LOKO Yesu maa kpale kɛ ho hiɔwe ya a, e de kaseli ɔmɛ ke: ‘Nyɛ maa ye odase ha mi kɛ yaa su je ɔ nyagbe he tɔɔ.’ (Bɔfo Ɔmɛ A Ní Tsumi 1:8) Kɛ a ma plɛ kɛ fiɛɛ ngɛ je ɔ mi tsuo ha kɛɛ?

Martin Goodman, nɛ e ji tsɔɔlɔ kpanaa ngɛ Oxford University ɔ de ke, “blɔ nya ní tsumi nɛ fɔɔ si ngɛ Kristofohi a nɔ ɔ, ha nɛ a je ekpa ngɛ jami kpa amɛ a he, nɛ jã nɛ e ji ngɛ Yuda bi nɛ a hi Roma nɔ yemi ɔ sisi ɔ hu a blɔ fa mi.” Yesu fiɛɛ ngɛ he slɔɔtoslɔɔtohi. E sa kaa anɔkuale Kristofohi nɛ a kase lɛ konɛ a fiɛɛ “Mawu matsɛ yemi ɔ he sane kpakpa a” ngɛ he fɛɛ he. E sa kaa a hla nihi nɛ a suɔ kaa a maa le anɔkuale ɔ a se blɔ. (Luka 4:43) Enɛ ɔ he ɔ, ngɛ kaseli ɔmɛ a be ɔ mi ɔ, “bɔfohi” ngɛ. Munyungu nɛ ji bɔfohi ɔ sisi ji nihi nɛ a tsɔ mɛ kaa a ya pee nɔ́ ko. (Luka 6:13) Yesu fã e se nyɛɛli ɔmɛ ke: “Nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli.”​—Mateo 28:18-20.

Mwɔnɛ ɔ, Yesu bɔfo 12 ɔmɛ be zugba a nɔ hu mohu lɛɛ, se Yehowa sɔmɔli fuu ngɛ mɛ kasee. Ke a de mɛ ke a ya fiɛɛ ngɛ he nɛ fiɛɛli fuu a he hia ngɛ ɔ, a deɔ ke: “I ngɛ hiɛ ɔ! Moo tsɔ mi!” (Yesaya 6:8) Ni komɛ hia kɛ ho hehi tsitsatsitsa ya nɛ a ya ngɛ fiɛɛe ngɛ lejɛ ɔ. Nimli nɛ ɔmɛ a kpɛti ni komɛ ji nimli akpehi abɔ nɛ a ya Gilead Sukuu ɔ. Ni komɛ hu hia kɛ ho he kpahi ya ngɛ mɛ nitsɛmɛ a mahi a mi. Nihi fuu hu kase gbi kpa konɛ a kɛ ye bua asafo ko, loo kuu ko. Tsa pi be tsuaa be nɛ enɛ ɔ peemi ngɛ gbɔjɔɔ, se nyɛmimɛ nyumuhi kɛ yihi kaa jã a suɔ kaa a maa ngɔ a he kɛ sã afɔle kɛ tsɔɔ kaa a  suɔ Yehowa kɛ nimli. Enɛ ɔ he ɔ, a to a níhi a he blɔ nya saminya, nɛ a ngɔ a be, a he wami, kɛ a sika kɛ sã afɔle konɛ a nyɛ nɛ a ya fiɛɛ ngɛ hehi nɛ fiɛɛli fuu a he hia ngɛ. (Luka 14:28-30) Ní nɛ nyɛmimɛ nyumu kɛ yi nɛ ɔmɛ ngɛ tsue ɔ he hia wawɛɛ nitsɛ.

Tsa pi wɔ tsuo nɛ wa ma nyɛ ma ya sɔmɔ ngɛ he nɛ fiɛɛli fuu a he hia ngɛ, aloo wa ma nyɛ maa kase gbi kpa. Se wɔ tsuo wa ma nyɛ maa pee wa he ma se sane kpakpa fiɛɛli ngɛ wa we asafo ɔmɛ a mi.

Ngɛ kaseli ɔmɛ a be ɔ mi ɔ, e ngɛ mi kaa Kristofohi fuu hi si nɛ pi ma se sane kpakpa fiɛɛli ji mɛ mohu lɛɛ, se a fiɛɛ kɛ kã ngɛ mɛ nitsɛmɛ a mahi a mi. Paulo de Timoteo ke: “Bɔɔ sane kpakpa a fiɛɛmi he mɔde wawɛɛ, konɛ o pee Mawu sɔmɔlɔ kpakpa.” (2 Timoteo 4:5) Munyu nɛ ɔ kɔɔ Kristofohi tsuo nɛ a hi si ngɛ kaseli ɔmɛ a be ɔ mi ɔ a he, nɛ mwɔnɛ ɔ, e kɔɔ wɔ hu wa he. E sa nɛ Kristofohi tsuo nɛ a bu fami nɛ a kɛ ha mɛ kaa a fiɛɛ Matsɛ Yemi sɛ gbi ɔ nɛ a pee nihi kaseli ɔ tue. Ngɛ wɔ nitsɛmɛ wa we asafo ɔmɛ a mi po ɔ, wa ma nyɛ maa gu blɔhi fuu nɔ kɛ pee wa ní kaa ma se sane kpakpa fiɛɛli.

Kaa nɔ hyɛmi nɔ́ ɔ, ke ma se sane kpakpa fiɛɛli hia kɛ ho ma kpa ko nɔ ya a, a naa kaa jamɛ a ma a mi si himi ngɛ ekpa kulaa ngɛ ma nɛ a je mi ɔ he. Ke wa be nyɛe ma ya sɔmɔ ngɛ he nɛ fiɛɛli fuu a he hia ngɛ po ɔ, wa ma nyɛ maa gu blɔ slɔɔtohi a nɔ kɛ fiɛɛ kɛ tsɔɔ nihi? Kaa nɔ hyɛmi nɔ́ ɔ, ngɛ jeha 1940 ɔ mi ɔ, a wo wa nyɛmimɛ ɔmɛ he wami kaa a ye nihi odase ngɛ gbɛjegbɛhi a he si kake daa otsi. Anɛ o ye nihi odase ngɛ gbɛjegbɛ he hyɛ lo? Anɛ o kɛ atsɛ̃se fiɛɛ hyɛ lo? Oti ɔ ji, Anɛ o suɔ kaa o maa gu blɔ kpahi a nɔ kɛ fiɛɛ sane kpakpa a kɛ tsɔɔ nihi lo?

Ke o ná juɛmi nɛ da ngɛ fiɛɛmi ní tsumi ɔ he ɔ, o maa fiɛɛ kɛ kã. Behi fuu ɔ, nihi nɛ a ya fiɛɛɔ ngɛ he nɛ fiɛɛli fuu a he hia ngɛ, aloo a kaseɔ gbi kpa a ji fiɛɛli nɛ a ngɛ níhi a si kpami, nɛ a ma nyɛ maa ye bua asafo ɔ wawɛɛ. Kaa nɔ hyɛmi nɔ́ ɔ, a nyɛɛɔ hɛ mi ngɛ fiɛɛmi ní tsumi ɔ mi. Jehanɛ hu ɔ, ma se sane kpakpa fiɛɛli nyɛɛɔ hɛ mi ngɛ asafo ɔ mi kɛ ya siɔ benɛ nyɛmimɛ nyumuhi nɛ a ngɛ jamɛ a ma a mi ɔ a he ba suɔ kɛ ha jã peemi. Ke o ji nyumu nɛ a baptisi mo ɔ, anɛ o “suɔ kaa” o ma sɔmɔ kaa asafo mi sɔmɔlɔ loo asafo mi nɔkɔtɔma konɛ o ye  bua nyɛmimɛ nyumuhi kɛ yihi nɛ o kɛ mɛ ngɛ asafo mi ɔ lo?​—1 Timoteo 3:1.

Wa ma nyɛ maa gu blɔ kpahi a nɔ kɛ ye bua ngɛ wa we asafo ɔ mi hulɔ. Wa wa jio, wa wɛ jio, wa ma nyɛ ma ‘wa’ wa nyɛmimɛ Kristofohi nɛ a hia yemi kɛ buami ɔ.​—Kolose Bi 4:11.

Ke wa suɔ kaa wa maa ye bua wa nyɛmimɛ nyumuhi kɛ yihi ɔ, lɛɛ e sa kaa waa le mɛ saminya. Baiblo ɔ woɔ wɔ he wami kaa ke wa kpe ɔ, ‘wa susu wa sibi a he,’ konɛ waa le a hiami níhi. (Hebri Bi 10:24) Enɛ ɔ tsɔɔ we kaa e sa nɛ waa bɔ mɔde kaa wa maa le nihi a laami sanehi. Nɔ́ nɛ e tsɔɔ ji kaa e sa nɛ waa bɔ mɔde nɛ waa nu wa nyɛmimɛ nyumuhi kɛ yihi a sisi, nɛ waa le a hiami níhi. Eko ɔ, e ma bi nɛ waa pee ní pɔtɛɛ komɛ ha mɛ, waa wo a bua, aloo waa kɛ Baiblo ɔ nɛ wo mɛ he wami. Ngɛ anɔkuale mi ɔ, yemi kɛ buami komɛ ngɛ nɛ asafo mi nikɔtɔmahi kɛ asafo mi sɔmɔli pɛ lɛ a ma nyɛ ma tsu he ní. (Galatia Bi 6:1) Se wɔ tsuo wa ma nyɛ maa ye bua nyɛmimɛ nyumuhi kɛ yihi nɛ a wa ngɛ jeha mi, loo weku komɛ nɛ a kɛ haomihi ngɛ kpee ɔ.

Nyɛminyumu Salvatore nine su yemi kɛ buami ko kaa jã a nɔ. E he fĩ lɛ ngɛ sika blɔ fa mi, enɛ ɔ he ɔ, e jua e ní tsumi, kɛ e we, kɛ níhi fuu nɛ e weku ɔ ngɛ ɔ. E hao wawɛɛ ngɛ e weku ɔ he je. Weku ko nɛ ngɛ asafo ɔ mi ɔ na kaa nyɛminyumu ɔ kɛ e weku ɔ hia yemi kɛ buami. A ha Salvatore sika, nɛ a hla ní tsumi ha e kɛ e yo ɔ. Jehanɛ hu ɔ, a pɔɔ Salvatore kɛ e weku ɔ slaami gbɔkuɛ, nɛ ke a kɛ mɛ ngɛ ní sɛɛe ɔ, a buɔ mɛ tue, nɛ a woɔ mɛ he wami. A ba pee huɛmɛ nɛ nyu bi ngɛ a kpɛti. Amlɔ nɛ ɔ, weku enyɔ ɔmɛ tsuo kaiɔ bɔ nɛ a ná bua jɔmi ngɛ jamɛ a haomi be ɔ mi ha a.

Anɔkuale Kristofohi suɔ kaa a kɛ nihi ma susu a hemi kɛ yemi ɔ he. E sa nɛ waa kase Yesu, nɛ wa ha nɛ nɔ tsuaa nɔ nɛ le ní kpakpahi nɛ Mawu wo si kaa e maa pee ɔ. Wa ma nyɛ maa hia kɛ ho he kpa ya jio, wa be nyɛe jio, wɔ tsuo wa ma nyɛ ma tsu wa blɔ fa mi nɔ́ kɛ ye bua nihi ngɛ wa we asafo ɔmɛ a mi. (Galatia Bi 6:10) Ke wa pee níhi kɛ ye bua nihi ɔ, wa ma ná bua jɔmi, nɛ wa maa ya nɔ “ma tsu ní kpakpa sɔuu.”​—Kolose Bi 1:10; Bɔfo Ɔmɛ A Ní Tsumi 20:35.