Kɛ o susuɔ ngɛ tsakemihi nɛ nihi fuu ngɛ dee kaa e maa ba ngɛ je kɛ wɛ ngɛ December 21, 2012, ngɛ Mayabi a calendar a nya a he ha kɛɛ? Ke o ngɛ nɔ́ nɛ maa ba a gbeye yee ɔ, lɛɛ ke e bɛ ɔ, eko ɔ, o tsui maa nɔ o mi. Ke o suɔ nɛ o na bɔnɛ níhi maa ya nɔ ha ngɛ jamɛ a be ɔ mi nɛ nɔ́ ko bɛ ɔ, e maa dɔ mo. Aloo ke o ngɛ jamɛ a be ɔ mlɛe nɛ e bɛ ɔ, eko ɔ, o kɔni mi maa jɔ. Anɛ December 21, 2012 ɔ hu maa pee be nɛ nihi maa hyɛ blɔ kaa nyagbe ɔ maa ba se e be bae lo?

Nɛ “je nɛ ɔ nyagbe” ɔ nɛ Baiblo ɔ tu he munyu ɔ hu nɛɛ? (Mateo 24:3) Ni komɛ yeɔ gbeye kaa Mawu maa sã zugba a. Ni komɛ hu suɔ nɛ a na bɔnɛ je ɔ nyagbe ɔ maa ba ha. Nihi fuu nɛ a ngɛ blɔ hyɛe kaa nyagbe ɔ maa ba nɛ e bɛ ɔ, a kɔni mi jɔ. Se jã ji bɔnɛ e sa kaa nihi nɛ a pee a ní ngɛ munyuhi nɛ nihi po de ɔ a he lo?

Eko ɔ, ke o kase nɔ́ tutuutu nɛ Baiblo ɔ de kɛ kɔ je nɛ ɔ nyagbe ɔ he ɔ, e maa pee mo nyakpɛ. Baiblo ɔ tsɔɔ wɔ yi mi tomihi a heje nɛ e sa kaa waa hyɛ je nɛ ɔ nyagbe ɔ blɔ ɔ. E tsɔɔ hu kaa nihi a kɔni mi maa wo nyu ke nyagbe ɔ bɛ ngɛ be nɛ a kɛ a hɛ fɔ nɔ kaa e maa ba a. Nihi pɔɔ sanehi nɛ nyɛɛ se nɛ ɔ bimi kɛ kɔ je nɛ ɔ nyagbe ɔ he. Wa suɔ nɛ o susu hetohi nɛ Baiblo ɔ ha a he.

HETO NƐ BAIBLO Ɔ HA: “[Mawu] ngɔ je ɔ ngɔ ma e sisi tomi ɔ nɔ kpɛii, nɛ a be jee ngɛ lejɛ ɔ gblegbleegble.”—LA 104:5.

A kɛ la aloo nɔ́ kpa ko be zugba a hɛ mi kpatae. Mohu ɔ, Baiblo ɔ tsɔɔ kaa zugba nɛ ɔ nɔ ji he nɛ adesahi maa hi kɛ ya neneene. La 37:29 ɔ de ke: “Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.”—La 115:16; Yesaya 45:18.

Benɛ Mawu bɔ zugba a ta a, e hyɛ nɛ e na kaa e “muɔ e hɛ saminya,” nɛ amlɔ nɛ ɔ hu e muɔ e hɛ. (1 Mose 1:31) E tui e yi mi kaa e ma kpata zugba a hɛ mi kɔkɔɔkɔ, mohu ɔ, e wo si ke, e ma ‘kpata nihi nɛ ngɛ zugba a hɛ mi kpatae ɔ a hɛ mi,’ nɛ e maa po zugba a he piɛ nɛ e ko puɛ.—Kpojemi 11:18.

Eko ɔ, o ma susu kaa munyu nɛ a ngma ngɛ 2 Petro 3:7 ɔ tsɔɔ kaa a maa sã zugba a. A ngma ngɛ lejɛ ɔ ke: ‘Se hiɔwe kɛ zugba a nɛ ngɛ amlɔ nɛ ɔ, a kɛ la ma ba kpata a hɛ mi hwɔɔ se.’ Anɛ enɛ ɔ tsɔɔ kaa a maa sã zugba a lo? Ngɛ anɔkuale mi ɔ, be komɛ ngɛ nɛ Baiblo ɔ ngɔɔ “hiɔwe,” “zugba,” kɛ “la” kɛ tsuɔ ni ngɛ okadi peemi mi. Kaa nɔ hyɛmi nɔ́ ɔ, benɛ Yesaya 1:2 ɔ de ke: “Hiɔwe kɛ zugba, nyɛɛ bu nɔ́ nɛ i ngɛ dee ɔ tue” ɔ, zugba a nɛ Yesaya tu he munyu ɔ daa si kɛ ha adesahi.

Munyu nɛ ngɛ 2 Petro 3:7 ɔ tsɔɔ kaa hiɔwe ɔ, zugba a, kɛ la a ji okadi peemi mi níhi. Kuku 5 kɛ 6 ha nɛ wa na kaa bɔnɛ e ba ngɛ Noa be ɔ mi Nyu Afua a mi ɔ, jã kɛ̃ nɛ níhi maa ya nɔ. A kpata jamɛ a je ɔ hɛ mi ngɛ jamɛ a be ɔ mi. Nyu Afua a kpata adesahi nɛ a peeɔ basabasa nɛ ji “zugba” a hɛ mi, se pi zugba a nitsɛ. E kpata “hiɔwe” ɔ, nɛ ji adesa nɔ yeli ɔmɛ a hɛ mi. (1 Mose 6:11) Jã kɛ̃ nɛ 2 Petro 3:7 ɔ gba kɛ fɔ si kaa a ma kpata yayami peeli kɛ a nɔ yemi yaya amɛ a hɛ mi pɛsɛpɛsɛ kaa bɔnɛ ke la sã nɔ́ nɛ e hɛ mi kpataa pɛsɛpɛsɛ ɔ.

HETO NƐ BAIBLO Ɔ HA: “Je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa. Se nɔ nɛ peeɔ Mawu suɔmi nya ní ɔ, lɛɛ e ngɛ kɛ yaa neneene.”—1 YOHANE 2:17.

“Je ɔ” nɛ maa be kɛ ho ɔ ji adesahi nɛ a pee we Mawu suɔmi nya ní ɔ, se pi zugba a. Kaa bɔnɛ dɔkita gbaa hiɔtsɛ nɛ e jeɔ hiɔ ngɛ e mi konɛ e kɛ he e yi wami ɔ, jã nɔuu nɛ Mawu ma “kpata” nimli yayami ɔmɛ tsuo a hɛ mi konɛ dali nɛ a hi zugba a nɔ kɛ bua jɔmi nitsɛnitsɛ. (La 37:9) Ngɛ sisi numi nɛ ɔ nya a, “je nɛ ɔ nyagbe” ɔ nɛ maa ba a ji nɔ́ kpakpa.

Susumi kpakpa kaa kikɛ ɔ ji nɔ́ nɛ Baiblo sisi tsɔɔli komɛ hɛɛ, enɛ ɔ he ɔ, a tsɔɔ je nɛ ɔ nyagbe ɔ sisi ke, “je ɔ blɔ nya tomi ɔ nyagbe,” aloo “yinɔ ɔ nyagbe.” (Mateo 24:3; New International Version) Akɛnɛ a maa baa adesahi kɛ zugba a tsuo yi heje ɔ, anɛ sisi numi be he kaa yinɔ ehe loo blɔ nya tomi ehe maa nyɛɛ se kɛ ba lo? Baiblo ɔ tsɔɔ kaa sisi numi ngɛ he, ejakaa Baiblo ɔ tu “je nɛ maa ba a” aloo blɔ nya tomi nɛ maa ba a he munyu.—Luka 18:30.

Yesu tu hwɔɔ se be nɛ ɔ he munyu kaa e ji “je ehe.” Jamɛ a be ɔ mi ɔ, Mawu ma ha nɛ adesahi ma ná si himi kpakpa ekohu kaa bɔnɛ e to e yi mi kaa a ná a. (Mateo 19:28) Kɛkɛ ɔ, wa ma ná níhi nɛ nyɛɛ se nɛ ɔ a he se:

• Zugba a maa pee paradeiso, nɛ adesahi tsuo maa hi si slɔkee nɛ a ma ná bua jɔmi.—Yesaya 35:1; Mika 4:4.

• Nítsumi kpakpa nɛ haa nɛ nɔ tsui nɔɔ nɔ mi.—Yesaya 65:21-23.

• A ma tsa hiɔhi tsuo.—Yesaya 33:24.

• Nɔ ko be bwɔe hu.—Hiob 33:25.

• A ma tle ni gbogboehi a si.—Yohane 5:28, 29.

Ke wa peeɔ “Mawu suɔmi nya ní” ɔ, e he hia we nɛ waa ye je ɔ nyagbe ɔ gbeye. Mohu ɔ, wa ma nyɛ maa hyɛ jamɛ a be ɔ blɔ.

HETO NƐ BAIBLO Ɔ HA: “Ke nyɛ na ní nɛ ɔmɛ ɔ, nyɛ maa le kaa Mawu matsɛ yemi ɔ su ta.”—LUKA 21:31.

Ní lelɔ kpanaa ko nɛ a tsɛɛ lɛ ke Richard Kyle ɔ ngma ngɛ womi nɛ ji The Last Days Are Here Again ɔ mi kaa “ke tsakemi loo basabasa peemi ko ba je ɔ mi tlukaa a, nihi tsɔɔ bɔnɛ nyagbe ɔ ma plɛ kɛ ba ha, kɛ be nɛ e maa ba.” A deɔ enɛ ɔ, titli ɔ, ke a nui tsakemi loo basabasa peemi nɛ ba a sisi.

Se Baiblo gbali nɛ a tu nyagbe ɔ he munyu ɔ tsɔɔ níhi nɛ maa ba hwɔɔ se, se pi níhi nɛ ngɛ nɔ yae ngɛ a be ɔ mi nɛ a nui sisi ɔ nya nɛ a tsɔɔ. Mawu gu e mumi ɔ nɔ nɛ e ha nɛ a tsɔɔ wɔ níhi nɛ ma ha nɛ waa na kaa e be kɛe nɛ nyagbe ɔ maa ba. Gbami nɛ ɔmɛ ekomɛ nɛ a nyɛɛ se nɛ ɔ nɛ. Mo nitsɛ mo susu a he nɛ o hyɛ kaa a ngɛ mi bae ngɛ wa be nɛ ɔ mi lo.

•   Tahi, hwɔ, zugba mimiɛmi, kɛ gbenɔ hiɔ nɛ sãa nɔ.—Mateo 24:7; Luka 21:11.

• Yayami maa pɔhe.—Mateo 24:12.

• Adesahi ma puɛ zugba a.—Kpojemi 11:18.

• Nihi ma fo mɛ pɛ a nɔ́ mi, a maa pee a he sika suɔli, a maa suɔ fiɛmi pe bɔnɛ a suɔ Mawu.—2 Timoteo 3:2, 4.

• Wekuhi ma puɛ.—2 Timoteo 3:2, 3.

• Nihi ma ma a hɛ kɛ fɔ okadihi nɛ tsɔɔ kaa nyagbe ɔ su si ta a nɔ.—Mateo 24:37-39.

• A maa fiɛɛ Mawu Matsɛ Yemi ɔ he sane kpakpa a ngɛ je kɛ wɛ.—Mateo 24:14.

Kaa bɔnɛ Yesu de ɔ, ke wa na “ní nɛ ɔmɛ tsuo ɔ,” e sa nɛ wa ná nɛ waa le kaa je ɔ nyagbe ɔ su si ta. (Mateo 24:33) Yehowa Odasefoli he ye kaa níhi nɛ ngɛ nɔ yae ɔ tsɔɔ kaa nyagbe ɔ su si ta, enɛ ɔ he ɔ, a fiɛɛɔ a hemi kɛ yemi ɔ kɛ tsɔɔ nihi ngɛ mahi 236 nɔ.

HETO NƐ BAIBLO Ɔ HA: “Be mi nɛ nihi ma de ke, ‘Wa he mi jɔ wɔ, nɛ wa tue mi hu jɔ wɔ’ ɔ, jamɛ a be ɔ mi nɔuu nɛ a hɛ mi ma kpata tlukaa kaa bɔnɛ yo nɛ mi wa nuɔ kɔɔmi si kake too ɔ; nɛ nɔ ko nɔ ko be e he yee.”—1 TESALONIKABI 5:3.

Baiblo ɔ ngɔ je ɔ hɛ mi kpatami ɔ kɛ to kɔɔmi he. Yohɔyo nuɔ kɔɔmi tlukaa be mi nɛ e hɛ be e he nɔ. Kaa bɔnɛ ke yo nu kɔɔmi nɛ kɔɔmi ɔ mi waa kɛ ya siɔ be nɛ e fɔɔ ɔ, jã nɔuu kɛ̃ nɛ okadihi nɛ maa sɛ nyagbe ɔ hlami ɔ hu maa hi. Eko ɔ, dɔkita a maa tsɔɔ yohɔyo ɔ be nɛ e ma fɔ; se ke yohɔyo ɔ fɔ we ngɛ be nɛ a tsɔɔ lɛ ɔ nɔ po ɔ, e le kaa bɔ tsuaa bɔ nɛ ji ɔ, e be kɛe nɛ e ma fɔ. Jã kɛ̃ nɛ ke waa kɛ wa hɛ fɔ be pɔtɛɛ ko nɔ kaa nyagbe ɔ maa ba se e bɛ ɔ, lɔɔ tsɔɔ we kaa pi “nyagbe ligbi ɔmɛ” a he okadihi nɛ wa ngɛ nae nɛ ɔ.—2 Timoteo 3:1.

Eko ɔ, o ma bi ke, ‘Ke okadi ɔ tsɔɔ heii kaa e be kɛe kulaa nɛ nyagbe ɔ maa ba a, lɛɛ mɛni heje nɛ nihi fuu ma a hɛ fɔ nɔ mɔ?’ Baiblo ɔ tsɔɔ kaa ke nyagbe ɔ su si ta a, nihi fuu ma ma a hɛ kɛ fɔ nɔ. Ngɛ be mi nɛ e sa kaa a kplɛɛ tsakemihi nɛ ngɛ nɔ yae ngɛ nyagbe ligbi ɔmɛ a mi ɔ nɔ ɔ, a maa ye nihi nɛ a he ye kaa nyagbe ɔ su si ta a, a he fɛu nɛ a ma de ke:  “Kɛ je benɛ wa nɛmɛ ɔmɛ gbo nɛ ɔ, bɔnɛ níhi ngɛ kɛ je benɛ a bɔ je ɔ, jã nɔuu nɛ a ngɛ nɛ ɔ nɛ.” (2 Petro 3:3, 4) Ngɛ blɔ ko nɔ ɔ, nyagbe ligbi ɔmɛ a he okadi ɔ maa pee heii mohu lɛɛ, se nihi fuu ma ma a hɛ ngɔ fɔ nɔ.—Mateo 24:38, 39.

Wa ma susu odase yemi komɛ nɛ ngɛ Ngmami ɔ mi nɛ tsɔɔ kaa nyagbe ɔ su si ta a, a he ngɛ munyu nɛ ɔ mi. * Anɛ o maa suɔ nɛ o le babauu lo? Ke jã a, lɛɛ mɛni heje mɔ nɛ o hla we Yehowa Odasefoli a se blɔ konɛ a kɛ mo nɛ kase Baiblo ɔ yaka gu ɔ? A kɛ mo ma nyɛ ma ba kase ní ngɛ o we mi, aloo ngɛ he saisaa nɛ maa hi ha mo, aloo ngɛ tɛlifoo nɔ po. Nɔ́ nɛ he hia pɛ ji deka nɛ o ma ná. Ke o kase Baiblo ɔ, o ma ná he se wawɛɛ.