A fɔ mi ngɛ kɔpe ko mi ngɛ Saxony nɛ be ko nɛ be ɔ a tsɛɛ ke German Democratic Republic (GDR). Bua jɔmi kɛ suɔmi ngɛ wa weku ɔ mi, nɛ ye fɔli tsɔse mi konɛ ma ba ye je mi saminya. Kɔmiunisi nɔ yemi lɛ ngɛ jamɛ a be ɔ, lɔ ɔ he ɔ, Saxony bi babauu bui Mawu jami kaa nɔ́ ko nɛ he hia. Ngɛ ye blɔ fa mi ɔ, i he we yi kaa Mawu ngɛ. Kɛ je ye jokuɛwi a si kɛ ba si be nɛ i ye jeha 18 ɔ, ye bua jɔ níhi enyɔ komɛ a he: mi kaa Mawu be kɛ Kɔmiunisi.

Kɔmiunisi bi hɛɛ susumi kaa adesahi tsuo sɔ. Enɛ ɔ he je nɛ ye bua jɔ Kɔmiunisi he wawɛɛ ɔ nɛ. Jehanɛ se hu ɔ, i he ye kaa e sa nɛ a dla nɔ́ fɛɛ nɔ́ pɛpɛɛpɛ bɔ nɛ pee nɛ nɔ ko kó ye ohia. Enɛ ɔ he ɔ, i ya piɛɛ Kɔmiunisi nihewi kɛ yihewi a kuu ko he. Ma a to blɔ nya nɛ womihi nɛ nihi kɛ pee we nɔ́ ko hu ɔ, a muɔɔ nɛ a kɛ peeɔ ní kpahi. Benɛ i ye jeha 14 ɔ, i kɛ ye he wo blɔ nya tomi nɛ ɔ mi. Mɔde nɛ i bɔ ɔ sa Aue ma bi ɔmɛ a hɛ, enɛ ɔ ha nɛ ma nikɔtɔma amɛ ha mi nike ní ko. Jamɛ a be ɔ mi ɔ, i wɛ kulaa mohu, se i ba le GDR ma kudɔli ɔmɛ a kpɛti nihi fuu. I susu kaa oti nɛ i kɛ ma ye hɛ mi ɔ sa wawɛɛ nɛ lɔ ɔ ma ha nɛ ma ná si himi kpakpa hwɔɔ se.

Se ye si himi tsake tlukaa. Ngɛ jeha 1989 mi ɔ, a ku Berlin Gbogbo ɔ nɛ Kɔmiunisi nɔ yemi ɔ nɛ ngɛ Eastern Europe ɔ gu. Níhi nɛ ya nɔ pee se ɔ pee mi nyakpɛ. I yɔse kaa mamoo dami sane nɛ a yi ngɛ nɔ yae wawɛɛ ngɛ GDR. Kaa nɔ hyɛmi nɔ́ ɔ, a bui nihi nɛ a fĩ we Kɔmiunisi nɔ yemi ɔ se ɔ kulaa. Kɛ e ba lɛ kɛɛ? Tse wɔ Kɔmiunisi bi mohu nɛ jinɛ wa hɛɛ susumi kaa adesahi tsuo sɔ. Anɛ a kɛ jamɛ a susumi ɔ mlɔɔ wɔ lo? Sane nɛ ɔ ha nɛ i pee yeyeeye nɛ i hao.

Lɔ ɔ he ɔ, i ngɔ oti kpahi kaa la fiami kɛ ní tɛnimi kɛ ma ye hɛ mi. I ya kase la he ní ngɛ sukuu. I kɛ ma ye hɛ mi hu kaa ma tsa nɔ kɛ ya Yunivɛsiti konɛ ma ba pee la fialɔ kɛ ní tɛnilɔ hwɔɔ se. Je mi bami kpakpa nɛ i kase ngɛ ye jokuɛwi a si ɔ hu i kɛ tsu we ní hu. Nɔ́ nɛ he hia mi amlɔ nɛ ɔ ji kaa ma ye ngɔɔmi ngɛ je mi. Ma hi yi ɔmɛ tsakee kɛkɛ. Se ngɛ la fiami, ní tɛnimi kɛ he yemi nɛ i ná tsuo se ɔ, yeyeeye peemi ɔ bɛ si. Fonihi nɛ i tɛni ɔ nitsɛ po tsɔɔ kaa i hao. Lɔ ɔ he ɔ, i bi ye he ke: Mɛni maa ba hwɔɔ se? Nɛ mɛni yi mi tomi lɛ ngɛ wami he?

 Benɛ i ba na hetohi nɛ i ngɛ hlae ɔ, ye bua jɔ nitsɛ. Ligbi ko ɔ, i kɛ ye huɛmɛ sukuu bi komɛ bua wa he nya gbɔkuɛ ko ngɛ sukuu ɔ mi, nɛ wa ngɛ bɔ nɛ níhi maa ya nɔ ha hwɔɔ se ɔ he susue. A kpɛti nɔ kake nɛ a tsɛɛ lɛ ke Mandy * ɔ ji Yehowa Odasefo no. Jamɛ a gbɔkuɛ ɔ, e wo mi ga kpakpa ko. E de mi ke: “Andreas, ke o ngɛ hlae nɛ o ná heto kɛ ha o sane bimihi nɛ kɔ wami kɛ hwɔɔ se si himi he ɔ, lɛɛ e he hia nɛ o kane Baiblo ɔ.”

Ye yi mi pee mi enyɔɔnyɔ mohu lɛɛ se i to kaa ma kane Baiblo ɔ konɛ ma na heto ɔmɛ. Mandy de mi ke ma kane Daniel yi 2 ɔ. Nɔ́ nɛ i kane ngɛ lejɛ ɔ pee mi nyakpɛ wawɛɛ. Gbami nɛ ngɛ lejɛ ɔ tsɔɔ nɔ yeli nɛ a maa ye je ɔ nɔ hluu kɛ ba su wa be nɛ ɔ mi. Mandy tsɔɔ mi Baiblo mi gbami kpahi nɛ kɔɔ wa hwɔɔ se si himi he. Bɔɔbɔɔbɔɔ ɔ, i ngɛ ye sane bimi ɔmɛ a heto náe! Se mɛnɔ lɛ ngma jamɛ a gbami ɔmɛ, nɛ mɛnɔ ma nyɛ maa tsɔɔ bɔ nɛ hwɔɔ se si himi a tutuutu? Aloo Mawu ngɛ niinɛ?

Mandy ha nɛ nyumu ko kɛ e yo nɛ a tsɛɛ mɛ ke Horst kɛ Angelika nɛ mɛ hu a ji Odasefohi ye bua mi konɛ ma nu Mawu Munyu ɔ sisi saminya. I ba yɔse kaa Yehowa Odasefohi pɛ ji jami kuu ko nɛ a kɛ Mawu biɛ nitsɛ nɛ ji Yehowa a tsuɔ ní. (La 83:18; Mateo 6:9) I ba kase kaa Yehowa Mawu ha adesahi hɛ nɔ kami kaa a maa hi si ngɛ zugba a nɔ kɛ ya neneene ngɛ paradeiso. La 37:9 ɔ de ke: ‘Ni nɛmɛ nɛ ngɔɔ a hɛ kɛ fɔɔ Yehowa nɔ ɔ, mɛɛ lɛɛ a nine maa su zugba a nɔ.’ Ye bua jɔ kaa adesahi tsuo a nine maa su si womi nɛ ɔ nɔ ke a bɔ mɔde nɛ a kɛ je mi bami he mlaahi nɛ Mawu wo ngɛ Baiblo ɔ mi ɔ tsu ní.

Se e ye ha mi kaa ma pee tsakemihi nɛ ma hi si ngɛ Baiblo blɔ tsɔɔmihi a nya. E sa nɛ ma kase he si bami ejakaa la fiami kɛ ní tɛnimi ha nɛ i ná he nɔ womi su. Jehanɛ hu, e he wa ha mi kaa ma kua je mi bami yaya nɛ i kɛ ye he wo mi ɔ. Ye bua jɔ kaa Yehowa toɔ e tsui si, e naa nɔ mɔbɔ nɛ e susuɔ nihi nɛ bɔɔ mɔde kaa a kɛ níhi nɛ a kase ngɛ Baiblo ɔ mi ɔ ma tsu ní ɔ a he!

Kɛ je ye jokuɛwi a si kɛ ba si benɛ i ye jeha 18 ɔ, i fĩ Kɔmiunisi nɔ yemi ɔ se nɛ i he we yi kaa Mawu ngɛ. Se kɛ je jamɛ a be ɔ kɛ ma nɛ ɔ, Baiblo ɔ ngɛ ye si himi tsakee bɔɔbɔɔbɔɔ. Níhi nɛ i kase ngɛ Baiblo ɔ mi ɔ ha nɛ yeyeeye peemi ɔ ba si, nɛ i na yi mi tomi nɛ ngɛ wami he. Ngɛ 1993 ɔ mi ɔ, a baptisi mi kaa Yehowa Odasefo no, nɛ ngɛ jeha 2000 ɔ mi ɔ, i kɛ Tabitha sɛ gba si himi mi. Tabitha kɛ Mawu jami fiɛ we kulaa. Waa kɛ be babauu tsɔɔ nihi Baiblo mi anɔkuale ɔ. Nihi nɛ waa kɛ mɛ kaseɔ Baiblo ɔ a ti nihi fuu ngɛ kaa bɔ nɛ i ngɛ sa a. A bua jɔ Kɔmiunisi nɔ yemi ɔ he nɛ a he we yi kaa Mawu ngɛ. Ke i tsɔɔ mɛ bɔ nɛ a ma plɛ kɛ le Yehoe tsui nɔɔ ye mi nitsɛ.

Benɛ i kɛ Yehowa Odasefohi bɔni bɔmɔ ɔ, ye fɔli a bua juɛ he kulaa. Se a ba na tsakemi slɔɔtohi nɛ i pee ngɛ ye si himi mi akɛnɛ i kɛ Odasefo ɔmɛ ngɛ bɔe ɔ he je. Amlɔ nɛ ɔ, a kaneɔ Baiblo ɔ nɛ a yaa kpehi nɛ Yehowa Odasefohi peeɔ ɔ hulɔ. Enɛ ɔ ha nɛ ye bua jɔ wawɛɛ.

Ye gba si himi ɔ hu pee kpakpa ejakaa i kɛ Tabitha tsuo bɔɔ mɔde kaa waa kɛ ga womi nɛ Baiblo ɔ kɛ ha ngɛ gba si himi he ɔ ma tsu ní. Kaa nɔ hyɛmi nɔ́ ɔ, akɛnɛ waa kɛ ga womi nɛ kɔɔ anɔkuale yemi ngɛ gba si himi mi tsuɔ ní he je ɔ, e ha nɛ kake peemi nɛ ngɛ wa kpɛti ɔ mi ba wa.​—Hebri Bi 13:4.

I pee we yeyeeye hu, nɛ i yi gbeye ngɛ hwɔɔ se si himi he hu. I na kaa i ba piɛɛ Mawu sɔmɔli nɛ a ngɛ je kɛ wɛ, nɛ ji weku nɛ kake peemi kɛ tue mi jɔmi ngɛ mi ɔ a he. Ngɛ weku nɛ ɔ mi ɔ, wa buu nɔ tsuaa nɔ, nɛ a hyɛ we nɔ hɛ mi hulɔ. Si himi nɛ ɔ nɛ jinɛ i ngɛ hlae ma ná kɛ je ye jokuɛwi a si tɔ̃ɔ.