September 15, 1950 Blɛfo gbi Hwɔɔmi Mɔ ɔ tsɔɔ mi kaa Baiblo mi munyu komɛ daa si kɛ ha nɔ́ ngua ko nɛ maa ba hwɔɔ se. Hwɔɔmi Mɔ ɔ tsɔɔ kaa ni komɛ nɛ Baiblo ɔ tu a he munyu ɔ daa si kɛ ha nɔmlɔ ngua ko nɛ maa ba hwɔɔ se, nɛ jã kɛ̃ nɛ nɔ́ ko, aloo nɔ́ ko nɛ ya nɔ ɔ hu daa si kɛ ha nɔ́ ngua ko nɛ maa ba hwɔɔ se.

Be ko nɛ be ɔ, wa tsɔɔ nya ngɛ wa womi ɔmɛ a mi kaa nyumuhi kɛ yihi anɔkualetsɛmɛ kaa Debora, Elihu, Yefta, Hiob, Rahab, Rebeka, kɛ ni kpa komɛ daa si kɛ ha nihi nɛ a pɔ mɛ nu ɔ, aloo “nimli asafo” ɔ. (Kpojemi 7:9) Kaa nɔ hyɛmi nɔ́ ɔ, wa tsɔɔ nya kaa Yefta, Hiob, kɛ Rebeka daa si kɛ ha nihi nɛ a pɔ mɛ nu ɔ, nɛ Debora kɛ Rahab hu daa si kɛ ha nimli asafo ɔ. Se be saii ji nɛ ɔ, waa kɛ níhi tui níhi a he jã hu. Mɛni he je?

Ngmami ɔ nitsɛ tsɔɔ kaa ni komɛ nɛ a wo a ta ngɛ Baiblo ɔ mi ɔ daa si kɛ ha nɔmlɔ ngua ko, aloo nɔ́ ngua ko nɛ maa ba hwɔɔ se. Kaa nɔ hyɛmi nɔ́ ɔ, ngɛ Galatia Bi 4:21-31 ɔ, bɔfo Paulo tsɔɔ kaa munyu ko nɛ ya nɔ nɛ kɔɔ yi enyɔ komɛ a he ɔ “daa si ngɛ ní pɔtɛɛ komɛ a nane mi.” Kekleekle yo ɔ ji Hagar, nɛ ji Abraham mawayo ɔ. Paulo tsɔɔ mi kaa Hagar daa si kɛ ha Israel ma a, nɛ Yehowa gu Mose Mlaa a nɔ nɛ e kɛ mɛ pee e ma. Yo enyɔne ɔ ji “yo odehe,” nɛ ji Abraham yo Sara. Sara daa si kɛ ha Mawu yo ɔ, nɛ ji Mawu sɔmɔli nɛ a ngɛ hiɔwe ɔ. Paulo tu Melkizedek nɛ e ji osɔfo kɛ matsɛ ɔ hu he munyu, nɛ e tsɔɔ kaa Melkizedek kɛ Yesu je a he ngɛ níhi fuu a mi. (Hebri Bi 6:20; 7:1-3) Jehanɛ hu ɔ, Paulo ngɔ gbalɔ Yesaya kɛ e binyumu ɔmɛ kɛ to Yesu kɛ Kristofohi nɛ a pɔ mɛ nu ɔ a he. (Hebri Bi 2:13, 14) Yehowa mumi ɔ lɛ ye bua Paulo nɛ e ngɔ ní nɛ ɔmɛ kɛ to níhi a he ɔ nɛ, enɛ ɔ he ɔ, wa ngɛ nɔ́ mi mami kaa níhi tsuo nɛ e de ɔ da.

Se ke Baiblo ɔ ngɔ nɔ ko kɛ da si kɛ ha nɔ ko nɛ maa ba hwɔɔ se po ɔ, e sɛ nɛ wa susu kaa nɔ́ tsuaa nɔ́ nɛ ngɛ jamɛatsɛ ɔ he ɔ daa si kɛ ha nɔ́  ngua ko nɛ maa ba hwɔɔ se. Kaa nɔ hyɛmi nɔ́ ɔ, Paulo tsɔɔ kaa Melkizedek daa si kɛ ha Yesu. Se abolo kɛ wai nɛ Melkizedek kɛ ya ha Abraham benɛ e ye matsɛmɛ eywiɛ ɔmɛ a nɔ kunimi ɔ lɛɛ, Paulo wui ta. Enɛ ɔ he ɔ, wa be nɔ́ ko nɛ wa maa da nɔ ngɛ Ngmami ɔ mi kɛ hla nɔ́ tsuaa nɔ́ mi fitsofitso.—1 Mose 14:1, 18.

Ngɛ Kristo gbenɔ se jeha lafa komɛ a se ɔ, womi ngmali komɛ pee ní komɛ nɛ dɛ blɔ kulaa. Ke wa ma de ɔ, a tsɔɔ kaa nɔ́ tsuaa nɔ́ nɛ ngɛ Baiblo ɔ mi ɔ daa si kɛ ha nɔ́ ko nɛ maa ba hwɔɔ se. Womi ko nɛ ji The International Standard Bible Encyclopaedia a tu munyu ko kɛ kɔ tsɔɔmihi nɛ Origen, Ambrose, kɛ Jerome, tsɔɔ ɔ he. E de ke: “A suɔ kaa a maa tsɔɔ kaa nɔ́ tsuaa nɔ́ nɛ ngɛ Ngmami ɔ mi ɔ daa si kɛ ha nɔ́ ko, nɔ́ ɔ he hia jio, e he hia we jio, nɛ a pee jã hulɔ. A susu kaa anɔkuale munyu komɛ hɔ wo ní nyafinyafihi kɛ níhi nɛ nihi peeɔ daa ligbi nɛ a tu he munyu ngɛ Ngmami ɔ mi ɔ se. . . . A tsɔɔ po kaa benɛ Yi Wami Helɔ ɔ te si nɛ e je e he kpo kɛ tsɔɔ e kaseli ɔmɛ ɔ, lo 153 nɛ kaseli ɔmɛ gbe jamɛ a gbɔkuɛ ɔ daa si kɛ ha nɔ́ ko!”

Womi ngmalɔ kpa ko nɛ a tsɛɛ lɛ ke Augustine nɛ e je Hippo ɔ hu tu abolo bɔbɔɛ enuɔ nɛ a kɛ ngma pee, kɛ lo enyɔ nɛ Yesu kɛ lɛ nihi 5,000 ɔ he munyu. E tsɔɔ kaa jamɛ a Baiblo mi munyu ɔ daa si kɛ ha nɔ́ ko. Augustine tsɔɔ kaa abolo enuɔ nɛ a kɛ ngma pee ɔ daa si kɛ ha kekleekle womi enuɔ nɛ ngɛ Baiblo ɔ mi ɔ. Nɛ akɛnɛ nihi susu kaa ngma komɛ hi pe ngma nɛ a kɛ pee jamɛ a abolo ɔ he je ɔ, enɛ ɔ tsɔɔ kaa “Somi He ɔ” hi pe “Somi Momo ɔ.” E tsɔɔ hu kaa lo enyɔ ɔmɛ daa si kɛ ha matsɛ ko kɛ osɔfo ko. Womi mi lelɔ kpa ko hu tsɔɔ kaa bitɛte blɔ nya nɛ Yakob ngɔ flɔɔ tsutsu kɛ he ngɛ Esau dɛ ɔ, daa si kɛ ha hɛ nɔ kami nɛ adesahi ngɛ kaa a maa ya hiɔwe nɛ Yesu ngɔ e muɔ kɛ he ha mɛ ɔ!

Ke o nui nya tsɔɔmi nɛ ɔmɛ a sisi ɔ, lɛɛ e sa nɛ o na kaa nyagba ngɛ he. Adesa ko be nyɛe maa le Baiblo mi munyuhi nɛ a daa si kɛ ha nɔ́ ngua ko nɛ maa ba hwɔɔ se kɛ ní nɛmɛ nɛ dɛ si ha nɔ́ ko. Ke jã a, lɛɛ mɛni lɛ nile ngɛ mi kaa waa pee? Ke Ngmami ɔ tsɔɔ kaa nɔ ko daa si kɛ ha nɔmlɔ ngua ko nɛ maa ba hwɔɔ se, aloo Ngmami ɔ tsɔɔ kaa nɔ́ ko, aloo nɔ́ ko nɛ ya nɔ daa si kɛ ha nɔ́ ngua ko nɛ maa ba hwɔɔ se ɔ, wa kplɛɛɔ nɔ. Se ke Ngmami ɔ de we nɔ́ ko kaa jã a, e sɛ nɛ wa de ke Baiblo mi munyu ko daa si kɛ ha nɔ́ ko.

Lɛɛ kɛ wa ma plɛ kɛ nu ní komɛ nɛ ya nɔ, aloo nɔ hyɛmi ní komɛ nɛ wa kaneɔ ngɛ Baiblo ɔ mi ɔ a sisi ha kɛɛ? Bɔfo Paulo ngma ke: ‘Nɔ́ tsuaa nɔ́ nɛ ngɛ ngmami ɔmɛ a mi ɔ, a ngma konɛ a kɛ tsɔɔ wɔ ní. Kɛkɛ ɔ, ngmami ɔmɛ ma ha wa maa to wa tsui si, nɛ a maa wo wɔ he wami nɛ wa ná hɛ kɛ nɔ fɔmi.’ (Roma Bi 15:4) Paulo ngma womi nɛ ɔ ya ha Kristofohi nɛ a pɔ mɛ nu nɛ a hi si ngɛ kaseli ɔmɛ a be ɔ mi ɔ, e ngɛ mɛ dee kaa a ma nyɛ ma ná Baiblo mi munyuhi a he se. Se kɛ je jamɛ a be ɔ mi ɔ, Kristofohi tsuo nɛ “to kpa” amɛ hu piɛɛ he ɔ ná munyuhi nɛ ngɛ Ngmami ɔ mi ɔ a he se.—Yohane 10:16; 2 Timoteo 3:1.

Se Baiblo mi munyu komɛ ngɛ nɛ e kɔ we nihi nɛ a pɔ mɛ nu ɔ pɛ, aloo “to kpa” amɛ pɛ, aloo Kristo se nyɛɛli komɛ nɛ a hi si ngɛ be pɔtɛɛ ko mi ngɛ yi nɔ sane mi ɔ pɛ a he. Mohu ɔ, Mawu sɔmɔli nɛ a hi si blema a ná Baiblo mi munyuhi fuu a he se, nɛ Mawu sɔmɔli nɛ a ngɛ mwɔnɛ ɔ hu ngɛ he se náe. Kaa nɔ hyɛmi nɔ́ ɔ, e sɛ nɛ wa de ke amanehlu nɛ Hiob na a daa si kɛ ha amanehlu nɛ nihi nɛ a pɔ mɛ nu ɔ na ngɛ Kekleekle Je Mi Ta a mi ɔ pɛ. Mawu we bi fuu, nyumuhi kɛ yihi, nihi nɛ a pɔ mɛ nu, kɛ “to kpa” amɛ tsuo naa amanehlu kaa Hiob, nɛ a kaseɔ nɔ́ ko kɛ jeɔ Hiob sane ɔ mi. A ‘nu bɔ nɛ Hiob to e tsui si ha, nɛ́ nyagbe ɔ, Yehowa ha e ná ní babauu ɔ. Yehowa mi mi jɔ, nɛ e naa mɔbɔ.’—Yakobo 5:11.

Mwɔnɛ ɔ, ngɛ wa we asafo ɔmɛ a mi ɔ, wa ngɛ nyɛmimɛ yihi anɔkualetsɛmɛ nɛ a wa ngɛ jeha mi nɛ a ngɛ kaa Debora, kɛ nihewi nɛ a ji asafo mi nikɔtɔmahi nɛ a ngɛ kaa Elihu. Jehanɛ hu ɔ, wa ngɛ blɔ gbali nɛ a ngɛ kã, nɛ a hɛ mi hu wa kaa Yefta, nɛ jã kɛ̃ wa ngɛ nyumuhi kɛ yihi anɔkualetsɛmɛ nɛ a toɔ a tsui si kaa Hiob. Mwɔnɛ ɔ, wa bua jɔ wawɛɛ kaa Yehowa ha nɛ wa nine su “nɔ́ tsuaa nɔ́ nɛ ngɛ ngmami ɔ mi ɔ” nɔ, konɛ ‘ngmami ɔmɛ nɛ ha waa to wa tsui si, nɛ a wo wɔ he wami, konɛ wa ná hɛ kɛ nɔ fɔmi’!

Enɛ ɔ he ɔ, wa bɔɛ mɔde kaa wa ma hla nɔ́ nɛ Baiblo mi munyu tsuaa munyu daa si kɛ ha, aloo bɔ nɛ Baiblo mi munyu tsuaa munyu maa ba mi ha hwɔɔ se. Mohu ɔ, su kpakpahi nɛ wa ma nyɛ maa kase ngɛ Ngmami ɔ mi ɔ ji nɔ́ titli nɛ a tuɔ he munyu ngɛ wa womi ɔmɛ a mi.