Hebri munyungu nɛ a kɛ tsu ní ngɛ ngmami nɛ ɔ mi ɔ ma nyɛ maa tsɔɔ enyɔ ɔmɛ tsuo. Enɛ ɔ he ɔ, wa da níhi nɛ nyɛɛ se nɛ ɔmɛ a nɔ kɛ pee tsakemi ɔ:

1. Ngmami bɔ kɛ munyunguhi. Hebri munyungu nɛ ji asher nɛ je kuku 12 ɔ sisi ɔ ma ha nɛ waa na tsakpa nɛ ngɛ La 144:12-15 kɛ kukuhi nɛ sɛ hlami ɔ a kpɛti. A nyɛɔ tsɔɔ munyungu nɛ ji asher a sisi ngɛ blɔ slɔɔtohi a nɔ. Kaa nɔ hyɛmi nɔ́ ɔ, e ma nyɛ maa pee biɛ nane mi dalɔ nɛ tsɔɔ nɔ ko aloo nɔ́ ko nɛ a tu he munyu kɛ be. Biɛ nane dali ɔmɛ ekomɛ ji “mɛ,” “lɛ” kɛ “a.” Ngɛ sisi tsɔɔmi momo ɔ mi ɔ, a kɛ biɛ nane mi dalɔ nɛ ji “a” lɛ tsu ní. Enɛ ɔ he ɔ, yiwutsotsɛmɛ nɛ a tu a he munyu ngɛ kukuhi nɛ sɛ hlami ɔ mi ɔ a he nɛ ní kpakpa amɛ nɛ a wo ta ngɛ kuku 12 kɛ ya si kuku 14 ɔ mi ɔ kɔ. Se a ma nyɛ maa tsɔɔ asher sisi ngɛ blɔ kpa ko hu nɔ. Kaa nɔ hyɛmi nɔ́ ɔ, a ma nyɛ maa tsɔɔ sisi ke “konɛ,” “bɔ nɛ pee nɛ,” aloo “kɛkɛ ɔ.” Ngɛ 2013 sisi tsɔɔmi ɔ kɛ sisi tsɔɔmi kpahi a mi ɔ, a kɛ munyungu nɛ ji “kɛkɛ ɔ” lɛ tsu ní.

2. Sisi tsɔɔmi ehe ɔ ha nɛ munyuhi nɛ ngɛ La nɛ ɔ mi ɔ mi tɛ̃. Munyungu nɛ ji “kɛkɛ ɔ” nɛ́ a kɛ tsu ní ngɛ kuku 12 ɔ mi ɔ tsɔɔ kaa jɔɔmihi nɛ ngɛ kuku 12 kɛ ya si kuku 14 ɔ mi ɔ kɔɔ dali ɔmɛ a he. Mɛ ji nihi nɛ a ngɛ bie nɛ a ‘kpɔ mɛ’ kɛ je yiwutsotsɛmɛ nɛ a tu a he munyu ngɛ kuku 11 ɔ mi ɔ a dɛ ɔ nɛ. Tsakemi nɛ ɔ sa kuku 15 ɔ hu he. Amlɔ nɛ ɔ, sisi numi ngɛ munyungu nɛ ji “bua jɔmi” nɛ a kɛ tsu ní si enyɔ ngɛ lejɛ ɔ he, ejakaa e kɔɔ dali ɔmɛ a he. Enɛ ɔ he ɔ, dali nɛ ɔmɛ nɔuu nɛ a ma ná bua jɔmi nɛ a wo ta ngɛ kuku 15 ɔ mi ɔ nɛ, nɛ mɛ ji “nihi nɛ Yehowa ji a Mawu” ɔ nɛ. Wa hɛ hu nɛ ko je nɔ kaa ngɛ blema Hebri ngmami ɔ mi ɔ, a kɛ okadihi kaa ayaade (“) kɛ adeta (”) kɛ okadi kpahi tsu we ní. Enɛ ɔ he ɔ, e biɔ nɛ gbi sisi tsɔɔli nɛ a nu nɔ́ tutuutu nɛ ngmami ɔ ngɛ dee ɔ sisi, á le bɔ nɛ a ngmaa Hebri asilɛhi ha, oti nɛ ngmami ɔ ngɛ he munyu tue kɛ bɔ nɛ e kɔɔ ngmami kpahi nɛ ngɛ Baiblo ɔ mi ɔ a he ha.

3. Sisi tsɔɔmi ehe ɔ kɛ ngmami kpahi nɛ tsɔɔ jɔɔmihi nɛ Mawu we bi nɛ a yeɔ lɛ anɔkuale ɔ ma ná hwɔɔ se ɔ kɔ. Tsakemi nɛ a pee ngɛ munyungu nɛ ji asher a he ɔ ha nɛ amlɔ nɛ ɔ, la nɛ ɔ mi munyu ɔmɛ jeɔ David hɛ nɔ kami ɔ kpo. David hɛ nɔ kami ji kaa Mawu ma kpɔ̃ Israel bi ɔmɛ kɛ je a he nyɛli a dɛ mi, e maa jɔɔ mɛ, nɛ e ma ha nɛ a ná bua jɔmi kɛ kplɔkɔtɔ. (3 Mose 26:9, 10; 5 Mose 7:13; La 128:1-6) Kaa nɔ hyɛmi nɔ́ ɔ, 5 Mose 28:4 ɔ de ke: “Nyɛ ma fɔ bimɛ babauu; nyɛ zugba a maa ba ní, nɛ nyɛ we mi lohwehi, nɛ ji nyɛ na amɛ, kɛ nyɛ to ɔmɛ hu maa bɔ.” Ngɛ David bi Solomon nɔ yemi ɔ sisi ɔ, Israel ma a ná tue mi jɔmi kɛ kplɔkɔtɔ. Ngɛ anɔkuale mi ɔ, ní komɛ nɛ ya nɔ ngɛ Solomon nɔ yemi sisi ɔ tsɔɔ níhi nɛ maa ya nɔ ngɛ Mesia a nɔ yemi ɔ sisi.​—1 Ma. 4:20, 21; La 72:1-20.

Lɛɛ kɛ wa maa ma nya si ha kɛɛ? Tsakemi nɛ a pee ngɛ La 144 ɔ tsakee we bɔ nɛ wa nu Baiblo tsɔɔmihi a sisi ha a. Mohu ɔ, e haa nɛ wa nuɔ hɛ nɔ kami nɛ Yehowa sɔmɔli ngɛ kɛ je blema a sisi saminya. Lɔ ɔ ji kaa Mawu ma kpata yiwutsotsɛmɛ a hɛ mi, nɛ dali maa hi si ngɛ kplɔkɔtɔ kɛ tue mi jɔmi mi kɛ ya neneene.​—La 37:10, 11.