JAMIHI komɛ kaa Roma Katoliki, Buda jami, Ɔtɔdɔks jami ɔmɛ kɛ jami kpahi komɛ wo mlaa kaa a hɛ mi nyɛɛli ɔmɛ kɛ osɔfo ɔmɛ kó sɛ gba si himi mi. Nihi fuu hu susu kaa blɔ nya tomi nɛ ɔ lɛ ha nɛ osɔfohi kɛ jami hɛ mi nyɛɛli fuu ngɔ a he kɛ ngɛ ajuama bɔmi ní peepeehi a mi woe wawɛɛ ligbi etɛ nɛ ɔ nɛ.

Anɛ Ngmami ɔ de ke Kristo jami mi hɛ mi nyɛɛli kó sɛ gba si himi mi lo? Loko wa ma ha sane bimi nɛ ɔ heto ɔ, ha nɛ waa hyɛ he nɛ ní peemi nɛ ɔ je, bɔ nɛ e je sisi ha kɛ Mawu susumi ngɛ he.

Womi nɛ ji, Encyclopædia Britannica a tsɔɔ munyu nɛ ɔ mi kaa e ji “be nɛ nɔ ko sɛ we gba si himi mi, nɛ e kɛ e he wui bɔmi nami ní peepeehi a mi hulɔ. Behi fuu ɔ, nɔ ɔ peeɔ jã ngɛ jami mi he blɔ nɛ e ngɛ ɔ he je aloo jami ɔ mi ní peemi ko he suɔmi nɛ e ngɛ ɔ he je.” Ngɛ jeha 2006 mi ɔ, Pope Benedict XVI tu munyu kɛ kɔ gba si himi mi nɛ nɔ ko be sɛe ɔ he kaa “e ji kusumi ko nɛ a kɛ bɔni ní tsumi ngɛ Bɔfo ɔmɛ a gbenɔ se.”

Ngɛ kekleekle jeha lafa a mi ɔ, nɔ́ ko kaa jã be Mawu jami mi, nɛ Kristofohi nɛ a hi si ngɛ jamɛ a be ɔ mi ɔ hu kɛ tsu we ní. Ngɛ anɔkuale mi ɔ, bɔfo Paulo nɛ e hi si ngɛ kekleekle jeha lafa a mi ɔ bɔ e nyɛmimɛ Kristofohi kɔkɔ ngɛ nihi nɛ a tuɔ “lakpa munyuhi” nɛ a tsiɔ ‘gba si himi mi sɛ mi nya’ a he.—1 Timoteo 4:1-3.

Ngɛ jeha lafa enyɔ jeha amɛ a mi ɔ, jami komɛ kɛ gba si himi mi nɛ nɔ ko be sɛe ngɛ jami blɔ nya nɛ nɔ ɔ hɛɛ he je ɔ bɔni ní tsumi. Pee se ɔ, jami nɛ ɔmɛ ba bla kɛ pee Roma Katoliki jami ɔ. Womi ko nɛ a tsɛɛ ke Celibacy and Religious Traditions ɔ tsɔɔ kaa, ní peemi nɛ ɔ ba “pɔ he ngɛ Roma Nɔ Yemi ɔ mi akɛnɛ ni komɛ tsi mɛ nitsɛmɛ a he nya kaa a kɛ  a he be bɔmi nami mi ní peepeehi a mi woe ɔ he je.”

Ngɛ jehahi nɛ nyɛɛ se ɔmɛ a mi ɔ, jami hɛ mi nyɛɛli kɛ jami sisi toli komɛ tsɔɔ kaa e sɛ nɛ osɔfohi nɛ a ngɛ a jami ɔmɛ a mi ɔ nɛ sɛ gba si himi mi. A susu kaa bɔmi nami ha we nɛ nɔ he nɛ tsɔ. Jehanɛ hu, bɔmi nami kɛ osɔfo ní tsumi yɛ. Se Encyclopædia Britannica a tsɔɔ kaa “ngɛ jeha 901 kɛ ya si jeha 1000 jeha amɛ a nyagbe ɔ mi ɔ, jami nya dali komɛ kɛ osɔfo komɛ po sɛ gba si himi mi.”

Ngɛ jeha 1123 kɛ 1139 ɔ mi ɔ, Roma Katoliki jami hɛ mi nyɛɛli ɔmɛ pee kpe ko ngɛ Lateran sɔlemi we (Lateran Councils of 1123 and 1139) nɛ ngɛ Roma ma a mi ɔ mi. Ngɛ jamɛ a kpe ɔmɛ a sisi ɔ, a wo mlaa kaa a jami ɔ mi osɔfohi kó sɛ gba si himi mi. Roma Katoliki jami ɔ kɛ mlaa nɛ ɔ ngɛ ní tsue kɛ ba si mwɔnɛ ɔ. Enɛ ɔ ye bua nɛ a nyɛ tsi he wami kɛ sɔlemi ɔ sika nɛ ya jee osɔfohi nɛ a sɛ gba si himi mi a bimɛ a dɛ ɔ nya.

Mawu munyu nɛ ji Baiblo ɔ tsɔɔ wɔ bɔ nɛ e naa ní peemi nɛ ɔ ha. Baiblo ɔ tsɔɔ wɔ nɔ́ nɛ Yesu de kɛ kɔ nihi nɛ a sɛ we gba si himi mi ‘ngɛ Mawu Matsɛ Yemi ɔ he je’ ɔ a he. Yesu nitsɛ hu sɛ we gba si himi mi. (Mateo 19:12) Bɔfo Paulo hu tu Kristofohi nɛ a hla kaa a maa kase e nɔ hyɛmi nɔ́ ɔ nɛ a be gba si himi mi sɛe ngɛ ‘sane kpakpa a he je’ ɔ he munyu.—1 Korinto Bi 7:37, 38; 9:23.

Yesu kɛ Paulo de we ke doo ɔ Kristofohi ko sɛ gba si himi mi. Yesu tsɔɔ kaa ke nɔ ko nyɛ nɛ e hi si nɛ e sɛ we gba si himi mi ɔ, e ji nɔ́ nɛ a “ngɔ ha” lɛ aloo nike ní nɛ e ná, se pi e kaseli ɔmɛ tsuo nɛ a ngɛ jamɛ a nike ní ɔ. Benɛ Paulo ngma kɛ kɔ ‘nihi nɛ a sɛ we gba si himi mi hyɛ ɔ a he ɔ,’ e de heii ke: ‘Nyɔmtsɛ ɔ ha we mi mlaa pɔtɛɛ ko, se ye juɛmi nɛ i kɛ ngɛ ga nɛ ɔ woe.’—Mateo 19:11; 1 Korinto Bi 7:25.

Jehanɛ hu, Baiblo ɔ tsɔɔ kaa Kristofohi babauu nɛ a hi si ngɛ kekleekle jeha lafa a mi ɔ sɛ gba si himi mi. A kpɛti nɔ kake ji bɔfo Petro. (Mateo 8:14; Marko 1:29-31; 1 Korinto Bi 9:5) Ngɛ anɔkuale mi ɔ, akɛnɛ bɔmi nami mi ní peepeehi nɛ sɛ pɔ he wawɛɛ ngɛ Roma jamɛ a be ɔ he je ɔ, Paulo ngma ke, ke asafo nya dalɔ maa sɛ gba si himi mi ɔ, ‘e ngɔ yo kake.’ Jehanɛ hu, e sa nɛ ‘e bimɛ nɛ ba a he si.’—1 Timoteo 3:2, 4.

Tsa pi gba si himi nɛ bɔmi nami be mi he munyu nɛ a ngɛ tue ngɛ ngmami nɛ ɔ mi, ejakaa Baiblo gba mi kpoo ke, ‘huno nɛ ha e yo nɔ́ nɛ ji yo blɔ nya nɛ sa kaa e ná.’ Nɛ ‘huno kɛ yo kó tsi a he nya kaa a kɛ a sibi be bɔmi nae.’ (1 Korinto Bi 7:3-5) E ngɛ heii kaa Mawu de we ke doo ɔ nɔ ko nɛ hi si nɛ e ko sɛ gba si himi mi, aloo Kristo jami hɛ mi nyɛɛli nɛ ko sɛ gba si himi mi.

Ke jã ji sane ɔ, lɛɛ mɛni he je nɛ Yesu kɛ Paulo je nihi nɛ a sɛ we gba si himi mi ɔ a yi ɔ? Ejakaa si himi kaa jã maa ye bua nɔ ɔ konɛ e ná be babauu kɛ fiɛɛ sane kpakpa a. Nihi nɛ a sɛ we gba si himi mi ɔ ma nyɛ ma ná be fuu kɛ fiɛɛ sane kpakpa a, akɛnɛ a kɛ nyagbahi nɛ nihi nɛ a sɛ gba si himi mi kɛ kpeɔ ɔ eko kpi ɔ he je.—1 Korinto Bi 7:32-35.

Mo susu David nɔ hyɛmi nɔ́ ɔ he nɛ o hyɛ. E ngmɛɛ ní tsumi nɛ a woɔ lɛ hiɔ saminya ngɛ mi ngɛ Mexico City ɔ he nɛ e hia kɛ ho kɔpe ko nɛ ngɛ Costa Rica a ya konɛ e kɛ nihi nɛ ya kase Baiblo ɔ. Anɛ David susu kaa gba si himi mi nɛ e sɛ we ɔ lɛ ye bua lɛ lo? Ee. E de ke, “Lejɛ ɔ si himi je ekpa ngɛ he nɛ i je ɔ he, lɔ ɔ he ɔ, i nɛ́ lɛ gbɔjɔɔ. Se akɛnɛ imi nɔ kake too nɛ i ngɛ he je ɔ, i na níhi a nya mla.”

Claudia ji Kristofo no nɛ e sɛ we gba si himi mi lolo. E ya fiɛɛ sane kpakpa a ngɛ he ko nɛ sane kpakpa fiɛɛli a he hia ngɛ. E de ke: “Ye bua jɔ Mawu munyu ɔ nɛ i ngɛ fiɛɛe ɔ he. Ke i na bɔ nɛ Mawu ngɛ ye nɔ hyɛe haa a, e haa nɛ hemi kɛ yemi nɛ i ngɛ ngɛ Mawu mi kɛ huɛ bɔmi nɛ ngɛ i kɛ lɛ wa kpɛti ɔ mi waa.”

E sɛ nɛ gba si himi mi nɛ nɔ ko be sɛe ɔ nɛ pee tloomi. Claudia de hu ke: “Ke o sɛ gba si himi mi jio, o sɛ we mi jio, o ma ná bua jɔmi ke o kɛ o he wami tsuo sɔmɔ Yehowa.”—La 119:1, 2.