1. Ngɛ mɛni blɔ nɔ nɛ Yehowa ngɛ kaa binyɛ nɛ pupɔɔ e bi?

“ANƐ binyɛ hɛ maa je lɛ nitsɛ e bi nɛ ngɛ nyɔ nya nɔ lo?” Yehowa lɛ bi sane nɛ ɔ ngɛ gbalɔ Yesaya be ɔ mi. Mawu de e we bi ke: “Ke binyɛ hɛ maa je e bi nɔ po, imi lɛɛ ye hɛ be [nyɛ] nɔ jee kɔkɔɔkɔ.” (Yes. 49:15) Yehowa kɛ e he pɔɛ binyɛ he tomi, se ngɛ si fɔfɔɛ nɛ ɔ mi lɛɛ e pee jã. Yehowa ngɔ huɛ bɔmi nɛ ngɛ binyɛ kɛ e bi a kpɛti ɔ kɛ to huɛ bɔmi nɛ mi wa nɛ ngɛ e kɛ e sɔmɔli a kpɛti ɔ he. Binyɛmɛ fuu nuɔ he kaa bɔ nɛ nyɛmiyo ko nɛ a tsɛɛ lɛ ke Jasmin ɔ nu he ɔ. E de ke: “Ke o pupɔ bimwɔyo ɔ, lɔ ɔ haa nɛ huɛ bɔmi nɛ ba hiɔ o kɛ o bi ɔ nyɛ kpɛti ɔ hiɔ si nyɛ wami be tsuo.”

2. Ke Yehowa bi ko kɛ asafo ɔ kpa bɔmi ɔ, kɛ Yehowa nuɔ he ha kɛɛ?

² Ke Yehowa bi ko kɛ asafo ɔ kpa bɔmi ɔ, Yehowa yɔseɔ. Hyɛ bɔ nɛ e maa dɔ lɛ ha ke e na kaa daa jeha a, e sɔmɔli babauu kpaa fiɛɛmi kɛ asafo mi kpehi yami *.

3. Mɛni Yehowa suɔ nɛ nihi nɛ a kɛ asafo ɔ kpa bɔmi ɔ nɛ a pee?

³ Behi fuu ɔ, wa nyɛmimɛ babauu nɛ a kpa fiɛɛmi kɛ asafo mi kpehi yami loo a kɛ asafo ɔ kpa bɔmi ɔ kpaleɔ kɛ baa asafo ɔ mi ekohu, nɛ ke e ba jã a, wa bua jɔɔ wawɛɛ! Kaa bɔ nɛ Yehowa suɔ nɛ a kpale kɛ ba a, wɔ hu wa suɔ nɛ a kpale kɛ ba. (1 Pet. 2:25) Se mɛni wa ma nyɛ maa pee kɛ ye bua mɛ nɛ a kpale kɛ ba? Loko wa nyɛ ma ha sane bimi nɛ ɔ heto ɔ, e maa hi kaa wa maa le nɔ́ he je nɛ wa nyɛmimɛ nɛ ɔmɛ kpaa fiɛɛmi kɛ asafo mi kpehi yami ɔ.

4. Kɛ ní tsumi nɛ ni komɛ tsuɔ ɔ saa a he ha kɛɛ?

⁴ Ni komɛ ha nɛ a ní tsumi pee oti ngɛ a si himi mi. Nyɛminyumu ko nɛ a tsɛɛ lɛ ke Hung * nɛ e ngɛ Asia a de ke: “I ngɔɔ ye be kɛ ye he wami fuu kɛ tsuɔ ní. I susu kaa ke i ná he lo nya ní babauu ɔ, lɔ ɔ ma ha nɛ ma nyɛ ma sɔmɔ Yehowa saminya. Enɛ ɔ he ɔ, i kɛ ngmlɛfiahi babauu tsuɔ ní. Bɔɔbɔɔbɔɔ ɔ, i bɔni asafo mi kpehi a mi pomi, nɛ nyagbenyagbe ɔ, i kɛ asafo ɔ kpa bɔmi. Satan ngɔɔ níhi nɛ ngɛ je ɔ mi ɔ kɛ sisiɔ nihi bɔɔbɔɔbɔɔ, nɛ a kpaa Mawu sɔmɔmi.”

5. Kɛ nyagba slɔɔtohi nɛ nyɛmiyo ko kɛ kpe ɔ sa e he ha kɛɛ?

⁵ Nyɛmimɛ komɛ ngɛ nɛ nyagbahi nɛ a kɛ ngɛ kpee ɔ haa nɛ a kɔni mi jɔ̃ɔ. Nyɛmiyo ko nɛ a tsɛɛ lɛ ke Anne nɛ e ngɛ Britain nɛ e ngɛ bimɛ enuɔ ɔ de ke: “Ye bimɛ ɔmɛ a kpɛti nɔ kake be nɔmlɔ tso mi he wami kulaa. Kɛ yaa kɛ yaa a, a fiee ye biyi ɔmɛ a kpɛti nɔ kake ngɛ asafo ɔ mi, nɛ ye binyumu ɔmɛ a kpɛti nɔ kake hu ná juɛmi mi nyagba. I hao wawɛɛ, enɛ ɔ he ɔ, i kpa fiɛɛmi kɛ asafo mi kpehi yami.” Wa nuɔ he wawɛɛ ha Anne kɛ e weku ɔ kɛ nihi tsuo nɛ a kɛ si fɔfɔɛ kaa kikɛ ngɛ kpee ɔ!

6. Ke nɔ ko kɛ Kolose Bi 3:13 ɔ tsu we ní ɔ, kɛ lɔ ɔ ma nyɛ ma ha nɛ e kɛ Mawu we bi nɛ kpa bɔmi ha kɛɛ?

⁶ Kane Kolose Bi 3:13. Ní komɛ nɛ nyɛmimɛ komɛ de ɔ gba nyɛmimɛ komɛ a nya wawɛɛ. Bɔfo Paulo tsɔɔ kaa be komɛ ɔ, wa maa na “nɔ́ ko nɛ [wa] maa da nɔ kɛ tu munyu kɛ si” wa nyɛmi ko. E ma nyɛ maa ba kaa a ye wɔ sane nɛ dɛ. Ke wa hyɛ we nɛ hi ɔ, wa maa ngɔ nihi a he abofu kɛ wo wa mi. Dɔdɔɛ nɛ maa hi nɔ ko mi ɔ ma nyɛ ma ha nɛ e kɛ Yehowa we bi nɛ kpa bɔmi. Mo susu nyɛminyumu ko nɛ a tsɛɛ lɛ ke Pablo nɛ e ngɛ South America a níhi a si kpami ɔ he nɛ o hyɛ. Nɔ ko ye lakpa kɛ si lɛ kaa e pee nɔ́ yayami ko, nɛ lɔ ɔ ha nɛ sɔmɔmi he blɔ nɛ e ngɛ ngɛ asafo ɔ mi ɔ je e dɛ. Kɛ e pee e ní ha kɛɛ? Pablo de ke: “Ye mi mi fu wawɛɛ, nɛ bɔɔbɔɔbɔɔ ɔ, i kɛ asafo ɔ kpa bɔmi.”

7. Kɛ nɔ ko he nile nɛ ngɛ lɛ fɔ bue ɔ ma nyɛ maa sa e he ha kɛɛ?

⁷ Ke nɔ ko tɔ̃ Yehowa mlaa nɔ be ko nɛ be ɔ, lɔ ɔ ma nyɛ ma ha nɛ e he nile nɛ hao lɛ wawɛɛ, nɛ e maa nu he kaa Mawu be nyɛe maa suɔ lɛ hu. Ke e pia e he nɛ a na lɛ mɔbɔ po ɔ, loloolo ɔ, e ma nyɛ maa nu he kaa e sɛ, nɛ e be nyɛe maa piɛɛ Mawu we bi a he hulɔ. Nyɛminyumu ko nɛ a tsɛɛ lɛ ke Francisco ɔ nu he jã. E de ke: “A kã ye hɛ mi ejakaa i kɛ ye he wo ajuama bɔmi mi. E ngɛ mi kaa sisije ɔ, i tsa nɔ nɛ i ya asafo mi kpe mohu lɛɛ, se kɛ yaa kɛ yaa a, i hao wawɛɛ nɛ i nu he kaa e sɛ nɛ i piɛɛɔ Yehowa we bi a he. Ye he nile hao mi wawɛɛ, nɛ lɔ ɔ ha nɛ i nu he wawɛɛ kaa Yehowa kɛ ye he yayami ɔ ki mi. Bɔɔbɔɔbɔɔ ɔ, i kɛ asafo ɔ kpa bɔmi.” Kɛ o naa nyɛmimɛ nɛ a kɛ si fɔfɔɛ kaa kikɛ ngɛ kpee ɔ ha kɛɛ? Anɛ o mi mi saa mo ngɛ a he lo? Se nɔ́ nɛ pe kulaa a, kɛ Yehowa naa mɛ ha kɛɛ?

8. Anɛ Yehowa hɛ jeɔ nihi nɛ a sɔmɔ lɛ be ko nɛ be ɔ a nɔ lo? Moo tsɔɔ nya.

⁸ Nihi nɛ a kɛ anɔkuale yemi sɔmɔ Yehowa se a kɛ asafo ɔ kpa bɔmi be bɔɔ ko ɔ, Yehowa hɛ ji a nɔ; nɛ e hɛ ji ní nɛ a tsu ngɛ e sɔmɔmi mi ɔ nɔ. (Heb. 6:10) Gbalɔ Yesaya ngma nɔ́ he tomi nɔ́ ko nɛ sa wawɛɛ kɛ fɔ si. Nɔ́ he tomi nɔ́ nɛ ɔ tsɔɔ kaa Yehowa susuɔ e we bi a he. Yesaya ngma ke: “E maa lɛ e to kuu ɔ kaa to hyɛlɔ kpakpa; e ma bua e to bi ɔmɛ a nya, nɛ e maa hɛɛ mɛ ngɛ e bɔkɔ mi.” (Yes. 40:11) Ke Yehowa to ko laa a, kɛ Yehowa nɛ e ji To Hyɛlɔ Ngua a nuɔ he ha kɛɛ? Sane ko nɛ Yesu bi  e kaseli ɔmɛ ɔ haa nɛ wa naa bɔ nɛ Yehowa nuɔ he ha. E bi mɛ ke: “Kɛ nyɛ susu kɛɛ? Ke nyumu ko ngɛ jijɔ 100 nɛ kake laa a, anɛ e be 99 ɔ sie ngɛ yoku ɔmɛ a nɔ nɛ e sɛ mi konɛ e ya hla nɔ́ nɛ laa a lo? Nɛ ke e na lɛ ɔ, ngɛ anɔkuale mi ɔ, i ngɛ nyɛ dee ke, e nyaa ngɛ lɔ ɔ he kulaa pe 99 nɛ a laa we ɔ he.”​—Mat. 18:12, 13.

9. Kɛ to hyɛli kpakpahi nɛ a hi si blema a pee a ní ngɛ a jijɔ ɔmɛ a he ha kɛɛ? (Hyɛ foni nɛ ngɛ womi ɔ hɛ mi ɔ.)

⁹ Mɛni he je nɛ e da blɔ kaa a kɛ Yehowa to to hyɛlɔ he ɔ? Ejakaa blema a, to hyɛlɔ kpakpa susuɔ e to ɔmɛ a he wawɛɛ. Kaa nɔ hyɛmi nɔ́ ɔ, David kɛ jata kɛ osisiblisi nɔ kunɔ konɛ e kɛ po e to ɔmɛ a he piɛ. (1 Sam. 17:34, 35) Ke jijɔ kake ngmelu po laa a, to hyɛlɔ kpakpa yɔseɔ. (Yoh. 10:3, 14) Jamɛ a to hyɛlɔ ɔ siɔ jijɔ 99 nɛ piɛɔ ngɛ to tsu mi aloo e siɔ mɛ kɛ haa to hyɛli kpahi nɛ e ya hlaa nɔ́ nɛ laa a. Yesu ngɔ nɔ́ he tomi nɔ́ nɛ ɔ kɛ tsu ní nɛ e kɛ tsɔɔ wɔ anɔkuale ko nɛ e he hia wawɛɛ. Yesu de ke: “Ye Tsɛ nɛ ngɛ hiɔwe ɔ sume kaa ni nyafii nɛ ɔmɛ a kpɛti nɔ kake hɛ mi nɛ kpata.”​—Mat. 18:14.

10. Ngɛ Ezekiel 34:11-16 nya a, mɛni Yehowa wo si kaa e maa pee kɛ ha e jijɔhi nɛ a laa a?

¹⁰ Yehowa suɔ wa kpɛti nɔ fɛɛ nɔ, nɛ e suɔ “ni nyafii” nɛ a tla blɔ ɔ hulɔ. Mawu gu gbalɔ Ezekiel nɔ kɛ tsɔɔ kaa e ma hla e jijɔhi nɛ a laa a, nɛ e maa ye bua mɛ konɛ a ha nɛ huɛ bɔmi kpakpa nɛ hi e kɛ mɛ a kpɛti ekohu. Nɛ e tsɔɔ blɔ pɔtɛɛ etɛ komɛ a nɔ nɛ e maa gu kɛ ye bua jijɔhi nɛ a laa a. Nɔ́ nɛ e maa pee ɔ ngɛ kaa nɔ́ nɛ to hyɛli nɛ a ngɛ Israel ɔ pee ɔ. (Kane Ezekiel 34:11-16.) Kekleekle ɔ, to hyɛlɔ ɔ ma hla jijɔ nɛ e laa a, nɛ enɛ ɔ ma bi mɔde bɔmi, nɛ e ma he be hulɔ. Nɛ ke e na jijɔ ɔ, e maa ngɔ lɛ kɛ ba piɛɛ jijɔ kpa amɛ a he. Lɔ ɔ se ɔ, ke e na kaa jijɔ ɔ plaa aloo hwɔ ngɛ lɛ yee ɔ, e maa je suɔmi mi kɛ ye bua lohwe ɔ. E maa fi e pa amɛ a nɔ ha lɛ, e ma wo lɛ, nɛ e ma ha lɛ ní. E sa nɛ asafo mi nikɔtɔmahi nɛ a ji to hyɛli nɛ a hyɛɛ “Mawu to kuu ɔ” nɔ ɔ nɛ a pee ní nɛ ɔmɛ nɔuu kɛ ye bua nihi nɛ a kɛ asafo ɔ kpa bɔmi ɔ. (1 Pet. 5:2, 3) Nikɔtɔma amɛ hlaa jijɔ nɛ ɔmɛ, a yeɔ bua mɛ  konɛ a kpale ba piɛɛ to kuu ɔ he, nɛ a jeɔ suɔmi kpo kɛ tsɔɔ mɛ kɛ gu yemi kɛ buami nɛ a kɛ haa mɛ konɛ a ba pee Yehowa huɛmɛ ekohu ɔ nɔ. *

11. Mɛni nɛ to hyɛlɔ kpakpa le?

¹¹ To hyɛlɔ kpakpa le kaa jijɔ ko ma nyɛ maa laa. Nɛ ke jijɔ ko laa a, to hyɛlɔ ɔ be e tue gblae. Nyɛ ha nɛ wa susu nɔ hyɛmi nɔ́ kpakpa nɛ Yehowa pee benɛ e ngɛ e sɔmɔli komɛ nɛ a tla blɔ be bɔɔ ɔ ye buae ɔ.

12. Kɛ Yehowa tsu Yona si fɔfɔɛ ɔ he ní ha kɛɛ?

¹² Gbalɔ Yona tu fo ngɛ ní tsumi nɛ Yehowa kɛ ha lɛ ɔ nya. Se kɛ̃ ɔ, Yehowa kua we Yona. Kaa bɔ nɛ to hyɛlɔ kpakpa peeɔ ɔ, Yehowa ya hla lɛ nɛ e ha nɛ e ná he wami nɛ e hia a konɛ e nyɛ nɛ e tsu ní tsumi nɛ e kɛ wo e dɛ ɔ. (Yona 2:7; 3:1, 2) Pee se ɔ, Mawu ngɔ tso ko kɛ pee nɔ hyɛmi nɔ́ kɛ ye bua Yona konɛ e na bɔ nɛ adesa fɛɛ adesa wami he jua wa ha lɛ ha. (Yona 4:10, 11) Mɛni wa ma nyɛ maa kase ngɛ mi? E sɛ nɛ asafo mi nikɔtɔmahi a he nɛ sɔ kɛ ngmɛɛ nihi nɛ a kpa fiɛɛmi kɛ asafo mi kpehi yami ɔ a he. Mohu ɔ, e sa nɛ nikɔtɔma amɛ nɛ a bɔ mɔde nɛ a le nɔ́ nɛ ha nɛ jijɔ ɔ tla blɔ. Nɛ ke jijɔ ko kpale kɛ ba Yehowa ngɔ ɔ, e sa nɛ nikɔtɔma amɛ nɛ a ya nɔ nɛ a je suɔmi kpo kɛ tsɔɔ lɛ.

13. Mɛni wa ma nyɛ maa kase ngɛ blɔ nɔ nɛ Yehowa gu kɛ tsu nɔ nɛ ngma La 73 ɔ sane ɔ he ní ɔ mi?

¹³ Nɔ nɛ ngma La 73 ɔ kɔni mi jɔ̃ benɛ e na bɔ nɛ yayami peeli bɔɔ ha a. Enɛ ɔ ha nɛ e ná susumi kaa Mawu suɔmi nya ní peemi he hia we mɔ. (La 73:12, 13, 16) Kɛ Yehowa tsu sane ɔ he ní ha kɛɛ? E bui la polɔ ɔ fɔ. Mohu ɔ, Mawu ha nɛ a ngma munyu nɛ ɔ kɛ wo Baiblo ɔ mi. Nyagbenyagbe ɔ, la polɔ ɔ ba na kaa huɛ bɔmi kpakpa nɛ ngɛ e kɛ Yehowa a kpɛti ɔ he hia, nɛ se nami ngɛ he pe ní kpahi tsuo. (La 73:23, 24, 26, 28) Mɛni wa kaseɔ ngɛ mi? E sɛ nɛ asafo mi nikɔtɔmahi kɛ oya yemi nɛ kojo nihi nɛ eko ɔ, a kɛ a munyu tumi kɛ a ní peepee tsɔɔ kaa se nami tsɔ ko be Yehowa sɔmɔmi he ɔ. Mohu ɔ, e sa nɛ nikɔtɔma amɛ nɛ a bɔ mɔde nɛ a le nɔ́ tutuutu nɛ ha nɛ nɔ ɔ  susu jã aloo e pee jã a. Jã nɛ a maa pee ɔ ma ha nɛ a le ngmami tutuutu nɛ maa wo nɔ ɔ he wami.

14. Mɛni he je nɛ Eliya hia yemi kɛ buami ɔ, nɛ kɛ Yehowa ye bua lɛ ha kɛɛ?

¹⁴ Gbalɔ Eliya tu Manyɛ Yezebel nya fo. (1 Ma. 19:1-3) E susu kaa lɛ nɔ kake too pɛ lɛ e ngɛ Yehowa sɔmɔe kaa gbalɔ, enɛ ɔ ha nɛ e nu he kaa e ní tsumi ɔ he be se nami. Eliya hao wawɛɛ, nɛ e ná nɛ e gbo. (1 Ma. 19:4, 10) Ngɛ Eliya si fɔfɔɛ nɛ ɔ tsuo se ɔ, Yehowa bui lɛ fɔ, mohu ɔ, Yehowa ma nɔ mi kɛ ha lɛ kaa e piɛɛ e he, nɛ e ma nyɛ ma ná hɛ kɛ nɔ fɔmi ngɛ e he wami ɔ mi, ejakaa ní tsumi babauu ngɛ nɛ e ma tsu. Yehowa bu Eliya tue saminya, nɛ e kɛ ní tsumi ehehi wo e dɛ. (1 Ma. 19:11-16, 18) Mɛni wa kaseɔ ngɛ mi? E sa nɛ wɔ tsuo wa je mi mi jɔmi kpo kɛ tsɔɔ Yehowa jijɔ ɔmɛ. Se titli ɔ, asafo mi nikɔtɔmahi ji nihi nɛ e sa nɛ a pee jã. Ke nɔ ko tu munyu basabasa, aloo e susu kaa Yehowa kɛ e yayami ɔmɛ be lɛ kee po ɔ, e sa nɛ asafo mi nikɔtɔma amɛ nɛ a bu lɛ tue saminya bemi nɛ e je e tsui mi kɛ ngɛ munyu tue ɔ. Lɔ ɔ se ɔ, a maa bɔ mɔde kaa a ma ha nɛ to ɔ nɛ laa a nɛ nu he kaa Yehowa suɔ lɛ.

15. Ngɛ Yohane 6:39 ɔ nya a, kɛ Yesu naa e Tsɛ ɔ jijɔ ɔmɛ ha kɛɛ?

¹⁵ Kɛ Yehowa suɔ nɛ waa pee wa ní ngɛ e jijɔhi nɛ a laa a he ha kɛɛ? Yesu pee enɛ ɔ he nɔ hyɛmi nɔ́ kɛ ha wɔ. Yesu le kaa Yehowa to ɔmɛ tsuo a he jua wa ngɛ Mawu hɛ mi, lɔ ɔ he ɔ,  e pee nɔ́ fɛɛ nɔ́ nɛ e ma nyɛ konɛ e kɛ ye bua “Israel we jijɔ ɔmɛ nɛ a laa amɛ” nɛ a kpale kɛ ba Yehowa ngɔ. (Mat. 15:24; Luka 19:9, 10) Akɛnɛ Yesu ji to hyɛlɔ kpakpa he je ɔ, e bɔ mɔde wawɛɛ nɛ e po Yehowa jijɔ ɔmɛ a he piɛ konɛ eko ko laa.​—Kane Yohane 6:39.

16-17. Kɛ e sa nɛ asafo mi nikɔtɔmahi nɛ a na nihi nɛ a tla blɔ nɛ a maa ye bua mɛ nɛ a kpale kɛ ba Yehowa ngɔ ɔ ha kɛɛ? (Hyɛ daka nɛ ji, “ Bɔ Nɛ Jijɔ Nɛ Laa a Ma Nyɛ Maa Nu He Ha.”)

¹⁶ Bɔfo Paulo wo asafo mi nikɔtɔmahi nɛ a ngɛ Efeso ɔ he wami kaa a kase Yesu. E de ke: “E sa nɛ nyɛɛ ye bua nihi nɛ a gbɔjɔ ɔ, konɛ nyɛ ha nɛ munyu nɛ Nyɔmtsɛ Yesu tu ɔ nɛ e hi nyɛ juɛmi mi, be mi nɛ lɛ nitsɛ e de ke: ‘Bua jɔmi babauu ngɛ nɔ́ hami mi pe nɔ́ ngɔmi’ ɔ.” (Níts. 20:17, 35) Ngmami ɔ ha nɛ e pee heii kaa mwɔnɛ ɔ, asafo mi nikɔtɔmahi hu ngɛ blɔ nya ní tsumi ko nɛ e he hia wawɛɛ, nɛ lɔ ɔ ji kaa a hyɛ Yehowa we bi a nɔ. Asafo mi nɔkɔtɔma ko nɛ a tsɛɛ lɛ ke Salvador nɛ e ngɛ Spain ɔ de ke: “Ke i susu bɔ nɛ Yehowa hyɛɛ e jijɔhi nɛ a laa a nɔ ha a he ɔ, lɔ ɔ woɔ mi he wami konɛ ma pee nɔ́ fɛɛ nɔ́ nɛ ma nyɛ kɛ ye bua mɛ. Kaa asafo mi nɔkɔtɔma a, i le kaa Yehowa suɔ nɛ ma hyɛ e jijɔ ɔmɛ a nɔ.”

¹⁷ Nihi tsuo nɛ wa tu a he munyu ngɛ ní kasemi nɛ ɔ mi kaa a tla blɔ ɔ, a ye bua mɛ nɛ a kpale kɛ ba Yehowa ngɔ ekohu. Amlɔ nɛ ɔ hu ɔ, nihi babauu nɛ a tla blɔ ɔ suɔ nɛ a kpale kɛ ba Yehowa ngɔ ekohu. Ngɛ ní kasemi nɛ nyɛɛ se ɔ mi ɔ, wa ma susu nɔ́ nɛ wa ma nyɛ maa pee kɛ ye bua mɛ nɛ a kpale kɛ ba Yehowa ngɔ ɔ he.