ANƆKUALE nɛ a yi ngɛ gba si himi mi ɔ yeɔ nɔ awi wawɛɛ nitsɛ. Ngɛ anɔkuale mi ɔ, ni komɛ ngɔɔ a he piɛɛlɔ nɛ e tsake e tsui ɔ yayami kɛ paa lɛ nɛ a kɛ lɛ hiɔ si. a Se a po gba a mi jio, a pui mi jio, he piɛɛlɔ nɛ a yí lɛ anɔkuale ɔ haoɔ, nɛ e yeɔ tsui wawɛɛ. Kɛ a ma plɛ kɛ da haomi nɛ ɔ nya ha kɛɛ?

Ngɛ haomi nɛ ɔ tsuo se ɔ, nihi fuu nɛ a he piɛɛli yi mɛ anɔkuale ɔ ná bua womi ngɛ Baiblo ɔ mi. A ba kase kaa Mawu naa a haomi ɔmɛ nɛ e mi mi saa lɛ ngɛ a he.​—Malaki 2:13-16.

“Ke yi mi susumi tsɔ ha nɛ i pee basaa kikɛ nɛ ɔ, mo lɛ o haa mi bua jɔmi, nɛ ye nɔ gbagba tee ekohu.”​—La 94:19.

Bill de ke, “Benɛ i kane ngmami nɛ ɔ, i nu he kaa Yehowa ngɛ ye bua woe, kaa bɔ nɛ tsɛ nɛ e mi mi saa lɛ peeɔ ɔ.”

“Nihi nɛ yeɔ anɔkuale ɔ, o jeɔ o he si kɛ tsɔɔ mɛ kaa anɔkualetsɛ.”​—La 18:25.

Carmen nɛ e huno ɔ yi lɛ anɔkuale nyɔhiɔhi abɔ ɔ de ke: “Ye huno ɔ yi mi anɔkuale ngɛ wa gba si himi ɔ mi. Se i he ye kaa Yehowa maa ye mi anɔkuale. E be mi kuae kɔkɔɔkɔ.”

‘Nyɛ ko pee yeyeeye ngɛ nɔ́ ko nɔ́ ko he, se mohu ngɛ nɔ́ fɛɛ nɔ́ mi ɔ, nyɛɛ gu sɔlemi kɛ pɛɛ kpami nɛ mi wa nɔ kɛ ha nɛ Mawu nɛ e le nyɛ ní bimi ɔmɛ; nɛ Mawu tue mi jɔmi ɔ nɛ pã níhi a sisi numi tsuo ɔ maa bu nyɛ tsui he.’​—Filipi Bi 4:6, 7.

Sasha de ke: “I kane ngmami nɛ ɔ si abɔ, se benɛ i bɔni sɔlemi wawɛɛ jehanɛ ɔ, Mawu ha nɛ i ná tue mi jɔmi ngɛ ye si himi mi.”

Nihi nɛ a wo a ta kɛ sɛ hla mi ɔ tsuo a kɔni mi jɔ̃ɔ be komɛ. Se a ngɔ a hɛ kɛ fɔ Yehowa Mawu nɔ nɛ a ná he wami womi kɛ je e Munyu ɔ nɛ a kane ɔ mi. Bill de ke: “Benɛ i susu kaa hɛ nɔ kami ko be hu ɔ, hemi kɛ yemi nɛ i ngɛ ɔ ha nɛ ye si himi pee bua jɔmi ekohu. E ngɛ mi kaa i nyɛɛ ‘diblii kpii mi’ be ko mohu lɛɛ, se Mawu ngɛ ye kasa nya haa.”​—La 23:4.