1. Mɛni nɛ e sa nɛ nɔ ko nɛ pee loko e je tsu mami sisi?

NGƆƆ lɛ kaa nɔ ko mwɔ e yi mi kpɔ kaa e maa ma tsu. E le tsu pɔtɛɛ nɛ e suɔ nɛ e ma. Anɛ lɔ ɔ tsɔɔ kaa e sa nɛ e ya he níhi nɛ e kɛ maa ma tsu ɔ ekomɛ oya nɔuu nɛ e je tsu ɔ mami sisi lo? Dɛbi. Loko e maa je tsu ɔ mami sisi ɔ, nɔ́ ko ngɛ nɛ e he hia nɛ e sa nɛ e pee. Lɔ ɔ ji kaa e maa bu nya nɛ e hyɛ sika nɛ e maa hia. Mɛni he je? Ejakaa e sa nɛ e le ke ji sika nɛ e ngɛ ɔ maa su tsu ɔ mami lo. Ke e nyɛ nɛ e bu nya, nɛ e le sika abɔ nɛ e maa hia loko e je sisi ɔ, lɔ ɔ maa ye bua nɛ e ma nyɛ maa ma tsu ɔ kɛ gbe nya.

2. Ngɛ Luka 14:27-30 ɔ nya a, mɛni e sa nɛ o susu he saminya loko o ha nɛ a baptisi mo?

² Anɛ suɔmi nɛ o ngɛ kɛ ha Yehowa a ha nɛ o pee klaalo kaa o ma ha nɛ a baptisi mo lo? Ke jã a, lɛɛ o si fɔfɔɛ ɔ ngɛ kaa nɔ ɔ nɛ e ngɛ hlae nɛ e ma tsu ɔ. Mɛni he je nɛ wa deɔ jã a? Mo ha nɛ wa susu Yesu munyu nɛ ngɛ Luka 14:27-30 ɔ he nɛ waa hyɛ. (Kane.) Yesu ngɛ e kaselɔ nɛ nɔ ko maa pee ɔ mi tsɔɔe. Ke wa suɔ nɛ waa nyɛɛ Yesu se ɔ, e sa nɛ waa pee klaalo kaa wa maa da nyagbahi nɛ waa kɛ maa kpe ɔ a nya, nɛ́ waa kɛ ní komɛ hu nɛ sã afɔle. (Luka 9:23-26; 12:51-53) Enɛ ɔ he ɔ, loko o ma ha nɛ a baptisi mo ɔ, e sa nɛ o susu nyagbahi nɛ o kɛ ma nyɛ maa kpe kaa Kristo kaselɔ ɔ he saminya. Lɔ ɔ maa ye bua mo nɛ o dla o he kaa o ma sɔmɔ Mawu kaa anɔkuale Kristofo no nɛ a baptisi lɛ.

3. Mɛni he wa ma susu ngɛ ní kasemi nɛ ɔ mi?

³ Ke nɔ ko ba pee Kristo kaselɔ nɛ a baptisi lɛ ɔ, e ma bi nɛ e da nyagbahi nɛ e kɛ maa kpe ɔ nya, nɛ́ e kɛ ní kpahi hu nɛ sã afɔle. Se anɛ se nami ngɛ jã peemi he lo? Ee! Baptisimi ngɔɔ jɔɔmi babauu kɛ baa amlɔ nɛ ɔ kɛ hwɔɔ se tsuo. Nyɛ ha nɛ wa susu sane bimi komɛ nɛ a he hia wawɛɛ nɛ kɔɔ  baptisimi he ɔ he nɛ waa hyɛ. Jã peemi maa ye bua mo konɛ o ha sane bimi nɛ ji, “Anɛ i pee klaalo kaa ma ha nɛ a baptisi mi lo?” ɔ heto.

4. (a) Mɛni ji he nɔ jɔɔmi? (b) Kaa bɔ nɛ Mateo 16:24 ɔ tsɔɔ ɔ, mɛni nɛ nɔ ko he nɛ e ma “kua” a tsɔɔ?

⁴ Mɛni ji he nɔ jɔɔmi? Loko o ma ha nɛ a baptisi mo ɔ, e sa nɛ o jɔɔ o he nɔ. Ke o je o tsui mi nɛ o sɔle ha Yehowa, nɛ o de lɛ kaa o suɔ nɛ o sɔmɔ lɛ o wami be tsuo ɔ, lɔ ɔ tsɔɔ kaa o jɔɔ o he nɔ. Ke o jɔɔ o he nɔ ha Mawu ɔ, lɔ ɔ tsɔɔ kaa o “kua” o he. (Kane Mateo 16:24.) Kɛ je lɔ ɔ se kɛ yaa a, Yehowa nɔ́ ji mo. Enɛ ɔ ji he blɔ nɛ se be. (Rom. 14:8) Ke e ba jã a, o ngɛ Yehowa dee ke kɛ je jamɛ a ligbi ɔ kɛ yaa a, nɔ́ nɛ he hia mo ngɛ o si himi mi ji kaa o ma sɔmɔ lɛ, se pi kaa o maa pee nɔ́ nɛ mo nitsɛ o suɔ. O he nɔ jɔɔmi ɔ ji kita nɛ o kã Mawu. Yehowa nyɛ we wa nɔ kaa wa kã lɛ jamɛ a kita a. Se ke wa pee jã a, e hyɛɛ blɔ kaa waa ye nɔ.​—La 116:12, 14.

5. Mɛni slɔɔto lɛ ngɛ he nɔ jɔɔmi kɛ baptisimi a kpɛti?

⁵ Mɛni slɔɔto lɛ ngɛ he nɔ jɔɔmi kɛ baptisimi a kpɛti? He nɔ jɔɔmi ji nɔ́ ko nɛ mo nitsɛ o maa pee ngɛ laami mi; e ji nɔ́ ko nɛ ngɛ o kɛ Yehowa nyɛ kpɛti. Baptisimi ji nɔ́ ko nɛ a peeɔ ngɛ ma hɛ mi. Behi fuu ɔ, a peeɔ ngɛ kpɔ mi kpehi kɛ kpokpa nɔ kpehi a sisi. Ke a baptisi mo ɔ, e haa nɛ ni kpahi naa kaa o jɔɔ o he nɔ kɛ ha Yehowa momo. * Enɛ ɔ he ɔ, baptisimi haa nɛ ni kpahi naa kaa o suɔ Yehowa o Mawu ɔ kɛ o tsui tsuo, o susuma tsuo, o juɛmi tsuo kɛ o he wami tsuo, nɛ o fia o pɛɛ si kaa o ma sɔmɔ lɛ kɛ ya neneene.​—Maak. 12:30.

6-7. Ngɛ 1 Petro 3:18-22 ɔ nya a, mɛni ji yi mi tomi enyɔ komɛ a he je nɛ e he hia nɛ a baptisi wɔ?

⁶ Anɛ e he hia kaa o ma ha nɛ a baptisi mo lo? Mo susu munyu nɛ ngɛ 1 Petro 3:18-22 ɔ he nɛ o hyɛ. (Kane.) Kaa bɔ nɛ daka a nɛ Noa kpɛ ɔ ji odase nɛ tsɔɔ kaa e ngɛ hemi kɛ yemi ɔ, mo hu o baptisimi ɔ ji odase nɛ tsɔɔ kaa o jɔɔ o he nɔ kɛ ha Yehowa. Se anɛ baptisimi he hia lo? Ee, e he hia. Petro tsɔɔ nɔ́ he je nɛ e he hia. Kekleekle ɔ, baptisimi ngɛ o “yi wami hee.” Ke waa kɛ wa ní peepee tsɔɔ kaa wa ngɛ hemi kɛ yemi ngɛ Yesu mi, wa he ye kaa e gbo kɛ ha wɔ, a tle lɛ si kɛ ho hiɔwe ya, nɛ e “ngɛ Mawu hiɔ nɔ” ɔ, baptisimi ma nyɛ ma he wa yi wami.

⁷ Nɔ́ nɛ ji enyɔ ɔ, baptisimi haa nɛ wa náa “he nile kpakpa.” Ke wa jɔɔ wa he nɔ ha Mawu, nɛ wa ha nɛ a baptisi wɔ ɔ, huɛ bɔmi klɛdɛɛ ko ba hiɔ waa kɛ lɛ wa kpɛti. Akɛnɛ wa je wa tsui mi nɛ wa pia wa he, nɛ wa ngɛ hemi kɛ yemi ngɛ kpɔmi nɔ́ ɔ mi he je ɔ, Mawu kɛ wa he yayami ɔmɛ keɔ wɔ. Enɛ ɔ haa nɛ wa náa he nile kpakpa.

8. Mɛni nɔ e sa nɛ o da kɛ mwɔ o yi mi kpɔ kaa o ma ha nɛ a baptisi mo?

⁸ Mɛni nɛ e sa nɛ o da nɔ kɛ mwɔ o yi mi kpɔ kaa o ma ha nɛ a baptisi mo? Kɛ gu Baiblo ɔ nɛ o ba kase saminya a nɔ ɔ, o ba le Yehowa he ní fuu, o ba le bɔ nɛ e ngɛ ha kɛ bɔ nɛ e peeɔ e ní ha. Níhi nɛ o kase ngɛ e he ɔ ta o tsui he, nɛ lɔ ɔ ha nɛ suɔmi nɛ o ngɛ kɛ ha lɛ ɔ mi wa. E sa nɛ o da suɔmi nɛ o ngɛ kɛ ha Yehowa a nɔ kɛ mwɔ o yi mi kpɔ kaa o ma ha nɛ a baptisi mo.

9. Kaa bɔ nɛ a tsɔɔ ngɛ Mateo 28:19, 20 ɔ, mɛni nɛ nɔ ko nɛ a maa baptisi lɛ ngɛ Tsɛ ɔ biɛ mi, Bi ɔ biɛ mi, kɛ mumi klɔuklɔu ɔ biɛ mi ɔ tsɔɔ?

⁹ Nɔ́ kpa ko hu nɛ o ma nyɛ maa da nɔ kɛ ha nɛ a baptisi mo ji Baiblo ɔ mi anɔkualehi nɛ o kase nɛ o he ye ɔ. Mo susu nɔ́ nɛ Yesu de  benɛ e fã kaa a pee nihi kaseli ɔ he nɛ o hyɛ. (Kane Mateo 28:19, 20.) Yesu tsɔɔ kaa e sa nɛ a baptisi nihi “ngɛ Tsɛ ɔ biɛ mi, ngɛ Bi ɔ biɛ mi, kɛ ngɛ mumi klɔuklɔu ɔ biɛ mi.” Mɛni munyu nɛ ɔ tsɔɔ? E sa nɛ o kɛ o tsui tsuo nɛ he Baiblo mi anɔkualehi nɛ kɔɔ Yehowa, e Bi Yesu, kɛ mumi klɔuklɔu ɔ he ɔ nɛ o ye. Anɔkuale nɛ ɔmɛ ngɛ he wami, nɛ a ma nyɛ maa ta o tsui he. (Heb. 4:12) Nyɛ ha nɛ wa susu anɔkuale nɛ ɔmɛ ekomɛ a he nɛ waa hyɛ.

10-11. Mɛni anɔkualehi nɛ o kase kɛ kɔ Tsɛ ɔ he nɛ o he ye?

¹⁰ Mo susu bɔ nɛ o pee o ní ha benɛ o kase anɔkualehi nɛ nyɛɛ se nɛ kɔɔ Tsɛ ɔ he ɔ he nɛ o hyɛ: E biɛ ji ‘Yehowa,’ lɛ “nɔ kake too lɛ [e] ngɛ he wami pe nɔ tsuaa nɔ ngɛ je ɔ mi tsuo,” nɛ lɛ pɛ ji “anɔkuale Mawu.” (La 83:18; Yes. 37:16, NW.) Lɛ ji wa Bɔlɔ kɛ “wa yi wami helɔ.” (La 3:8; 36:9) E to blɔ nya nɛ e kɛ ma kpɔ̃ wɔ kɛ je yayami kɛ gbenɔ dɛ mi, nɛ e ha wɔ neneene wami he hɛ nɔ kami. (Yoh. 17:3) O he nɔ jɔɔmi kɛ o baptisimi ɔ ma ha nɛ a le mo kaa Yehowa Odasefo no. (Yes. 43:10-12) O ma ba piɛɛ Mawu sɔmɔli nɛ a ngɛ je kɛ wɛ nɛ a ji weku ɔ a he. A ha nɛ ni kpahi leɔ Mawu biɛ ɔ, nɛ a bua jɔ kaa a kɛ Mawu biɛ ɔ tsɛɛ mɛ.​—La 86:12.

¹¹ E ji he blɔ ngua nɛ wa ná kaa wa le nɔ́ nɛ Baiblo ɔ tsɔɔ kɛ kɔɔ Tsɛ ɔ he! Ke o he anɔkuale nɛ ɔmɛ nɛ a he jua wa a ye ɔ, e maa ta o tsui he, nɛ e maa wo mo he wami konɛ o jɔɔ o he nɔ ha Yehowa, nɛ́ o ha nɛ a baptisi mo.

12-13. Mɛni anɔkualehi nɛ o kase ngɛ Bi ɔ he nɛ o he ye?

¹² Benɛ o kase anɔkualehi nɛ nyɛɛ se nɛ kɔɔ Bi ɔ he ɔ, kɛ o pee o ní ha kɛɛ? Ngɛ Mawu se ɔ, Yesu ji nɔ nɛ e nɔ kuɔ pe kulaa ngɛ je ɔ mi tsuo. Lɛ ji wa Kpɔlɔ. E je e suɔmi mi nɛ e ngɔ e wami kɛ ha ngɛ wa he. Ke wa ngɔ wa ní peepee kɛ tsɔɔ kaa wa ngɛ hemi kɛ yemi ngɛ kpɔmi nɔ́ ɔ mi ɔ, a ma nyɛ maa ngɔ wa he yayami ɔmɛ kɛ ke wɔ, huɛ bɔmi kpakpa maa hi waa kɛ Mawu wa kpɛti, nɛ wa ma ná neneene wami hulɔ. (Yoh. 3:16) Yesu ji wa we Osɔfo Nɔkɔtɔma Pe Kulaa. E suɔ nɛ e ye bua wɔ konɛ wa ná kpɔmi nɔ́ ɔ he se, nɛ huɛ bɔmi kpakpa nɛ hi waa kɛ Mawu wa kpɛti. (Heb. 4:15; 7:24, 25) Lɛ ji Mawu Matsɛ Yemi ɔ nya Matsɛ, nɛ Yehowa maa gu e nɔ kɛ tsɔ e biɛ ɔ he, kɛ po nɔ́ yayami se, nɛ e maa ngɔ neneene jɔɔmi kɛ ba ngɛ Paradeiso ɔ mi. (Mat. 6:9, 10; Kpoj. 11:15) Yesu ji nɔ nɛ e sa nɛ waa kase. (1 Pet. 2:21) E ngɔ e wami kɛ ha kɛ pee Mawu suɔmi nya ní, nɛ e kɛ pee nɔ hyɛmi nɔ́ kpakpa kɛ ha wɔ.​—Yoh. 4:34.

¹³ Ke o he nɔ́ nɛ Baiblo ɔ tsɔɔ ngɛ Yesu he ɔ ye ɔ, o ma ba ná suɔmi kɛ ha Mawu Bi nɛ e suɔ lɛ ɔ. Jamɛ a suɔmi ɔ maa wo mo he wami konɛ o ngɔ o wami be tsuo kɛ pee Mawu suɔmi nya ní kaa bɔ nɛ Yesu pee ɔ. Nɛ lɔ ɔ maa ye bua mo konɛ o jɔɔ o wami nɔ kɛ ha Yehowa nɛ a baptisi mo.

14-15. Mɛni anɔkualehi nɛ o kase ngɛ mumi klɔuklɔu ɔ he nɛ o he ye?

¹⁴ Benɛ o kase anɔkuale nɛ ɔmɛ nɛ kɔɔ mumi klɔuklɔu ɔ he ɔ, mɛni lɛ ba o juɛmi mi? Mumi klɔuklɔu ɔ pi nɔmlɔ, mohu ɔ, e ji Mawu he wami nɛ e kɛ tsuɔ ní. Yehowa ngɔ mumi klɔuklɔu ɔ kɛ wo nihi he wami nɛ a ngma Baiblo ɔ, mumi klɔuklɔu ɔ nɔuu yeɔ bua wɔ nɛ wa nuɔ níhi nɛ wa kaseɔ ngɛ Baiblo ɔ mi ɔ sisi, nɛ waa kɛ tsuɔ ní. (Yoh. 14:26; 2 Pet. 1:21) Kɛ gu mumi klɔuklɔu ɔ nɔ ɔ, Yehowa ha wɔ “he wami nɛ pe adesahi a nɔ́.” (2 Kor. 4:7) Mumi klɔuklɔu ɔ haa wɔ he wami nɛ waa kɛ fiɛɛɔ sane kpakpa a, e woɔ wɔ he wami nɛ wa nyɛɔ daa si temi kɛ womihi kɛ kahi a nya. E woɔ wɔ he wami ke wa kɔni mi jɔ̃. E yeɔ bua wɔ nɛ wa jeɔ su kpakpahi nɛ ji  “mumi ɔ yiblii ɔ” kpo. (Gal. 5:22) Mawu kɛ e mumi klɔuklɔu ɔ haa nihi nɛ a heɔ lɛ yeɔ nɛ a jeɔ a tsui mi kɛ biɔ lɛ ɔ faa.​—Luka 11:13.

¹⁵ Yehowa sɔmɔli le kaa mumi klɔuklɔu ɔ ma nyɛ maa ye bua mɛ kɛ sɔmɔ lɛ. Enɛ ɔ nɛ wa le ɔ woɔ wɔ he wami wawɛɛ! Ke o he níhi nɛ o kase kɛ kɔ mumi klɔuklɔu ɔ he ɔ ye ɔ, e maa wo mo he wami nɛ o maa jɔɔ o he nɔ ha Mawu, nɛ o ma ha nɛ a baptisi mo.

16. Kɛ ba si hiɛ ɔ, mɛni o kase?

¹⁶ Yi mi kpɔ nɛ o maa mwɔ kaa o maa jɔɔ o he nɔ ha Mawu, nɛ́ a baptisi mo ɔ he hia wawɛɛ nitsɛ. Kaa bɔ nɛ wa sɛ hlami kase ɔ, e sa nɛ o pee klaalo kaa o maa da nyagbahi nɛ o kɛ maa kpe ɔ a nya, nɛ o kɛ níhi maa sã afɔle. Se jɔɔmihi nɛ o ma ná a hiɛ pe níhi nɛ o kɛ maa sã afɔle ɔ. Baptisimi ma nyɛ ma he o yi wami, nɛ e ma nyɛ ma ha nɛ o ná he nile kpakpa ngɛ Mawu hɛ mi. E sa nɛ o da suɔmi nɛ o ngɛ kɛ ha Yehowa Mawu ɔ nɔ kɛ mwɔ yi mi kpɔ kaa o ma ha nɛ a baptisi mo. Jehanɛ hu ɔ, e sa nɛ o kɛ o tsui tsuo nɛ he anɔkualehi nɛ o kase ngɛ Tsɛ ɔ, Bi ɔ, kɛ mumi klɔuklɔu ɔ he ɔ nɛ o ye. Ke o hyɛ níhi nɛ wa susu a he nɛ ɔmɛ ɔ, kɛ o ma ha sane bimi nɛ ji, “Anɛ i pee klaalo kaa ma ha nɛ a baptisi mi lo?” ɔ heto ha kɛɛ?

17. Mɛni ní komɛ e sa nɛ nɔ ko nɛ pee loko a baptisi lɛ?

¹⁷ Ke o susu kaa o pee klaalo kɛ ha baptisimi ɔ, lɛɛ lɔ ɔ tsɔɔ kaa o pee ní komɛ nɛ ma ha nɛ huɛ bɔmi kpakpa maa hi o kɛ Yehowa nyɛ kpɛti. * Kɛ gu Baiblo ɔ nɛ o kaseɔ daa ligbi ɔ nɔ ɔ, o ba le Yehowa kɛ Yesu a he níhi fuu. O ba ná hemi kɛ yemi. (Heb. 11:6) O ngɛ hemi kɛ yemi ngɛ Yehowa si womihi nɛ a ngɛ Baiblo ɔ mi ɔ mi, nɛ o ngɛ nɔ mi mami kaa o hemi kɛ yemi ngɛ Yesu afɔle sami ɔ mi ɔ ma nyɛ ma kpɔ̃ mo ngɛ yayami kɛ gbenɔ mi. O pia o he ngɛ ní yayahi nɛ o pee ɔ a he, nɛ e dɔ mo wawɛɛ kaa o pee jamɛ a ní ɔmɛ, nɛ o kpa Yehowa pɛɛ konɛ e ngɔ o he yayami ɔmɛ kɛ ke mo. O pee tsakemihi ngɛ o si himi mi; o ngmɛɛ ní yayahi nɛ o peeɔ be ko nɛ be ɔ tsuo a he, nɛ o bɔni o je mi bami ngɛ blɔ nɛ saa Mawu hɛ mi ɔ nɔ. (Níts. 3:19) O suɔ nɛ o jaje o hemi kɛ yemi ɔ kɛ tsɔɔ ni kpahi. O he su kaa fiɛɛlɔ nɛ a baptisii we lɛ, nɛ o kɛ o we asafo ɔ bɔni fiɛɛmi. (Mat. 24:14) Yehowa bua jɔ o he kaa o pee níhi nɛ a he hia nɛ ɔmɛ. O ha nɛ Yehowa bua jɔ wawɛɛ nitsɛ.​—Abɛ 27:11.

18. Mɛni nɔ́ kpa ko nɛ e sa nɛ o pee loko a ma nyɛ maa baptisi mo?

¹⁸ Loko a maa baptisi mo ɔ, ní kpa komɛ hu ngɛ nɛ e sa nɛ o pee. Kaa bɔ nɛ wa sɛ hlami kase ɔ, e sa nɛ o jɔɔ o he nɔ ha Mawu. Moo je o tsui mi nɛ o sɔle ha lɛ, nɛ́ o wo lɛ si kaa o maa pee e suɔmi nya ní o wami be tsuo. (1 Pet. 4:2) Lɔ ɔ se ɔ, mo de nikɔtɔmahi a kuu ɔ sanehi a he blɔ nya tolɔ ɔ kaa o suɔ nɛ a baptisi mo. E ma ha nɛ asafo mi nikɔtɔma  komɛ nɛ a kɛ mo nɛ kpe. Wa kpa mo pɛɛ, o tsui ko po kaa o kɛ nikɔtɔma nɛ ɔmɛ maa kpe. Mo kai kaa nyɛmimɛ nɛ ɔmɛ le mo momo, nɛ a suɔ mo. A kɛ mo ma susu Baiblo ɔ mi sisije tsɔɔmi ɔmɛ nɛ o kase ɔ a he. A suɔ nɛ a ná nɔ mi mami kaa o nu tsɔɔmi nɛ ɔmɛ a sisi saminya, nɛ o le bɔ nɛ he nɔ jɔɔmi kɛ baptisimi he hia ha. Ke a na kaa o he su kɛ ha baptisimi ɔ, a ma ha nɛ o le kaa a maa baptisi mo ngɛ kpɔ mi kpe aloo kpokpa nɔ kpe nɛ maa nyɛɛ se ɔ sisi.

19-20. Mɛni nɛ e he hia nɛ o pee ngɛ o baptisimi se, nɛ kɛ o maa pee lɛ ha kɛɛ?

¹⁹ Ke a baptisi mo ta a, mɛni nɛ e sa nɛ o pee? * Mo kai kaa he nɔ jɔɔmi ji kita nɛ o kã, nɛ Yehowa hyɛɛ blɔ kaa o maa ye kita nɛ ɔ nɔ. Lɔ ɔ he ɔ, ke a baptisi mo se ɔ, e sa nɛ o ya nɔ nɛ o ye kita nɛ ɔ nɔ. Kɛ o maa pee lɛ kɛɛ?

²⁰ O kɛ o we asafo ɔ nɛ bɔ. Ke o ba pee Kristofo no nɛ a baptisi lɛ ɔ, o ba piɛɛ “nyɛmimɛ a kuu ɔ” he. (1 Pet. 2:17) O nyɛmimɛ nyumuhi kɛ yihi nɛ a ngɛ asafo ɔ mi ɔ ba peeɔ o weku. Ke o yaa asafo mi kpe daa a, huɛ bɔmi nɛ ngɛ o kɛ mɛ nyɛ kpɛti ɔ mi maa wa. Moo kane Mawu Munyu ɔ daa, nɛ o pue o yi mi tɛ ngɛ he. (La 1:1, 2) Ke o kane Baiblo ɔ fã ko ta a, mo he be bɔɔ kɛ susu nɔ́ nɛ o kane ɔ he saminya. Lɔ ɔ ma ha nɛ munyu ɔ maa ta o tsui he. “Sɔlee daa.” (Mat. 26:41) Ke o je o tsui mi kɛ sɔle ɔ, lɔ ɔ ma ha nɛ o hɛ kɛ su Yehowa he. Yaa nɔ nɛ o “hla Matsɛ Yemi ɔ . . . kekle.” (Mat. 6:33) O ma nyɛ maa pee jã kɛ gu fiɛɛmi ní tsumi ɔ nɛ o kɛ maa pee oti ngɛ o si himi mi ɔ nɔ. Ke o fiɛɛɔ be fɛɛ be ɔ, e ma ha nɛ o hemi kɛ yemi ɔ mi maa wa, nɛ o ma nyɛ maa ye bua ni kpahi konɛ mɛ hu a nyɛɛ neneene wami blɔ ɔ nɔ.​—1 Tim. 4:16.

21. Mɛni nɛ baptisimi ma ha nɛ o ná?

²¹ O he nɔ nɛ o maa jɔɔ ha Yehowa, nɛ́ a baptisi mo ɔ ji yi mi kpɔ ko nɛ he hia wawɛɛ nɛ e sa nɛ o mwɔ ngɛ o si himi mi. Se ngɛ anɔkuale mi ɔ, e sa nɛ o kɛ ní komɛ nɛ sã afɔle. Ke o pee jã a, anɛ o ma ná he se lo? Ee! Nyagba fɛɛ nyagba nɛ eko ɔ, o kɛ maa kpe ngɛ je yaya nɛ ɔ mi ɔ “se be kɛe nɛ e mi jiɔ we” hulɔ. (2 Kor. 4:17) Se ke a baptisi mo ɔ, e ma ha nɛ o ná si himi kpakpa amlɔ nɛ ɔ, kɛ “wami nitsɛnitsɛ” nɛ maa ba hwɔɔ se ɔ. (1 Tim. 6:19) Enɛ ɔ he ɔ, wa kpa mo pɛɛ nɛ o susu heto kɛ ha sane bimi nɛ ji, “Anɛ i pee klaalo kaa ma ha nɛ a baptisi mi lo?” ɔ he saminya.