Ke o suɔ nɛ o le nɔ ko ɔ, eko ɔ, kekleekle nɔ́ nɛ o maa pee ji o ma bi lɛ ke, “Kɛ a tsɛɛ mo kɛɛ?” Ke o bi Mawu sane nɛ ɔ, mɛni heto e ma ha mo? E ma de mo ke:

‘Ye biɛ ji Yehowa.’​—Yesaya 42:8.

Biɛ ɔ he hia Mawu wawɛɛ. Pi nɔ ko nɛ wo lɛ biɛ nɛ ɔ; lɛ nitsɛ nɛ e ha e he biɛ nɛ ɔ. Yehowa de ke: “Biɛ nɛ ɔ ji ye biɛ kɛ yaa neneene, nɛ yi nɔhi nɛ maa ba a, mɛ hu a ma tsɛ mi jã.” (2 Mose 3:15) Ngɛ Baiblo ɔ mi ɔ, Mawu biɛ ɔ je kpo si abɔ pe sablai kpahi kaa Ope, Tsɛ, Nyɔmtsɛ aloo Mawu. Jehanɛ se hu ɔ, e biɛ ɔ je kpo pe biɛ kpahi kaa Abraham, Mose, David, aloo Yesu. Yehowa suɔmi nya ní ji kaa nihi nɛ a le e biɛ ɔ. Baiblo ɔ de ke: “Konɛ a le kaa mo [nɛ o biɛ ji] Yehowa, mo nɔ kake too lɛ o ngɛ he wami pe nɔ tsuaa nɔ ngɛ je ɔ mi tsuo.”​—La 83:18.

Biɛ ɔ he hia Yesu wawɛɛ. Ngɛ sɔlemi nɛ nihi fuu tsɛɛ ke Nyɔmtsɛ ɔ Sɔlemi ɔ mi ɔ, Yesu tsɔɔ e kaseli ɔmɛ kaa ke a ngɛ sɔlee ɔ, a de Mawu ke: “Ha nɛ o biɛ ɔ he nɛ tsɔ.” (Mateo 6:9) Yesu nitsɛ de Mawu ngɛ sɔlemi mi ke: “Tsaatsɛ, wo o biɛ ɔ hɛ mi nyami.” (Yohane 12:28) Mawu biɛ ɔ he nɛ ma tsɔ ɔ ji nɔ́ ko nɛ he hia Yesu ngɛ e si himi mi, enɛ ɔ he ɔ, e nyɛ nɛ e de ngɛ sɔlemi mi ke: “I ha nɛ a le o biɛ ɔ, nɛ ma ha nɛ a maa le.”​—Yohane 17:26.

Biɛ ɔ he hia nihi nɛ a le Mawu ɔ. Mawu we bi nɛ a hi si blema a yɔse kaa a he piɛ pomi kɛ a yi wami hemi kɛ Mawu biɛ nɛ ngɛ slɔɔto nɛ ɔ ngɛ tsakpa.  ‘Yehowa biɛ ɔ ngɛ kaa mɔ nguaa. He nɛ nimli kpakpahi tuu fo kɛ ya saa we ngɛ nɛ a yi náa wami.’ (Abɛ 18:10) “Nɔ fɛɛ nɔ nɛ e tsɛɔ Yehowa biɛ ɔ, a ma he e yi wami.” (Roma Bi 10:13) Baiblo ɔ tsɔɔ kaa Mawu biɛ ɔ ma ha nɛ nihi nɛ a sɔmɔɔ lɛ ɔ maa je ekpa. “Simeon tu kekleekle be nɛ Mawu ngɔ e juɛmi kɛ ya je ma amɛ a nɔ, konɛ e ngɔ ni komɛ kɛ je a kpɛti kɛ ha e biɛ ɔ he munyu fitsofitso.”​—Mika 4:5; Ní Tsumi 15:14.

Biɛ ɔ tsɔɔ kaa Mawu ngɛ slɔɔto. Baiblo mi ni leli fuu tsɔɔ kaa biɛ Yehowa a sisi ji “O Deɔ O Peeɔ.” Yehowa Mawu ha nɛ wa le sisi numi nɛ ngɛ e biɛ ɔ he. E de Mose ke: “Ma Plɛ Ye He Kɛ Pee Nɔ́ Nɛ I Suɔ.” (2 Mose 3:14, NW) Enɛ ɔ he ɔ, sisi numi nɛ ngɛ Mawu biɛ ɔ he ɔ mi kuɔ pe Bɔlɔ nɛ e ji ɔ. E biɛ ɔ tsɔɔ kaa e ma nyɛ ma plɛ e he loo e nibɔ níhi kɛ pee nɔ́ tsuaa nɔ́ nɛ e suɔ konɛ e yi mi tomi nɛ ba mi. E ngɛ mi kaa Mawu sablai ɔmɛ ma nyɛ maa tsɔɔ he blɔ aloo he wami nɛ e ngɛ mohu lɛɛ, se e biɛ nɛ ji Yehowa a pɛ lɛ tsɔɔ nɔ tutuutu nɛ e ji kɛ nɔ́ nɛ e ma nyɛ ma plɛ e he kɛ pee.

Mawu biɛ ɔ tsɔɔ kaa e peeɔ wa he akɔtaa. Sisi numi nɛ ngɛ Mawu biɛ ɔ he ɔ tsɔɔ kaa e maa ya nɔ nɛ e maa suɔ wɔ kɛ e nibɔ ní kpahi kɛ maa ya neneene. Jehanɛ se hu ɔ, akɛnɛ Mawu tsɔɔ wɔ e biɛ ɔ he je ɔ, atsinyɛ jemi ko be he kaa e suɔ nɛ waa le lɛ. Ejakaa lɛ nitsɛ e sɛ hlami nɛ e tsɔɔ wɔ e biɛ ɔ loko wɔ po wa susu he kaa e sa nɛ waa le e biɛ ɔ. E ngɛ heii kaa Mawu suɔ nɛ waa na lɛ kaa e ji Nɔ nitsɛnitsɛ nɛ wa ma nyɛ maa hɛ kɛ su e he, se pi kaa e ji mawu ko nɛ a li lɛ nɛ e ngɛ tsitsaa nɛ a be nyɛe maa hɛ kɛ su e he.​—La 73:28.

Ke waa kɛ Mawu biɛ ɔ tsuɔ ní ɔ, lɔ ɔ tsɔɔ kaa wa suɔ nɛ waa le lɛ. Kaa nɔ hyɛmi nɔ́ ɔ, o ma nyɛ ma de nɔ ko nɛ o suɔ nɛ o kɛ lɛ nɛ pee huɛ ɔ kaa e ngɔ mo nitsɛ o biɛ kɛ tsɛ mo. Se ke nɔ ɔ kua kaa e kɛ o biɛ ɔ ma tsɛ mo ɔ, kɛ o maa nu he ha kɛɛ? Eko ɔ, o maa nu he kaa nɔ ɔ sume nɛ e kɛ mo maa pee huɛ. Jã nɛ e ji ngɛ Mawu hu blɔ fa mi. Yehowa ha nɛ adesahi le e biɛ, nɛ e suɔ nɛ waa ngɔ kɛ tsu ní. Ke waa kɛ biɛ ɔ tsu ní ɔ, Yehowa maa na kaa wa suɔ nɛ waa hɛ kɛ su e he. Anɔkuale sane ji kaa e toɔ nihi tsuo nɛ a “susuɔ e biɛ ɔ he” ɔ a he hɛ!​—Malaki 3:16, NW.

Ke wa suɔ nɛ waa le Mawu ɔ, nɔ́ nɛ e sa nɛ waa pee kekleekle ji kaa wa maa le e biɛ. Lɔ ɔ se ɔ, mɛni e sa nɛ waa pee? E sa nɛ waa le Nɔ nɛ hɛɛ jamɛ a biɛ ɔ. E sa nɛ waa le e suhi.