1, 2. (a) Benɛ e piɛ bɔɔ nɛ Yesu ma gbo ɔ, mɛni e de e kaseli ɔmɛ? (Moo hyɛ foni nɛ ngɛ ní kasemi ɔ sisije ɔ.) (b) Mɛni he je nɛ e sɛ nɛ wa hɛ nɛ je yi mi tomi he je nɛ wa fiɛɛɔ nɔ ɔ? (d) Mɛni he wa ma susu ngɛ munyu nɛ ɔ mi?

GBƆKUƐ nɛ e nɔ jena Yesu ma gbo ɔ, e kɛ e bɔfo ɔmɛ sɛɛ ní be kɛkɛɛ, nɛ e ha nɛ a le kaa e suɔ mɛ wawɛɛ. Jehanɛ hu ɔ, e ngɔ wai tso kɛ pee nɔ́ he tomi nɔ́ kɛ tsɔɔ mɛ ní kaa bɔ nɛ wa na ngɛ munyu nɛ sɛ hlami ɔ mi ɔ. Yesu ngɔ jamɛ a nɔ́ he tomi nɔ́ ɔ kɛ tsu ní kɛ wo e kaseli ɔmɛ he wami konɛ a “ya nɔ” nɛ a “wo yiblii babauu,” nɛ tsɔɔ kaa e sa nɛ a kɛ hɛ mi miami nɛ fiɛɛ Matsɛ Yemi sɛ gbi ɔ.​—Yoh. 15:8.

² Se kɛ̃ ɔ, tsa pi nɔ́ nɛ e sa nɛ kaseli ɔmɛ nɛ a pee ɔ pɛ nɛ Yesu tsɔɔ mɛ, se e tsɔɔ nɔ́ he je nɛ e sa nɛ a pee jã a hulɔ. E tsɔɔ mɛ yi mi tomihi a he je nɛ e sa kaa a fiɛɛ. Mɛni he je nɛ e sa kaa wa susu yi mi tomi nɛ ɔmɛ a he ɔ? Ke wa le nɔ́ he je nɛ e sa kaa waa ya nɔ nɛ waa fiɛɛ ɔ, e maa ye bua wɔ nɛ wa ma fĩ si be mi nɛ wa ngɛ “je ma amɛ tsuo odase” yee ɔ. (Mat. 24:13, 14) Enɛ ɔ he ɔ, nyɛ ha nɛ waa hyɛ níhi eywiɛ nɛ ngɛ Ngmami ɔ mi nɛ woɔ wɔ he wami kaa waa fiɛɛ. Wa ma susu nike ní eywiɛ komɛ nɛ Yehowa kɛ ha wɔ ɔmɛ hu a he. Nike ní nɛ ɔmɛ yeɔ bua wɔ nɛ wa woɔ yiblii.

3. (a) Kaa bɔ nɛ Yohane 15:8 ɔ tsɔɔ, mɛni ji yi mi tomi he je nɛ wa fiɛɛɔ? (b) Mɛni wai yiblii ɔ nɛ ngɛ Yesu nɔ́ he tomi nɔ́ ɔ mi ɔ daa si ha, nɛ mɛni he je nɛ sisi numi ngɛ he jã?

³ Yi mi tomi titli he je nɛ wa fiɛɛɔ ji kaa wa suɔ nɛ waa wo Yehowa hɛ mi nyami, nɛ́ wa tsɔ e biɛ ɔ he. (Kane Yohane 15:1, 8.) Mo kadi kaa Yesu ngɔ e Tsɛ ɔ, nɛ ji Yehowa kɛ to wai ngmɔ hulɔ ko he. Yesu ngɔ lɛ nitsɛ e he kɛ to wai tso he, nɛ e ngɔ e se nyɛɛli ɔmɛ kɛ to wai tso kɔni ɔmɛ a he. (Yoh. 15:5) Enɛ ɔ he ɔ, sisi numi ngɛ he kaa wai yiblii ɔ daa si ha Matsɛ yemi sɛ gbi nɛ Kristo se nyɛɛli ngɛ fiɛɛe ɔ. Yesu de e bɔfo ɔmɛ ke: “Nɔ́ nɛ e woɔ ye Tsɛ ɔ hɛ mi nyami ji kaa nyɛ maa ya nɔ maa wo yiblii babauu.” Kaa bɔ nɛ wai tso nɛ woɔ yiblii kpakpa haa nɛ ngmɔtsɛ ɔ bua jɔɔ aloo e woɔ e hɛ mi nyami ɔ, jã nɔuu nɛ ke wa fiɛɛ Matsɛ Yemi sɛ gbi ɔ saminya a, e woɔ Yehowa hɛ mi nyami.​—Mat. 25:20-23.

4. (a) Mɛni blɔhi a nɔ wa guɔ kɛ haa nɛ Mawu biɛ ɔ he tsɔɔ? (b) Kɛ o naa he blɔ nɛ o ná kaa o ma ha nɛ Mawu biɛ ɔ he nɛ tsɔ ɔ ha kɛɛ?

⁴ Ngɛ mɛni blɔ nɔ nɛ wa fiɛɛmi ní tsumi ɔ haa nɛ Mawu biɛ ɔ he tsɔɔ? Mawu biɛ ɔ he tsɔ aloo e ngɛ klɔuklɔu momo. Enɛ ɔ he ɔ, wa be nyɛe maa pee nɔ́ ko nɛ ma ha nɛ e biɛ ɔ nɛ pee klɔuklɔu pe bɔ nɛ e ngɛ ɔ. Se mo kadi nɔ́ nɛ gbalɔ Yesaya de ɔ. E de ke: “Yehowa Tabohiatsɛ ɔ, lɛ ji Nɔ nɛ e sa kaa nyɛɛ bu lɛ kaa e ngɛ klɔuklɔu.” (Yes. 8:13, NW) Ní komɛ ngɛ nɛ wa ma nyɛ maa pee kɛ tsɔɔ kaa Mawu biɛ ɔ ngɛ klɔuklɔu. E sa nɛ waa na e biɛ ɔ kaa e ngɛ slɔɔto kulaa ngɛ biɛ kpahi tsuo a he konɛ waa ye bua ni kpahi nɛ a ná bumi kɛ ha e biɛ klɔuklɔu ɔ. (Mat. 6:9, sisi ningma) Kaa nɔ hyɛmi nɔ́ ɔ, ke wa tsɔɔ nihi Yehowa su kpakpa amɛ, nɛ wa ha nɛ a le Yehowa yi mi tomi kɛ ha adesahi ɔ, wa ngɛ mɛ ye buae konɛ a na kaa ní yayahi tsuo nɛ Satan de ngɛ Mawu he ɔ ji lakpa. (1 Mose 3:1-5) Jehanɛ hu ɔ, ke wa bɔ mɔde kaa wa maa ye bua nihi konɛ a na kaa e sa nɛ a “ngɔ hɛ mi nyami, bumi, kɛ he wami” kɛ ha Yehowa a, wa ngɛ Mawu biɛ ɔ pee klɔuklɔu. (Kpoj. 4:11) Nyɛminyumu ko nɛ a tsɛɛ lɛ ke Rune nɛ e kɛ jeha 16 tsu blɔ gbami ní tsumi ɔ de ke: “Lemi nɛ i le kaa a ha mi he blɔ kaa ma ye je ɔ tsuo Bɔlɔ ɔ he odase ɔ haa nɛ ye bua jɔɔ wawɛɛ. Lɔ ɔ woɔ mi he wami nɛ i kpa we fiɛɛmi.”

5. (a) Kaa bɔ nɛ Yohane 15:9, 10 tsɔɔ ɔ, mɛni he je nɛ wa fiɛɛɔ? (b) Ngɛ mɛni blɔ nɔ nɛ Yesu ma nɔ mi kaa e he hia nɛ wa fĩ si?

⁵ Kane Yohane 15:9, 10. Suɔmi nɛ wa ngɛ kɛ ha Yehowa kɛ Yesu ɔ ji yi mi tomi enyɔne he je nɛ wa fiɛɛɔ Matsɛ Yemi sɛ gbi ɔ. (Maak. 12:30; Yoh. 14:15) Yesu de e kaseli ɔmɛ kaa a “hi [e] suɔmi ɔ mi.” Mɛni he je? Ejakaa loko nɔ ko ma nyɛ maa pee Kristo kaselɔ nitsɛnitsɛ daa ligbi ɔ, ja e fĩ si. Yesu ngɔ munyu nɛ ji, ‘hii mi’ ɔ kɛ tsu ní ngɛ blɔ slɔɔtohi a nɔ ngɛ Yohane 15:4-10 konɛ e kɛ ma nɔ mi kaa e he hia nɛ wa fĩ si.

6. Mɛni wa maa pee kɛ tsɔɔ kaa wa suɔ nɛ waa hi Kristo suɔmi ɔ mi?

⁶ Mɛni wa maa pee kɛ tsɔɔ kaa wa suɔ nɛ waa hi Kristo suɔmi ɔ mi konɛ e bua nɛ jɔ wa he? Ja wa ye e mlaa amɛ a nɔ. Ngɛ e kpiti pomi mi ɔ, Yesu ngɛ dee ke, ‘Nyɛɛ bu mi tue.’ Nɔ́ nɛ Yesu nitsɛ pee ɔ nɛ e ngɛ wɔ dee ke waa pee ɔ nɛ, ejakaa e de ke: “Imi hu i ye Tsɛ ɔ kita amɛ a nɔ nɛ i ngɛ e suɔmi ɔ mi.” E sa nɛ waa nyɛɛ Yesu nɔ hyɛmi nɔ́ ɔ se.​—Yoh. 13:15.

7. Mɛni tsakpa lɛ ngɛ tue bumi kɛ suɔmi a kpɛti?

⁷ Yesu tsɔɔ e bɔfo ɔmɛ kaa tsakpa ngɛ tue bumi kɛ suɔmi a kpɛti. E de mɛ ke: “Nɔ fɛɛ nɔ nɛ e ngɛ ye kita amɛ, nɛ e yeɔ a nɔ ɔ, lɛ ji nɔ nɛ e suɔ mi.” (Yoh. 14:21) Fami nɛ Yesu fã wɔ kaa wa ya fiɛɛ ɔ je  e Tsɛ ɔ ngɔ. Enɛ ɔ he ɔ, ke wa ye fami nɛ ɔ nɔ ɔ, lɔ ɔ tsɔɔ kaa wa suɔ Mawu. (Mat. 17:5; Yoh. 8:28) Ke wa pee jã a, Yehowa kɛ Yesu hu maa suɔ wɔ daa.

8, 9. (a) Mɛni ji yi mi tomi kpa ko he je nɛ wa fiɛɛɔ? (b) Mɛni he je nɛ munyu nɛ Yehowa tu ngɛ Ezekiel 3:18, 19 kɛ 18:23 ɔ woɔ wɔ he wami, nɛ wa yaa nɔ nɛ wa fiɛɛɔ ɔ?

⁸ Yi mi tomi etɛne he je nɛ wa tsuɔ fiɛɛmi ní tsumi ɔ ji kaa, wa fiɛɛmi ní tsumi ɔ bɔɔ nihi kɔkɔ. Ngɛ Baiblo ɔ mi ɔ, a tsɛ Noa ke “fiɛɛlɔ.” (Kane 2 Petro 2:5.) Loko Nyu Kpekpemi ɔ maa ba a, e ngɛ heii kaa e bɔ nihi kɔkɔ kaa a ma kpata je ɔ hɛ mi. Kɛ wa plɛ kɛ le kaa e bɔ ni ɔmɛ kɔkɔ kɛɛ? Mo kadi kaa Yesu de ke: “Loko Nyu Kpekpemi ɔ maa ba a, jamɛ a be ɔ mi ɔ, nihi ngɛ ní yee nɛ a ngɛ ní nue, nyumuhi ngɛ yihi ngɔe nɛ a ngɔ yihi kɛ ngɛ gba hae kɛ ya si ligbi ɔ nɛ Noa sɛ daka a mi, nɛ a yɔse we kɛ ya si be nɛ Nyu Kpekpemi ɔ ba nɛ e ba muɔɔ mɛ tsuo kɛ ho. Kaa bɔ nɛ e ba ngɛ jamɛ a be ɔ mi ɔ, jã kɛ̃ nɛ e maa ba ke nɔmlɔ Bi ɔ ba a.” (Mat. 24:38, 39) E ngɛ mi kaa ni ɔmɛ bui Noa tue mohu lɛɛ, se e ya nɔ nɛ e bɔ mɛ kɔkɔ kaa bɔ nɛ Yehowa fã lɛ ɔ.

⁹ Mwɔnɛ ɔ, wa fiɛɛɔ Matsɛ Yemi sɛ gbi ɔ konɛ nihi nɛ a le Mawu yi mi tomi kɛ ha adesahi. Ngɛ anɔkuale mi ɔ, wa suɔ kaa nihi nɛ a bu wɔ tue konɛ a “yi nɛ ná wami” kaa bɔ nɛ Yehowa ngɛ hlae ɔ. (Eze. 18:23) Se jamɛ a be ɔ mi nɔuu hu ɔ, ke wa ngɛ fiɛɛe ngɛ wehi a mi kɛ magbɛ nɔ ɔ, wa bɔɔ nihi babauu kɔkɔ kaa Mawu Matsɛ Yemi ɔ ma ba kpata je yaya nɛ ɔ hɛ mi.​—Eze. 3:18, 19; Dan. 2:44; Kpoj. 14:6, 7.

10. (a) Kaa bɔ nɛ Mateo 22:39 ɔ tsɔɔ ɔ, mɛni he je nɛ wa fiɛɛɔ? (b) Moo tsɔɔ bɔ nɛ Paulo kɛ Silas ye bua bulɔ ko ha ngɛ Filipi.

¹⁰ Yi mi tomi eywiɛne he je nɛ wa yaa nɔ nɛ wa fiɛɛɔ ji kaa wa suɔ wa nyɛmimɛ adesahi. (Mat. 22:39) Suɔmi nɛ ɔ woɔ wɔ he wami nɛ waa kɛ hɛ mi miami tsuɔ fiɛɛmi ní tsumi ɔ, ejakaa wa le kaa ke nihi a si himi tsake ɔ, lɔ ɔ ma nyɛ ma ha nɛ a bu wɔ tue. Mo susu bɔfo Paulo kɛ Silas a níhi a si kpami ɔ he nɛ o hyɛ. Benɛ a ya Filipi ɔ, si temi kɛ woli wo mɛ tsu. Nyɔ mi kpɛti ɔ, zugba mimiɛɛ tlukaa ngɛ tsu womi he ɔ, nɛ sinya amɛ bli. Bulɔ nɛ ngɛ nihi nɛ a wo mɛ tsu ɔ a nɔ hyɛe ɔ susu kaa ni ɔmɛ tu fo kɛ je, enɛ ɔ he ɔ, e hia klaate nɛ jinɛ e yaa gbe e he. Se Paulo kpa ngmlaa ke: “Koo ye o he awi!” Bulɔ ɔ bi ke: “Mɛni e sa kaa ma pee konɛ a he ye yi wami?” A de lɛ ke: “Mo he Nyɔmtsɛ Yesu nɛ o ye, nɛ a ma he [o] yi wami.”​—Níts. 16:25-34.

11, 12. (a) Kɛ bulɔ ɔ sane ɔ kɔɔ wa fiɛɛmi ní tsumi ɔ he ha kɛɛ? (b) Mɛni he je nɛ wa suɔ nɛ waa ya nɔ nɛ waa fiɛɛ ɔ?

¹¹ Kɛ bulɔ ɔ sane ɔ kɔɔ wa fiɛɛmi ní tsumi ɔ he ha kɛɛ? Mo kadi kaa zugba mimiɛmi ɔ se loko bulɔ ɔ tsake e tsui, nɛ e bi yemi kɛ buami. Jã nɔuu nɛ mwɔnɛ ɔ, ni komɛ hu nɛ a bui Baiblo ɔ sɛ gbi ɔ tue ɔ ma nyɛ ma tsake a tsui, nɛ a ma bi nɛ a ye bua mɛ ke haomi ngua ko hoso mɛ kaa bɔ nɛ zugba mimiɛɛɔ ɔ. Kaa nɔ hyɛmi nɔ́ ɔ, nihi nɛ wa fiɛɛɔ ha mɛ ɔ a ti ni komɛ a ní tsumi ma nyɛ ma puɛ, nɛ lɔ ɔ ma ha nɛ a  hao. Eko ɔ, ni komɛ hu a gba si himi ma nyɛ ma puɛ, nɛ a maa pee basaa. E ma nyɛ maa ba kaa a kpɛti ni komɛ maa nu hiɔ ko nɛ nya wa, aloo a suɔlɔ ko ma gbo nɛ lɔ ɔ ma ha nɛ a ye aywilɛho. E ngɛ mi kaa jinɛ a bua jɔɛ sɛ gbi ɔ he mohu lɛɛ, se ke a kɛ haomihi kaa jã kpe ɔ, a maa suɔ nɛ a le nɔ́ he je nɛ ní nɛ ɔmɛ ba a nɔ. Eko ɔ, lɔ ɔ ma ha nɛ a bi ke, ‘Mɛni e sa kaa ma pee konɛ a he ye yi wami?’ Eko ɔ, ke wa ya a ngɔ jehanɛ ɔ, a maa bu wa sɛ gbi nɛ haa nɔ hɛ nɔ kami ɔ tue.

¹² Enɛ ɔ he ɔ, ke wa ya nɔ nɛ waa kɛ anɔkuale yemi fiɛɛ ɔ, wa ma nyɛ maa wo nihi nɛ a pee klaalo kaa a maa bu sɛ gbi ɔ tue ɔ a bua ngɛ be nɛ sa mi. (Yes. 61:1) Nyɛmiyo Charlotte nɛ e kɛ jeha 38 tsu be tsuo sɔmɔmi ní tsumi ɔ de ke: “Mwɔnɛ ɔ, nihi fuu laa. Se ke wa ya fiɛɛ ha mɛ ɔ, a ma ná he blɔ kɛ nu sane kpakpa a.” Nyɛmiyo Ejvor nɛ e kɛ jeha 34 tsu blɔ gbami ní tsumi ɔ de ke: “Mwɔnɛ ɔ, nihi fuu a kɔni mi ngɛ jɔ̃e pe be ko nɛ be ɔ. I suɔ nɛ ma ye bua mɛ. Enɛ ɔ woɔ mi he wami nɛ i fiɛɛɔ.” Niinɛ, suɔmi nɛ wa ngɛ kɛ ha wa nyɛmimɛ adesahi ɔ woɔ wɔ he wami, nɛ wa yaa nɔ nɛ wa tsuɔ fiɛɛmi ní tsumi ɔ!

13, 14. (a) Mɛni nike ní nɛ a wo ta ngɛ Yoh. 15:11? (b) Kɛ wa ma plɛ kɛ ná bua jɔmi nɛ Yesu ngɛ ɔ eko ha kɛɛ? (d) Ke wa ngɛ bua jɔmi ɔ, kɛ lɔ ɔ ma ha nɛ wa tsu fiɛɛmi ní tsumi ɔ ha kɛɛ?

¹³ Gbɔkuɛ nɛ e nɔ jena Yesu ma gbo ɔ, e tsɔɔ e bɔfo ɔmɛ nike ní slɔɔtohi nɛ maa ye bua mɛ konɛ a nyɛ nɛ a kɛ hɛ mi miami nɛ wo yiblii. Mɛni ji jamɛ a nike ní ɔmɛ, nɛ kɛ wa náa a he se ha kɛɛ?

¹⁴ Bua jɔmi. Anɛ fami nɛ Yesu fã wɔ kaa waa fiɛɛ ɔ ji tlomi lo? Dɛbi. Benɛ Yesu ngɔ wai tso ɔ kɛ pee nɔ́ he tomi nɔ́ ɔ se ɔ, e tsɔɔ kaa Matsɛ Yemi sɛ gbi ɔ nɛ wa maa fiɛɛ ɔ ma ha nɛ wa ná bua jɔmi. (Kane Yohane 15:11.) Ngɛ anɔkuale mi ɔ, e wo wɔ si kaa wa ma ná e bua jɔmi ɔ eko. Ngɛ mɛni blɔ nɔ? O ma kai kaa Yesu ngɔ lɛ nitsɛ e he kɛ to wai tso he, nɛ e ngɔ e kaseli ɔmɛ kɛ to wai tso kɔnihi a he. Wai tso kɔni ɔmɛ be nyɛe maa wa ngɛ a dɛ he. A náa nyu kɛ niye ní kɛ jeɔ wai tso ɔ mi. Jã kɛ̃ nɛ e sa nɛ waa nyɛɛ Kristo nane mami he ɔmɛ a se haa konɛ nɔ́ ko nɛ ko gba wɔ kɛ je e he. Kɛkɛ ɔ, wa ma ná bua jɔmi nɛ lɛ hu e náa ngɛ e Tsɛ ɔ suɔmi nya ní peemi mi ɔ eko. (Yoh. 4:34; 17:13; 1 Pet. 2:21) Nyɛmiyo Hanne nɛ e kɛ jeha 40 tsu blɔ gbami ní tsumi ɔ de ke: “Ke i ya fiɛɛmi ɔ, bua jɔmi nɛ i náa a woɔ mi he wami, nɛ i tsuɔ babauu ngɛ Yehowa sɔmɔmi mi.” Ee, bua jɔmi haa nɛ wa náa kã nɛ wa yaa nɔ nɛ wa fiɛɛɔ ngɛ zugba kpɔhi nɛ a mi wa po a mi.​—Mat. 5:10-12.

15. (a) Mɛni nike ní nɛ a wo ta ngɛ Yohane 14:27? (b) Ngɛ mɛni blɔ nɔ nɛ tue mi jɔmi yeɔ bua wɔ nɛ wa yaa nɔ nɛ wa woɔ yiblii?

¹⁵ Tue mi jɔmi. (Kane Yohane 14:27.) Jamɛ a gbɔkuɛ ɔ nɛ e nɔ je na Yesu ma gbo ɔ, e sɛ hlami de e bɔfo ɔmɛ ke: “I ngɔ ye tue mi jɔmi ɔ kɛ ngɛ nyɛ hae.” Ngɛ mɛni blɔ nɔ nɛ tue mi jɔmi nɛ Yesu haa wɔ ɔ yeɔ bua wɔ nɛ wa woɔ yiblii? Ke wa fĩ si ngɛ fiɛɛmi ní tsumi ɔ mi ɔ, wa le kaa lɔ ɔ saa Yehowa kɛ Yesu a hɛ mi. Enɛ ɔ haa nɛ wa nuɔ he ngɛ wa tsui mi kaa wa ngɛ tue mi jɔmi nitsɛnitsɛ. (La 149:4; Rom. 5:3, 4; Kol. 3:15) Nyɛminyumu Ulf nɛ e kɛ jeha 45 tsu be tsuo sɔmɔmi ní tsumi ɔ de ke: “Ke i ya fiɛɛmi ɔ, pɔ tɔɔ ye he lɛɛ, se fiɛɛmi ní tsumi ɔ haa nɛ ye tsui nɔɔ ye mi, nɛ i naa kaa i kɛ ye wami ngɛ ní tsumi nɛ hi pe kulaa tsue.” Wa naa Yehowa si kaa e haa nɛ wa náa tue mi jɔmi nitsɛnitsɛ!

16. (a) Mɛni nike ní nɛ a wo ta ngɛ Yohane 15:15? (b) Mɛni nɛ e sa nɛ bɔfo ɔmɛ nɛ a pee konɛ huɛ bɔmi nɛ ngɛ a kɛ Yesu a kpɛti ɔ nɛ hi si daa?

¹⁶ Huɛ bɔmi. Benɛ Yesu de e bɔfo ɔmɛ ke  e ma ha nɛ bua jɔmi nɛ a ngɛ ɔ maa “pi si” ɔ, e tsɔɔ mɛ hu kaa e he hia nɛ a ngɔ a he kɛ sã afɔle ha ni kpahi. (Yoh. 15:11-13) Lɔ ɔ se ɔ, e de ke: “I tsɛ nyɛ ke huɛmɛ.” Huɛ bɔmi nɛ maa hi nɔ ko kɛ Yesu a kpɛti ɔ ji nike ní nitsɛnitsɛ! Se mɛni e sa kaa bɔfo ɔmɛ nɛ a pee konɛ huɛ bɔmi nɛ ngɛ a kɛ Yesu a kpɛti ɔ nɛ hi si daa? E sa nɛ a ‘ya nɛ a ya hi yiblii woe.’ (Kane Yohane 15:14-16.) Jeha enyɔ loko Yesu maa tu munyu nɛ ɔ, e ngɔ blɔ tsɔɔmi kɛ ha e kaseli ɔmɛ. E de mɛ ke: “Ke nyɛ yaa a, nyɛɛ fiɛɛ nɛ nyɛ de ke: ‘Hiɔwe Matsɛ Yemi ɔ su si ta.’” (Mat. 10:7) Lɔ ɔ he ɔ, gbɔkuɛ nɛ e nɔ jena Yesu ma gbo ɔ, e wo e bɔfo ɔmɛ he wami kaa a fĩ si nɛ a tsu ní tsumi nɛ a je sisi ɔ. (Mat. 24:13; Maak. 3:14) E ngɛ mi kaa Yesu fami ɔ nɔ yemi be gbɔjɔɔ mohu lɛɛ, se a ma nyɛ maa ye manye, nɛ jã nɛ a maa pee ɔ ma ha nɛ huɛ bɔmi nɛ ngɛ a kɛ Yesu a kpɛti ɔ maa hi si daa. Se mɛni maa ye bua mɛ konɛ a nyɛ nɛ a ye manye? Nike ní kpa ko ngɛ nɛ maa ye bua mɛ.

17, 18. (a) Mɛni nike ní nɛ a wo ta ngɛ Yohane 15:16? (b) Kɛ nike ní ɔ ye bua Yesu kaseli ɔmɛ ha kɛɛ? (d) Mɛni nike níhi wa ná nɛ woɔ wɔ he wami mwɔnɛ ɔ?

¹⁷ Wa sɔlemihi a heto nɛ Mawu haa. Yesu de e bɔfo ɔmɛ ke: “Nɔ́ fɛɛ nɔ́ nɛ nyɛ ma bi Tsɛ ɔ ngɛ ye biɛ mi ɔ, e [ma] ha nyɛ.” (Yoh. 15:16) Hyɛ bɔ nɛ si womi nɛ ɔ maa wo bɔfo ɔmɛ he wami ha! * Bɔfo ɔmɛ nui sisi kaa e be kɛe nɛ a Hɛ Mi Nyɛɛlɔ ɔ ma gbo kɛ je a he. Se ke e gbo po ɔ, lɔ ɔ tsɔɔ we kaa a be yemi kɛ buami ko náe. Yehowa pee klaalo kaa ke a sɔle kɛ bi yemi kɛ buami konɛ a nyɛ nɛ a fiɛɛ Matsɛ Yemi sɛ gbi ɔ kaa bɔ nɛ Yesu fã mɛ ɔ, e ma ha a sɔlemi ɔ heto. Niinɛ hu ɔ, ngɛ Yesu gbenɔ se ɔ, e kɛ we kulaa nɛ a na kaa Yehowa ha sɔlemi ko nɛ a sɔle kɛ bi yemi kɛ buami ɔ heto.​—Níts. 4:29, 31.

¹⁸ Jã nɛ e ji ngɛ wa be nɛ ɔ mi hulɔ. Yiblii nɛ wa woɔ ngɛ fiɛɛmi ní tsumi ɔ mi ɔ haa nɛ wa peeɔ Yesu huɛmɛ. Jehanɛ hu ɔ, wa ngɛ nɔ mi mami kaa ke waa kɛ nyagbahi ngɛ kpee ngɛ fiɛɛmi ní tsumi ɔ mi, nɛ wa sɔle kaa Yehowa nɛ ye bua wɔ ɔ, e ma ha wa sɔlemi ɔ heto. (Filip. 4:13) Wa bua jɔɔ wawɛɛ kaa wa ji Yesu huɛmɛ, nɛ Mawu hu haa wa sɔlemihi a heto! Nike ní nɛ ɔmɛ nɛ Yehowa ha wɔ ɔ woɔ wɔ he wami, nɛ wa woɔ yiblii daa.​—Yak. 1:17.

19. (a) Mɛni he je nɛ wa kpa we fiɛɛmi ɔ? (b) Mɛni maa ye bua wɔ konɛ wa nyɛ nɛ waa gbe ní tsumi nɛ Mawu kɛ wo wa dɛ ɔ nya?

¹⁹ Kaa bɔ nɛ wa na ngɛ munyu nɛ ɔ mi ɔ, ke wa fiɛɛ Matsɛ Yemi sɛ gbi ɔ, e woɔ Yehowa hɛ mi nyami, nɛ e haa nɛ e biɛ ɔ peeɔ klɔuklɔu. E tsɔɔ bɔ nɛ wa suɔ Yehowa kɛ Yesu ha, wa náa he blɔ kɛ bɔɔ nihi kɔkɔ, nɛ wa tsɔɔ kaa wa suɔ wa nyɛmimɛ adesahi. Jehanɛ hu ɔ, nike níhi nɛ ji, bua jɔmi, tue mi jɔmi, huɛ bɔmi kɛ wa sɔlemihi a heto nɛ wa náa a woɔ wɔ he wami konɛ wa nyɛ nɛ waa gbe ní tsumi nɛ Mawu kɛ wo wa dɛ ɔ nya. Ke wa “ya nɔ” nɛ wa “wo yiblii babauu” ɔ, Yehowa bua maa jɔ wa he wawɛɛ!