A fɔ mi ngɛ St. Paul, Minnesota ngɛ U.S.A. ngɛ jeha 1954 ɔ mi. Ye fɔli ngɛ Katoliki jami ɔ mi. Tsa pi niatsɛmɛ ji mɛ, nɛ tsa pi ohiatsɛmɛ ji mɛ hulɔ. A fɔ wɔ ni enuɔ, nɛ imi ji bi enyɔne. I ya Katoliki sukuu, nɛ i yeɔ bua osɔfo ɔ ke wa ngɛ sɔlemi pee. Se i li níhi fuu ngɛ Baiblo ɔ mi. E ngɛ mi kaa i he ye kaa Mawu ngɛ, nɛ lɛ nɛ e bɔ níhi tsuo mohu lɛɛ, se i he we yi kaa Katoliki jami ɔ ma nyɛ maa ye bua mi nɛ ma sɔmɔ Mawu.

Nyumu ko kɛ e yo nɛ a ji Yehowa Odasefohi ba slaa mi ngɛ ye we mi ngɛ kekle jeha nɛ i bɔni mlaa he ní kasemi ngɛ William Mitchell College ɔ. Benɛ a ba a, i ngɛ níhi a he fɔe, lɔ ɔ he ɔ, a de mi kaa a maa kpale kɛ ba pee se. Benɛ a kpale kɛ ba a, i de mɛ kaa i ngɛ sane bimi enyɔ kɛ ha mɛ. I bi mɛ ke: “Mɛni he je nɛ nimli yayamihi mohu a si himi peeɔ kpakpa pe nimli kpakpahi ɔ?” kɛ “Mɛni e sa nɛ nɔ ko nɛ pee konɛ e ná bua jɔmi nitsɛnitsɛ?” A ha mi womi nɛ ji, The Truth That Leads to Eternal Life kɛ New World Translation of the Holy Scriptures nɛ e se mi kɔla ngɛ kaa ba mumu ɔ. Jehanɛ hu ɔ, i kplɛɛ nɔ kaa a kɛ mi  nɛ ba kase Baiblo ɔ. Baiblo ɔ nɛ a kɛ mi kase ɔ bli ye hɛngmɛ wawɛɛ. Ye bua jɔ wawɛɛ benɛ i kase kaa Mawu Matsɛ Yemi ɔ ji nɔ yemi ko nɛ maa ye adesahi tsuo a nɔ ngɛ zugba a nɔ ɔ. I na kaa adesahi a nɔ yemi yi manye, nɛ e haa nɛ nihi nɛ a ngɛ je ɔ mi ɔ naa nɔ́, nɛ a yeɔ mɛ sane yaya.

I jɔɔ ye he nɔ ha Yehowa ngɛ jeha 1982 ɔ mi, nɛ i ha nɛ a baptisi mi ngɛ Kpokpa Nɔ Kpe ko nɛ a pee ngɛ St. Paul Civic Center nɛ e yi ji “Kingdom Truth” ɔ sisi. E we otsi ɔ, i kpale kɛ ya he nɛ a pee kpe ɔ ngɛ ɔ, nɛ i ya ngma ye nyagbe ka. A tsɛɛ ka nɛ ɔ ke Minnesota bar exam. Ngɛ October mi ɔ, a ha nɛ i le kaa i bɔ mɔde ngɛ ka a mi, nɛ ye he su nɛ ma nyɛ ma tsu ní kaa mlaa lelɔ.

Ngɛ “Kingdom Truth” kpokpa nɔ kpe ɔ sisi ɔ, i kɛ Mike Richardson nɛ e tsuɔ ní ngɛ Brooklyn Betel ɔ kpe, nɛ e de mi kaa a to ɔfisi ko nɛ tsuɔ mlaa sanehi a he ní ɔ sisi ngɛ asafo ɔ ní tsumi yi ɔ. Benɛ e de mi nɔ́ nɛ ɔ, i kai munyu nɛ Etiopia nyumu nɛ a puɛ lɛ ɔ tu nɛ ngɛ Ní Tsumi 8:36, nɛ i bi ye he ke, ‘Mɛni tsiɔ ye nya nɛ ma ko tsu ní ngɛ ɔfisi nɛ ɔ?’ Lɔ ɔ he ɔ, i ngma Betel blɔ bimi womi nɔ ní.

Ye fɔli ɔmɛ a bua jɔɛ kaa i ba pee Yehowa Odasefo no. Ye papaa bi mi kaa ke i ya ngɛ ní tsue ngɛ Betel ɔ, mɛni se ma ná? I de lɛ kaa ma ngɔ ye he kɛ ha ngɛ lejɛ ɔ faa. I de lɛ kaa ke nyɔhiɔ ɔ gbo ɔ, a ma ha mi sika bɔɔ ko kaa bɔ nɛ a haa Betel sɔmɔli tsuo ɔ.

Akɛnɛ i kplɛɛ nɔ kaa ma tsu ní ngɛ kojomi he ko momo he je ɔ, i nyɛ we nɛ ma ya sɔmɔ ngɛ Betel amlɔ nɔuu. Lɔ ɔ he ɔ, i bɔni sɔmɔmi ngɛ Betel ngɛ Brooklyn, New York ngɛ jeha 1984 ɔ mi. A ha nɛ i ya tsu ní ngɛ ɔfisi nɛ tsuɔ mlaa sanehi a he ní ɔ. Níhi a si kpami nɛ i ná ngɛ kojomi he nɛ i ya tsu ní ngɛ ɔ ye bua mi.

Ngɛ November 1983 ɔ mi ɔ, asafo ɔ he sini jemi he nɛ ji Stanley Theater nɛ ngɛ Jersey City, New Jersey ɔ. Nyɛmimɛ ɔmɛ ngma blɔ bimi womi kaa a ngmɛ mɛ blɔ nɛ a dla ní komɛ nɛ puɛ ngɛ tsu ɔ he ɔ. Benɛ a kɛ nikɔtɔma amɛ ngɛ kpɔ ɔ mi ɔ kpe ɔ, nyɛmimɛ ɔmɛ tsɔɔ nya kaa a suɔ nɛ a dla Stanley Theater a konɛ a kɛ hi kpe pee. Enɛ ɔ ngɔ nyagba ko kɛ ba. Jersey City ma a mlaa nɛ kɔɔ bɔ nɛ a kɛ tsuhi ma tsu ní ha a he ɔ tsɔɔ kaa ke nɔ ko suɔ nɛ e to tsu he blɔ nya kɛ ha Mawu jami ɔ, lɛɛ e sa nɛ e pee he nɛ nihi ma a wehi ngɛ. Se nyagba a ji kaa Stanley Theater a ngɛ he nɛ a ma ní tsumi hehi ngɛ. Enɛ ɔ he ɔ,  ma nikɔtɔma amɛ kplɛɛ we nɔ. Nyɛmimɛ ɔmɛ ngɔ sane ɔ kɛ ya kojomi he, se a kplɛɛ we nɔ kɛ ha mɛ.

Asafo ɔ kpale ngɔ sane ɔ kɛ ya kojomi he ngɛ kekleekle otsi mi nɛ i ya Betel ɔ. Akɛnɛ i kɛ jeha enyɔ tsu ní ngɛ kojomi he nɛ ngɛ St. Paul, Minnesota a he je ɔ, i le níhi fuu ngɛ sanehi kaa kikɛ nɛ ɔmɛ a he. Kojolɔ ɔ kake tsɔɔ kaa a jeɔ sinihi, nɛ lali ba laa, nɛ a peeɔ ní slɔɔtoslɔɔtohi ngɛ Stanley Theater a. Ke a peeɔ ní nɛ ɔmɛ ngɛ lejɛ ɔ, lɛɛ mɛni he je mɔ nɛ a be nyɛe maa pee Mawu jami mi níhi ngɛ lejɛ ɔ? Kojomi he ɔ susu sane ɔ he, nɛ a tsɔɔ kaa Jersey City mlaa a bui he blɔ nɛ wa ngɛ kaa wa jaa Mawu ngɛ he fɛɛ he ɔ. Kojomi he ɔ fã kaa ma a nɛ ngmɛ nyɛmimɛ ɔmɛ blɔ nɛ a kɛ tsu ɔ nɛ tsu ní. Enɛ ɔ ha nɛ i na bɔ nɛ Yehowa gu blɔ kaa kikɛ nɔ kɛ ha nɛ e ní tsumi ɔ ngɛ nɔ yae saminya. Ye bua jɔ wawɛɛ kaa imi hu i ye bua.

Nyɛmimɛ ɔmɛ je tsu ɔ dlami sisi. Ní tsumi ɔ kle, se e sui jeha kake nɛ a dla níhi nɛ puɛ ngɛ tsu ɔ he ɔ ta, nɛ ngɛ September 8, 1985 ɔ mi ɔ, a pee Gilead sukuu nɛ to nɔ 79 ɔ nya gbemi ɔ ngɛ Jersey City Kpe Peemi Asa a nɔ. Ye bua jɔ wawɛɛ kaa i ye bua kɛ tsu ní tsumi nɛ ɔ kɛ ha Yehowa. Enɛ ɔ ha nɛ i ná bua jɔmi pe benɛ i ngɛ ní tsue kaa mlaa lelɔ ɔ. I li kaa ní tsumi fuu ngɛ nɛ Yehowa kɛ mi ma tsu.

Ngɛ jeha 1980 jeha amɛ a mi ɔ, ke Odasefo no ko kplɛɛ we kaa a kɛ muɔ nɛ tsu ní ngɛ e tsami mi ɔ, behi fuu ɔ, dɔkita amɛ aloo hiɔ tsami he ɔ kplɛɛ we nɔ. Kojoli fuu susu kaa yihi nɛ a hɛɛ hɔ ɔ be he blɔ kaa a ma kua muɔ. Kojoli ɔmɛ tsɔɔ kaa ke yohɔyo ko ngɔɛ muɔ ɔ, e ma nyɛ ma gbo kɛ je e bi ɔ he.

Ngɛ December 29, 1988 ɔ mi ɔ, benɛ nyɛmiyo ko nɛ a tsɛɛ lɛ ke Denise Nicoleau ɔ fɔ se ɔ, muɔ fuu be ngɛ e he. Akɛnɛ muɔ ta e he he je ɔ, dɔkita a tsɔɔ kaa e ma ha lɛ muɔ, se Nyɛmiyo Nicoleau kua. E nɔ jena a, hiɔ tsami he ɔ bi blɔ ngɛ kojolɔ ko ngɔ konɛ a ha nyɛmiyo ɔ muɔ. Kojolɔ ɔ ha we Nyɛmiyo Nicoleau loo e huno ɔ he blɔ nɛ a kɛ tsɔɔ a susumi, nɛ e de we mɛ hu po kaa e ha hiɔ tsami he ɔ he blɔ kaa a ha nyɛmiyo ɔ muɔ.

Soha, December 30 nɔ ɔ, hiɔ tsami he ɔ ha Nyɛmiyo Nicoleau muɔ be mi nɛ e huno ɔ kɛ e weku li kpahi kplɛɛ we nɔ kulaa. Jamɛ a gbɔkuɛ ɔ, a po sane kɛ fɔ weku li ɔmɛ ekomɛ, kɛ asafo mi nikɔtɔma komɛ a nɔ kaa a tsi blɔ konɛ a ko ha Nyɛmiyo Nicoleau muɔ, enɛ ɔ he ɔ, a nu mɛ kɛ wo tsu mi. E nɔ jena mɔtu ɔ, a fia nyɛmimɛ ɔmɛ nɛ a nu mɛ kɛ wo tsu mi ɔ a he adafi ngɛ hleedio kɛ tiivi nɔ ngɛ New York City kɛ Long Island ma amɛ a mi.

E nɔ jena Hɔɛgbi ɔ, i kɛ kojolɔ ɔ kake nɛ e ngɛ Kojomi He Ngua a nɛ a tsɛɛ lɛ ke Milton  Mollen ɔ tu munyu. I gba níhi a mi kɛ tsɔɔ lɛ, nɛ i ha nɛ e nu sisi kaa kojolɔ kpa a ngɔ e nine kɛ wo womi ɔ sisi be mi nɛ e ngmɛ́ nyɛmiyo ɔ kɛ e weku ɔ blɔ nɛ a tsɔɔ lɛ níhi a nya. Kojolɔ Mollen de mi kaa ma ba piani konɛ wa susu sane ɔ kɛ mlaahi nɛ kɔɔ sane ɔ he ɔ a he. Nyɛminyumu Philip Brumley nɛ e hyɛɛ ɔfisi nɛ tsuɔ mlaa sanehi a he ní ɔ nɔ ɔ kɛ mi ya Kojolɔ Mollen ɔfisi ɔ jamɛ a gbɔkuɛ ɔ. Mollen fɔ hiɔ tsami he ɔ kojolɔ ɔ hu nine kɛ ba e ɔfisi ɔ. Wa sã nya wawɛɛ ngɛ ɔfisi ɔ. E ba su he ko ɔ, Nyɛminyumu Brumley ngma nɔ́ ko ngɛ e womi ɔ nɔ kɛ ha mi nɛ tsɔɔ kaa ma ná tsui. Ga womi nɛ ɔ hi, ejakaa ye mi mi fu wawɛɛ, nɛ i ngɛ hlae nɛ ma tsɔɔ hiɔ tsami he ɔ kojolɔ ɔ kaa nɔ́ nɛ e pee ɔ dɛ.

Maa pee ngmlɛfia kake se ɔ, Kojolɔ Mollen de kaa sane nɛ ɔ ji sane nɛ a maa ye kekle ngɛ kojomi he ɔ hwɔɔ mɔtu. Benɛ wa ngɛ kpo jee ngɛ Kojolɔ Mollen ɔfisi ɔ, e de kaa hiɔ tsami he kojolɔ ɔ be lɛ náe gbɔjɔɔ hwɔɔ. Akɛnɛ hiɔ tsami he ɔ nyɛ nyɛmiyo ɔ nɔ nɛ a ha lɛ muɔ he je ɔ, e he maa wa ha hiɔ tsami he kojolɔ ɔ kaa e ma fã nɔ́ nɛ hiɔ tsami he ɔ pee ɔ he. I nu he kaa nɔ́ nɛ Yehowa ngɛ wɔ dee ke wa maa ye kunimi. E pee mi nyakpɛ wawɛɛ kaa Yehowa gu wa nɔ kɛ ngɛ e yi mi tomi he ní tsue.

Wa dla wa he jamɛ a nyɔ ɔ mi ɔ konɛ waa le nɔ́ nɛ wa ma de mɔtu. Akɛnɛ kojomi he ɔ kɛ Brooklyn Betel ɔ he kɛ we he je ɔ, nihi nɛ waa kɛ mɛ tsuɔ ní ngɛ wa ɔfisi ɔ a kpɛti nihi fuu nyɛɛ kɛ ya lejɛ ɔ. Benɛ kojoli eywiɛ ɔmɛ bu wa sane ɔ tue ɔ, a ma nya si kaa e sɛ nɛ a ko ha nyɛmiyo ɔ muɔ. Kojomi He Ngua a ye Nyɛmiyo Nicoleau sane ɔ ha lɛ, nɛ a tsɔɔ kaa akɛnɛ hiɔ tsami he kojolɔ ɔ kɛ e nine wo womi sisi be mi nɛ e ha we he blɔ nɛ nyɛmiyo ɔ nɛ e tsɔɔ lɛ níhi a nya he je ɔ, e te si kɛ wo he blɔ nɛ nyɛmiyo ɔ ngɛ ngɛ ma a mlaa a nya a.

Benɛ a ye sane ɔ ta a, Kojomi He Ngua nɛ ngɛ New York ɔ kplɛɛ nɔ kaa Nyɛmiyo Nicoleau ngɛ he blɔ kaa e ma ha nɛ a tsa lɛ nɛ a kɛ muɔ be ní tsue. Enɛ ɔ ji kekleekle muɔ he sane nɛ i piɛɛ he nɛ a ye. Se a ye muɔ he sane kakaaka eywiɛ ngɛ kojomi he slɔɔtohi ngɛ United States. (Hyɛ daka nɛ ji, “ Kunimihi Nɛ A Ye Ngɛ Kojomi He Nguahi.”) Jehanɛ hu ɔ, i piɛɛ mlaa leli kpahi nɛ a ngɛ Betel ɔ a he kɛ tsu sane komɛ nɛ kɔɔ jokuɛwi a he piɛ  pomi, gba mi pomi kɛ mlaahi nɛ kɔɔ zugbahi kɛ tsuhi a he blɔ nya tomi he ɔ he ní.

Benɛ i kɛ Dawn kpe ɔ, e ji fɔlɔ kake nɛ ngɛ bimɛ etɛ a nɔ hyɛe. E ngɛ ní tsue, nɛ jamɛ a be ɔ mi nɔuu ɔ, e ji blɔ gbalɔ. E kɛ si fɔfɔɛhi nɛ a mi wa kpe, nɛ ye bua jɔ bɔ nɛ e ngɛ mɔde bɔe kaa e ma sɔmɔ Yehowa a he. Ngɛ jeha 1992 ɔ mi ɔ, wa ya Kpokpa Nɔ Kpe nɛ a pee ngɛ New York City nɛ e yi ji “Light Bearers” ɔ. I de lɛ kaa ma suɔ nɛ waa le wa sibi saminya. Ngɛ jeha kake se ɔ, wa sɛ gba si himi. I ná yo nɛ e ngɔɔ Yehowa sɔmɔmi kɛ yeɔ kekle blɔ he ngɛ e si himi mi, nɛ e woɔ nɔ nya muɔ hulɔ. Enɛ ɔ ji nike ní nɛ se be nɛ je Yehowa ngɔ. Dawn pee ye suɔmi nya ní, nɛ e ngɔ nɔ́ kpakpa kɛ wo mi hiɔ ngɛ be nɛ waa kɛ hi si ɔ mi tsuo.​—Abɛ 31:12.

Benɛ wa sɛ gba si himi mi ɔ, jamɛ a be ɔ, jokuɛ ɔmɛ ye jeha 11, 13, kɛ 16. I suɔ nɛ ma pee tsɛ kpakpa kɛ ha mɛ, lɔ ɔ he ɔ, i kane níhi nɛ kɔɔ huno bi aloo yo bi kɛ si himi ɔ he ní ngɛ wa womi ɔmɛ a mi, nɛ i kɛ níhi nɛ i kane ɔ tsuo tsu ní. Waa kɛ nyagbahi kpe jehahi fuu, se ye bua jɔ kaa jokuɛ ɔmɛ naa mi kaa a huɛ, nɛ a naa mi kaa tsɛ nɛ ngɛ suɔmi. Wa haa wa bimɛ ɔmɛ he blɔ nɛ a kɛ a huɛmɛ baa we ɔ mi be fɛɛ be, nɛ wa bua jɔ kaa jokuɛwi nɛ ɔmɛ ngɛ wa kasa nya.

Ngɛ jeha 2013 ɔ mi ɔ, i kɛ Dawn hia kɛ ya Wisconsin konɛ wa ya hyɛ wa fɔli nɛ a wa ngɛ jeha mi ɔ a nɔ. E pee mi nyakpɛ wawɛɛ kaa ngɛ enɛ ɔ tsuo se ɔ, Betel suɔ nɛ e kɛ mi nɛ tsu ní. A ha mi he blɔ kaa ma ya nɔ nɛ ma ye bua ɔfisi nɛ tsuɔ mlaa sanehi a he ní ɔ be komɛ.

Ngɛ September 2018 ɔ mi ɔ, i yɔse kaa i ngɛ ye kuɔ si kpɛe tsɔ. I ya hiɔ tsami hehi nɛ ngɛ wa kpɔ ɔ mi ɔ, se a nyɛ we nɛ a tsɔɔ nɔ́ nɛ ngɛ mi pee. Pee se ɔ, dɔkita ko de mi kaa ma ya na dɔkita nɛ e tsuɔ juɛmi he ní. Ngɛ January jeha 2019 ɔ mi ɔ, dɔkita nɛ tsuɔ juɛmi he ní ɔ de mi kaa hiɔ nɛ ngɛ ye he ɔ ji hiɔ ko nɛ pɔɛ he, nɛ ke be ngɛ mi puee ɔ, hiɔ nɛ ɔ maa sa ye nɔmlɔ tso ɔ tsuo he wawɛɛ. A tsɛɛ hiɔ nɛ ɔ ke progressive supranuclear palsy (PSP).

Ligbi etɛ se ɔ, i kɛ ye he wo fiɛmi nɛ ye bua jɔ he wawɛɛ ɔ mi. Benɛ i ngɛ fiɛmi nɛ ɔ fiɛe ɔ, i nɔ si nɛ ye hiɔ nine ku. I kɛ ye he wo fiɛmi nɛ ɔ mi ye wami be tsuo, nɛ ye he be ngɛ mi. Lɔ ɔ he ɔ, benɛ ye nine ku ɔ, i yɔse kaa hiɔ ɔ ha nɛ ye pani ɔmɛ nyɛ we nɛ a tsu ní saminya. E pee mi nyakpɛ benɛ i na kaa hiɔ ɔ he wa wawɛɛ ɔ. E ha nɛ e he waa ha mi kaa ma tu munyu, nyɛɛmi hu peeɔ dengme, nɛ nɔ́ mimi hu yeɔ ha mi.

Ye bua jɔ wawɛɛ kaa i nyɛ nɛ i ngɔ he blɔ nɛ i ngɛ kaa mlaa lelɔ ɔ kɛ ye bua Yehowa asafo ɔ. Nɛ ye bua jɔ hu kaa i ná he blɔ kɛ ngma womihi kɛ ha dɔkitahi kɛ kojoli nɛ a kane. Jehanɛ hu ɔ, i fã Yehowa we bi nɛ a fia a pɛɛ si kaa a be muɔ ngɔe, loo a kɛ hiɔ tsami blɔ nya tomi nɛ a kɛ muɔ be ní tsue ngɛ mi ɔ hu he. Kaa bɔ nɛ Luka 17:10 tsɔɔ ɔ, ‘I ji nyɔguɛ nɛ he be se nami. Nɔ́ nɛ e sa kaa ma pee ɔ, lɔ ɔ nɛ i pee ɔ nɛ.’