NÍ KASEMI 41
Moo Ye Anɔkuale Ngɛ “Amanehlu Ngua” a Mi
“Nyɛɛ suɔ Yehowa, nyɛ nihi tsuo nɛ nyɛ fĩɔ e se ɔ! Yehowa poɔ anɔkualetsɛmɛ a he piɛ.”—LA 31:23, NW.
LA 129 Wa Ma Fĩ Si Daa
NƆ́ NƐ WA MAA KASE *
1-2. (a) Mɛni e be kɛe nɛ je ma amɛ ma de? (b) Mɛni sane bimihi e sa nɛ wa ná a heto ɔmɛ?
MOO ngɔ lɛ kaa jehanɛ ɔ lɛɛ je ma amɛ bɔni munyu ko nɛ waa kɛ be gagaa hyɛ blɔ ɔ tumi. A ngɛ dee ke, “tue mi jɔmi kɛ slɔkee si himi ba.” Eko ɔ, a ma si a gugue nɛ a ma de ke je ɔ mi pee slɔkee pe daa. Je ma amɛ maa suɔ nɛ wa susu kaa a nyɛ tsu haomihi nɛ ngɛ je ɔ mi ɔ he ní. Se ngɛ anɔkuale mi ɔ, nɔ́ ko maa ba ngɛ lɔ ɔ se nɛ a be nyɛe maa pee he nɔ́ ko! Mɛni he je? Ejakaa Baiblo ɔ gba ke, “si kake too ɔ, hɛ mi kpatami maa ba a nɔ tlukaa, . . . nɛ a he be mi jee kɔkɔɔkɔ.”—1 Tɛs. 5:3.
2 Sane bimi komɛ hu nɛ e sa nɛ waa na heto ɔmɛ ji: Mɛni maa ya nɔ ngɛ “amanehlu ngua” a mi? Mɛni Yehowa maa hyɛ blɔ kaa waa pee ngɛ jamɛ a be ɔ mi? Mɛni wa maa pee kɛ dla wa he konɛ wa nyɛ nɛ waa ye anɔkuale ngɛ amanehlu ngua a mi?—Mat. 24:21.
MƐNI MAA YA NƆ NGƐ “AMANEHLU NGUA” A MI?
3. Ngɛ Kpo Jemi 17:5, 15-18 ɔ nya a, mɛni blɔ nɔ Mawu maa gu kɛ kpata “Babilon Ngua a” hɛ mi?
3 Kane Kpo Jemi 17:5, 15-18. A ma kpata “Babilon Ngua a” hɛ mi! Kaa bɔ nɛ wa de kɛ sɛ hlami ɔ, je ma amɛ be nyɛe maa pee nɔ́ nɛ ɔ he nɔ́ ko. Mɛni he je? Ejakaa “Mawu [maa] ngɔ kɛ wo a tsui mi kaa a tsu e susumi ɔ he ní.” Mɛni ji jamɛ a susumi ɔ? Lɔ ɔ ji lakpa jamihi tsuo a hɛ mi nɛ a ma kpata. Jamihi tsuo nɛ a tsɛɛ a he ke Kristofohi ɔ hu piɛɛ he. Mawu maa ngɔ e susumi kɛ wo “lohwe awi yelɔ tsutsuutsu” ɔ “koli nyɔngma a” tsui mi. Koli nyɔngma a daa si kɛ ha nɔ yemihi nɛ a ngɛ jeɔ mi nɛ a fĩ “lohwe awi yelɔ ɔ,” nɛ ji Je Ma Amɛ A Kake Peemi Kuu ɔ se ɔ. (Kpoj. 17:3, 11-13; 18:8) Ke nɔ yemi ɔmɛ te si kɛ wo lakpa jamihi pɛ ɔ, lɔ ɔ maa tsɔɔ kaa amanehlu ngua a je sisi. Enɛ ɔ maa ba tlukaa, nɛ e maa wo nihi tsuo nɛ a ngɛ je ɔ mi ɔ a he gbeye wawɛɛ nitsɛ.
4. (a) Mɛni nɛ eko ɔ, je ma amɛ maa da nɔ kɛ tua lakpa jami ɔmɛ? (b) Mɛni nɛ eko ɔ, nihi nɛ jinɛ a ngɛ jami nɛ ɔmɛ a mi ɔ maa pee?
4 Wa li níhi nɛ ma ha nɛ je ma amɛ nɛ a ya tua Babilon Ngua a. Eko ɔ, a ma de ke jami ɔmɛ ha we nɛ tue mi jɔmi nɛ hi je ɔ mi, nɛ a ngɔɔ a he kɛ woɔ ma kudɔmi sanehi a mi. Aloo eko ɔ, a ma de ke jami kuu nɛ ɔmɛ gu nihi a nɔ kɛ ná ní kpɔtɔɔ kɛ weto níhi fuu. (Kpoj. 18:3, 7) Se tuami nɛ ɔ tsɔɔ we doo kaa a ma kpata nihi tsuo nɛ a ngɛ jami nɛ ɔmɛ a mi ɔ a hɛ mi. Mohu ɔ, e ma nyɛ maa pee kaa jami kuu ɔmɛ a hɛ mi nɛ a ma kpata. Ke jami kuu nɛ ɔmɛ be si himi mi hu ɔ, nihi nɛ jinɛ a ngɛ kuu ɔmɛ a mi ɔ maa na kaa a hɛ mi nyɛɛli ɔmɛ sisi mɛ, nɛ eko ɔ, a ma de ke a kɛ jami ɔmɛ be nɔ́ ko peemi hu.
5. Mɛni si lɛ Yehowa wo ngɛ amanehlu ngua a he, nɛ mɛni he je?
5 Baiblo ɔ tsɔɔ we be abɔ nɛ Babilon Ngua a hɛ mi kpatami ɔ maa ye. Se wa le kaa e maa ya nɔ ngɛ be kpiti mi. (Kpoj. 18:10, 21) Yehowa wo si kaa ngɛ amanehlu ngua a mi ɔ, e maa “po ligbi ɔmɛ a nɔ kpiti” konɛ e kɛ baa “nihi nɛ e hla” a, kɛ anɔkuale jami yi. (Maak. 13:19, 20) Se mɛni Yehowa maa hyɛ blɔ kaa waa pee ngɛ amanehlu ngua a sisije kɛ yaa si benɛ Hamagedɔn maa ba?
YAA NƆ NƐ O FĨ ANƆKUALE JAMI SE
6. Mɛni he je nɛ lakpa jami nɛ waa kɛ maa po tako mi pɛ pi ɔ?
6 Kaa bɔ nɛ wa na ngɛ ní kasemi nɛ sɛ hlami ɔ mi ɔ, Yehowa ngɛ blɔ hyɛe kaa e sɔmɔli kɛ Babilon Ngua a nɛ po tako mi. Se pi lɔ ɔ pɛ nɛ e ngɛ blɔ hyɛe kaa waa pee. E sa nɛ waa fia wa pɛɛ si kaa wa ma fĩ anɔkuale jami se. Nyɛ ha nɛ waa hyɛ blɔ enyɔ nɛ wa ma nyɛ maa gu nɔ kɛ pee jã.
Wa ko kpa wa he nya buami, ke wa ya je si fɔfɔɛhi nɛ a mi wa po mi (Hyɛ kuku 7) *
7. (a) Kɛ wa ma plɛ kɛ ye Yehowa je mi bami he mlaahi nɛ a da a nɔ sisiisi ha kɛɛ? (b) Mɛni he je nɛ Hebri Bi 10:24, 25 ɔ tsɔɔ kaa e sa nɛ waa kpe ɔ, nɛ mɛni he je nɛ jã peemi he hia wawɛɛ amlɔ nɛ ɔ?
7 Kekleekle ɔ, e sa nɛ waa ya nɔ nɛ waa kɛ Yehowa je mi bami he mlaahi nɛ a da a nɛ tsu ní. E sɛ nɛ waa kplɛɛ je mi bami he mlaa nɛ je ɔ wo ɔ nɔ. Kaa nɔ hyɛmi nɔ́ ɔ, wa kplɛɛ we ajuama bɔmi nɔ, nyumu kɛ nyumu loo yo kɛ yo a gba si himi mi sɛmi, kɛ a ní peepee kpahi a nɔ. (Mat. 19:4, 5; Rom. 1:26, 27) Nɔ́ nɛ ji enyɔ ɔ, e sa nɛ waa ya nɔ nɛ waa kɛ wa nyɛmimɛ Kristofo ɔmɛ nɛ pee kake kɛ ja Yehowa. Wa kpeɔ ngɛ Matsɛ Yemi Asahi a nɔ aloo wa nyɛmimɛ a wehi a mi, nɛ be komɛ po ɔ, wa kpeɔ ngɛ laami mi. Bɔ fɛɛ bɔ nɛ si fɔfɔɛ ɔ ma ji ɔ, wa maa ya nɔ maa pee kake kɛ ja Mawu. Ngɛ anɔkuale mi ɔ, e sa nɛ waa ya nɔ nɛ wa bua wa he nya, nɛ “waa hi jã pee wawɛɛ nitsɛ be mi nɛ [wa] na kaa ligbi ɔ ngɛ sue ɔ.”—Kane Hebri Bi 10:24, 25.
8. Eko ɔ, kɛ sɛ gbi nɛ wa ngɛ fiɛɛe ɔ ma tsake ha kɛɛ hwɔɔ se?
8 Ngɛ amanehlu ngua a mi ɔ, eko ɔ, sɛ gbi nɛ wa fiɛɛɔ ma tsake. Amlɔ nɛ ɔ, wa fiɛɛɔ Matsɛ Yemi ɔ he sane kpakpa a, nɛ wa bɔɔ mɔde wawɛɛ kaa wa maa pee nihi kaseli. Se ngɛ jamɛ a be ɔ mi ɔ, wa maa fiɛɛ sɛ gbi ko nɛ nya wa kaa gbiɛ ngo ngu. (Kpoj. 16:21) Eko ɔ, wa maa fiɛɛ kaa e be kɛe nɛ a ma kpata Satan je ɔ hɛ mi pɛsɛpɛsɛ. Kɛ yaa kɛ yaa a, wa maa le sɛ gbi tutuutu nɛ wa maa fiɛɛ, kɛ bɔ nɛ wa ma plɛ kɛ fiɛɛ lɛ ha. Anɛ wa maa gu blɔ nɛ wa guɔ nɔ kɛ fiɛɛɔ jeha lafa kɛ se ji nɛ ɔ nɔuu nɔ kɛ fiɛɛ ha nihi lo? Aloo wa maa gu blɔ kpa komɛ a nɔ kɛ pee jã? Wa li lolo. Bɔ fɛɛ bɔ nɛ e ma ji ɔ, wa ma nyɛ ma ná kã kɛ jaje Yehowa kojomi sɛ gbi ɔ!—Eze. 2:3-5.
9. Eko ɔ, kɛ je ma amɛ maa pee a ní ngɛ wa sɛ gbi ɔ he ha kɛɛ, se mɛni nɔ mi mami wa ma nyɛ ma ná?
9 Eko ɔ, wa sɛ gbi ɔ ma ha nɛ je ma amɛ maa bɔ mɔde kaa a maa tsi wa nya nɛ wa ko fiɛɛ hu. Kaa bɔ nɛ wa ngɔɔ wa hɛ kɛ fɔɔ Yehowa nɔ mwɔnɛ ɔ konɛ e ye bua wɔ kɛ tsu fiɛɛmi ní tsumi ɔ, e ma bi nɛ waa ngɔ wa hɛ kɛ fɔ Yehowa nɔ ngɛ jamɛ a be ɔ mi hulɔ. Wa ma nyɛ ma ná nɔ mi mami kaa wa Mawu ɔ ma ha nɛ e mumi ɔ nɛ yi wɔ tɔ konɛ wa nyɛ nɛ waa pee e suɔmi nya ní kɛ pi si.—Mika 3:8.
DLA O HE KƐ HA TUAMI NƐ A MA TUA MAWU WE BI Ɔ
10. Kaa bɔ nɛ a gba ngɛ Luka 21:25-28 ɔ, kɛ adesahi babauu maa pee a ní ha kɛɛ ngɛ amanehlu ngua a mi?
10 Kane Luka 21:25-28. Ngɛ amanehlu ngua a mi ɔ, ke nihi na kaa níhi nɛ a ngɔ a hɛ kɛ fɔ nɔ ɔ hɛ mi ngɛ kpatae ɔ, a he mi maa po. A maa “hao,” nɛ a maa ye gbeye kaa a yi be wami náe ngɛ be nɛ mi wa nɛ ɔ mi. (Zef. 1:14, 15) Ngɛ jamɛ a be ɔ mi ɔ, níhi a mi maa wa wawɛɛ ha Mawu we bi po. Akɛnɛ wa piɛɛ we je ɔ he he je ɔ, eko ɔ, waa kɛ nyagba komɛ maa kpe. Eko ɔ, pi nɔ́ fɛɛ nɔ́ nɛ maa hia wɔ ɔ nɛ wa nine maa su nɔ.
11. (a) Mɛni he je nɛ je ma amɛ ma je a hɛ kɛ pi Yehowa Odasefohi ɔ? (b) Mɛni he je nɛ e sɛ nɛ waa ye amanehlu ngua a gbeye ɔ?
11 Kɛ yaa kɛ yaa a, eko ɔ, nihi nɛ a kpata a jami kuu ɔmɛ a hɛ mi ɔ a mi mi ma fu kaa Yehowa Odasefo ɔmɛ a jami ɔ lɛɛ a kpataa we hɛ mi. Hyɛ bɔ nɛ a kɛ abofu maa tu he munyu ha ngɛ hleedio, tiivi kɛ Intanɛti ɔ nɔ ha. Je ma amɛ kɛ a nɔ yelɔ nɛ ji Satan maa nyɛ wɔ akɛnɛ wa jami ɔ pɛ ji jami nɛ a kpataa we hɛ mi ɔ he je. A be nyɛe maa su oti nɛ a kɛ ma a hɛ mi kaa a ma kpata jamihi tsuo ngɛ zugba a nɔ a hɛ mi ɔ he. Enɛ ɔ he ɔ, a ma je a hɛ kɛ pi wɔ. Ke e ba jã a, Gog nɛ je Magog * ɔ kɛ abofu ma ya tua Yehowa we bi. (Eze. 38:2, 14-16) Eko ɔ, wa maa hao ngɛ níhi nɛ maa ya nɔ ngɛ amanehlu ngua a mi ɔ he akɛnɛ wa li bɔ nɛ níhi maa ya nɔ ha tutuutu ɔ he je. Se nɔ́ kake nɛ wa le ji: E sɛ nɛ waa ye amanehlu ngua a gbeye. Yehowa ma ha wɔ blɔ tsɔɔmihi nɛ ma he wa yi wami. (La 34:19) Wa ma nyɛ maa ‘da si tlɔmɔɔ nɛ wa wo wa yi nɔ,’ ejakaa wa le kaa ‘e be kɛe nɛ a ma kpɔ̃ wɔ.’ *
12. Mɛni blɔ nɔ nɛ “tsɔlɔ anɔkualetsɛ kɛ ní lelɔ” ɔ ngɛ wɔ dlae kɛ ha níhi nɛ maa ba hwɔɔ se ɔ?
12 “Tsɔlɔ anɔkualetsɛ kɛ ní lelɔ” ɔ ngɛ wɔ dlae konɛ waa ya nɔ nɛ waa ye anɔkuale ngɛ amanehlu ngua a mi. (Mat. 24:45) A guɔ blɔhi fuu a nɔ kɛ peeɔ jã. Kaa nɔ hyɛmi nɔ́ ɔ, a gu kpokpa nɔ kpehi nɛ wa pee kɛ je jeha 2016 kɛ ya si 2018 ɔ nɔ kɛ dla wɔ ngɛ be nya. Ngɛ jamɛ a kpe ɔmɛ a sisi ɔ, a wo wɔ he wami kaa waa ya nɔ nɛ wa je suhi nɛ maa ye bua wɔ be mi nɛ Yehowa ligbi ɔ ngɛ sue ɔ kpo. Nyɛ ha nɛ wa susu su nɛ ɔmɛ a he bɔɔ.
YAA NƆ NƐ O YE ANƆKUALE, NƐ O FĨ SI, NƐ O PEE KÃ
Mo dla o he amlɔ nɛ ɔ konɛ o nyɛ nɛ o gblee “amanehlu ngua” a mi (Hyɛ kuku 13-16) *
13. Mɛni wa maa pee konɛ waa ya nɔ nɛ waa ye Yehowa anɔkuale, nɛ mɛni he je nɛ e sa nɛ waa pee jã amlɔ nɛ ɔ?
13 Anɔkuale Yemi: Jeha 2016 kpokpa nɔ kpe ɔ yi ji, “Moo Ya Nɔ Nɛ O Ye Yehowa Anɔkuale!” Kpe nɛ ɔ ye bua wɔ nɛ wa na kaa ke huɛ bɔmi nɛ mi wa ngɛ waa kɛ Yehowa wa kpɛti ɔ, lɔ ɔ maa ye bua wɔ nɛ wa maa ye lɛ anɔkuale. A kai wɔ kaa wa ma nyɛ maa hɛ wɔ kɛ su Yehowa he kɛ gu sɔlemi nɛ wa maa je wa tsui mi kɛ sɔle, kɛ Mawu Munyu ɔ nɛ wa maa kase lɛ saminya a nɔ. Jã nɛ wa maa pee ɔ maa ye bua wɔ kɛ da nyagbahi nɛ a nya wa wawɛɛ po a nya. E piɛ bɔɔ nɛ Satan je ɔ maa ba nyagbe, enɛ ɔ he ɔ, wa ma nyɛ maa hyɛ blɔ kaa waa kɛ kahi maa kpe, nɛ e ma ha nɛ e he maa wa kaa wa maa ye Mawu anɔkuale nɛ wa fĩ e Matsɛ Yemi ɔ se. Eko ɔ, nihi maa ya nɔ nɛ a maa ye wa he fɛu. (2 Pet. 3:3, 4) A maa pee jã, titli ɔ, akɛnɛ wa fĩ we Satan je ɔ se ɔ he je. E sa nɛ waa ya nɔ nɛ waa ye anɔkuale amlɔ nɛ ɔ konɛ wa nyɛ nɛ waa ye anɔkuale ngɛ amanehlu ngua a mi.
14. (a) Mɛni tsakemi nɛ maa ba nyɛmimɛ nyumuhi nɛ a nyɛɛɔ wa hɛ mi ngɛ zugba a nɔ ɔ a blɔ fa mi? (b) Mɛni he je nɛ e sa nɛ waa ye anɔkuale jamɛ a be ɔ mi?
14 Ngɛ amanehlu ngua a mi ɔ, tsakemi maa ba nyɛmimɛ nyumuhi nɛ a nyɛɛɔ wa hɛ mi ngɛ zugba a nɔ ɔ a blɔ fa mi. E maa su be nɛ a ma bua nihi nɛ a pɔ mɛ nu nɛ a ngɛ zugba a nɔ loloolo ɔ a nya kɛ ho hiɔwe ya konɛ a ya piɛɛ he kɛ hwu Hamagedɔn ta a. (Mat. 24:31; Kpoj. 2:26, 27) Enɛ ɔ tsɔɔ kaa e maa su be nɛ Blɔ Tsɔɔmi Ajla Toli ɔmɛ kɛ wɔ be zugba a nɔ hie hu. Se kɛ̃ ɔ, asafo kuu ngua a maa ya nɔ maa nyɛɛ blɔ nya tomi se. Nyɛmimɛ nyumuhi nɛ a sa nɛ a piɛɛ jijɔ kpa amɛ a he ɔ maa nyɛɛ wa hɛ mi. E sa nɛ waa ye nyɛmimɛ nyumu nɛ ɔmɛ anɔkuale kɛ gu a se nɛ wa ma fĩ, kɛ blɔ tsɔɔmihi nɛ Mawu maa gu a nɔ kɛ ha wɔ nɛ wa maa bu tue ɔ nɔ. Wa wami daa si ngɛ tue bumi nɛ wa maa pee ɔ nɔ!
15. Mɛni maa ye bua wɔ konɛ waa ya nɔ nɛ wa fĩ si, nɛ mɛni he je nɛ e he hia nɛ waa pee jã amlɔ nɛ ɔ?
15 Si Fimi: Jeha 2017 kpokpa nɔ kpe ɔ yi ji, “O Kɔni Mi Nɛ Ko Jɔ̃!” Kpe nɛ ɔ ye bua wɔ nɛ wa nyɛɔ yaa nɔ nɛ wa fĩɔ si ngɛ kahi a mi. Wa kase kaa tsa pi lemi nɛ wa le kaa níhi a mi ma ba hi ha wɔ ɔ he je nɛ wa fĩɔ si, mohu ɔ, wa hɛ nɛ wa ngɔɔ kɛ fɔɔ Yehowa nɔ ɔ lɛ yeɔ bua wɔ nɛ wa fĩɔ si. (Rom. 12:12) Wa hɛ nɛ ko je Yesu si womi nɛ ɔ nɔ: “Nɔ nɛ e ma fĩ si kɛ ya si nyagbe ɔ, a ma he e yi wami.” (Mat. 24:13) Si womi nɛ ɔ tsɔɔ kaa e sa nɛ waa ya nɔ nɛ waa ye anɔkuale ngɛ ka fɛɛ ka nɛ waa kɛ maa kpe ɔ mi. Ke wa fĩ si ngɛ kahi nɛ waa kɛ maa kpe amlɔ nɛ ɔ mi ɔ, e ma ha nɛ wa hemi kɛ yemi ɔ mi maa wa loko amanehlu ngua a maa je sisi.
16. Mɛni maa tsɔɔ kaa wa peeɔ kã, nɛ mɛni maa ye bua wɔ konɛ waa pee kã wawɛɛ amlɔ nɛ ɔ?
16 Kã: Jeha 2018 kpokpa nɔ kpe ɔ yi ji, “Moo Pee Kã!” Kpe nɛ ɔ kai wɔ kaa tsa pi nyɛmihi nɛ wa ngɛ ɔ nɛ ha nɛ wa peeɔ kã. Mohu ɔ, ke nɔ ko maa pee kã nitsɛnitsɛ ɔ, ja e ngɔ e hɛ kɛ fɔ Yehowa nɔ. Mɛni maa ye bua wɔ konɛ wa nyɛ nɛ waa ngɔ wa hɛ kɛ fɔ Yehowa nɔ? E sa nɛ waa kane e Munyu ɔ daa ligbi, nɛ wa pue wa yi mi tɛ ngɛ blɔ nɛ e gu nɔ kɛ he e we bi a yi wami blema a he. (La 68:20; 2 Pet. 2:9) Ke je ma amɛ ba tua wɔ ngɛ amanehlu ngua a mi ɔ, e he maa hia nɛ waa pee kã nɛ waa ngɔ wa hɛ kɛ fɔ Yehowa nɔ pe daa. (La 112:7, 8; Heb. 13:6) Ke wa ngɔ wa hɛ kɛ fɔ Yehowa nɔ amlɔ nɛ ɔ, lɔ ɔ ma ha nɛ wa ná kã kɛ da tuami nɛ Gog kɛ maa ba wa nɔ ɔ nya. *
MOO HYƐ BLƆ KAA A MA KPƆ̃ MO
E be kɛe nɛ Yesu kɛ e hiɔwe tabo ɔ ma kpata Mawu he nyɛli a hɛ mi ngɛ Hamagedɔn ta a mi! (Hyɛ kuku 17)
17. Mɛni he je nɛ e sɛ nɛ waa ye Hamagedɔn ta a gbeye ɔ? (Hyɛ foni nɛ ngɛ womi ɔ hɛ mi ɔ.)
17 Kaa bɔ nɛ wa na ngɛ ní kasemi nɛ sɛ hlami ɔ mi ɔ, wa kpɛti nihi fuu hi nyagbe ligbi ɔmɛ a mi wa wami be tsuo. Se wa ngɛ hɛ nɔ kami kaa wa maa gblee amanehlu ngua a mi. Hamagedɔn ta a ji nɔ́ nɛ maa ngɔ níhi a blɔ nya tomi nɛ ɔ kɛ ba nyagbe kulaa. Se kɛ̃ ɔ, e sɛ nɛ waa ye gbeye. Mɛni he je? Ejakaa Mawu lɛ maa hwu ta a nɛ. (Abɛ 1:33; Eze. 38:18-20; Zak. 14:3) Ke Yehowa ngɔ fami ɔ kɛ ha a, Yesu Kristo maa nyɛɛ Mawu tabo ɔ hɛ mi kɛ ya ta a. Nihi nɛ a pɔ mɛ nu nɛ a tle mɛ si kɛ bɔfohi akpe nyɔngmahi abɔ maa piɛɛ e he. A maa pee kake kɛ hwu kɛ si Satan kɛ e daimonio ɔmɛ kɛ a ta buli nɛ a ngɛ zugba a nɔ ɔ.—Dan. 12:1; Kpoj. 6:2; 17:14.
18. (a) Mɛni si nɛ Yehowa wo? (b) Mɛni hɛ nɔ kami nɛ Kpo Jemi 7:9, 13-17 ɔ haa nɛ wa náa ngɛ hwɔɔ se he?
18 Yehowa wo si ke: “Ta hwumi níhi nɛ a sɔ̃ nɛ ɔmɛ ekoeko be nyɛe maa pee mo nɔ́ ko.” (Yes. 54:17) “Asafo kuu ngua a” nɛ ji Yehowa sɔmɔli anɔkualetsɛmɛ maa “je amanehlu ngua a mi” slɔkee! Nɛ a maa ya nɔ nɛ a ma sɔmɔ lɛ ngɛ blɔ klɔuu nɔ. (Kane Kpo Jemi 7:9, 13-17.) Baiblo ɔ ha nɛ wa ná nɔ mi mami kaa a ma he wa yi wami hwɔɔ se! Wa le kaa ‘Yehowa baa nihi tsuo nɛ yeɔ lɛ anɔkuale ɔ a yi.’ (La 31:23) Nihi tsuo nɛ a suɔ Yehowa nɛ a jeɔ e yi ɔ bua maa jɔ ke Yehowa wo e biɛ klɔuklɔu ɔ nguɔ.—Eze. 38:23.
19. Mɛni si himi nɛ e be kɛe nɛ wa ma ná?
19 Satan be adesahi a nɔ he wami náe hu. Jamɛ a be ɔ mi ɔ, kɛ o susu kaa a maa kane 2 Timoteo 3:2-5 ɔ ha kɛɛ? (Hyɛ daka nɛ ji, “ Bɔ Nɛ Nihi Maa Ba A Jemi Ha Ngɛ Je Ehe ɔ Mi.”) Nyɛminyumu George Gangas * nɛ e sɔmɔ kaa Blɔ Tsɔɔmi Ajla Toli ɔmɛ a kpɛti nɔ kake ɔ de ke: “Kɛ je ɔ mi maa hi ha kɛɛ ke nɔ fɛɛ nɔ ji wa nyɛminyumu loo wa nyɛmiyo! E be kɛe nɛ o maa hi níhi a blɔ nya tomi ehe ɔ mi. Be abɔ nɛ Yehowa ngɛ wami mi ɔ, mo hu o maa hi wami mi. Wa maa hi si kɛ ya neneene.” Enɛ ɔ ji hɛ nɔ kami nɛ se be!
LA 122 Nyɛ Fĩ Si, Nyɛɛ Da Si Kpɛii!
^ kk. 5 Wa le kaa e be kɛe nɛ “amanehlu ngua” ko maa ba adesahi a nɔ. Mɛni maa ba Yehowa sɔmɔli a nɔ ngɛ jamɛ a be ɔ mi? Mɛni Yehowa maa hyɛ blɔ kaa waa pee ngɛ jamɛ a be ɔ mi? Mɛni suhi nɛ maa ye bua wɔ konɛ waa ye anɔkuale? Wa maa na sane bimi nɛ ɔmɛ a heto ngɛ ní kasemi nɛ ɔ mi.
^ kk. 11 MUNYU NƐ A TSƆƆ SISI: Gog Nɛ Je Magog ɔ (nɛ a poɔ lɛ kpiti ke Gog) ji je mahi nɛ a pee kake nɛ a ma tua Mawu we bi ngɛ amanehlu ngua a mi.
^ kk. 11 Ke o suɔ nɛ o le babauu kɛ kɔ níhi nɛ maa ya nɔ loko Hamagedɔn maa ba a he ɔ, hyɛ womi nɛ ji Mawu Matsɛ Yemi ɔ Ngɛ Nɔ Yee! ɔ yi 21 ɔ. Ke o suɔ nɛ o le babauu kɛ kɔ Gog nɛ je Magog tuami ɔ kɛ blɔ nɔ nɛ Yehowa maa gu kɛ fã e we bi a he ngɛ Hamagedɔn ta a mi ɔ he ɔ, hyɛ womi nɛ ji Pure Worship of Jehovah—Restored At Last! ɔ yi 17 kɛ 18 ɔ.
^ kk. 16 Jeha 2019 kpokpa nɔ kpe ɔ yi ji, “Suɔmi Se Pui Gblegbleegble”! Kpe nɛ ɔ ye bua wɔ nɛ wa na kaa Yehowa maa je suɔmi mi kɛ po wa he piɛ, nɛ wa ma nyɛ maa hi si slɔkee.—1 Kor. 13:8.
^ kk. 19 Hyɛ munyu nɛ ji, “His Deeds Follow Him” nɛ je kpo ngɛ December 1, 1994 Blɛfo gbi Hwɔɔmi Mɔ ɔ mi ɔ.
