Ke a ke o kɛ o bimɛ nɛ sɛɛ ní ɔ, e tsɔɔ kaa o maa ngmɛ mɛ blɔ nɛ́ mɛ hu a je a susumi kɛ a he numi kpo.

E yeɔ ha nihewi kɛ yihewi kaa a kɛ a fɔli maa sɛɛ ní. Ke o bimɛ wɛ lolo ɔ, a deɔ mo nɔ́ fɛɛ nɔ́. Se ke a ba pee nihewi kɛ yihewi ɔ, a kɛ mo sɛɛ we ní kpakpa ko hu. Ke e ba jã a, o li níhi nɛ a ngɛ he susue kɛ bɔ nɛ a ngɛ he nue ha. E ba peeɔ kaa nɔ́ nɛ muɔ gbajaa ko ba fɔɔ si ngɛ o kɛ o bimɛ ɔmɛ nyɛ kpɛti. Ke e ngɛ kaa nɔ́ nɛ o bimɛ ɔmɛ sume nɛ a kɛ mo nɛ sɛɛ ní ɔ, jamɛ a be ɔ mohu ji be nɛ e sa nɛ o kɛ mɛ nɛ sɛɛ ní wawɛɛ nitsɛ!

Mo ná be ha o bimɛ ɔmɛ be saa be. Moo pee jã ke e biɔ nɛ o kɛ mɛ nɛ sɛɛ ní nyɔ mi po.

“Eko ɔ, e maa pee mo kaa o de ke, ‘Kɛ je mɔtu tɔɔ nɛ i kɛ mo ngɛ we mi ɔ, kpaako o ngɛ hlae nɛ o kɛ mi nɛ sɛɛ ní lo? Se anɛ e sa nɛ wa kuɛ kɛ wo wa bimɛ ɔmɛ ke a ngɛ hlae nɛ a kɛ wɔ nɛ sɛɛ ní lo? Anɛ pi lɔ ɔ nɛ fɔli tsuo ngɛ hlae lo?”​—Lisa.

“I sume nɛ a puɛɔ ye mahe, se behi fuu ɔ, be nɛ i kɛ ye bimɛ ɔmɛ nyɛɛ sɛɛɔ ní saminya ji makɛ.”​—Herbert.

BAIBLO SISI TOMI MLAA: “Ha nɛ nɔ fɛɛ nɔ nɛ e ya nɔ nɛ e hla nɔ́ nɛ maa hi kɛ ha nɔ kpa, se pi kɛ ha lɛ nitsɛ e he.”​—1 Korinto Bi 10:24.

Ko ha nɛ nɔ́ ko nɛ gbla o juɛmi. Tsɛ ko de ke: “Be komɛ ɔ, ke i kɛ ye bimɛ ɔmɛ ngɛ ní sɛɛe ɔ, i hii ní kpahi a he susue. A naa heii kaa ye juɛmi be nɔ́ nɛ a ngɛ dee ɔ nɔ!”

Ke o pɔɔ jã peemi ɔ, lɛɛ jehanɛ ke o bimɛ kɛ mo ma ní sɛɛmi ɔ, bɔɔ mɔde nɛ o gbe TV ɔ, nɛ o kpa nɔ́ fɛɛ nɔ́ nɛ o ngɛ pee ɔ. Ngɔɔ o juɛmi kɛ ma nɔ́ nɛ o bi ɔ ngɛ dee ɔ nɔ, nɛ ke o susu kaa nɔ́ nɛ e ngɛ dee ɔ he hia we mo po ɔ, ko ha nɛ nɔ́ ko nɛ gbla o juɛmi.

“E sa nɛ wa ha nɛ wa bimɛ ɔmɛ nɛ a le kaa wa suɔ nɛ waa le bɔ nɛ a nuɔ he ha. Ke wa ha we nɛ a le jã a, a be wɔ a susumi dee, loo a ma ya de ni kpahi a susumi konɛ a ye kɛ bua mɛ.”​—Maranda.

“Ke o bi ɔ susumi dɛ po ɔ, o mi mi ko fu lɛ.”​—Anthony.

BAIBLO SISI TOMI MLAA: “Nyɛɛ hyɛ bɔ nɛ nyɛ buɔ tue ha a saminya.”​—Luka 8:18.

Ngɔɔ he blɔ fɛɛ he blɔ nɛ o ma ná a nɛ o kɛ o bimɛ ɔmɛ nɛ sɛɛ ní. Behi fuu ɔ, jokuɛwi sume nɛ a kɛ a fɔli sɛɛɔ ní ke a kɛ mɛ hii si hɛ mi kɛ hɛ mi.

“Ke wa ngɛ lɔle mi ɔ, wa ngɔɔ jamɛ a he blɔ ɔ nɛ waa kɛ mɛ sɛɛɔ ní. Wa hiɔ si ngɛ a kasa mi pe nɛ waa kɛ mɛ maa hi si hɛ mi kɛ hɛ mi, nɛ enɛ ɔ haa nɛ ní sɛɛmi ɔ yaa nɔ saminya.”​—Nicole.

Ní yemi be hu haa fɔli he blɔ nɛ se be nɛ a kɛ a bimɛ ɔmɛ maa sɛɛ ní.

“Ke e su gbɔkuɛ ní yemi be ɔ, wɔ tsuo wa sɛɛɔ níhi nɛ ya nɔ nɛ wa bua jɔ he kɛ níhi nɛ ya nɔ nɛ wa bua jɔɛ he ngɛ ligbi ɔ mi ɔ he ní. Jã nɛ wa peeɔ ɔ ha nɛ kake peemi ngɛ wa kpɛti, nɛ wa nuɔ he kaa ke waa kɛ nyagba ko ngɛ kpee ɔ, nɔ ko ngɛ nɛ e maa ye bua wɔ.”​—Robin.

BAIBLO SISI TOMI MLAA: “Nɔ fɛɛ nɔ he nɛ e sɔ kɛ bu munyu tue, e he nɛ e ko sɔ kɛ tu munyu.”​—Yakobo 1:19.