1, 2. Mɛni he je nɛ ohia se be poe kulaa ngɛ je yaya nɛ ɔ mi ɔ?

MWƆNƐ Ɔ, je ɔ mi si himi he wa, nɛ a sisiɔ nihi. Nihewi kɛ yihewi nɛ́ ní tsumi nɛ a ma tsu. A kpɛti nihi fuu kɛ a wami woɔ oslaa mi nɛ a hiaa blɔ kɛ yaa sika mahi a nɔ. Se ngɛ ma nɛ ɔmɛ a mi po ɔ, nihi fuu ngɛ ohia yee. Slɔɔto nɛ ngɛ niatsɛmɛ kɛ ohiatsɛmɛ a kpɛti ɔ ngɛ klee. Akɔtaa bumi nɛ a pee lingmi haa nɛ ɔ tsɔɔ kaa ke a gba nihi nɛ a ngɛ je ɔ mi ɔ a mi lafa a, e mi kake nɛ ji nihi nɛ a ngɛ sika wawɛɛ ɔ a sika a, kɛ 99 nɛ piɛ ɔ a sika a miɔ nɛ e maa sɔ. E ngɛ mi kaa wa be nɔ mi mami ngɛ akɔtaa bumi nɛ ɔ he mohu lɛɛ, se atsinyɛ jemi ko be he kaa nimli ayɔ akpehi abɔ ngɛ ohia futaa yee, be mi nɛ ni komɛ lɛɛ a ná ní kpɔtɔɔ nɛ ma nyɛ maa lɛ a bimɛ, a bibimɛ, kɛ a bibimibimɛ tsuo jehahi fuu. Yesu yɔse si himi nɛ mi wa nɛ ɔ. E de ke: “Ohiatsɛmɛ ɔmɛ ɔ, nyɛɛ kɛ mɛ ngɛ daa.” (Mar. 14:7) Mɛni he je nɛ si himi ɔ ngɛ jã a?

² Yesu le kaa je nɛ ɔ mi sika he blɔ nya tomi ɔ be tsakee kɛ yaa si be nɛ Mawu Matsɛ Yemi ɔ maa ba. Ma kudɔmi kɛ jami blɔ nya tomi ɔmɛ, kɛ jua yemi blɔ nya tomi ɔ nɛ daa si kɛ ha “jua yeli” nɛ a tu a he munyu ngɛ Kpojemi 18:3 ɔ piɛɛ Satan je ɔ he. Mawu we bi nyɛ nɛ a je a he kulaa kɛ je ma kudɔmi sanehi kɛ lakpa jami  he, se e be jã ngɛ jua yemi blɔ nya tomi nɛ ngɛ Satan je ɔ mi ɔ blɔ fa mi. Mawu we bi fuu nyɛ we nɛ a je a he kulaa ngɛ jua yemi blɔ nya tomi ɔ he.

3. Mɛni sane bimihi a he wa ma susu?

³ Akɛnɛ Kristofohi ji wɔ he je ɔ, wa bɔɔ mɔde kaa wa maa kpa wa mi konɛ waa le bɔ nɛ wa naa jua yemi blɔ nya tomi ɔ ha. Enɛ ɔ he ɔ, wa biɔ wa he sane nɛ ɔmɛ: ‘Mɛni blɔ nɔ ma nyɛ ma gu konɛ ma ngɔ he lo nya níhi nɛ i ngɛ ɔ kɛ tsu ní kɛ tsɔɔ kaa i yeɔ Mawu anɔkuale? Mɛni ma nyɛ ma pee konɛ i kɛ ye he ko wo je ɔ jua yemi mi vii? Mɛni níhi a si kpamihi lɛ tsɔɔ kaa Mawu we bi ngɔ a hɛ kɛ fɔ Mawu nɔ kulaa ngɛ si himi nɛ mi wa nɛ ɔ mi?’

4, 5. (a) Mɛni si fɔfɔɛ mi nɛ tsɔlɔ nɔkɔtɔma nɛ ngɛ Yesu nɔ́ he tomi nɔ́ ɔ mi ɔ ya je? (b) Mɛni kɔkɔ bɔmi nɛ Yesu kɛ ha e se nyɛɛli ɔmɛ?

⁴ Kane Luka 16:1-8. Yesu nɔ́ he tomi nɔ́ nɛ kɔɔ tsɔlɔ nɔkɔtɔma nɛ dɛ ɔ he ɔ haa nɛ nɔ susuɔ e yi mi wawɛɛ. Benɛ a po tsɔlɔ nɔkɔtɔma a nya kaa e ngɛ ní ɔmɛ a hɛ mi kpatae ɔ, e ngɔ “ga” kɛ tsu ní konɛ e “ná huɛmɛ” nɛ a maa ye bua lɛ ke e ní tsumi ɔ je e dɛ ɔ. * Ngɛ anɔkuale mi ɔ, pi nɛ Yesu ngɛ e kaseli ɔmɛ he wami woe kaa a pee níhi nɛ dɛ konɛ a kɛ ná a he ngɛ je yaya nɛ ɔ mi. E tsɔɔ kaa su nɛ ɔ ji “je mi bi” a su, se e kɛ nɔ́ he tomi nɔ́ nɛ ɔ tsu ní konɛ e kɛ tsɔɔ mɛ nɔ́ ko nɛ he hia wawɛɛ.

⁵ Kaa bɔ nɛ e ba ngɛ tsɔlɔ nɔkɔtɔma a blɔ fa mi ɔ, Yesu le kaa e he maa hia nɛ e se nyɛɛli ɔmɛ nɛ a tsu ní kɛ hyɛ a he ngɛ je nɛ a kɛ jua yemi sisiɔ nɔ ngɛ mi nɛ ɔ mi. Enɛ ɔ he ɔ, e wo mɛ he wami ke: “Nyɛɛ gu ní nami nɛ dɛ ɔ nɔ kɛ ná huɛmɛ kɛ ha nyɛ he, konɛ ke jamɛ a ní ɔmɛ ta a, [Yehowa kɛ Yesu] a nyɛ nɛ a he nyɛ kɛ ya neneene si himi he ɔmɛ.” (Luka 16:9, NW) Mɛni wa ma nyɛ maa kase ngɛ Yesu ga womi ɔ mi?

6. Kɛ wa plɛɔ kɛ leɔ kaa jua yemi blɔ nya tomi nɛ ngɛ mwɔnɛ ɔ piɛɛ we Mawu yi mi tomi he ha kɛɛ?

⁶ E ngɛ mi kaa Yesu tsɔɔ we nɔ́ he je nɛ e tsɛ ní nami kaa nɔ́ ko nɛ “dɛ” mohu lɛɛ, se Baiblo ɔ ha nɛ wa na heii kaa jua yemi piɛɛ we Mawu yi mi tomi ɔ he. Yehowa ha Adam kɛ Hawa níhi fuu ngɛ Eden abɔɔ mi. (1 Mose 2:15, 16) Pee se ɔ, benɛ mumi klɔuklɔu ɔ ba Yesu se nyɛɛli nɛ a pɔ mɛ nu nɛ a hi si ngɛ kaseli ɔmɛ a be ɔ mi ɔ a nɔ ɔ, “a ti nɔ ko nɔ ko tsɛ we níhi nɛ e ngɛ ɔ eko ke lɛ nitsɛ e nɔ́, mohu, nɔ́ nɛ nɔ ko ngɛ ɔ peeɔ ma tsuo nɔ́.” (Níts. 4:32) Gbalɔ Yesaya tsɔɔ kaa be ko ma nɛ adesahi tsuo ngɛ zugba a nɔ ɔ ma ná níhi nɛ ngɛ zugba a nɔ ɔ mi blɔ fa mi nɔ́ faa. (Yes. 25:6-9; 65:21, 22) Se loko jamɛ a be ɔ maa su ɔ, e ma bi nɛ Yesu kaseli ɔmɛ nɛ a ngɔ “ga” kɛ tsu ní. E ma bi nɛ a ngɔ “ní nami nɛ dɛ” nɛ ngɛ je nɛ ɔ mi ɔ kɛ hyɛ a he, nɛ́ a bɔ mɔde kaa a maa sa Mawu hɛ mi.

7. Mɛni kɔkɔ bɔmi lɛ ngɛ Luka 16:10-13?

⁷ Kane Luka 16:10-13. Tsɔlɔ nɔkɔtɔma nɛ Yesu tu e he munyu ɔ hla huɛmɛ kɛ ha e he, konɛ lɛ nitsɛ e ná he se. Se Yesu wo e se nyɛɛli ɔmɛ he wami kaa a hla huɛmɛ kɛ ha a he ngɛ hiɔwe, nɛ a ko fo mɛ nitsɛmɛ pɛ a nɔ́ mi. Nɔ́ nɛ Yesu de ngɛ e nɔ́ he tomi nɔ́ ɔ se ɔ ha nɛ wa na kaa bɔ nɛ waa kɛ “ní nami nɛ dɛ” ɔ ma tsu ní ha a maa tsɔɔ kaa wa yeɔ Mawu anɔkuale loo wa yi lɛ anɔkuale. Yesu ngɛ tsɔɔe kaa wa ma nyɛ maa ‘ye anɔkuale,’ aloo wa ma nyɛ maa ngɔ ní nami nɛ ɔ kɛ tsu ní saminya. Ngɛ mɛni blɔ nɔ?

8, 9. Mo ha nɔ hyɛmi níhi nɛ tsɔɔ kaa nyɛmimɛ komɛ ngɔ ní nami nɛ dɛ ɔ kɛ ngɛ ní tsue ngɛ anɔkuale yemi mi.

 ⁸ Blɔ kake nɛ wa ma nyɛ maa gu nɔ konɛ waa ngɔ he lo nya níhi nɛ wa ngɛ ɔ kɛ tsu ní ji kaa wa ma je sika kɛ fĩ je kɛ wɛ fiɛɛmi ní tsumi ɔ nɛ Yesu gba kɛ fɔ si ɔ se. (Mat. 24:14) Jokuɛ yoyo ko nɛ e ngɛ India a bua sika nya kɛ wo daka ko mi bɔɔbɔɔbɔɔ, nɛ e jua e tso bihi po konɛ e ngɔ kɛ piɛɛ sika a he. Benɛ daka a hyi lɛ ɔ, e ngɔ sika a kɛ ha konɛ a kɛ fĩ fiɛɛmi ní tsumi ɔ se. Nyɛminyumu ko hu nɛ e ngɛ India nɛ e juaa ngmɛ ɔ ngɔ ngmɛ fuu kɛ ya ha gbi sisi tsɔɔmi ní tsumi he nɛ be Betel nɛ ngɛ Malayalam ɔ. Akɛnɛ nyɛmimɛ ɔmɛ hia ngmɛ he je ɔ, e susu kaa ke e ngɔ ngmɛ kɛ ya ha mɛ ɔ, a ma ná he se wawɛɛ pe nɛ e ma ha sika nitsɛ. E ngɔ ga kɛ tsu ní. Jã nɔuu nɛ nyɛmimɛ nɛ a ngɛ Greece ɔ hu ngɔɔ oliv nu, bɔta, kɛ niye ní kpahi kɛ ya haa Betel weku ɔ.

⁹ Nyɛminyumu ko nɛ e ngɛ Sri Lanka nɛ amlɔ nɛ ɔ e ya je ma se ɔ ngɔ e we kɛ ha asafo ɔ konɛ a ha nɛ be tsuo sɔmɔli nɛ a hi lejɛ ɔ. E ngɔ e zugba hu kɛ ha konɛ a kɛ pee asafo mi kpehi kɛ kpɔ mi kpehi. Nyɛminyumu nɛ ɔ ngɔ e sika kɛ sã afɔle mohu lɛɛ, se nyɛmimɛ nɛ a be nɔ́ ko tsɔ ɔ ná he se wawɛɛ. Ngɛ ma ko nɛ a tsi wa ní tsumi ɔ nya ngɛ mi ɔ nɔ ɔ, nyɛmimɛ kɛ a wehi haa konɛ a kɛ pee Matsɛ Yemi Asahi. Enɛ ɔ haa nɛ blɔ gbali fuu kɛ nihi nɛ a be nɔ́ ko tsɔ ɔ naa he ko nɛ a kɛ peeɔ asafo mi kpehi, nɛ a bɔɛ hiɔ fuu.

10. Ke wa haa nɔ nɔ́ faa a, mɛni jɔɔmihi wa ma ná?

¹⁰ Nɔ hyɛmi níhi nɛ wa wo a ta kɛ sɛ hlami ɔ tsɔɔ bɔ nɛ Mawu we bi “yeɔ anɔkuale ngɛ nɔ́ nyafii mi” ha. (Luka 16:10) Bɔ nɛ a kɛ he lo nya níhi tsuɔ ní ha a tsɔɔ kaa mumi mi níhi a he hia mɛ pe he lo nya níhi. Kɛ e peeɔ Yehowa huɛmɛ nɛ a ngɔɔ he lo nya ní nɛ a ngɛ ɔ kɛ sãa afɔle ɔ ha kɛɛ? A le kaa ke a haa nɔ nɔ́ faa a, lɔ ɔ ma ha nɛ a nine nɛ su ní nami “nitsɛnitsɛ” nɔ. (Luka 16:11) Nyɛmiyo ko nɛ e pɔɔ sika jemi konɛ a kɛ fĩ Matsɛ Yemi ní tsumi ɔ se ɔ tsɔɔ jɔɔmihi nɛ e ná. E de ke: “Akɛnɛ i jeɔ ye tsui mi nɛ i ngɔɔ ye he lo nya ní kɛ haa faa he je ɔ, jehahi komɛ ji nɛ ɔ nɛ i ná jɔɔmi slɔɔto komɛ nɛ i hyɛ we blɔ. I yɔse kaa akɛnɛ i haa nihi ní faa he je ɔ, i nyɛɔ nɛ i kɛ nihi hiɔ si saminya. I nyɛɔ nɛ i ngɔɔ nihi a tɔmihi kɛ paa mɛ, i náa nihi a he tsui, nɛ ke níhi yɛ nɔ saminya a, e gba we ye nya tsɔ, nɛ i kplɛɛɔ ga womi nɔ hulɔ.” Nihi fuu yɔse kaa ke nɔ ko haa nɔ nɔ́ faa a, lɛ nitsɛ e náa he se.​—La 112:5; Abɛ 22:9.

11. (a) Ngɛ mɛni blɔ nɔ nɛ yemi kɛ buami nɛ waa kɛ haa a tsɔɔ kaa wa kɛ “ga” tsuɔ ní? (b) Ngɛ mɛni blɔ nɔ nɛ yemi kɛ buami nɛ Mawu we bi kɛ haa a tsuo ba peeɔ pɛ? (Moo hyɛ foni nɛ ngɛ ní kasemi ɔ sisije ɔ.)

¹¹ Ke wa ngɔ he lo nya níhi nɛ wa ngɛ ɔ kɛ fĩ Matsɛ Yemi ɔ se ɔ, lɔ ɔ tsɔɔ kaa wa kɛ “ga” tsuɔ ní. E haa nɛ wa náa he blɔ kɛ yeɔ bua ni kpahi. Ke nihi nɛ a ngɛ he lo nya níhi, se a nyɛ we nɛ a kɛ a he nɛ wo be tsuo sɔmɔmi ní tsumi ɔ mi, aloo a nyɛ we nɛ a hia kɛ ho ma kpahi a nɔ ya a ná le kaa yemi kɛ buami nɛ a kɛ fĩɔ fiɛɛmi ní tsumi ɔ se ɔ yeɔ bua ni kpahi ɔ, a bua jɔɔ. (Abɛ 19:17) Sika nɛ wa jeɔ wa tsui mi nɛ waa kɛ haa a yeɔ bua nɛ a nyɛɔ peeɔ womihi kɛ haa nihi nɛ a ngɛ ohia  mahi a nɔ nɛ fiɛɛmi ní tsumi ɔ ngɛ yiblii woe ngɛ lejɛ ɔ, nɛ a kɛ fĩɔ fiɛɛmi ní tsumi ɔ se hulɔ. Jeha komɛ nɛ be ɔ, e biɔ nɛ nyɛmimɛ nɛ a ngɛ ma komɛ kaa Congo, Madagascar, kɛ Rwanda nɔ ɔ nɛ a hla kaa a maa ngɔ sika bɔɔ nɛ a ngɛ ɔ kɛ he niye ní kɛ ha a weku mi bimɛ, aloo a kɛ ma he Baiblo. Nɛ loko nɔ ko ma nyɛ ma he Baiblo ɔ eko ɔ, ja e tsu ní otsi aloo nyɔhiɔ kake. Yemi kɛ buami nɛ nihi kɛ haa nɛ wa kɛ yeɔ bua wa nyɛmimɛ ngɛ ohia mahi a nɔ konɛ wɔ tsuo wa nɔ́ ɔ nɛ “pee pɛ” he je ɔ, amlɔ nɛ ɔ, Yehowa asafo ɔ nyɛ nɛ e tsɔɔ Baiblo ɔ sisi kɛ ya a gbi ɔmɛ a mi, nɛ wekuhi nɛ a ngɛ lejɛ ɔ tsuo a mi bimɛ a nine su Baiblo ɔ eko nɔ. Baiblo kaseli hu a nine su eko nɔ. (Kane 2 Korinto Bi 8:13-15.) Enɛ ɔ he ɔ, Yehowa kɛ nihi nɛ a jeɔ sika kɛ yeɔ bua, kɛ nihi nɛ a náa he se ɔ tsuo bɔɔ huɛ faa.

12. Ngɛ mɛni blɔ nɔ nɛ Abraham tsɔɔ kaa e ngɔ e hɛ kɛ fɔ Yehowa nɔ?

¹² Ke waa kɛ wa he wui jua yemi mi vii, nɛ si fɔfɔɛ fɛɛ si fɔfɔɛ mi nɛ wa ngɛ ɔ, wa bɔɔ mɔde kaa wa maa di ní nami “nitsɛnitsɛ” se ɔ, lɔ ɔ hu ma ha nɛ waa kɛ Yehowa nɛ pee huɛ. Akɛnɛ blematsɛ Abraham ngɛ hemi kɛ yemi nɛ e suɔ kaa e kɛ Yehowa maa pee huɛ he je ɔ, e bu Yehowa tue nɛ e hia kɛ je sika ma nɛ ji Ur mi, nɛ e ya hi bo tsuhi a mi. (Heb. 11:8-10) E ngɔ e hɛ kɛ fɔ Mawu nɔ be fɛɛ be, ejakaa Mawu ji Nɔ nɛ peeɔ nɔ niatsɛ nitsɛ. Abraham dí he lo nya níhi a se kɔkɔɔkɔ, nɛ e kɛ tsɔɔ kaa e ngɔ e hɛ kɛ fɔ Yehowa nɔ. (1 Mose 14:22, 23) Yesu wo nihi he wami kaa a ná hemi kɛ yemi nɛ ɔ eko, enɛ ɔ he ɔ, e de niatsɛ ko ke: “Ke o ngɛ hlae nɛ o hi kɛ pi si ɔ, yaa nɛ o ya jua o níhi nɛ o ngɛ ɔ, nɛ o ngɔ sika a kɛ ha ohiatsɛmɛ, nɛ o ma na juetli ngɛ hiɔwe. Kɛkɛ ɔ, kpale kɛ ba nɛ o ba nyɛɛ ye se.” (Mat. 19:21) Jamɛ a nyumu ɔ be Abraham hemi kɛ yemi ɔ eko, se ni kpahi ngɔ a hɛ kɛ fɔ Mawu nɔ kulaa.

13. (a) Mɛni kɔkɔ bɔmi nɛ Paulo kɛ ha Timoteo? (b) Ngɛ mɛni blɔ nɔ nɛ wa ma nyɛ maa ngɔ Paulo ga womi ɔ kɛ tsu ní mwɔnɛ ɔ?

¹³ Timoteo hu ji nɔ ko nɛ e ngɛ hemi kɛ yemi. Paulo tsɛ Timoteo ke “Kristo Yesu ta bulɔ kpakpa.” Lɔ ɔ se ɔ, e de Timoteo ke: “Adesa ko be nɛ e ngɛ sɔmɔe kaa ta bulɔ nɛ e ngɔɔ e he kɛ woɔ jua yemi mi, ejakaa e suɔ kaa e maa sa nɔ nɛ e ngɔ lɛ kaa ta bulɔ ɔ hɛ mi.” (2 Tim. 2:3, 4, NW) Yesu se nyɛɛli nɛ a ngɛ mwɔnɛ ɔ a kpɛti nihi nɛ a hiɛ pe ayɔ kake ngɛ sɔmɔe kaa be tsuo sɔmɔli, nɛ a bɔɔ mɔde kaa a kɛ Paulo ga womi ɔ ma tsu ní. A ha we nɛ níhi a jua tsɛmi kɛ bɔ nɛ nihi peeɔ a ní ha a nɛ sisi mɛ. A kaiɔ sisi tomi mlaa nɛ nyɛɛ se nɛ ɔ: “Ke o pa sika ngɛ nɔ ko dɛ kɛkɛ o plɛ pee e nyɔguɛ.” (Abɛ 22:7) Nɔ́ nɛ Satan ngɛ hlae pɛ ji kaa e ma ha nɛ wa puɛ wa be kɛ wa he wami tsuo kɛ tsu ní ha e je ɔ kaa nyɔguɛhi. Juɛmi komɛ nɛ wa peeɔ ɔ ma nyɛ ma ha nɛ waa ye hiɔ jehahi fuu. Sika agbo nɛ wa ma ya pa kɛ ma we, kɛ ya sukuu, kɛ he lɔlehi nɛ a he jua wa, aloo kɛ pee ayɛflo nguahi ɔ ma nyɛ ma ha nɛ waa ye hiɔ ngua. Ke wa pee wa si himi kpokploo, wa yi hiɔ, wa puɛ we sika tsɔ, nɛ waa kɛ wa he woɔ Mawu jami mi vii pe nɛ waa kɛ wa he maa wo jua yemi mi vii ɔ, lɔ ɔ tsɔɔ kaa waa kɛ ga tsuɔ ní.​—1 Tim. 6:10.

14. Mɛni nɛ e sa kaa waa fia wa pɛɛ si kaa wa maa pee? Mo ha enɛ ɔ he nɔ hyɛmi níhi.

¹⁴ Ke wa ma nyɛ maa pee wa si himi kpokploo ɔ, e ma bi nɛ waa kɛ níhi nɛ a he hia wawɛɛ ɔ nɛ pee nɔ́ titli ngɛ wa si himi mi. Kaa nɔ hyɛmi nɔ́ ɔ, nɔ ko kɛ e yo ngɛ ní tsumi ko nɛ haa mɛ sika wawɛɛ. Se kɛ̃ ɔ, a suɔ nɛ a kpale ngɔ a he kɛ wo be tsuo sɔmɔmi ní tsumi ɔ mi ekohu, enɛ ɔ he ɔ, a jua a ní tsumi ɔ, kɛ a lɛ, kɛ ní kpahi nɛ a ngɛ ɔ. Lɔ ɔ se ɔ, a ya ye bua kɛ ma asafo ɔ ní tsumi he yi nɛ ngɛ Warwick, New York ɔ. Jɔɔmi ko nɛ se be nɛ a ná ji kaa a kɛ a biyo kɛ e huno tsuo ya sɔmɔ ngɛ Betel, nɛ e huno ɔ fɔli hu ya ye otsi bɔɔ ko ngɛ Betel kɛ ye bua  Warwick ní tsumi ɔ. Nyɛmiyo ko nɛ e ji blɔ gbalɔ nɛ e ngɛ Colorado, ngɛ U.S.A. ɔ hu ná ní tsumi ko nɛ e kɛ e be fã pɛ ma tsu ngɛ sika to he ko. Nitsumitsɛmɛ ɔmɛ a bua jɔ e ní tsumi he, enɛ ɔ he ɔ, a suɔ nɛ e kɛ e be tsuo nɛ tsu ní ngɛ ní tsumi he ɔ, konɛ a bɔ e hiɔwo ɔ he totoe etɛ ha lɛ. Se kɛ̃ ɔ, akɛnɛ e le kaa ní tsumi nɛ ɔ ma je e juɛmi ngɛ fiɛɛmi ní tsumi ɔ nɔ he je ɔ, e kua he blɔ nɛ ɔ. Enɛ ɔmɛ ji nɔ hyɛmi ní bɔɔ ko nɛ tsɔɔ bɔ nɛ Yehowa sɔmɔli ngɔ a níhi kɛ sã afɔle ha. Mɔde nɛ wa ngɛ bɔe kaa wa maa ngɔ Matsɛ Yemi ɔ he níhi kɛ pee nɔ́ titli ngɛ wa si himi mi ɔ tsɔɔ kaa Mawu nɛ waa kɛ lɛ maa pee huɛ, kɛ ní nami nitsɛnitsɛ he hia wɔ pe he lo nya níhi nɛ wa ma ná ngɛ jua yemi mi.

15. Mɛni ní nami lɛ haa nɔ bua jɔmi pe kulaa?

¹⁵ Ke nɔ ko ngɛ he lo nya níhi fuu ɔ, lɔ ɔ kɛkɛ tsɔɔ we kaa Mawu jɔɔ lɛ. Yehowa jɔɔ nihi nɛ ‘a bɔleɔ a nine kɛ haa nɔ tsuaa nɔ,’ aloo a pee niatsɛmɛ ngɛ ní tsumi kpakpahi a mi ɔ. (Kane 1 Timoteo 6:17-19.) Kaa nɔ hyɛmi nɔ́ ɔ, ngɛ jeha 1993 ɔ mi benɛ Lucia ná le kaa a hia fiɛɛli ngɛ Albania a, e hia kɛ je Italy kɛ ho Albania ya be mi nɛ e li nɔ́ nɛ e ma ya tsu kɛ hyɛ e he, se e ngɔ e hɛ kɛ fɔ Yehowa nɔ kulaa. E kase Albania gbi ɔ, nɛ e ye bua nihi nɛ a he hiɛ pe 60, nɛ a jɔɔ a he nɔ kɛ ha Yehowa. E ngɛ mi kaa Mawu we bi babauu fiɛɛ we ngɛ zugba kpɔhi nɛ woɔ yiblii kaa jã mi mohu lɛɛ, se nɔ́ fɛɛ nɔ́ nɛ wa peeɔ kɛ yeɔ bua nihi konɛ a ba le wami blɔ ɔ, nɛ́ a nyɛɛ nɔ ɔ ji nɔ́ ko nɛ waa kɛ mɛ tsuo ma ná he se kɛ ya neneene.​—Mat. 6:20.

16. (a) Hwɔɔ se ɔ, mɛni maa ba je nɛ ɔ jua yemi blɔ nya tomi ɔ nɔ? (b) Kɛ e sa nɛ enɛ ɔ nɛ ha nɛ waa na he lo nya níhi ha kɛɛ?

¹⁶ Yesu de ke: “Ke jamɛ a ní ɔmɛ [ní nami nɛ dɛ ɔ] ta a,” e de we ke, ‘ke eko ɔ, jamɛ a ní ɔmɛ ta a.’ (Luka 16:9, NW) Mwɔnɛ ɔ, sika to hehi fuu gu, nɛ ma komɛ hu a sika sane puɛ kulaa. Se e be kɛe nɛ nyagba nɛ ɔ mi maa wa kulaa pe jã. Ma kudɔmi blɔ nya tomi, jami blɔ nya tomi, kɛ jua yemi blɔ nya tomi nɛ peeɔ Satan je ɔ ma puɛ kokooko. Gbalɔ Ezekiel, kɛ gbalɔ Zefania gba kɛ fɔ si kaa sika tsu kɛ sika hiɔ nɛ jua yemi blɔ nya tomi ɔ ngɔ e hɛ kɛ fɔ nɔ jeha lafahi abɔ ji nɛ ɔ hɛ mi ma kpata. (Eze. 7:19; Zef. 1:18) Ke wa bwɔ nɛ wa yɔse kaa wa ngɔ ní nami nitsɛnitsɛ kɛ tsake je nɛ ɔ mi “ní nami nɛ dɛ” fuu ɔ, kɛ e maa pee wɔ ha kɛɛ? E ma nyɛ maa pee wɔ kaa nɔ ko nɛ e kɛ e be tsuo tsu ní kɛ bua sika fuu nya, nɛ́ pee se ɔ e ba le kaa sika a tsuo ji abisinia sika. (Abɛ 18:11) Niinɛ, nyagbenyagbe ɔ, he lo nya ní nɛ ɔmɛ maa ta aloo a ma puɛ, lɔ ɔ he ɔ, moo ngɔ ní nɛ ɔmɛ kɛ tsu ní kɛ “ná huɛmɛ” ngɛ hiɔwe. Nɔ́ fɛɛ nɔ́ nɛ wa peeɔ kɛ fĩɔ Yehowa Matsɛ Yemi ɔ se ɔ haa nɛ wa peeɔ mumi mi niatsɛmɛ.

17, 18. Mɛni Mawu huɛmɛ ma ná hwɔɔ se?

¹⁷ Ke Mawu Matsɛ Yemi ɔ ba a, nɔ ko be tsu haie hu, nɔ ko be sika pae hu, niye ní maa pɔ he, nɛ wa maa ye faa, nɛ dɔkitahi kɛ tsopa he be hiae hu. Yehowa weku ɔ fã nɛ ngɛ zugba a nɔ ɔ ma ná ní kpakpahi nɛ ngɛ zugba a nɔ ɔ he se. A kɛ sika tsu, sika hiɔ, kɛ junehi be jua yee, mohu ɔ, nihi kɛ ma dla a he. Wa maa na tsohi, tɛhi, kɛ dadehi nɛ a he jua wa a yaka, nɛ waa kɛ maa ma tsuhi nɛ a ngɛ fɛu. Wa huɛmɛ maa je a tsui mi kɛ ye bua wɔ kɛ ma tsu nɛ ɔmɛ, nɛ a be sika ko ngɔe. Ngɛ je ehe ɔ mi ɔ, wa ma ná níhi nɛ ngɛ zugba a nɔ ɔ tsuo mi blɔ fa mi nɔ́.

¹⁸ Enɛ ɔ ji jɔɔmi nɛ se be nɛ nihi nɛ a peeɔ huɛmɛ ngɛ hiɔwe ɔ ma ná a mi bɔɔ ko. Yehowa sɔmɔli nɛ a ngɛ zugba a nɔ ɔ a bua maa jɔ wawɛɛ ke ji a nu nɛ Yesu ngɛ dee ke: “Nyɛ nihi nɛ Tsaatsɛ gbaa nyɛ, nyɛɛ ba! Matsɛ yemi ɔ nɛ a dla ngɔ to nyɛ kɛ je be nɛ a to je ɔ sisi ɔ, nyɛ ba ngɔ.”​—Mat. 25:34.