1-3. (a) Mɛni maa ye bua wɔ konɛ waa ya nɔ nɛ waa ye Mawu anɔkuale ngɛ nyagbe ligbi nɛ ɔmɛ a mi? (b) Mɛni he wa ma susu ngɛ munyu nɛ ɔ mi?

NGƐ nyagbe ligbi nɛ ɔmɛ a mi ɔ, yiwutsotsɛmɛ a he ngɛ hiɛe nɛ a ngɛ ‘bɔe flɔflɔɔflɔ kaa nga.’ (La 92:7) Enɛ ɔ he ɔ, e pee we wɔ nyakpɛ kaa nihi fuu sume nɛ a maa pee níhi nɛ da ngɛ Mawu hɛ mi. Lɛɛ kɛ wa ma plɛ kɛ pee wa he “jokuɛ tsɔwi ngɛ yayami blɔ fa mi,” nɛ waa pee wa he nihi nɛ a “wa saminya ngɛ nɔ́ sisi numi mi” ngɛ je kaa kikɛ nɛ ɔ mi kɛɛ?​—1 Kor. 14:20.

² Wa maa na heto ɔ ngɛ ngmami nɛ a kɛ munyu nɛ ɔ da nɔ ɔ mi. Ngmami ɔ fã ko de ke: ‘Ni nɛmɛ nɛ a sɔmɔɔ Yehowa a, mɛɛ lɛɛ a nuɔ nɔ́ fɛɛ nɔ́ sisi saminya.’ Enɛ ɔ tsɔɔ kaa a nu nɔ́ fɛɛ nɔ́ nɛ e sa nɛ a pee konɛ a sa Yehowa hɛ mi ɔ sisi. (Abɛ 28:5) Munyu nɛ ngɛ Abɛ 2:7, 9 ɔ hu hɛɛ sisi numi kaa jã nɔuu. Ngmami nɛ ɔ tsɔɔ kaa Yehowa ‘haa dali juɛmi.’ Enɛ ɔ he ɔ, a nyɛɔ nɛ ‘a leɔ nɔ́ nɛ hi, kɛ blɔ nɛ da, kɛ nɔ́ nɛ sa mɛ peemi.’

³ Noa, Daniel, kɛ Hiob ná juɛmi nɛ Yehowa haa dali ɔ eko. (Eze. 14:14) Mawu we bi nɛ a ngɛ mwɔnɛ ɔ hu ngɛ juɛmi nɛ ɔ eko. Se mo nɛɛ? Anɛ o ‘nu nɔ́ fɛɛ nɔ́’ nɛ e sa kaa o pee konɛ o nyɛ nɛ o sa  Yehowa hɛ mi ɔ “sisi saminya” lo? Nɔ́ nɛ he hia ji kaa o ma ná Yehowa he anɔkuale nile. Ngɛ munyu nɛ ɔ mi ɔ, wa maa na (1) bɔ nɛ Noa, Daniel, kɛ Hiob plɛ kɛ le Mawu ha, (2) bɔ nɛ Mawu he nile nɛ a ná a ye bua mɛ ha, kɛ (3) bɔ nɛ wa maa pee ha konɛ wa ná hemi kɛ yemi kaa mɛ.

4. Mɛni blɔ nɔ Noa gu kɛ ba le Yehowa, nɛ kɛ Yehowa he nile nɛ e ná a ye bua lɛ ha kɛɛ?

⁴ Bɔ nɛ Noa plɛ kɛ le Yehowa ha. Kɛ je blema lokoo ɔ, nihi guɔ blɔ pɔtɛɛ etɛ nɛ ɔmɛ a nɔ kɛ kaseɔ Mawu he ní: adebɔ níhi, níhi nɛ a kase ngɛ Mawu sɔmɔli anɔkualetsɛmɛ a ngɔ, kɛ jɔɔmihi nɛ mɛ nitsɛmɛ a náa ke a ngɔ Mawu sisi tomi mlaahi kɛ tsu ní. (Yes. 48:18) Eko ɔ, Noa hyɛ adebɔ níhi, nɛ e na odasehi nɛ tsɔɔ kaa Mawu ngɛ, nɛ e kase Mawu suhi nɛ a nɛ kɛ hɛ ngmɛ kaa ‘e he wami nɛ ngɛ daa, kɛ Mawu nɛ e ji ɔ’ he ní hulɔ. (Rom. 1:20) Enɛ ɔ he ɔ, Noa he ye kaa Mawu ngɛ, nɛ e ná hemi kɛ yemi nɛ mi wa ngɛ e mi.

5. Kɛ Noa pee kɛɛ kɛ ba le Mawu yi mi tomi kɛ ha adesahi?

⁵ Hemi kɛ yemi “nyɛɛɔ nɔ́ nɛ a nu ɔ se.” (Rom. 10:17) Kɛ Noa pee kɛɛ kɛ nu Yehowa he sane? Eko ɔ, e nu Yehowa he sane kɛ je e weku li a ngɔ. A kpɛti nɔ kake ji e tsɛ Lamek nɛ e ngɛ hemi kɛ yemi ngɛ Mawu mi ɔ. Benɛ a fɔ Lamek ɔ, Adam ngɛ je mi. (Moo hyɛ foni nɛ ngɛ ní kasemi ɔ sisije ɔ.) E weku li kpahi hu nɛ e kase Yehowa he ní kɛ je a ngɔ ji e nɛ Metusela kɛ e nɛnɛkasowa Yared. Benɛ Yared gbo ɔ, Noa ye jeha 366. * (Luka 3:36, 37) Eko ɔ, nyumu nɛ ɔmɛ kɛ a yihi ji nihi nɛ a tsɔɔ Noa kaa Mawu bɔ adesahi konɛ a fɔ nɛ a hyi zugba a nɔ nɛ a sɔmɔ lɛ. Eko ɔ, a tsɔɔ lɛ hu kaa Adam kɛ Hawa gbo Mawu tue, nɛ lɛ nitsɛ hu e na níhi nɛ je atua tsɔmi ɔ mi kɛ ba a. (1 Mose 1:28; 3:16-19, 24) Noa bua jɔ níhi nɛ e kase kɛ je sane nɛ ɔmɛ a mi ɔ he, nɛ lɔ ɔ wo lɛ he wami nɛ e sɔmɔ Mawu.​—1 Mose 6:9.

6, 7. Ngɛ mɛni blɔ nɔ nɛ hɛ kɛ nɔ fɔmi ha nɛ Noa hemi kɛ yemi ɔ mi wa?

⁶ Hɛ kɛ nɔ fɔmi haa nɛ hemi kɛ yemi mi waa. Moo hyɛ bɔ nɛ Noa hemi kɛ yemi mi maa wa ha benɛ e ba le kaa e biɛ ɔ sisi ji “He Jɔmi” aloo “Bua Womi” ɔ! (1 Mose 5:29) Mumi klɔuklɔu ɔ wo Lamek he wami nɛ e de ke: ‘Dengme nɛ wa ngɛ gboe kɛ ngɛ ní tsue ngɛ zugba nɛ Yehowa gbiɛ ɔ nɔ ɔ, bi nɛ ɔ ma ba wo wa bua.’ Noa ná hɛ kɛ nɔ fɔmi ngɛ Mawu mi. Kaa bɔ nɛ Habel kɛ Enɔk ná hemi kɛ yemi ɔ, Noa hu ná hemi kɛ yemi ngɛ “nina” nɛ e maa fia sinɔ ɔ yi nɔ́ ɔ mi.​—1 Mose 3:15.

⁷ E ngɛ mi kaa eko ɔ, Noa nui gbami nɛ ngɛ 1 Mose 3:15 ɔ sisi saminya mohu lɛɛ, se atsinyɛ jemi ko be he kaa e ná hɛ kɛ nɔ fɔmi kaa a ma kpɔ̃ adesahi. Jehanɛ hu ɔ, si nɛ Mawu wo ngɛ Eden abɔɔ ɔ mi ɔ kɛ gbami nɛ Enɔk gba kaa Mawu maa kojo yiwutsotsɛmɛ ɔ ngɛ tsakpa. (Jud 14, 15) Enɔk sɛ gbi ɔ nɛ e maa ba mi kulaa ngɛ Hamagedɔn ɔ wo Noa hemi kɛ yemi mi he wami, nɛ lɔ ɔ ha nɛ e ná hɛ kɛ nɔ fɔmi!

8. Ngɛ mɛni blɔhi a nɔ nɛ Mawu he nile nɛ Noa ná a po e he piɛ?

⁸ Bɔ nɛ Mawu he nile nɛ Noa ná a ye bua lɛ ha. Mawu he anɔkuale nile ha nɛ Noa ná hemi kɛ yemi kɛ juɛmi nɛ je Mawu ngɔ. Juɛmi nɛ ɔ ye bua lɛ nɛ e pee we yayami ko kɛ si Mawu. Kaa nɔ hyɛmi nɔ́ ɔ, akɛnɛ Noa suɔ kaa e maa ‘pee Mawu suɔmi nya ní’ he je ɔ, e kɛ nihi nɛ a pee we Mawu suɔmi nya ní ɔ bɔɛ. Benɛ daimoniohi tsake a he kɛ pee adesahi nɛ a ngɔ he wami nɛ a ngɛ ɔ kɛ sisi adesahi nɛ a be hemi kɛ yemi ɔ, Noa ha we nɛ a sisi lɛ. Eko ɔ, nihi ja bɔfo nɛ ɔmɛ po.  (1 Mose 6:1-4, 9) Jehanɛ hu ɔ, Noa le kaa adesahi lɛ Mawu de mɛ ke a fɔ nɛ a hyi zugba a nɔ. (1 Mose 1:27, 28) Enɛ ɔ he ɔ, e le kaa Mawu bɔɛ bɔfohi kaa a kɛ yihi nɛ ná bɔmi, nɛ e le hu kaa e hí. Benɛ bɔfo ɔmɛ kɛ yihi fɔ bimɛ nɛ a je ekpa kulaa a, Noa ba ná nɔ mi mami kaa níhi nɛ e kase ɔ ji anɔkuale. Pee se ɔ, Mawu bɔ Noa kɔkɔ kaa e maa ngɔ nyu kpekpemi kɛ kpata je ɔ hɛ mi. Hemi kɛ yemi nɛ Noa ná ngɛ kɔkɔ bɔmi nɛ ɔ mi ɔ wo lɛ he wami nɛ e kpɛ daka a, nɛ e kɛ he e weku ɔ yi wami.​—Heb. 11:7.

9, 10. Kɛ wa ma plɛ kɛ kase Noa hemi kɛ yemi ɔ ha kɛɛ?

⁹ Bɔ nɛ wa maa pee ha kɛ ná hemi kɛ yemi kaa Noa. Nɔ́ nɛ e sa nɛ waa pee ji kaa wa maa kase Mawu Munyu ɔ saminya, wa ma ha nɛ nɔ́ nɛ wa ngɛ kasee ɔ maa sɛ wa tsui mi, konɛ waa ngɔ nɔ́ nɛ wa ngɛ kasee ɔ kɛ tsu ní. (1 Pet. 1:13-15) Ke wa pee jã a, hemi kɛ yemi nɛ wa ngɛ kɛ juɛmi nɛ je Mawu ngɔ ɔ maa po wa he piɛ ngɛ Satan klama amɛ, kɛ su yayahi nɛ ngɛ je ɔ mi ɔ he. (2 Kor. 2:11) Nihi babauu a bua jɔ basabasa peemi kɛ je mi bami yaya he, nɛ a peeɔ níhi nɛ he lo ɔ suɔ. (1 Yoh. 2:15, 16) Enɛ ɔ ma nyɛ ma ha nɛ nihi nɛ a gbɔjɔ ngɛ Mawu jami mi ɔ ma susu kaa Mawu ligbi ngua a be bae piɔ. Mo kai kaa benɛ Yesu ngɔ wa be nɛ ɔ kɛ to Noa be ɔ he ɔ, pi basabasa peemi kɛ je mi bami yayami he munyu nɛ e ngɛ tue, mohu ɔ, nyagbahi nɛ maa ba ke wa je wa juɛmi kɛ je Mawu jami nɔ ɔ he munyu e ngɛ tue.​—Kane Mateo 24:36-39.

¹⁰ Mo bi o he ke: ‘Anɛ bɔ nɛ i baa ye je mi ha a tsɔɔ kaa i le Yehowa nitsɛnitsɛ lo? Anɛ hemi kɛ yemi nɛ i ngɛ ɔ woɔ mi he wami nɛ i hiɔ si ngɛ Mawu sisi tomi mlaa amɛ a nya, nɛ i fiɛɛɔ ha ni kpahi lo?’ Bɔ nɛ o ma ha sane bimi nɛ ɔmɛ a heto ha a maa tsɔɔ kaa o ngɛ ‘Mawu suɔmi nya ní pee,’ aloo o pee we e suɔmi nya ní.

11. (a) Mɛni nɛ suɔmi nɛ Daniel ngɛ kɛ ha Mawu ɔ deɔ wɔ ngɛ e fɔli a he? (b) Daniel su ɔmɛ a kpɛti te nɛɛ nɛ o suɔ kaa o maa kase?

¹¹ Bɔ nɛ Daniel plɛ kɛ le Yehowa ha. E ngɛ heii kaa Daniel fɔli tsɔse lɛ saminya. A tsɔɔ lɛ kaa e sa nɛ e suɔ Yehowa kɛ e Munyu nɛ a ngma a. Daniel pee jã e wami be tsuo. Benɛ Daniel bwɔ po ɔ, e ya nɔ nɛ e kase Ngmami ɔ saminya. (Dan. 9:1, 2) Daniel ba le Mawu wawɛɛ. E le níhi tsuo nɛ Mawu pee kɛ ha Israel bi ɔmɛ hulɔ. Wa naa enɛ ɔ ngɛ sɔlemi nɛ e je e tsui mi kɛ sɔle nɛ a ngma ngɛ Daniel 9:3-19 ɔ. Moo bɔ mɔde nɛ o kane ngmami nɛ ɔ nɛ o pue o yi mi tɛ ngɛ he, konɛ o kadi nɔ́ nɛ e deɔ mo ngɛ Daniel he.

12-14. (a) Ngɛ mɛni blɔhi a nɔ nɛ Daniel tsɔɔ kaa e ngɛ juɛmi nɛ je Mawu ngɔ? (b) Ngɛ mɛni blɔ nɔ nɛ Yehowa jɔɔ Daniel ngɛ kã nɛ e pee kɛ anɔkuale nɛ e ye ɔ he je?

¹² Bɔ nɛ Mawu he nile nɛ Daniel ná a ye bua lɛ ha. Akɛnɛ Babilon ma a ji wɔ jali a ma he je ɔ, e he maa wa ha Yuda bi kaa e ma ja Mawu ngɛ lejɛ ɔ. Kaa nɔ hyɛmi nɔ́ ɔ, Yehowa de Yuda bi ɔmɛ ke: “Ma a nɛ i ha nɛ a ngɔ nyɛ kɛ ya hi mi ɔ, nyɛ hla jamɛ a ma a nɔ yami.” (Yer. 29:7) Se jamɛ a be ɔ mi nɔuu hu ɔ, Yehowa suɔ kaa a ja lɛ pɛ. (2 Mose 34:14) Mɛni ye bua Daniel nɛ e nyɛ nɛ e ye fami enyɔ nɛ ɔmɛ tsuo a nɔ? Mawu he nile nɛ e ngɛ ɔ ye bua lɛ nɛ e na kaa e sa nɛ e bu Mawu tue kekle loko e bu adesa nɔ yeli tue. Jeha lafa komɛ a se ɔ, Yesu hu ma sisi tomi mlaa nɛ ɔ nɔ mi.​—Luka 20:25.

¹³ Mo susu nɔ́ nɛ Daniel pee benɛ a wo mlaa kaa nɔ ko nɛ ko sɔle kɛ bi nɔ́ ko ngɛ mawu ko, aloo nɔmlɔ adesa ko dɛ pe matsɛ ɔ pɛ ɔ he nɛ o hyɛ. Mlaa a tsɔɔ kaa nɔ ko nɛ ko sɔle ligbi 30. (Kane Daniel 6:7-10.) Eko ɔ, Daniel ko je e nya ke, ‘Enɛ ɔ lɛɛ tse ligbi nyingmi etɛ pɛ!’ Se e ha we nɛ matsɛ ɔ fami ɔ  nɛ tsi e Mawu jami nya. Jinɛ e ma nyɛ maa sɔle ngɛ laami mi nɛ nɔ ko be lɛ nae. E le kaa ke e ngɛ sɔlee daa ligbi ɔ, nihi naa lɛ. Daniel le kaa ke e yi matsɛ ɔ fami ɔ nɔ ɔ, lɔ ɔ maa ngɔ haomi kɛ ba, se akɛnɛ e sume nɛ nihi nɛ a susu kaa e kpa Yehowa sɔmɔmi he je ɔ, e ya nɔ nɛ e sɔle.

¹⁴ Yehowa jɔɔ Daniel ngɛ kã nɛ e pee, kɛ anɔkuale nɛ e ye ɔ he je, nɛ e je lɛ kɛ je gbenɔ mi. Ngɛ anɔkuale mi ɔ, nɔ́ nɛ ɔ ha nɛ nihi fuu nu Yehowa he ngɛ tsitsaa ngɛ Medo-Persia Nɔ Yemi ɔ mi ɔ mi.​—Dan. 6:25-27.

15. Kɛ wa ma plɛ kɛ ná hemi kɛ yemi kaa Daniel ha kɛɛ?

¹⁵ Bɔ nɛ wa maa pee ha kɛ ná hemi kɛ yemi kaa Daniel. Pi Baiblo ɔ nɛ wa maa kane kɛkɛ nɛ ma ha nɛ wa hemi kɛ yemi ɔ mi maa wa, se mohu e sa nɛ waa ‘nu sisi.’ (Mat. 13:23) E sa nɛ waa le Yehowa susumi, kɛ bɔ nɛ waa kɛ Baiblo sisi tomi mlaahi ma tsu ní ha. Enɛ ɔ he ɔ, ke wa kane Baiblo ɔ, e sa nɛ wa susu he. Jehanɛ hu ɔ, e sa nɛ waa sɔle daa, titli ɔ, ke waa kɛ kahi aloo si fɔfɔɛhi nɛ a mi wa ngɛ kpee. Ke wa sɔle kaa Yehowa nɛ e ha wɔ juɛmi kɛ he wami, nɛ wa ngɛ hemi kɛ yemi ɔ, e ma ha wɔ faa.​—Yak. 1:5.

16, 17. Mɛni blɔ nɔ nɛ Hiob gu kɛ ná Yehowa he anɔkuale nile?

¹⁶ Bɔ nɛ Hiob plɛ kɛ le Yehowa ha. Pi Israel no ji Hiob. Se kɛ̃ ɔ, e nɛnɛmɛ ji Yakob, Isak kɛ Abraham. Yehowa tsɔɔ Hiob weku li nɛ ɔmɛ e he ní, kɛ yi mi tomi nɛ e ngɛ kɛ ha adesahi. Wa li blɔ pɔtɛɛ nɛ Hiob gu nɔ kɛ kase Yehowa he ní mohu lɛɛ, se e kase anɔkualehi nɛ a he hia nɛ ɔmɛ ekomɛ. (Hiob 23:12) E de ke: “Níhi nɛ nihi de mi ngɛ o he kɛkɛ lɛ i le.” (Hiob 42:5) Jehanɛ hu ɔ, Yehowa nitsɛ tsɔɔ kaa níhi nɛ Hiob de ngɛ e he ɔ ji anɔkuale.​—Hiob 42:7, 8.

¹⁷ Hiob na Mawu suhi nɛ a nɛ́ kɛ hɛ ngmɛ ɔ babauu ngɛ adebɔ níhi nɛ a naa amɛ a mi. (Hiob 12:7-9, 13) Pee se ɔ, Yehowa kɛ Elihu tsuo ngɔ adebɔ ní komɛ kɛ kai Hiob kaa ke a ngɔ adesahi kɛ to Mawu agboje ɔ he ɔ, adesa sui nɔ́ ko kulaa. (Hiob 37:14; 38:1-4) Munyuhi nɛ Yehowa tu ɔ ta Hiob tsui he, nɛ e kɛ he si bami de Mawu ke: “I le kaa he walɔ kpetekpleenyɛ ji mo; o nyɛɔ nɛ o peeɔ nɔ́ tsuaa nɔ́ nɛ o suɔ. . . . I kɛ tabo zu kɛ la zu to okadi kaa i pia ye he niinɛ.”​—Hiob 42:2, 6.

18, 19. Ngɛ mɛni blɔhi a nɔ nɛ Hiob tsɔɔ kaa e le Yehowa nitsɛnitsɛ?

 ¹⁸ Bɔ nɛ Mawu he nile nɛ Hiob ná a ye bua lɛ ha. Hiob le Mawu sisi tomi mlaa amɛ saminya. E le Yehowa nitsɛnitsɛ, nɛ lɔ ɔ ye bua lɛ nɛ e pee nɔ́ nɛ da. Mo susu he nɛ o hyɛ: Hiob le kaa e be nyɛe ma de ke e suɔ Mawu be mi nɛ e kɛ ni kpahi hí si saminya. (Hiob 6:14) E wo we e he nɔ, mohu ɔ, e tsɔɔ kaa e susuɔ ohiatsɛmɛ kɛ sikatsɛmɛ tsuo a he. Hiob de ke: ‘Mawu ɔ nɛ bɔ mi ɔ, lɛ kɛ̃ lɛ e bɔ mɛ.’ (Hiob 31:13-22) Benɛ Hiob ji niatsɛ po ɔ, e wo we e he nɔ, nɛ e bui ni kpahi kaa se nami be a he. Bɔ nɛ e pee e ní ha a je kpa kulaa ngɛ bɔ nɛ nihi fuu nɛ a ngɛ blɔ nya kɛ sika peeɔ a ní ha mwɔnɛ ɔ he!

¹⁹ Hiob yu e he ngɛ wɔ jami ní peepeehi tsuo a he. E le kaa ke nɔ ko ngɔ he lo nya níhi kɛ pee nɔ́ titli ngɛ e si himi mi ɔ, e ji wɔ jami, nɛ lɔ ɔ tsɔɔ kaa nɔ ɔ kua anɔkuale “Mawu nɛ ngɛ hiɔwe ɔ.” (Kane Hiob 31:24-28.) E na gba si himi kaa nɔ́ ko nɛ ngɛ klɔuklɔu nɛ Mawu to blɔ nya kɛ ha nyumu kɛ yo. E kɛ e hɛ ngmɛ so kaa e be zangmayo ko hyɛe ngɛ blɔ yaya nɔ. (Hiob 31:1) Nɔ́ nɛ Hiob pee ɔ sa kadimi wawɛɛ, ejakaa jamɛ a be ɔ mi ɔ, Mawu ngmɛ blɔ kaa nyumu ma nyɛ maa ngɔ yihi fuu. Lɔ ɔ he ɔ, jinɛ Hiob ma nyɛ maa ngɔ yihi enyɔ. * Se e ngɛ heii kaa Hiob mwɔ e yi mi kpɔ kaa e kɛ gba si himi he blɔ nya nɛ Yehowa to ngɛ Eden abɔɔ ɔ mi ɔ ma tsu ní. (1 Mose 2:18, 24) Maa pee jeha 1,600 se ɔ, Yesu Kristo tsɔɔ e kaseli ɔmɛ kaa a kɛ sisi tomi mlaa nɛ ɔ nɛ kɔɔ gba si himi kɛ bɔmi nami he ɔ nɛ tsu ní.​—Mat. 5:28; 19:4, 5.

20. Ngɛ mɛni blɔ nɔ nɛ ke wa le Yehowa kɛ e sisi tomi mlaa amɛ saminya a, lɔ ɔ maa ye bua wɔ konɛ waa hla huɛmɛ kpakpahi kɛ hɛja jemi nɛ sa?

²⁰ Bɔ nɛ wa maa pee ha kɛ ná hemi kɛ yemi kaa Hiob. Si kake ekohu ɔ, nɔ́ nɛ e he hia ji kaa wa ma ná Yehowa he anɔkuale nile konɛ jamɛ a nile ɔ nɛ kudɔ wɔ ngɛ si himi mi. Kaa nɔ hyɛmi nɔ́ ɔ, la polɔ David tsɔɔ kaa Yehowa ‘sume yiwutsotsɛmɛ kulaa.’ E bɔ wɔ kɔkɔ hu kaa waa kɛ “yakayaka nimli” nɛ ji nihi nɛ a yi anɔkuale ɔ nɛ ko bɔ. (Kane La 11:5; 26:4.) Mɛni ngmami nɛ ɔmɛ tsɔɔ mo ngɛ bɔ nɛ Yehowa susuɔ níhi a he ha a he? Kɛ ngmami ɔ maa ye bua mo ha kɛɛ, konɛ o le nɔ́ nɛ o kɛ maa pee nɔ́ titli ngɛ o si himi mi, bɔ nɛ o kɛ Intanɛti ɔ ma tsu ní ha, nihi nɛ e sa kaa o kɛ mɛ nɛ bɔ, kɛ níhi nɛ o kɛ ma je o hɛja? Bɔ nɛ o ma ha sane bimi nɛ ɔmɛ a heto ha a maa ye bua mo konɛ o le ke ji o suɔ Yehowa nitsɛnitsɛ. Bɔ nɛ pee nɛ wa nyɛ nɛ waa hi si kaa nihi nɛ piami ko be a he ngɛ je nɛ ní yayahi hyi lɛ tɔ nɛ ɔ mi ɔ, e sa nɛ wa tsɔse wa ‘juɛmi konɛ wa nyɛ nɛ wa kɔ nɔ́ se,’ nɛ waa le slɔɔto nɛ ngɛ nɔ́ nɛ da kɛ nɔ́ nɛ dɛ, kɛ jehanɛ hu ɔ, nɔ́ nɛ juɛmi ngɛ mi kɛ nɔ́ nɛ juɛmi be mi a kpɛti.​—Heb. 5:14; Efe. 5:15.

21. Mɛni maa ye bua wɔ nɛ waa ‘nu nɔ́ fɛɛ nɔ́’ nɛ e sa kaa waa pee konɛ waa sa wa hiɔwe Tsɛ ɔ hɛ mi ɔ “sisi saminya”?

²¹ Akɛnɛ Noa, Daniel kɛ Hiob tsuo je a tsui mi kɛ hla Yehowa se blɔ he je ɔ, Yehowa ha nɛ a na lɛ. Yehowa ye bua mɛ nɛ a ‘nu nɔ́ fɛɛ nɔ́’ nɛ e sa kaa a pee konɛ a nyɛ nɛ a sa e hɛ mi ɔ “sisi saminya.” A nɔ hyɛmi ní ɔmɛ tsɔɔ kaa ke wa pee níhi nɛ da ngɛ Mawu hɛ mi ɔ, wa maa ye manye ngɛ si himi mi. (La 1:1-3) Lɔ ɔ he ɔ, mo bi o he ke: ‘Anɛ i le Yehowa kaa bɔ nɛ Noa, Daniel kɛ Hiob le lɛ ɔ lo?’ Ngɛ anɔkuale mi ɔ, o ma nyɛ maa le Yehowa pe mɛ po, ejakaa mwɔnɛ ɔ, mumi mi la a ngɛ kpɛe wawɛɛ! (Abɛ 4:18) Enɛ ɔ he ɔ, moo kase Baiblo ɔ saminya. Mo pue o yi mi tɛ ngɛ he, nɛ o sɔle kɛ bi mumi klɔuklɔu ɔ. Kɛkɛ ɔ, o maa hɛ kɛ su wa hiɔwe Tsɛ ɔ he haa. Enɛ ɔ maa ye bua mo konɛ o kɛ nɔ́ se kɔmi kɛ juɛmi nɛ tsu ní ngɛ je yaya nɛ ɔ mi.​—Abɛ 2:4-7.