Yehowa suɔ nɛ huɛ bɔmi kpakpa nɛ hi nihi enyɔ nɛ a sɛ gba si himi mi ɔ a kpɛti nɛ a ná bua jɔmi daa. (Mat. 19:4-6) Ke o suɔ nɛ o sɛ gba si himi mi ɔ, mɛni blɔ nɔ o maa gu kɛ ná huno loo yo kpakpa? Akɛnɛ Yehowa ji wa Bɔlɔ he je ɔ, e le nɔ́ nɛ ma nyɛ maa ye bua ni enyɔ nɛ a ngɛ nyɛɛe kɛ sɛ gba si himi mi ɔ konɛ a gba a nɛ ye manye. Enɛ ɔ he ɔ, ke o kɛ sisi tomi mlaahi nɛ e kɛ ha a tsu ní ɔ, o ma ná bua jɔmi nitsɛnitsɛ. Nyɛ ha nɛ wa susu sisi tomi mlaa nɛ ɔmɛ ekomɛ a he nɛ waa hyɛ.

Kekleekle ɔ, e sa nɛ waa le nɔ́ nɛ ɔ ngɛ wɔ nitsɛmɛ wa he: “Mɛnɔ maa le nɔmlɔ adesa tsui mi? E nɔ nɔ sisilɔ ko be ɔ, e hiɔ ɔ hu be tsa ba.” (Yer. 17:9) Ke ni enyɔ ngɛ nyɛɛe konɛ a sɛ gba si himi mi ɔ, e kɛ we kɛkɛ a bɔni suɔmi nɛ mi wa nami kɛ ha a sibi, ke e ba lɛ jã a, e he waa ha mɛ kaa a maa mwɔ yi mi kpɔhi nɛ da. Ke ni enyɔ da a he numi nɔ kɛ sɛ gba si himi mi ɔ, behi fuu ɔ, a nine nyɛɔ si. (Abɛ 28:26) Enɛ ɔ he je nɛ e sɛ nɛ nihi enyɔ nɛ a ngɛ nyɛɛe kɛ sɛ gba si himi mi ɔ nɛ a ná suɔmi nɛ mi wa kɛ ha a sibi loo a wo a sibi si loko a ba le a he saminya a nɛ.

Abɛ 22:3 ɔ de ke: “Nɔmlɔ nɛ le nɔ́ ɔ, ke e na haomi nɛ ma a, e tuu nya fo, nɛ e ya laa e he. Nɔ nɛ be juɛmi ɔ, lɛɛ e kɛ e he ya woɔ haomi mi, nɛ e naa nɔ́.” Ke nɔ ko ya ngɛ huno loo yo hlae ngɛ wɛbsaitihi a nɔ ɔ, mɛni oslaahi lɛ ma nyɛ maa je mi kɛ ba? Aywilɛho sane ji kaa ni komɛ kɛ nibwɔhi sɛɛ ní ngɛ Intanɛti ɔ nɔ, nɛ a bɔni nyɛɛmi kɛ ha gba si himi mi sɛmi. Pee se ɔ, a ba yɔse kaa nɔ nɛ a kɛ lɛ ngɛ nyɛɛe ɔ sisi mɛ. Jehanɛ hu ɔ, ni komɛ nɛ a yi anɔkuale ɔ tsakeɔ a he sane komɛ nɛ a kɛ sisiɔ nihi nɛ a hɛ be a he nɔ ɔ nɛ a ngɔɔ a sika ngɛ a dɛ. Be komɛ ɔ, nimli nɛ ɔmɛ deɔ ke Odasefohi ji mɛ.

Nyɛ ha nɛ wa susu oslaa kpa ko hu he nɛ waa hyɛ. Wɛbsaiti komɛ ngɔɔ kɔmpiuta blɔ nya tomi komɛ kɛ tsɔɔ kaa nihi enyɔ ma nyɛ maa sɛ gba si himi mi. Se odase ko be nɛ tsɔɔ kaa kɔmpiuta blɔ nya tomi nɛ ɔmɛ tsuɔ ní saminya. Enɛ ɔ he ɔ, nile be mi kaa wa ma he blɔ nya nɛ adesahi to konɛ nihi kɛ hla huno kpakpa loo yo kpakpa a ye. Wa be nyɛe ma he kɔmpiuta blɔ nya tomi nɛ ɔ ye, ejakaa gba si himi ji nɔ́ ko nɛ e he hia wawɛɛ. Adesahi a blɔ nya tomi kɛ Baiblo sisi tomi mlaahi be nyɛe maa sɔ kɔkɔɔkɔ.​—Abɛ 1:7; 3:5-7.

 Abɛ 14:15 ɔ kaneɔ ke: “Kuasia heɔ nɔ́ tsuaa nɔ́ yeɔ. Ní lelɔ lɛɛ e le e nane nya hyɛmi.” Loko o maa mwɔ o yi mi kpɔ kaa o kɛ nɔ ko maa sɛ gba si himi mi ɔ, e sa nɛ o le nɔ ɔ saminya. Se e he maa wa kaa o maa pee jã kɛ gu Intanɛti ɔ nɔ. Ke nyɛ deɔ nyɛ sibi nyɛ he sane nɛ nyɛ náa be kɛ maneɔ nyɛ sibi sɛ gbi po ɔ, anɛ nyɛ ma nyɛ ma de ke nyɛ le nyɛ he saminya lo? Ni komɛ nɛ a susu kaa a na nɔ ko nɛ a suɔ lɛ ɔ a he mi po benɛ a kɛ nɔ ɔ kpe nitsɛnitsɛ ɔ.

La polɔ ɔ de ke: “I kɛ nɔ sisili bɔɛ, nɛ i yuɔ ye he ngɛ osatotsɛmɛ a he.” (La 26:4, NW) Nihi fuu tsɔɔ we bɔ nɛ a ngɛ ha tutuutu ngɛ Intanɛti ɔ nɔ bɔ nɛ pee nɛ nihi a bua nɛ jɔ a he kaa a kɛ mɛ maa sɛ gba si himi mi. A nɛ po kaa tɔmi ngɛ enɛ ɔ he. A laa a su yaya amɛ a nɔ, aloo ke a ngɛ sɛ gbi manee ngɛ Intanɛti ɔ nɔ po ɔ, a je we a su yaya nɛ ɔmɛ kpo. Ni komɛ po deɔ ke Yehowa Odasefohi ji mɛ, se ngɛ anɔkuale mi ɔ, anɛ a ji Kristofohi nɛ a baptisi mɛ lo? A nane pi si ngɛ Mawu jami mi lo? Anɛ huɛ bɔmi kpakpa ngɛ a kɛ Yehowa a kpɛti lo? Anɛ nyɛmimɛ nɛ a kɛ mɛ ngɛ asafo mi ɔ buɔ mɛ lo? A peeɔ nɔ hyɛmi nɔ́ kpakpa aloo a ji ‘huɛ yayamihi’? (1 Kor. 15:33; 2 Tim. 2:20, 21) Ngɛ Ngmami ɔ nya a, anɛ a ngɛ he blɔ kaa a sɛɛ gba si himi mi lo? E he hia nɛ o le enɛ ɔmɛ, se o be nyɛe maa le enɛ ɔmɛ ke o kɛ nyɛmimɛ kpahi nɛ a le nɔ ɔ saminya a sɛɛ we ní. (Abɛ 15:22) Ngɛ anɔkuale mi ɔ, e be Yehowa sɔmɔlɔ ko juɛmi mi bae po kaa e kɛ nɔ ko nɛ e he we yi ɔ maa “tloo kuɛpã tso.”​—2 Kor. 6:14; 1 Kor. 7:39.

Akɛnɛ oslaa ngɛ he kaa wa ma hla nɔ ko ngɛ wɛbsaitihi a nɔ nɛ waa kɛ lɛ nɛ sɛ gba si himi mi he je ɔ, e he maa hia nɛ waa le blɔ kpakpa nɔ nɛ wa maa gu kɛ hla nɔ ko nɛ waa kɛ lɛ nɛ sɛ gba si himi mi. Jije o ma nyɛ maa na nɔ kpakpa nɛ o kɛ lɛ nɛ sɛ gba si himi mi ngɛ? Ke Yehowa Odasefohi ya he nya buamihi kaa asafo mi kpehi, kpɔ mi kpehi, kpokpa nɔ kpehi, kɛ he nya buami kpahi a sisi ɔ, a kɛ nihi ma nyɛ maa kpe nɛ a le mɛ saminya.

Se ke wa be nyɛe ma bua wa he nya ngɛ behi kaa COVID-19 be nɛ ɔ mi ɔ, lɛɛ wa guɔ Intanɛti blɔ nya tomihi a nɔ kɛ peeɔ asafo mi kpehi. Enɛ ɔ haa nɛ wa náa he blɔ nɛ waa kɛ nyɛmimɛ nɛ a sɛ we gba si himi mi ɔ sɛɛɔ ní. O ma nyɛ maa na bɔ nɛ a hemi kɛ yemi mi wa ha ke a ngɛ heto hae loo a ngɛ magbɛ nɔ munyu tue. (1 Tim. 6:11, 12) Jehanɛ hu ɔ, a to blɔ nya ngɛ zoom ɔ nɔ konɛ kuu tsɔwitsɔwihi nɛ a nyɛ nɛ a kpe nɛ a sɛɛ ní. O kɛ a kpɛti ni komɛ ma nyɛ maa sɛɛ ní ke a kpa asafo mi kpe. Ke o kɛ Odasefohi kpahi to hɛ ja jemi he blɔ nya ngɛ Intanɛti ɔ nɔ ɔ, o maa na bɔ nɛ nɔ nɛ o suɔ nɛ o kɛ lɛ nɛ sɛ gba si himi mi ɔ kɛ ni kpahi hiɔ si ha, nɛ lɔ ɔ ma nyɛ ma ha nɛ o na bɔ nɛ nɔ ɔ ngɛ ha tutuutu. (1 Pet. 3:4) Ke be ngɛ mi puee ɔ, o ma ba le ke ji otihi nɛ o kɛ ma o hɛ mi kɛ otihi nɛ nɔ ɔ kɛ ma e hɛ mi ɔ kɔ, nɛ o maa le ke ji nyɛ ma nyɛ maa sɛ gba si himi mi loo nyɛ be nyɛe maa sɛ mi.

Ke nɔ ko ngɛ hlae nɛ e sɛ gba si himi mi, nɛ e da Baiblo sisi tomi mlaahi a nɔ kɛ hla nɔ nɛ e kɛ lɛ maa sɛ gba si himi mi ɔ, lɔ ɔ ma nyɛ ma ha nɛ a gba si himi ɔ nɛ ye manye. Nɛ abɛ nɛ ɔ maa ba mi ngɛ e blɔ fa mi. Abɛ ɔ de ke: “Ke o ná yo loo [huno] kpakpa a, Yehowa maa gbaa mo.”​—Abɛ 18:22, NW.