1, 2. (a) Mɛni nɔ́ hetomi níhi nɛ Yesu kɛ tsɔɔ e huɛmɛ nɛ nyu bi ngɛ e kɛ mɛ a kpɛti ɔ níhi a nya? ( Moo hyɛ foni nɛ ngɛ ní kasemi ɔ sisije ɔ.) (b) Mɛni e he hia nɛ waa le ngɛ nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he?

LIGBI ko ɔ, Yesu kɛ e huɛmɛ nɛ nyu bi ngɛ e kɛ mɛ a kpɛti nɛ ji Petro, Andrea,Yakobo, kɛ Yohane ya hi si ngɛ he ko nɛ a sɛɛ ní. Yesu de mɛ ní komɛ nɛ a he hia wawɛɛ nitsɛ. Benɛ e ngɔ nɔ́ hetomi nɔ́ nɛ kɔɔ tsɔlɔ anɔkualetsɛ kɛ ní lelɔ ɔ, yihewi nyɔngma amɛ, kɛ sika a he ɔ kɛ tsɔɔ mɛ níhi a nya ta a, e kɛ nɔ́ hetomi nɔ́ kpa ko hu tsu ní. Ngɛ jamɛ a nɔ́ hetomi nɔ́ ɔ mi ɔ, e tu be nɛ “nɔmlɔ Bi ɔ” ma ba kojo “je ma amɛ tsuo” ɔ he munyu. E de mɛ ke “nɔmlɔ Bi ɔ” ma gba nimli a mi kɛ wo kuu enyɔ mi. E tsɔɔ kaa kuu ɔ kake ji jijɔhi, nɛ kake hu ji apletsihi. Lɔ ɔ se ɔ, e wo kuu etɛne ko hu ta. Kuu nɛ ɔ he hia, nɛ mɛ ji Matsɛ ɔ “nyɛmimɛ” ɔmɛ ɔ nɛ.—Kane Mateo 25:31-46.

² Kaa bɔ nɛ bɔfo ɔmɛ pee ɔ, Yehowa sɔmɔli nɛ a ngɛ  mwɔnɛ ɔ hu suɔ kaa a maa nu nɔ́ hetomi nɔ́ nɛ ɔ sisi, ejakaa e kɔɔ nihi a wami he. Yesu tsɔɔ kaa ni komɛ ma ná neneene wami, nɛ ni komɛ lɛɛ a ma kpata a hɛ mi. Enɛ ɔ he je ɔ, e he hia wawɛɛ nɛ waa nu nɔ́ hetomi nɔ́ ɔ sisi, konɛ waa le nɔ́ nɛ e sa kaa waa pee nɛ wa ná neneene wami. Lɔ ɔ he ɔ, ngɛ munyu nɛ ɔ nɛ wa ngɛ kasee ɔ mi ɔ, wa ma ha sane bimihi nɛ nyɛɛ se nɛ ɔ a heto: Mɛni blɔ nɔ Yehowa gu kɛ ye bua wɔ nɛ wa nu nɔ́ hetomi nɔ́ nɛ ɔ sisi? Kɛ wa plɛ kɛ le kaa nɔ́ hetomi nɔ́ ɔ kɔɔ fiɛɛmi ní tsumi ɔ he ha kɛɛ? Mɛnɔmɛ nɛ e sa kaa a fiɛɛ? Nɛ mɛni he je nɛ amlɔ nɛ ɔ, e he hia kaa nihi nɛ a ye “Matsɛ ɔ” kɛ e “nyɛmimɛ” ɔmɛ anɔkuale?

3, 4. (a) Loko wa maa nu nɔ́ hetomi nɔ́ nɛ ɔ sisi ɔ, mɛni e he hia nɛ waa le? (b) Ngɛ jeha 1881 ɔ mi ɔ, kɛ a tsɔɔ nɔ́ hetomi nɔ́ nɛ ɔ sisi ngɛ Hwɔɔmi Mɔ ɔ mi ha kɛɛ?

³ Loko wa ma nyɛ maa nu nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ sisi ɔ, e he hia nɛ waa le níhi nɛ nyɛɛ se nɛ ɔ: (1) Mɛnɔ ji “nɔmlɔ Bi ɔ,” aloo “Matsɛ ɔ,” nɛ mɛnɔmɛ hu ji jijɔ ɔmɛ kɛ apletsi ɔmɛ, kɛ Matsɛ ɔ “nyɛmimɛ” ɔmɛ ɔ? (2) Mɛni be “nɔmlɔ Bi ɔ” gba jijɔ ɔmɛ kɛ apletsi ɔmɛ a mi? nɛ (3) mɛni he je a tsɛɛ ni komɛ ke jijɔhi kɛ ni komɛ hu ke apletsihi ɔ?

⁴ Ngɛ jeha 1881 ɔ mi ɔ, Hwɔɔmi Mɔ ɔ tsɔɔ kaa “nɔmlɔ Bi ɔ” aloo “Matsɛ ɔ” ji Yesu. Nɛ a tsɔɔ nya kaa tsa pi nihi nɛ a kɛ Yesu ma ya ye matsɛ ngɛ hiɔwe ɔ pɛ ji Matsɛ ɔ “nyɛmimɛ,” se ke nihi tsuo nɛ a maa hi si kɛ ya neneene ngɛ zugba a nɔ ɔ ye mluku ɔ, mɛ hu a maa pee Matsɛ ɔ “nyɛmimɛ.” Hwɔɔmi Mɔ ɔ tsɔɔ mi kaa a ma gba nihi a mi ngɛ Kristo Jeha Akpe Nɔ Yemi ɔ sisi, nɛ a ma tsɛ nihi nɛ a jeɔ suɔmi kpo kɛ haa nihi ngɛ nɔ́ tsuaa nɔ́ mi kaa bɔ nɛ Mawu peeɔ ɔ ke jijɔhi.

5. Ngɛ jeha 1923 ɔ mi ɔ, kɛ Mawu we bi nu nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ sisi ha kɛɛ?

⁵ Pee se ɔ, Yehowa ye bua e we bi nɛ a nu nɔ́ hetomi nɔ́ nɛ ɔ sisi saminya. Ngɛ October 15, 1923 Blɛfo gbi Hwɔɔmi Mɔ ɔ mi ɔ, a tsɔɔ kaa “nɔmlɔ Bi ɔ” ji Yesu. Se a tsɛ Baiblo ngmamihi a se kɛ tsɔɔ mi kaa “nyɛmimɛ” nɛ a tu a he munyu ngɛ nɔ́ hetomi nɔ́ ɔ mi ɔ daa si kɛ ha nihi nɛ a kɛ Yesu ma ya ye matsɛ ngɛ hiɔwe ɔ pɛ, nɛ mɛ tsuo a maa hi hiɔwe ngɛ Jeha Akpe Nɔ Yemi ɔ mi. A tsɔɔ mi hu kaa jijɔ ɔmɛ ji nihi nɛ a maa hi zugba a nɔ ngɛ Yesu kɛ e nyɛmimɛ ɔmɛ a nɔ yemi ɔ sisi. Nɔ́ hetomi nɔ́ ɔ tsɔɔ kaa nihi nɛ a maa hi zugba a nɔ ɔ maa ye bua Matsɛ ɔ nyɛmimɛ ɔmɛ. Enɛ ɔ he ɔ, nimli ɔmɛ a mi nɛ a ma gba, aloo kojomi nɛ a maa kojo mɛ ɔ maa ya nɔ be mi nɛ Yesu nyɛmimɛ nɛ a pɔ mɛ nu ɔ ngɛ zugba a nɔ loloolo ɔ, nɛ e maa ya nɔ loko Jeha Akpe Nɔ Yemi ɔ maa je sisi. A tsɔɔ nya hu kaa jijɔ ɔmɛ maa pee nihi nɛ a he Yesu ye, nɛ a he ye hu kaa Matsɛ Yemi ɔ maa ngɔ si himi kpakpa kɛ ba.

6. Ngɛ jeha 1995 ɔ mi ɔ, mɛni tsakemi wa pee ngɛ bɔ nɛ wa nu nɔ́ hetomi nɔ́ ɔ sisi ha a he?

⁶ Wa susu kaa wa fiɛɛmi ní tsumi ɔ nɔ a da kɛ ngɛ nihi kojoe ngɛ nyagbe be nɛ ɔ mi ɔ nɛ. Wa susu kaa nihi nɛ a kplɛɛɔ wa sɛ gbi ɔ nɔ ɔ ji jijɔhi, nɛ nihi nɛ a kplɛɛ we nɔ ɔ ji apletsihi. Wa hɛɛ susumi nɛ ɔ jehahi babauu. Se ngɛ jeha 1995 ɔ mi ɔ, wa nu nɔ́ hetomi nɔ́  nɛ ɔ sisi ngɛ blɔ kpa nɔ. Hwɔɔmi Mɔ ɔ ngɔ Mateo 24:29-31 ɔ (kane) kɛ to Mateo 25:31, 32 ɔ he (kane), nɛ a tsɔɔ mi kaa Yesu maa kojo nihi ngɛ haomi ngua a mi be mi nɛ nɔmlɔ Bi ɔ “maa ba kaa matsɛ” ɔ. *—Hyɛ sisi ningma.

7. Mɛni ji nɔ́ hetomi nɔ́ ɔ sisi?

⁷ Mwɔnɛ ɔ, wa nu nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ sisi heii. Wa ba ná le kaa “nɔmlɔ Bi ɔ” aloo “Matsɛ ɔ” ji Yesu. Matsɛ ɔ “nyɛmimɛ” ɔmɛ ji nihi nɛ a ngɔ mumi klɔuklɔu ɔ kɛ pɔ mɛ nu nɛ́ a kɛ Yesu maa ye matsɛ ngɛ hiɔwe ɔ. (Roma Bi 8:16, 17) “Jijɔ ɔmɛ” kɛ “apletsi ɔmɛ” daa si kɛ ha nihi nɛ a ngɛ je ma amɛ a mi ɔ. A maa kojo mɛ ke haomi ngua a maa ho nyagbe bami ya. E be kɛe kulaa nɛ haomi ngua nɛ ɔ maa je sisi. Wa ba ná le hu kaa Yesu maa da bɔ nɛ nihi kɛ nihi nɛ a pɔ mɛ nu nɛ a ngɛ zugba nɔ loloolo ɔ hi si ha a nɔ kɛ kojo mɛ. Wa bua jɔ wawɛɛ kaa Yehowa ye bua wɔ bɔɔbɔɔbɔɔ nɛ wa nu nɔ́ hetomi nɔ́ nɛ ɔ, kɛ ekpahi nɛ ngɛ Mateo yi 24 kɛ yi 25 ɔ sisi!

8, 9. Mɛni he je nɛ Yesu tsɛ jijɔ ɔmɛ ke ‘dali’ ɔ?

⁸ Ngɛ nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ mi ɔ, Yesu wui “fiɛɛmi,” aloo “fiɛɛmi ní tsumi” ɔ nɔ ta. Ke jã a, kɛ wa plɛ kɛ le kaa nɔ́ hetomi nɔ́ ɔ tsɔɔ kaa fiɛɛmi ní tsumi ɔ he hia wawɛɛ ha kɛɛ?

⁹ Loko wa ma ná sane bimi nɛ ɔ heto ɔ, kekleekle ɔ, e sa nɛ wa kai kaa Yesu kɛ nɔ́ hetomi nɔ́ ɔ ngɛ nihi ní tsɔɔe. Tsa pi jijɔhi kɛ apletsihi nitsɛnitsɛ a he munyu nɛ e ngɛ tue. Jã nɔuu kɛ̃ nɛ e tsɔɔ we kaa nɔ tsuaa nɔ nɛ a maa kojo lɛ kaa jijɔ ɔ nɛ́ a ha nihi nɛ a pɔ mɛ nu ɔ niye ní, heha nɔ́, e hyɛ a nɔ ke a be he wami, aloo e ya slaa mɛ ke a wo mɛ tsu. Mohu ɔ, Yesu tsɔɔ kaa jijɔ ɔmɛ ji ‘dali,’ ejakaa a buɔ nihi nɛ a pɔ mɛ nu ɔ kaa Yesu nyɛmimɛ, nɛ a yeɔ nihi nɛ a pɔ mɛ nu ɔ anɔkuale ngɛ nyagbe ligbi nɛ ɔmɛ nɛ je mi he wa nɛ ɔ mi.—Mateo 10:40-42; 25:40, 46; 2 Timoteo 3:1-5.

10. Mɛni blɔ nɔ jijɔ ɔmɛ ma nyɛ maa gu kɛ ye bua Kristo nyɛmimɛ ɔmɛ?

¹⁰ Níhi nɛ maa ya nɔ ngɛ nyagbe be ɔ mi ɔ a he munyu Yesu ngɛ tue loko e kɛ nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ tsu ní ɔ nɛ. (Mateo 24:3) Kaa nɔ hyɛmi nɔ́ ɔ, e de ke: “Sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛɛ kɛ kpa je ɔ mi tsuo.” (Mateo 24:14) Lɔ ɔ se ɔ, benɛ e gbe nɔ́ hetomi nɔ́ nɛ kɔɔ sika a he ɔ nya pɛ kɛkɛ nɛ e tu nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ he ɔ he munyu. Yesu kɛ nɔ́ hetomi nɔ́ nɛ ɔ tsu ní konɛ e kɛ tsɔɔ nihi nɛ a pɔ mɛ nu ɔ kaa e sa nɛ a bɔ mɔde nɛ a fiɛɛ. Se a kpɛti nihi bɔɔ pɛ nɛ e piɛ ngɛ zugba a nɔ, nɛ ní tsumi ɔ hu kle! A de nihi nɛ a pɔ  mɛ nu ɔ kaa a fiɛɛ “kɛ kpa je ɔ mi tsuo” loko nyagbe ɔ nɛ ba. Wa kase ngɛ nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ mi kaa “jijɔ ɔmɛ” yeɔ bua Yesu nyɛmimɛ ɔmɛ. Blɔ nɛ hi pe kulaa nɛ wa maa gu nɔ kɛ ye bua Yesu nyɛmimɛ ɔmɛ ji kaa wa ma fĩ a se ngɛ fiɛɛmi ní tsumi ɔ mi. Anɛ ke waa kɛ sika fĩ a se, nɛ waa kɛ wa nya mi munyu wo mɛ he wami ɔ, kɛkɛ e ta lo?

11. Mɛni sane nɛ eko ɔ, ni komɛ ma bi, nɛ mɛni he je?

¹¹ Mwɔnɛ ɔ, Yesu ngɛ kaseli ayɔ kpaanyɔ, nɛ a ti nihi hiɛhiɛɛ piɛɛ we nihi nɛ a pɔ mɛ nu ɔ a he. Yesu kɛ sika ko wui a dɛ. E kɛ sika a wo e nyɛmimɛ nɛ a pɔ mɛ nu ɔ pɛ a dɛ. (Mateo 25:14-18) Enɛ ɔ he ɔ, eko ɔ, ni komɛ ma bi ke, ‘Ke Yesu ha we nimli nɛ ɔmɛ sika ko ɔ, anɛ e he hia kaa a fiɛɛ lo?’ Ee, e he hia kaa a fiɛɛ. Nyɛ ha nɛ waa hyɛ nɔ́ he je nɛ e he hia kaa a fiɛɛ ɔ.

12. Mɛni wa kaseɔ ngɛ munyu nɛ Yesu tu ngɛ Mateo 28:19, 20 ɔ mi?

¹² Yesu fã e kaseli ɔmɛ tsuo kaa a ya fiɛɛ. Benɛ a tle Yesu si se ɔ, e de e kaseli ɔmɛ kaa a ‘pee nihi kaseli’ nɛ a tsɔɔ mɛ “níhi tsuo” nɛ e fã mɛ ke a pee ɔ. Enɛ ɔ he ɔ, e sa nɛ kaseli nɛ ɔmɛ hu nɛ a bu fami nɛ Yesu fã mɛ kaa a fiɛɛ ɔ tue. (Kane Mateo 28:19, 20.) E ngɛ heii kaa e sa kaa wɔ tsuo waa fiɛɛ, wa hɛ nɔ kami ji wa maa ya hiɔwe jio, wa maa hi zugba a nɔ jio.—Bɔfo Ɔmɛ A Ní Tsumi 10:42.

13. Mɛni wa kaseɔ ngɛ nina nɛ a je ngɔ tsɔɔ Yohane ɔ mi?

¹³ Ngɛ Kpojemi womi ɔ mi ɔ, wa kase kaa nihi nɛ a pɔ mɛ nu ɔ, kɛ ni kpahi lɛ a ma tsu fiɛɛmi ní tsumi ɔ. Yesu je nina ko kpo kɛ tsɔɔ bɔfo Yohane. Nina a kɔɔ “ayɛflo” ko nɛ ngɛ nihi nine fɔe konɛ a ba nu wami nyu ɔ he. Ayɛflo nɛ ɔ daa si kɛ ha nihi 144,000 nɛ a pɔ mɛ nu nɛ a maa piɛɛ Yesu he kɛ ye matsɛ ngɛ hiɔwe ɔ. (Kpojemi 14:1, 3; 22:17) Nyu ɔ daa si kɛ ha Yesu kpɔmi afɔle sami ɔ nɛ maa ye bua nihi konɛ a ye a he kɛ je yayami kɛ gbenɔ he ɔ. (Mateo 20:28; Yohane 3:16; 1 Yohane 4:9, 10) Nihi nɛ a pɔ mɛ nu ɔ kɛ kã tsɔɔ nihi kpɔmi nɔ́ ɔ he ní, kɛ bɔ nɛ a ma ná he se ha. (1 Korinto Bi 1:23) Se ngɛ nina a mi ɔ, a tsɔɔ kuu kpa ko nɛ a piɛɛ we nihi nɛ a pɔ mɛ nu ɔ a he, se mɛɛ a ngɛ hɛ nɔ kami kaa a maa hi zugba a nɔ. Mɛ hu a fã mɛ kaa a de nihi ke: “Ba!” A buɔ fami nɛ ɔ tue nɛ a fiɛɛɔ sane kpakpa a kɛ tsɔɔ nihi. Enɛ ɔ he ɔ, nina nɛ ɔ tsɔɔ kaa e sa nɛ nihi tsuo nɛ a kplɛɛɔ sane kpakpa a nɔ ɔ nɛ a fiɛɛ ha ni kpahi hulɔ.

14. Mɛni wa peeɔ kɛ tsɔɔ kaa wa buɔ “Kristo mlaa a” tue?

¹⁴ E sa nɛ nihi tsuo nɛ a buɔ “Kristo mlaa a” tue ɔ nɛ a fiɛɛ. (Galatia Bi 6:2) Yehowa ngɛ blɔ hyɛe kaa nihi tsuo nɛ a jaa lɛ ɔ nɛ a bu mlaa nɛ ɔ nɔuu tue. Blema a, Yehowa hyɛɔ blɔ kaa Israel bi kɛ nibwɔhi tsuo nɛ a ngɛ ma a mi ɔ nɛ a bu e mlaa amɛ tue. (2 Mose 12:49;  3 Mose 24:22) Ngɛ anɔkuale mi ɔ, mwɔnɛ ɔ, e he hia we nɛ waa bu mlaahi tsuo nɛ a wo Israel bi ɔmɛ ɔ tue. Se wa piɛɛ nihi nɛ a pɔ mɛ nu ɔ a he jio, wa piɛɛ we a he jio, e sa nɛ waa bu “Kristo mlaa” amɛ tue. Níhi nɛ a he hia pe kulaa nɛ Yesu tsɔɔ wɔ ɔ a kpɛti kake ji, suɔmi nɛ wa ma ná kɛ ha nihi. (Yohane 13:35; Yakobo 2:8) E sa nɛ waa suɔ Yehowa, nɛ waa suɔ Yesu, nɛ waa suɔ nihi. Blɔ kake nɛ hi pe kulaa nɛ wa maa gu nɔ kɛ tsɔɔ kaa wa suɔ nihi ji, nɛ wa maa fiɛɛ Matsɛ Yemi he sane kpakpa a kɛ tsɔɔ mɛ.—Yohane 15:10; Bɔfo Ɔmɛ A Ní Tsumi 1:8.

15. Mɛni he je nɛ wa ma nyɛ ma de ke Yesu fã e kaseli tsuo kaa a fiɛɛ ɔ?

¹⁵ Be komɛ ɔ, níhi nɛ Yesu deɔ e kaseli bɔɔ ko ɔ, nyɛɔ kɔɔ e kaseli babauu a he. Kaa nɔ hyɛmi nɔ́ ɔ, Yesu kɛ e kaseli 11 pɛ so, nɛ e wo mɛ si kaa a maa piɛɛ e he kɛ ye matsɛ ngɛ e Matsɛ Yemi ɔ mi. Se nimli 144,000 maa piɛɛ e he kɛ ye nɔ. (Luka 22:29, 30; Kpojemi 5:10; 7:4-8) Nɛ benɛ a tle Yesu si ɔ, e kaseli bɔɔ ko pɛ nɛ e fã mɛ kaa a ya nɛ a ya fiɛɛ. (Bɔfo Ɔmɛ A Ní Tsumi 10:40-42; 1 Korinto Bi 15:6) Se Yesu se nyɛɛli tsuo nɛ a hi si ngɛ kaseli ɔmɛ a be ɔ mi ɔ bu jamɛ a fami ɔ tue. (Bɔfo Ɔmɛ A Ní Tsumi 8:4; 1 Petro 1:8) Mwɔnɛ ɔ hu ɔ, e ngɛ mi kaa wa nui Yesu gbi nɛ e ngɛ wɔ dee ke wa ya fiɛɛ mohu lɛɛ, se wɔ hu wa le kaa e sa kaa waa fiɛɛ. Ngɛ anɔkuale mi ɔ, wɔ nihi nɛ wa ngɛ fiɛɛe amlɔ nɛ ɔ, wa yibɔ ji ayɔ kpaanyɔ. Wa le kaa ke wa fiɛɛ kɛ tsɔɔ  nihi ɔ, lɔ ɔ tsɔɔ kaa wa ngɛ hemi kɛ yemi ngɛ Yesu mi.—Yakobo 2:18.

16-18. Mɛni blɔ nɔ wa maa gu konɛ waa je wa tsui mi kɛ ye bua Kristo nyɛmimɛ nɛ a pɔ mɛ nu ɔ, nɛ mɛni he je nɛ e sa nɛ waa pee jã amlɔ nɛ ɔ?

¹⁶ Satan kɛ Kristo nyɛmimɛ nɛ a pɔ mɛ nu nɛ a piɛ ngɛ zugba a nɔ ɔ ngɛ hwue wawɛɛ nitsɛ. E hɛ dɔ, ejakaa e le kaa “be bɔɔ kɛkɛ nɛ piɛ” ha lɛ. (Kpojemi 12:9, 12, 17) Se ngɛ tuami nɛ Satan ngɛ nihi nɛ a pɔ mɛ nu ɔ tuae ɔ tsuo se ɔ, a ya nɔ nɛ a ngɛ fiɛɛmi ní tsumi ɔ hɛ mi nyɛɛe, nɛ nihi babauu ngɛ sane kpakpa a tue bue pe be ko nɛ be ɔ. Atsinyɛ jemi ko be he kaa Yesu kɛ nihi nɛ a pɔ mɛ nu ɔ ngɛ, nɛ e ngɛ mɛ kudɔe.—Mateo 28:20.

¹⁷ Wa na kaa e ji he blɔ nɛ wa ná kaa wa maa fiɛɛ kɛ ye bua Kristo nyɛmimɛ ɔmɛ. Wa yeɔ bua mɛ hu kɛ guɔ sika nɛ wa kɛ fĩɔ fiɛɛmi ní tsumi ɔ se ɔ nɔ. Jã kɛ̃ nɛ wa yeɔ bua mɛ kɛ guɔ Matsɛ Yemi Asahi, Kpe Peemi Asahi, kɛ asafo ɔ ní tsumi kɔnihi a mami nɔ. Ke wa jeɔ wa tsui mi nɛ wa peeɔ tue bumi kɛ haa asafo mi nikɔtɔma amɛ kɛ nyɛmimɛ nyumuhi kpahi nɛ “tsɔlɔ anɔkualetsɛ kɛ ní lelɔ ɔ” hla a, lɔ ɔ tsɔɔ kaa wa suɔ kaa wa maa ye bua Kristo nyɛmimɛ ɔmɛ.—Mateo 24:45-47; Hebri Bi 13:17.

¹⁸ E be kɛe kulaa nɛ nihi nɛ a pɔ mɛ nu, nɛ a piɛ ngɛ zugba a nɔ ɔ ma ná a nyagbe nya sɔumi ɔ. Lɔ ɔ se ɔ, bɔfo ɔmɛ maa ngmɛɛ “kɔɔhiɔ eywiɛ ɔmɛ” a he, nɛ haomi ngua a maa je sisi. (Kpojemi 7:1-3) Loko Harmagedon ma fɛ ɔ, Yesu maa ngɔ nihi nɛ a pɔ mɛ nu ɔ kɛ ho hiɔwe ya. (Mateo 13:41-43) Enɛ ɔ he ɔ, ke wa suɔ kaa a bu wɔ kaa jijɔhi be mi nɛ Yesu maa ba a, lɛɛ amlɔ nɛ ɔ ji be nɛ e sa nɛ waa ye Kristo nyɛmimɛ nɛ a pɔ mɛ nu ɔ anɔkuale.