛ waa kɛ maa wa hɛ mi kɛ yi mi kpɔhi nɛ wa mwɔɔ ɔ kɛ Mawu susumi kɔ, se pi je ɔ susumi.

5. Mɛni maa ye bua wɔ konɛ wa hɛ nɛ hi nɔ kaa Yehowa ligbi ɔ bami ɔ su si ta? (Hyɛ foni ɔ.)

⁵ Mo susu he nɛ o hyɛ. Yehowa suɔ nɛ ‘wa juɛmi nɛ hi e ligbi ɔ bami ɔ nɔ wawɛɛ.’ (2 Pet. 3:12) Mo bi o he ke: ‘Anɛ bɔ nɛ i baa ye je mi ha a tsɔɔ kaa i le kaa je nɛ ɔ nyagbe ɔ su si ta lo? Anɛ yi mi kpɔhi nɛ i mwɔɔ kɛ kɔɔ yunivɛsiti yami kɛ ní tsumi he ɔ tsɔɔ kaa Yehowa sɔmɔmi he hia mi pe nɔ́ fɛɛ nɔ́ ngɛ ye si himi mi lo? Anɛ i ngɛ hemi kɛ yemi kaa Yehowa ma ha i kɛ ye weku ɔ wa hiami níhi, aloo i pɔɔ tsui yemi ngɛ he lo nya níhi a he lo?’ Ke Yehowa na kaa wa bɔɔ mɔde kaa wa maa sa e hɛ mi ngɛ nɔ́ fɛɛ nɔ́ nɛ wa peeɔ ɔ mi ɔ, e bua jɔɔ wawɛɛ.​—Mat. 6:25-27, 33; Filip. 4:12, 13.

6. Mɛni nɛ e sa nɛ waa ya nɔ nɛ waa pee?

⁶ Be fɛɛ be ɔ, e sa nɛ waa hyɛ níhi nɛ wa susuɔ he ɔ saminya, konɛ waa pee tsakemihi nɛ a he hia kaa waa pee ɔ. Paulo de Korinto bi ɔmɛ ke: “Nyɛɛ ya nɔ nɛ nyɛɛ hi nyɛ he kae nɛ nyɛɛ hi hyɛe kaa nyɛ ngɛ hemi kɛ yemi ɔ mi lo; nyɛɛ ya nɔ nɛ nyɛɛ  hi nyɛ mi kpae konɛ nyɛ kɛ tsɔɔ nimli nɛ nyɛ nitsɛmɛ nyɛ ji.” (2 Kor. 13:5) Tsa pi asafo mi kpehi kɛ fiɛɛmi pɛ nɛ wa maa ya a nɛ tsɔɔ kaa wa ngɛ “hemi kɛ yemi ɔ mi.” E biɔ hu nɛ waa hyɛ wa susumi, níhi nɛ wa bua jɔ he, kɛ yi mi tomi he je nɛ wa peeɔ nɔ́ ko ɔ. Enɛ ɔ he ɔ, e sa nɛ waa ya nɔ nɛ wa dla wa susumi kɛ gu Mawu Munyu ɔ nɛ wa maa kane ɔ nɔ. E sa nɛ wa ha nɛ wa susumi kɛ Yehowa nɔ ɔ nɛ kɔ, nɛ waa pee nɔ́ fɛɛ nɔ́ nɛ ma ha nɛ waa sa e hɛ mi.​—1 Kor. 2:14-16.

7. Ngɛ Efeso Bi 4:31, 32 ɔ nya a, mɛni ji tsakemi kpa ko hu nɛ e sa nɛ waa pee, nɛ mɛni he je nɛ e he ma nyɛ maa wa ha wɔ kaa wa maa pee jã a?

⁷ Kane Efeso Bi 4:31, 32. Tsakemi kpa ko hu nɛ e he hia wawɛɛ nɛ e sa nɛ waa pee ji nɛ wa maa “wo su ehe ɔ.” (Efe. 4:24) E biɔ mɔde bɔmi wawɛɛ loko wa ma nyɛ maa pee jã. E sa nɛ waa bɔ mɔde nɛ waa ngmɛɛ su komɛ a he. Su nɛ ɔmɛ ekomɛ ji ninyɛ, abofu kɛ mi mi la. Mɛni he je nɛ e he ma nyɛ maa wa ha wɔ kaa wa maa pee jã a? Ejakaa su yaya komɛ ma nyɛ maa tlɔ wa he. Kaa nɔ hyɛmi nɔ́ ɔ, Baiblo ɔ tsɔɔ kaa ni komɛ ngɛ nɛ ‘a mi mi woɔ la nɛ a náa abofu mlamlaamla.’ (Abɛ 29:22) Ke nɔ ko ngɛ su yaya nɛ ɔmɛ eko ɔ, e he maa hia nɛ e ya nɔ nɛ e bɔ mɔde wawɛɛ nɛ e pee tsakemi. Ke a baptisi lɛ po ɔ, e ma bi nɛ e ya nɔ nɛ e pee jã kaa bɔ nɛ níhi a si kpami nɛ nyɛɛ se nɛ ɔ tsɔɔ ɔ.

8-9. Mɛni blɔ nɔ Stephen níhi a si kpami ɔ ha nɛ wa na kaa e he hia nɛ waa ya nɔ nɛ wa je susu momo ɔ kɛ fɔ he ɔ?

⁸ Nyɛminyumu ko nɛ a tsɛɛ lɛ ke Stephen ɔ tsui gbaa e nya wawɛɛ. E de ke: “Benɛ a baptisi mi se po ɔ, e he ba hia nɛ ma bɔ mɔde wawɛɛ nɛ ma ye ye he nɔ. Kaa nɔ hyɛmi nɔ́ ɔ, ligbi ko benɛ wa ngɛ fiɛɛe ngɛ wehi a mi ɔ, i tu fo kɛ fiee julɔ ko nɛ e ju radio nɛ ngɛ ye lɔle ɔ mi ɔ se. Se benɛ e piɛ nyafii nɛ ma nu lɛ ɔ, e ngmɛɛ radio ɔ he kɛ fɔ si nɛ e je. Benɛ i de nihi nɛ a piɛɛ ye he ɔ bɔ nɛ ye nine plɛ kɛ su radio ɔ nɔ ha a, asafo mi nɔkɔtɔma ko nɛ ngɛ lejɛ ɔ bi mi ke, ‘Stephen, kaa o nu julɔ ɔ, mɛni o ko pee lɛ?’ Jamɛ a sane bimi ɔ ha nɛ i susu níhi a he wawɛɛ, nɛ e wo mi he wami konɛ ma ya nɔ nɛ ma di tue mi jɔmi se.” b

⁹ Stephen nɔ hyɛmi nɔ́ ɔ ha nɛ wa na kaa ke wa susu kaa wa ngmɛɛ su yaya ko he po ɔ, be komɛ ɔ, wa ma nyɛ ma je su nɛ ɔ kpo be mi nɛ wa hyɛ we blɔ. Ke e ba jã ngɛ o blɔ fa mi po ɔ, o kɔni mi nɛ ko jɔ̃ nɛ́ o susu kaa pi Kristofo no kpakpa ji mo. Bɔfo Paulo de ke: “Ke i suɔ kaa ma pee nɔ́ nɛ da a, nɔ́ yayami mohu lɛ e baa ye hɛ mi.” (Rom. 7:21-23) Wɔ tsuo wa yí mluku, enɛ ɔ he ɔ, wa kpɛti nɔ fɛɛ nɔ ngɛ su yaya komɛ nɛ haoɔ lɛ be komɛ kaa bɔ nɛ ke wa dla wa we mi ɔ, bunyuku haa nɛ e sɛɔ mu ekohu ɔ. E sa nɛ waa bɔ mɔde wawɛɛ nɛ wa he nɛ tsɔ be fɛɛ be. Mɛni blɔ nɔ wa ma nyɛ maa gu kɛ pee jã?

10. Mɛni blɔ nɔ wa ma nyɛ maa gu kɛ hwu kɛ si su yayahi? (1 Yohane 5:14, 15)

¹⁰ Ke o ngɛ su yaya ko nɛ e tlɔ o he ɔ, moo sɔle ha Yehowa ngɛ he, nɛ o ná nɔ mi mami kaa e maa bu mo tue nɛ e maa ye bua mo. (Kane 1 Yohane 5:14, 15.) E ngɛ mi kaa Yehowa be nyakpɛ blɔ nɔ gue kɛ je jamɛ a su yaya a ngɛ o he mohu lɛɛ, se e maa wo mo he wami konɛ o nyɛ nɛ o ye o he nɔ. (1 Pet. 5:10) E sa nɛ o bɔ mɔde wawɛɛ nɛ o tsu o sɔlemi ɔ nya ní,  nɛ o ko pee níhi nɛ ma ha nɛ o je su nɛ ɔ kpo. Kaa nɔ hyɛmi nɔ́ ɔ, e sɛ nɛ o hyɛ sinihi loo tiivi nɔ ní peemihi, loo o kane womihi nɛ ma nyɛ ma ha nɛ e he maa wa ha mo kaa o ma kua su yayahi nɛ tlɔ o he ɔ. Jehanɛ hu ɔ, e sɛ nɛ o hi ní yayahi a he susue.​—Filip. 4:8; Kol. 3:2.

11. Mɛni wa ma nyɛ maa pee konɛ waa ya nɔ nɛ waa wo su ehe ɔ?

¹¹ Ke o je su momo ɔ kɛ fɔ he ɔ, e he maa hia nɛ o wo su ehe ɔ. Mɛni blɔ nɔ o maa gu kɛ pee jã? Ke o ngɛ Yehowa su ɔmɛ a he ní kasee ɔ, mo kɛ pee oti kaa o ma je e su ɔmɛ kpo. (Efe. 5:1, 2) Kaa nɔ hyɛmi nɔ́ ɔ, ke o kane sane ko ngɛ Baiblo ɔ mi nɛ tsɔɔ bɔ nɛ Yehowa kɛ tɔmi keɔ ha a, mo bi o he ke, ‘Anɛ i kɛ ni kpahi a tɔmi keɔ mɛ lo?’ Ke o kane bɔ nɛ Yehowa mi mi sãa lɛ ngɛ nihi nɛ a be nɔ́ ko ɔ a he ɔ, mo bi o he ke, ‘Anɛ i kɛ ye ní peepee tsɔɔ kaa imi hu ye mi mi sãa mi ngɛ nyɛmimɛ nɛ a be nɔ́ ko ɔ a he lo?’ Yaa nɔ nɛ o tsake o juɛmi kɛ gu su ehe ɔ nɛ o maa wo ɔ nɔ. Ke o ngɛ jã pee ɔ, mo ná tsui ha o he.

12. Mɛni blɔ nɔ nɛ Stephen níhi si kpami ɔ tsɔɔ kaa Baiblo ɔ tsakeɔ nihi a si himi?

¹² Stephen nɛ wa wo e ta kɛ sɛ hlami ɔ na kaa bɔɔbɔɔbɔɔ ɔ, e nyɛ nɛ e wo su ehe ɔ. E de ke: “Kɛ je benɛ a baptisi mi ɔ, i kɛ si fɔfɔɛhi fuu kpe nɛ́ e biɔ nɛ ma ye ye he nɔ konɛ ye mi mi nɛ ko fu mla. I na kaa ke nihi ngɛ hlae nɛ a wo ye mi mi la a, e sa nɛ ma je he nɛ a ngɛ ɔ, loo ma ngmɛɛ sane ɔ he loko níhi nɛ puɛ kulaa. Ye yo ɔ kɛ nihi fuu je ye yi ngɛ bɔ nɛ i tsu si fɔfɔɛ komɛ a he ní ha a he. E pee mi nyakpɛ po! Se ke nihi je ye yi ngɛ tsakemihi nɛ i pee ɔ he ɔ, i naa kaa pi imi nitsɛ ye he wami nya nɛ i nyɛ nɛ i pee jã, mohu ɔ, e ji odase nɛ tsɔɔ kaa Baiblo ɔ tsakeɔ nihi a si himi niinɛ.”

13. Mɛni maa ye bua wɔ konɛ waa pee nɔ́ nɛ da? (Galatia Bi 5:16)

¹³ Kane Galatia Bi 5:16. Yehowa jeɔ mi mi himi mi nɛ e kɛ mumi klɔuklɔu ɔ yeɔ bua wɔ konɛ wa nyɛ nɛ waa pee nɔ́ nɛ da. Ke wa kaseɔ Mawu Munyu ɔ, lɔ ɔ tsɔɔ kaa wa suɔ nɛ Mawu mumi ɔ nɛ kudɔ wɔ. Ke wa ya wa kpe ɔmɛ ɔ, mumi klɔuklɔu ɔ yeɔ bua wɔ hulɔ. Ngɛ wa kpe nɛ ɔmɛ a sisi ɔ, waa kɛ wa nyɛmimɛ nyumuhi kɛ yihi nɛ mɛ hu a ngɛ mɔde bɔe kaa a maa pee nɔ́ nɛ da a bɔɔ, nɛ lɔ ɔ woɔ wɔ he wami. (Heb. 10:24, 25; 13:7) Jehanɛ se hu ɔ, ke wa ngɛ gbɔjɔmi ko nɛ wa je wa tsui mi kɛ sɔle ha Yehowa a, e ma ha wɔ e mumi klɔuklɔu ɔ konɛ waa ya nɔ nɛ waa hwu kɛ si jamɛ a gbɔjɔmi ɔ. Eko ɔ, ní nɛ ɔmɛ nɛ wa maa pee ɔ be hae nɛ wa kpa akɔnɔ yayahi nami mohu lɛɛ, se e maa ye bua wɔ nɛ a ko ná wa nɔ he wami. Galatia Bi 5:16 tsɔɔ kaa nihi nɛ a nyɛɛɔ ngɛ mumi ɔ nya a “be he lo ɔ akɔnɔ ko nya ní tsue.”

14. Mɛni he je nɛ e he hia nɛ waa ya nɔ nɛ waa pee nɔ́ nɛ da a?

¹⁴ Ke wa bɔni níhi nɛ ma ha nɛ huɛ bɔmi kpakpa maa hi waa kɛ Yehowa wa kpɛti ɔ peemi ɔ, e sa nɛ waa ya nɔ nɛ waa pee jã konɛ waa pee nɔ́ nɛ da be fɛɛ be. Mɛni he je? Ejakaa wa ngɛ he nyɛlɔ ko nɛ e kɛ wɔ ngɛ hwue be fɛɛ be. Lɔ ɔ ji he numi nɛ wa náa kaa waa pee nɔ́ nɛ dɛ. Ke a baptisi wɔ po ɔ, eko ɔ, wa maa nu he kaa waa pee níhi nɛ e sɛ kaa waa pee ɔ. Ní nɛ ɔmɛ ekomɛ ji asɔ fiɛmi, da fuu numi kɛ bɔmi nami he fonihi kɛ video hyɛmi. (Efe. 5:3, 4) Nyɛminyumu wayoo ko de ke: “Be ko nɛ be ɔ, i náa nyumuhi a he akɔnɔ wawɛɛ. Enɛ ɔ ji ka ko nɛ e he wa wawɛɛ nɛ i kɛ kpe. I susu kaa jamɛ a he numi ɔ maa  je, se e ji.” Mɛni ma nyɛ maa ye bua mo ke akɔnɔ yaya ko he si ngɛ o mi?

15. Mɛni he je nɛ lemi nɛ wa le kaa akɔnɔ yaya ji ka nɛ ‘baa adesahi tsuo a nɔ’ ɔ woɔ wa bua a? (Hyɛ foni ɔ.)

¹⁵ Ke o ngɛ mɔde bɔe kaa o maa ye akɔnɔ yaya ko nɛ he si ngɛ o mi ɔ nɔ ɔ, mo kai kaa pi mo pɛ nɛ o kɛ si fɔfɔɛ nɛ ɔ eko ngɛ kpee. Baiblo ɔ de ke: “Ka ko bɛ nyɛ nɔ hyɛ kaa ja nɔ́ nɛ baa adesahi a nɔ ɔ pɛ.” (1 Kor. 10:13a) A ngma munyu nɛ ɔ kɛ ya ha nyumuhi kɛ yihi nɛ a ji Kristofohi nɛ a ngɛ Korinto ɔ. Jinɛ be ko nɛ be ɔ, a kpɛti ni komɛ ji gba puɛli, ni kpahi hu ngɔ a he kɛ wo nyumu kɛ nyumu loo yo kɛ yo a bɔmi nami mi, nɛ ni komɛ hu ji dã deli. (1 Kor. 6:9-11) Anɛ o susu kaa benɛ a baptisi mɛ se po ɔ, a ná we akɔnɔ yaya ko hu lo? Pi jã kulaa nɛ e ji. E ngɛ mi kaa nyɛmimɛ nɛ ɔmɛ tsuo ji Kristofohi nɛ a pɔ mɛ nu mohu lɛɛ, se ngɛ anɔkuale mi ɔ, a ji adesahi nɛ a yi mluku. E ngɛ heii kaa a ná akɔnɔ yayahi be komɛ. Enɛ ɔ he ɔ, e sɛ nɛ wa kɔni mi nɛ jɔ̃ ngɛ si fɔfɔɛ kaa jã a mi. Mɛni he je? Ejakaa ke akɔnɔ yaya ko ngɛ wɔ haoe po ɔ, wa le kaa nɔ ko hu kɛ jamɛ a ka a kpe nɛ e nyɛ nɛ e ye nɔ. Ngɛ anɔkuale mi ɔ, o ma nyɛ ma ha nɛ o ‘he nɛ wa ngɛ hemi kɛ yemi ɔ mi be fɛɛ be, ejakaa o le kaa kikɛmɛ amanehlu nɛ ɔmɛ nɔuu nɛ nyɛmimɛ a kuu ɔ tsuo ngɛ nae.’​—1 Pet. 5:9.

16. Mɛni ji nɔ ko nɛ ngɛ oslaa nɛ e sɛ kaa waa pee, nɛ mɛni he je?

¹⁶ E sɛ nɛ o susu kaa nɔ ko nɔ ko be nyɛe maa nu mo sisi ngɛ haomi pɔtɛɛ ko nɛ o kɛ ngɛ kpee ɔ he, ejakaa jã a peemi ma nyɛ maa ye mo awi. Susumi kaa jã a ma nyɛ ma ha nɛ o nu he kaa o si fɔfɔɛ ɔ he nɔ́ ko be hie peemi, nɛ o be nyɛe maa ye akɔnɔ yayahi a nɔ. Se pi jã ji sane ɔ. Baiblo ɔ de ke: “Anɔkualetsɛ ji Mawu, nɛ e be hae nɛ a ka nyɛ pe bɔ nɛ nyɛ ma nyɛ  maa da nya, mohu ɔ, ngɛ ka a mi ɔ, lɛ hu e ma je blɔ nɛ́ nyɛ ma nyɛ maa gu nɔ kɛ je mi, konɛ nyɛ nyɛ nɛ nyɛɛ da nya.” (1 Kor. 10:13b) Enɛ ɔ he ɔ, ke akɔnɔ yaya ko he si ngɛ wa mi kaa mɛni po ɔ, wa ma nyɛ maa da nya. Yehowa ma nyɛ maa ye bua wɔ konɛ wa nyɛ nɛ waa ye akɔnɔ yaya nɔ.

17. E ngɛ mi kaa wa be nyɛe maa tsi akɔnɔ yaya nya mohu lɛɛ, se mɛni wa ma nyɛ maa pee?

¹⁷ Mo kai be fɛɛ be kaa, akɛnɛ wa ji adesahi nɛ yayami ngɛ wa he he je ɔ, wa be nyɛe maa tsi akɔnɔ yaya nya. Se ke o ná akɔnɔ yaya po ɔ, o ma nyɛ maa tu nya fo kaa bɔ nɛ Yosef kɛ oya yemi tu fo ngɛ Potifar yo ɔ nya a. (1 Mose 39:12) E sɛ nɛ o ngmɛ blɔ nɛ akɔnɔ yaya nɛ ye o nɔ!

18-19. Ke o ngɛ mɔde bɔe kaa o ma dla o susumi ɔ, mɛni sanehi nɛ o ma nyɛ ma bi o he?

¹⁸ Wa ba na kaa wa juɛmi loo wa susumi nɛ wa ma dla a tsɔɔ kaa e sa nɛ wa ha nɛ wa susumi kɛ wa ní peepee nɛ sa Yehowa hɛ mi be fɛɛ be. Enɛ ɔ he ɔ, e sa nɛ be fɛɛ be ɔ, o kpa o mi nɛ o bi o he ke: ‘Anɛ i kɛ ye ní peepee tsɔɔ kaa i le kaa be nɛ piɛ nɛ nyagbe ɔ maa ba a pi kulaa lo? Anɛ i ngɛ mɔde bɔe konɛ ma ya nɔ nɛ ma wo su ehe ɔ lo? Anɛ i haa nɛ Yehowa mumi ɔ kudɔɔ mi bɔ nɛ pee nɛ ma hwu kɛ si akɔnɔ yaya nɛ ma pee nɔ́ nɛ da lo?’

¹⁹ Ke o ngɛ o he sane nɛ ɔmɛ bie ɔ, koo hyɛ blɔ kaa o maa pee o ní kaa nɔ nɛ ye mluku, mohu ɔ, o bua nɛ jɔ kaa o ngɛ o he mɔde bɔe konɛ o nyɛ nɛ o ya o hɛ mi. Ke o na kaa e sa nɛ o pee tsakemi komɛ ɔ, o kɔni mi nɛ ko jɔ̃. Mohu ɔ, o kɛ ga womi nɛ ngɛ Filipi Bi 3:16 nɛ tsu ní. Lejɛ ɔ de ke: “He nɛ wa ya wa hɛ mi kɛ su ɔ, nyɛ ha nɛ waa ya nɔ nɛ waa nyɛɛ pɛpɛɛpɛ ngɛ blɔ nɛ ɔ nɔuu nɔ.” Ke o ngɛ jã pee ɔ, mo ná nɔ mi mami kaa Yehowa maa jɔɔ o mɔde bɔmi ɔmɛ a nɔ konɛ o ya nɔ nɛ o dla o susumi.