KƐ HA NIHI NƐ A SƐ GBA SI HIMI MI
4: Nyɛɛ Ngɔ Nyɛ Sibi A He Tɔmi Kɛ Ke
NƆ́ NƐ E TSƆƆ
Tɔmi nɛ o kɛ maa ke ɔ tsɔɔ kaa o maa ngmɛɛ nɔ́ yayami ko nɛ a pee mo ɔ he, nɛ́ o je dɔdɔɛ ɔ kɛ je o mi kulaa. Yayami nɛ o kɛ maa ke ɔ tsɔɔ we kaa a tɔ̃ we o nɔ loo a pee we mo yayami ko.
BAIBLO SISI TOMI MLAA: “Ke nɔ ko ngɛ nɔ́ ko nɛ e maa da nɔ kɛ tu munyu kɛ si nɔ kpa ko po ɔ, nyɛɛ ya nɔ nɛ nyɛ ná nyɛ sibi a he tsui nɛ nyɛɛ ngɔ kɛ pa nyɛ sibi faa.”—Kolose Bi 3:13.
“Ke o suɔ nɔ ko ɔ, o kɛ o juɛmi ma we nɔ ɔ fã tɔmihi a nɔ, mohu ɔ, o ngɔɔ o juɛmi kɛ maa mɔde nɛ e ngɛ bɔe ɔ nɔ.”—Aaron.
NƆ́ HE JE NƐ E HE HIA
Ke o ngɔ nɔdɔ nɔ́ ko kɛ wo o mi ɔ, o maa ye mo nitsɛ o he awi, nɛ e ma nyɛ ma puɛ o gba si himi ɔ.
“Ligbi ko ɔ, ye huno ɔ pee nɔ́ ko nɛ dɔ mi wawɛɛ nɛ e kpa mi pɛɛ ngɛ he. E he wa ha mi wawɛɛ kaa i kɛ maa ke lɛ. Pee se ɔ, i kɛ ke lɛ, se e dɔ mi kaa i pee we jã mla. Ejakaa kemi nɛ i kɛ ki lɛ mla a ngɔ nyagbahi fuu kɛ ba wa gba si himi ɔ mi.”—Julia.
NƆ́ NƐ O MA NYƐ MAA PEE
MOO KA O HE
Be kpa nɛ o huno ɔ loo o yo ɔ ma de nɔ́ ko loo e maa pee nɔ́ ko nɛ maa dɔ mo ɔ, mo bi o he ke:
‘Anɛ ye mi mi fu mla tsɔ lo?’
‘Anɛ nɔ́ nɛ e pee ɔ ji nɔ́ ngua ko nɛ e biɔ nɛ e kpa pɛɛ doo, aloo ma nyɛ ma ma ye hɛ ngɔ fɔ nɔ?’
O KƐ O YO Ɔ LOO O HUNO Ɔ NƐ SUSU SANE BIMI NƐ ƆMƐ A HE
Ke wa tɔ̃ wa sibi a nɔ ɔ, be enyɛmɛ e yeɔ loko waa kɛ keɔ wa sibi?
Mɛni wa maa pee konɛ waa kɛ tɔmi nɛ ke wa sibi mla?
GA WOMI
Ke o yo ɔ loo o huno ɔ pee nɔ ko nɛ dɔ mo ɔ, ko susu kaa pe e je blɔ nɛ e pee.
Moo bɔ mɔde nɛ o ma o hɛ kɛ fɔ nɔ́ nɛ o huno ɔ loo o yo ɔ pee ɔ nɔ, nɛ o kai kaa “wɔ tsuo wa tɛɔ si si abɔ.”—Yakobo 3:2.
“Ke nyɛ tsuo nɛ nyɛ tɔ̃ ɔ, e yi kaa o kɛ maa ke, se ke nɔ kake lɛ tɔ̃ ɔ, e he waa kaa o kɛ maa ke. Ja o ngɛ he si bami nitsɛ loko o ma nyɛ maa kplɛɛ pɛɛ kpami nɔ nɛ o kɛ ke.”—Kimberly.
BAIBLO SISI TOMI MLAA: “O kɛ lɛ nɛ dla nyɛ kpɛti mla.”—Mateo 5:25.
Ke o ngɔ nɔdɔ nɔ́ ko kɛ wo o mi ɔ, o maa ye mo nitsɛ o he awi, nɛ e ma nyɛ ma puɛ o gba si himi ɔ
