BLEMA munyu nɛ ɔmɛ be Baiblo ɔ mi. A kɛ munyu nɛ ɔmɛ tsu ní jeha lafahi abɔ kɛ tsɔɔ kaa tɔmi ko be he kaa nihi bui yihi. Mwɔnɛ ɔ po ɔ, nihi nɛ a sane he wa a tsɛɔ jami mi munyuhi a se kɛ tsɔɔ kaa tɔmi ko be he kaa nihi yeɔ yihi a nɔ, nɛ a tsɔɔ kaa e sa nɛ a pia yihi ngɛ haomihi nɛ adesahi kɛ ngɛ kpee ɔ a he. Anɛ Mawu suɔmi nya ji kaa nyumuhi nɛ́ a ko bu yihi, nɛ a pee mɛ níhi nɛ sɛ lo? Mɛni ji nɔ́ nɛ Baiblo ɔ de? Ha nɛ waa hyɛ.

Anɛ Mawu gbiɛ yihi lo?

Dɛbi. Mohu ɔ, “blema sinɔ nguaa a nɛ a tsɛɛ lɛ ke Abosiami” ɔ ji nɔ nɛ Mawu “gbiɛ.” (Kpojemi 12:9; 1 Mose 3:14) Benɛ Mawu de ke Adam ‘maa ye e yo ɔ nɔ’ ɔ, Mawu tsɔɔ we kaa e kplɛɛ nɔ kaa nyumu nɛ e ye yo nɔ. (1 Mose 3:16) Mohu ɔ, e ngɛ haomi nɛ maa je yayami nɛ kekleekle nyumu ɔ kɛ e yo ɔ pee ɔ mi kɛ ba a he munyu tue kɛkɛ.

Lɔɔ he ɔ, yayami nɛ ngɛ adesahi a he ɔ heje nɛ nihi peeɔ yihi basabasa a nɛ, se pi Mawu suɔmi nya ji kaa a pee mɛ jã. Baiblo ɔ fi we se kaa a ye yihi a nɔ konɛ a kɛ gbla a tue ngɛ sisije yayami nɛ a pee ɔ he.—Romabi 5:12.

Anɛ Mawu bɔ nyumu nɛ e nɔ kuɔ pe yo lo?

Dɛbi. A de ngɛ 1 Mose 1:27 ɔ ke: “Kɛkɛ nɛ Mawu bɔ nɔmlɔ, nɛ e pee lɛ kaa bɔnɛ lɛ nitsɛ e ngɛ ɔ; e bɔ nyumu kɛ yo.” Enɛ ɔ tsɔɔ kaa kɛ je sisije tɔɔ nɛ Mawu bɔ nyumu kɛ yo konɛ a nyɛ nɛ a je e su ɔmɛ kpo. E ngɛ mi kaa e slo bɔnɛ Adam kɛ Hawa a ti nɔ tsuaa nɔ ngɛ kɛ bɔnɛ a nuɔ níhi a he ha mohu lɛɛ, se a kɛ fami kake ha mɛ tsuo, nɛ a Bɔlɔ ɔ nɛ a ti nɔ ko kaa e nɔ kuɔ pe e nyɛmi.—1 Mose 1:28-31.

Loko Mawu maa bɔ Hawa a, e de ke: ‘Ma ha Adam he piɛɛlɔ nɛ sa lɛ.’ (1 Mose 2:18) Anɛ munyu nɛ ji “he piɛɛlɔ nɛ sa lɛ” ɔ tsɔɔ kaa nyumu ɔ nɔ kuɔ pe yo ɔ lo? Dɛbi, ejakaa a ma nyɛ maa tsɔɔ Hebri munyungu ɔ sisi hu kaa nyumu ɔ “yemi kɛ bualɔ nɛ sa.” Kaa nɔ hyɛmi nɔ́ ɔ, wa ngɛ dɔkita nɛ e gbaa nɔ, kɛ dɔkita nɛ e peeɔ tsopa kɛ haa nɔ loko a gbaa lɛ konɛ e ko ye lɛ. Anɛ a ti nɔ ko ma nyɛ ma tsu ní nɛ e nyɛmi yemi kɛ buami he  be lɛ hiae lo? Dɛbi! E ngɛ mi kaa dɔkita nɛ gbaa nɔ ɔ ji nɔ nɛ gbaa hiɔtsɛ mohu lɛɛ, se anɛ lɔɔ tsɔɔ kaa jamɛ a dɔkita a he hia pe dɔkita nɛ peeɔ tsopa kɛ haa nɔ loko a gbaa lɛ ɔ lo? Dɛbi. Jã nɔuu kɛ̃ nɛ Mawu hu bɔɛ nyumu ɔ kɛ e yo ɔ kaa a kɛ a sibi nɛ si koli, mohu ɔ, e bɔ mɛ kaa a pee kake kɛ ye bua a sibi.—1 Mose 2:24.

Mɛni tsɔɔ kaa Mawu susuɔ yihi a he?

Akɛnɛ Mawu le kaa adesahi ji yayami peeli nɛ nyumuhi ma nyɛ maa pee yihi basabasa heje ɔ, e sɛ hlami wo mlaa nɛ maa po yihi a he piɛ. Benɛ womi ngmalɔ ko nɛ a tsɛɛ lɛ ke Laure Aynard ngɛ Mose Mlaa nɛ a kɛ ha maa pee jeha 1,500 loko a fɔ Yesu ɔ he munyu tue ɔ, e ngma ngɛ e womi nɛ ji La Bible au féminin (Nɔ́ Nɛ Baiblo ɔ De Ngɛ Yihi A He) ɔ mi ke: “Behi fuu ɔ, ke Mlaa somi ɔ wo yihi a ta a, e peeɔ jã konɛ e kɛ fã a he.”

Kaa nɔ hyɛmi nɔ́ ɔ, Mlaa a biɔ nɛ bimɛ nɛ a bu a tsɛmɛ kɛ a nyɛmɛ nɛ́ a wo a hɛ mi nyami. (2 Mose 20:12; 21:15, 17) Mlaa a biɔ hu nɛ a susu yihɔyihi a he wawɛɛ. (2 Mose 21:22) Mwɔnɛ ɔ po ɔ, he bumi nɛ mlaa nɛ ɔmɛ nɛ Mawu wo ɔ kɛ haa a, ngɛ slɔɔto kulaa ngɛ mlaa nya he blɔhi nɛ a ha we yihi ɔ ngɛ mahi fuu a nɔ ɔ he. Se níhi fuu ngɛ Mlaa a mi nɛ tsɔɔ kaa Mawu susuɔ yihi a he.

Nyumuhi kɛ yihi tsuo ná Mlaa nɛ Yehowa Mawu kɛ ha Israel ma a he se. Mlaa a ha nɛ a he tsɔ ngɛ nɔmlɔtso mi, kɛ je mi bami mi, nɛ e ha nɛ huɛ bɔmi kpakpa hu hi a kɛ Yehowa a kpɛti. Benɛ Israelbi ɔmɛ bu Yehowa tue nɛ a ye e Mlaa a nɔ ɔ, Yehowa wo a “nɔ gojoo pe je ma amɛ tsuo.” (5 Mose 28:1, 2) Mɛni he blɔ Mlaa a ha yo? Mo susu níhi nɛ nyɛɛ se nɛ ɔ a he nɛ o hyɛ.

1. He yemi. Blema a, Israel yihi ngɛ he yemi fuu pe yihi nɛ a ngɛ je ma kpa amɛ a mi ɔ. E ngɛ mi kaa a ha huno ɔ he blɔ kaa lɛ ji weku ɔ yi mohu, se ke huno ɔ ngɛ hɛ kɛ nɔ fɔmi ngɛ e yo ɔ mi ɔ, yo ɔ ma nyɛ ma ‘hla zugba nɛ e he,’ nɛ ‘e pee wai ngmɔ.’ Ke yo ɔ le bo lomi ɔ, e ma nyɛ maa hyɛ lɛ nitsɛ e nítsumi nɔ po. (Abɛ 31:11, 16-19) Ngɛ Mose  Mlaa a sisi ɔ, yihi ngɛ he blɔ nɛ a peeɔ níhi ngɛ mɛ nitsɛmɛ a dɛhe.

Ngɛ blema Israel ɔ, yihi hu ngɛ he blɔ nɛ a haa nɛ huɛ bɔmi kpakpa hiɔ a kɛ Mawu a kpɛti. Baiblo ɔ tu Hana he munyu kaa e sɔle nɛ e kɛ lɛ nitsɛ e hiami nɔ́ ko fɔ Mawu hɛ mi, nɛ e wo Mawu si nɛ́ nɔ ko li he nɔ́ ko. (1 Samuel 1:11, 24-28) Yo ko nɛ je Shunem ma a mi ɔ pɔɔ gbalɔ Elisha ngɔ yami ngɛ he jɔɔmi ligbihi a nɔ. (2 Matsɛmɛ 4:22-25) Mawu ha nɛ yi komɛ kaa Debora kɛ Hulda sɔmɔ kaa e nane mi dali. Bua jɔmi sane ji kaa nyumuhi kɛ osɔfohi nɛ a he biɛ suɔ kaa a bi ga womi kɛ je yi nɛ ɔmɛ a ngɔ.—Manyadali 4:4-8; 2 Matsɛmɛ 22:14-16, 20.

2. Ní kasemi. Akɛnɛ yihi hu piɛɛ Mlaa somi ɔ he heje ɔ, ke a ngɛ Mlaa a kanee ɔ, a tsɛɔ mɛ konɛ a ba bu tue, nɛ enɛ ɔ haa mɛ he blɔ nɛ a kaseɔ ní. (5 Mose 31:12; Nehemia 8:2, 8) Mɛ hu a kaseɔ ní nɛ a nyɛɔ nɛ a kɛ a he woɔ jami mi ní peemi komɛ a mi ngɛ magbɛ nɔ. Kaa nɔ hyɛmi nɔ́ ɔ, eko ɔ, yi komɛ “sɔmɔɔ” ngɛ kpe he bo tsu ɔ sinya a nya, nɛ ni komɛ hu piɛɛ lali a kuu ɔ he.—2 Mose 38:8; 1 Kronika 25:5, 6.

Yihi fuu ngɛ nile kɛ ga nɛ a kɛ hyɛɔ nítsumi nɔ nɛ a náa he se. (Abɛ 31:24) Blema a, ngɛ ma komɛ a nɔ ɔ, tsɛmɛ pɛ lɛ a tsɔɔ a bimɛ nyumuhi ní, se Israel binyɛmɛ lɛɛ a tsɔɔ a bimɛ nyumuhi ní kɛ ya siɔ a wami si. (Abɛ 31:1) E ngɛ heii kaa a tsɔɔ yihi nɛ a hi si ngɛ blema Israel ɔ ní.

3. Hɛ mi nyami kɛ bumi. A de ngɛ Kita Nyɔngma a mi ke: “Moo bu o tsɛ kɛ o nyɛ.” (2 Mose 20:12) Matsɛ Salomo ní lelɔ ɔ de ngɛ abɛ nɛ e bu ɔ mi ke: “Ye bi, ke o tsɛ ngɛ mo tsɔsee ɔ, bu tue! Ke o nyɛ hu ngɛ mo ní tsɔɔe ɔ, ko kua!”—Abɛ 1:8.

Mlaa a tsɔɔ bɔnɛ e sa kaa nyumuhi kɛ yihi nɛ a sɛ we gba si himi mi ɔ nɛ a ba a je mi ha, nɛ e tsɔɔ hu kaa nyumuhi nɛ a je bumi kpo kɛ ha yihi. (3 Mose 18:6, 9; 5 Mose 22:25, 26) Huno kpakpa susuɔ e yo ɔ nɔmlɔtso mi he wami kɛ e gbɔjɔmi he.—3 Mose 18:19.

4. He bumi. Yehowa kɛ e he to “awusahi a tsɛ, kɛ yalɔyihi a he bulɔ” he ngɛ e Munyu ɔ mi. Enɛ ɔ tsɔɔ kaa lɛ ji yihi nɛ a tsɛmɛ loo a hunomɛ pui he blɔ nɛ a ngɛ ɔ he piɛ ɔ a He Bulɔ. (La 68:5; 5 Mose 10:17, 18) Enɛ ɔ he ɔ,  be ko nɛ gbalɔ ko nɛ e gbo e yo ya pa sika ngɛ nɔ ko dɛ nɛ nɔ ɔ ngɛ lɛ haoe ɔ, Yehowa kɛ e he wo sane ɔ mi nɛ e pee nyakpɛ nɔ́ ko bɔnɛ pee nɛ yalɔyo ɔ yi nɛ ná wami nɛ́ e hɛ mi nɛ ko pue si.—2 Matsɛmɛ 4:1-7.

Loko Israelbi ɔmɛ ma ya su Si Womi Zugba a nɔ ɔ, wekuyi Zelofehad gbo nɛ e be binyumu ko. Enɛ ɔ he ɔ, Zelofehad biyi enuɔ ɔmɛ bi Mose konɛ e ha mɛ “weto ní” ngɛ Si Womi Zugba a nɔ. Yehowa ha nɛ a ha mɛ níhi fuu po pe bɔnɛ a bi ɔ. Yehowa de Mose ke: “Ha mɛ hu weto ní ɔ eko kaa a tsɛ nyɛmimɛ ɔmɛ; ngɔɔ a tsɛ zugba a kɛ ha mɛ.” Kɛ je jamɛ a be ɔ mi kɛ yaa a, Israel yihi a nine nyɛɔ suu a tsɛmɛ a gbo si níhi a nɔ nɛ mɛ hu a kɛ haa a bimɛ.—4 Mose 27:1-8.

A wo yihi nɛ a ngɛ Mose Mlaa a sisi ɔ hɛ mi nyami nɛ a je bumi kpo kɛ ha he blɔhi nɛ a ngɛ ɔ. Se kɛ je jeha lafa eywiɛ loko a fɔ Yesu kɛ ma a, a kɛ Hela kusumihi nɛ ha we nɛ nihi jeɔ bumi kpo kɛ ha we yihi ɔ bɔni Yuda jami ɔ futumi.—Hyɛ daka nɛ ji, “Blema Ningmahi Nɛ Kɔɔ Bumi Nɛ A Be Kɛ Ha Yihi ɔ He.”

Kaa nɔ hyɛmi nɔ́ ɔ, Hela asilɛte Hesiod (nɛ hi si maa pee jeha 800 loko a fɔ Yesu ɔ) pia yihi kaa mɛ ji nihi nɛ a kɛ haomihi ba adesahi tsuo a nɔ. E tu yihi a he munyu ngɛ e womi nɛ ji Theogony ɔ mi ke, “yihi ji musutsɛmɛ ngɛ nimli a kpɛti.” Susumi nɛ ɔ ba he si ngɛ Yuda jami mi maa pee jeha 200 loko a fɔ Yesu. Womi ko nɛ a tsɛɛ ke Talmud nɛ a bɔni nya buami ngɛ kaseli ɔmɛ a gbenɔ se ɔ kɛ kɔkɔ bɔmi nɛ ɔ ha nyumuhi: “O kɛ yihi nɛ ko sɛɛ ní fuu, ejakaa nyagbenyagbe ɔ, enɛ ɔ ma ha nɛ o he be tsɔe.”

Ngɛ jeha lafahi nɛ be ɔ a mi ɔ, hɛ kɛ nɔ fɔmi nɛ a be ngɛ yihi a mi ɔ ná yihi nɛ a ngɛ Yuda jami mi ɔ a ní peepee nɔ he wami wawɛɛ. Ngɛ Yesu be ɔ mi ɔ, Yihi A Kpo ɔ Nɔ pɛ ji he nɛ a ngmɛɛ yihi blɔ nɛ a yaa ngɛ sɔlemi we ɔ. Nyumuhi pɛ ji nihi nɛ a náa jami mi tsɔsemi, nɛ eko ɔ, yihi ngɛ he nɛ a hiɔ ngɛ kpe he ɔmɛ. Talmud ɔ tsɔɔ kaa Rabi ko de ke: “Nɔ tsuaa nɔ nɛ́ tsɔɔ e biyo Tora [Mlaa a], e ngɛ e biyo ɔ yakayaka ní tsɔɔe.” Akɛnɛ a plɛ bɔnɛ Mawu naa yihi ha a hɛ mi bu si heje ɔ, Yudabi a jami nya dali tsɔɔ nyumuhi babauu kaa a ko bu yihi.

Benɛ Yesu ngɛ zugba a nɔ ɔ, e yɔse kaa nihi daa a kusumi ní peepeehi a nɔ nɛ a bui yihi. (Mateo 15:6, 9; 26:7-11) Anɛ tsɔɔmihi kaa jã a sa bɔnɛ Yesu kɛ yihi hi si ha a he lo? Mɛni wa ma nyɛ maa kase ngɛ su nɛ e je kpo kɛ bɔnɛ e pee e ní ha ngɛ yihi a he ɔ mi? Anɛ anɔkuale jami ha nɛ yihi a he jɔ mɛ lo? Munyu nɛ nyɛɛ se ɔ ma ha sane bimi nɛ ɔmɛ a heto.