NGƐ je mi ta enyɔne ɔ mi ɔ, Nazi nɔkɔtɔma ko kpa ngmlaa kɛ pue Yehowa Odasefohi komɛ a nɔ nɛ e de mɛ ke: “Ke nyɛ ti nɔ ko kua kaa e maa hwu kɛ si France loo England ɔ, a maa gbe nyɛ tsuo!” E ngɛ mi kaa Nazi ta buli ɔmɛ hɛɛ tu kɛ daa si mohu lɛɛ, se wa nyɛmimɛ ɔmɛ tsuo mwɔ a yi mi kpɔ kaa a be Yehowa mlaa a nɔ tue gboe. Nɔ́ nɛ a pee ɔ tsɔɔ kaa a ngɛ kã wawɛɛ! Enɛ ɔ tsɔɔ bɔ nɛ Yehowa Odasefohi naa ta hwumi ha. Waa kɛ wa he wui tahi nɛ a hwuɔ ngɛ je nɛ ɔ mi ɔ mi. Ke a de wɔ ke a maa gbe wɔ po ɔ, waa kɛ wa he wui tahi nɛ ngɛ nɔ yae ngɛ je ɔ mi ɔ mi.

1. MAWU WE BI NƐ A HI SI BLEMA A JE MA KAKE MI

Blema a, Yehowa hla ma ko kaa e ma. Jamɛ a ma a ji Israel ma a nɛ. E tsɛ Israel bi ɔmɛ ke lɛ ‘nitsɛ e ma titli pe ma amɛ kulaa.’ (2 Mose 19:5) Jehanɛ hu ɔ, Mawu ha Israel bi ɔmɛ he ko pɔtɛɛ nɛ a hi. Enɛ ɔ he ɔ, ke Mawu fã Israel bi ɔmɛ kaa a kɛ ma kpahi nɛ ya hwu ta a, a gbi a nyɛmimɛ nɛ a kɛ mɛ ngɛ Yehowa sɔmɔe ɔ. a

Mwɔnɛ ɔ, Yehowa sɔmɔli anɔkualetsɛmɛ “je je mahi tsuo kɛ wɛtsohi kɛ nihi kɛ lilɛhi a mi.” (Kpoj. 7:9) Ke Mawu we bi kɛ a he woɔ ta hwumi mi ɔ, lɛɛ a maa hwu ta kɛ si a nyɛmimɛ Kristofohi, nɛ a maa gbe mɛ po.

 2. YEHOWA FÃ ISRAEL BI ƆMƐ KAA A YA TA

Blema a, Yehowa lɛ tsɔɔ be nɛ e sa kaa Israel bi ɔmɛ nɛ a hwu ta, kɛ nɔ́ he je nɛ e sa nɛ a pee jã. Kaa nɔ hyɛmi nɔ́ ɔ, Mawu fã Israel bi ɔmɛ kaa a kpata Kanaan bi ɔmɛ a hɛ mi. Kanaan bi ɔmɛ kɛ daimoniohi tsuɔ ní wawɛɛ, a ngɔɔ a he kɛ woɔ ajuama bɔmi ní peepeehi nɛ ngɛ tai mi, nɛ a ngɔɔ a bimɛ kɛ sãa afɔle. Yehowa fã Israel bi ɔmɛ kaa a kpata nihi nɛ a ngɛ yi wu tso ní nɛ ɔmɛ pee ngɛ Si Womi Zugba a nɔ ɔ a hɛ mi konɛ Israel bi ɔmɛ hu a ko pee ní yaya nɛ ɔmɛ. (3 Mose 18:24, 25) Benɛ Israel bi ɔmɛ ya su Si Womi Zugba a nɔ ɔ, be komɛ ɔ, Mawu deɔ mɛ kaa a ya ta konɛ a kɛ fã a he ngɛ a he nyɛli nɛ a yi mi wa a, a he. (2 Sam. 5:17-25) Se Yehowa ngmɛ́ Israel bi ɔmɛ blɔ kaa mɛ nitsɛmɛ a ya ta ngɛ a dɛ he. Ke a bui lɛ tue nɛ a ya a, a kɛ haomi ya kpeɔ.​—4 Mose 14:41-45; 2 Kron. 35:20-24.

Mwɔnɛ ɔ, Yehowa de we adesahi kaa a hwu ta. Je mahi fuu hwuɔ ta ngɛ mɛɛ a suɔmi nya konɛ a ná he se, se pi Mawu suɔmi nya. A hwuɔ ta konɛ a ná zugba fuu kɛ sika fuu, loo ngɛ ma kudɔmi sanehi a he je. Se ni nɛmɛ nɛ a deɔ ke a ngɛ ta hwue ngɛ Mawu biɛ mi konɛ a kɛ fã a jami ɔ he loo a kɛ gbe Mawu he nyɛli hu nɛɛ? Yehowa maa bu e sɔmɔli nɛ a yeɔ lɛ anɔkuale ɔ a he, nɛ e ma kpata e he nyɛli ɔmɛ a hɛ mi ngɛ ta ko nɛ maa ba hwɔɔ se ɔ mi. Jamɛ a ta a ji Harmagedon ta a nɛ. (Kpoj. 16:14, 16) Mawu ta buli nɛ a ngɛ hiɔwe ɔ nɛ a maa hwu ta nɛ ɔ, se pi e sɔmɔli nɛ a ngɛ zugba a nɔ ɔ.​—Kpoj. 19:11-15.

3. ISRAEL BI ƆMƐ KPATAA WE NIHI NƐ A NÁ HEMI KƐ YEMI NGƐ YEHOWA MI Ɔ A HƐ MI

Blema a, Israel bi ɔmɛ naa nihi nɛ a ngɛ hemi kɛ yemi ngɛ Mawu mi ɔ mɔbɔ, nɛ nihi nɛ Yehowa ma e juɛmi nya si kaa a gbe mɛ ɔ lɛɛ a kpataa a hɛ mi. Wa ma susu nɔ hyɛmi ní enyɔ komɛ nɛ tsɔɔ jã a he. E ngɛ mi kaa Yehowa fã Israel bi ɔmɛ kaa a kpata Yeriko ma a hɛ mi mohu lɛɛ, se a baa Rahab kɛ  e weku ɔ yi ejakaa e ba ná hemi kɛ yemi ngɛ Yehowa mi. (Yosh. 2:9-16; 6:16, 17) Pee se ɔ, a baa Gibeon ma a tsuo yi ejakaa a ná hemi kɛ yemi nɛ mi wa ngɛ Mawu mi.​—Yosh. 9:3-9, 17-19.

Mwɔnɛ ɔ, ke je ma amɛ ngɛ ta hwue ɔ, a gbeɔ nihi nɛ a ngɛ hemi kɛ yemi ngɛ Mawu mi ɔ, nɛ be komɛ po ɔ, a gbeɔ nihi nɛ tsa pi ta buli ji mɛ.

4. ISRAEL BI ƆMƐ NGƆ BLƆ TSƆƆMI NƐ MAWU KƐ HA NGƐ TA HWUMI HE Ɔ KƐ TSU NÍ

Blema a, Yehowa hyɛɔ blɔ kaa ke Israel ta buli maa hwu ta a, a ngɔ blɔ tsɔɔmi nɛ e kɛ ha mɛ ɔ kɛ tsu ní. Kaa nɔ hyɛmi nɔ́ ɔ, be komɛ ɔ, Mawu de mɛ kaa a kɛ mahi nɛ a ji a he nyɛli ɔ nɛ “so tue mi jɔmi somi.” (5 Mose 20:10, NW) Yehowa hyɛɔ blɔ kaa Israel ta buli ɔmɛ a he nɛ tsɔ, a sito he ɔ nɛ tsɔ, nɛ a je mi bami he hu nɛ tsɔ. (5 Mose 23:9-14) Ke je mahi nɛ a bɔle Israel bi ɔmɛ ye ma ko nɔ kunimi ɔ, ta buli ɔmɛ tuaa yihi nɛ a ngɛ ma nɛ a ye a nɔ kunimi ɔ mi ɔ abonua. Se Yehowa ngmɛ́ Israel bi ɔmɛ blɔ nɛ a pee jã. Ngɛ anɔkuale mi ɔ, ja nyɔhiɔ kake se loko Israel bi ɔmɛ kɛ yihi nɛ a ngɛ ma nɛ a ye a nɔ kunimi ɔ mi ɔ ma nyɛ maa sɛ gba si himi mi.​—5 Mose 21:10-13.

Mwɔnɛ ɔ, mahi fuu kplɛɛ nɔ kaa a kɛ ta hwumi he mlaahi ma tsu ní ngɛ ta hwumi mi. Yi mi tomi ɔ ji kaa a kɛ maa po ma mi bi ɔmɛ a he piɛ. Se aywilɛho sane ji kaa behi fuu ɔ, a yi mlaa nɛ ɔmɛ a nɔ.

5. MAWU HWU HA E MA A

Blema a, Yehowa hwu ta kɛ ha Israel bi ɔmɛ, nɛ behi fuu ɔ, e peeɔ nyakpɛ níhi konɛ a nyɛ nɛ a ye kunimi ngɛ ta mi. Kaa nɔ hyɛmi nɔ́ ɔ, Yehowa ye bua Israel bi ɔmɛ nɛ a ye Yeriko ma a nɔ kunimi. Anɛ o le bɔ nɛ e plɛ kɛ pee jã ha lo? Ngɛ Yehowa fami nya a, Israel bi ɔmɛ “he ose wawɛɛ nitsɛ. Kɛkɛ nɛ Yeriko gbogbo ɔ hule pue si,” nɛ lɔ ɔ ha nɛ e yi ha mɛ kaa a ma tua ma a. (Yosh. 6:20) Nɛ kɛ Israel bi ɔmɛ plɛ kɛ ye Amor bi ɔmɛ hu a nɔ kunimi ha kɛɛ? ‘Yehowa ha gbiɛ ngo ngu nguahi je hiɔwe ba nɔɔ a nɔ. Nihi nɛ gbiɛ ngo ngu ɔ gbe ɔ hiɛ kulaa pe nihi nɛ Israel bi ɔmɛ kɛ klaate gbe.’​—Yosh. 10:6-11.

ANƆKUALE KRISTOFOHI DIƆ TUE MI JƆMI SE

Kaa bɔ nɛ wa na a, mwɔnɛ ɔ, wa si fɔfɔɛ je ekpa kulaa ngɛ blema Israel bi ɔmɛ a nɔ́ ɔ he. Se tsa pi níhi nɛ a wo ta kɛ sɛ hlami ɔ pɛ a he je nɛ wa yɛ ta. Wa ngɛ yi mi tomi kpahi hu a he je nɛ wa pee we jã. Kaa nɔ hyɛmi nɔ́ ɔ, Mawu gba kɛ fɔ si kaa ngɛ nyagbe ligbi ɔmɛ a mi ɔ, nihi nɛ e ma tsɔse mɛ ɔ be “a he dlae kɛ ha ta gblegbleegble hu,” nɛ a be a he ngɔe kɛ wo ta hwumi mi. (Yes. 2:2-4) Jehanɛ hu ɔ, Kristo de ke e kaseli ɔmɛ “piɛɛ we je ɔ he,” enɛ ɔ he ɔ, a kɛ a he be ta hwumihi nɛ ngɛ nɔ yae ngɛ je ɔ mi ɔ mi.​—Yoh. 15:19.

Kristo de e se nyɛɛli ɔmɛ kaa a pee nɔ́ kpa ko hu nɛ he hia. E de mɛ ke a yu a he kɛ je ní peepeehi nɛ ngɔɔ abofu kɛ ta kɛ baa a he. (Mat. 5:21, 22) E de kɛ piɛɛ he ke, e sa nɛ e se nyɛɛli ɔmɛ nɛ a pee a he “nihi nɛ a haa nɛ tue mi jɔmi baa,” nɛ́ a suɔ a he nyɛli.​—Mat. 5:9, 44.

Mɛni blɔ nɔ wa maa gu kɛ pee jã? E ngɛ heii kaa wa be suɔe kaa wa maa hwu ta, se anɛ wa nuɔ he kaa nɔ ko ngɛ asafo ɔ mi nɛ e ji wa he nyɛlɔ lo? Ke wa nuɔ he jã a, lɛɛ e sa nɛ wa je kɛ je wa mi.​—Yak. 4:1, 11.

Waa kɛ wa he wui ta hwumi mi kaa bɔ nɛ je ma amɛ peeɔ ɔ. Mohu ɔ, wa haa nɛ tue mi jɔmi kɛ suɔmi hiɔ waa kɛ wa nyɛmimɛ ɔmɛ wa kpɛti. (Yoh. 13:34, 35) Wa ngɛ blɔ hyɛe kaa Yehowa maa po ta hwumi se kɛ maa ya neneene. Enɛ ɔ he ɔ, nyɛ ha nɛ waa fia wa pɛɛ si kaa wa be wa he ngɔe kɛ wo ta hwumi mi kɔkɔɔkɔ.​—La 46:9.