1, 2. (a) Mɛni Hebri munyu nɛ a tsɔɔ sisi ke “hɛ mi nyami” ɔ tsɔɔ? (b) Mɛni sane bihi a he nɛ wa ma susu ngɛ munyu nɛ wa ma kasemi nɛ ɔ mi?

KE O nu munyu nɛ ji “hɛ mi nyami” ɔ, mɛni baa o juɛmi mi? Anɛ o juɛmi yaa Mawu adebɔ níhi nɛ a ngɛ fɛu ɔ nɔ lo? (La 19:1) Aloo o juɛmi yaa hɛ mi nyami nɛ a kɛ haa niatsɛmɛ, ní leli, kɛ nihi nɛ a ye manye ngɛ si himi mi ɔ nɔ? Ngɛ Ngmami ɔ mi ɔ, Hebri munyu nɛ a tsɔɔ sisi ke “hɛ mi nyami” ɔ tsɔɔ nɔ́ ko nɛ e mi jiɔ. Blema a, a kɛ dade kpakpahi nɛ peeɔ sika, enɛ ɔ he ɔ, sika mi jiɔmi lɛ tsɔɔ e jua. Enɛ ɔ heje ɔ, munyu nɛ a tsɔɔ sisi ke hɛ mi nyami ɔ ma nyɛ maa tsɔɔ nɔ́ ko nɛ e he jua wa aloo nɔ́ ko nɛ e mi jiɔ.

² Adesahi daa blɔ nya nɛ nɔ ko ngɛ, he blɔ nɛ e ná, loo biɛ nɛ nɔ ɔ he ɔ nɔ kɛ woɔ e hɛ mi nyami. Se mɛni nɔ nɛ Mawu lɛɛ e daa kɛ woɔ nihi a hɛ mi nyami? Abɛ 22:4 de ke: ‘Nɔ nɛ baa e he si, nɛ e yeɔ Yehowa gbeye ɔ, e náa ní, e hɛ mi baa nyami.’ Kaselɔ Yakobo hu ngma ke: “Nyɛɛ ba nyɛ he si ngɛ Nyɔmtsɛ ɔ hɛ mi, nɛ e ma wo nyɛ nɔ.” (Yak. 4:10) Mɛni blɔ nɔ Yehowa woɔ wa hɛ mi nyami ngɛ? Mɛni ma nyɛ ma ha nɛ Mawu be wa hɛ mi nyami woe? Mɛni wa maa pee kɛ ye bua nihi konɛ Mawu nɛ wo a hɛ mi nyami?

3-5. Mɛni blɔ nɔ Yehowa woɔ wa hɛ mi nyami ngɛ?

³ La polɔ ɔ he ye kaa Yehowa maa pɛtɛ e hiɔ nine he nɛ e maa wo e hɛ mi nyami nitsɛnitsɛ. (Kane La 73:23, 24.) Mɛni blɔ nɔ Yehowa guɔ kɛ peeɔ jã? Yehowa woɔ e sɔmɔli nɛ a baa a he si ɔ a hɛ mi nyami ngɛ blɔhi fuu a nɔ. E haa nɛ a leɔ níhi nɛ e suɔ. (1 Kor. 2:7) E woɔ nihi nɛ buɔ lɛ tue ɔ a hɛ mi nyami nɛ e haa nɛ huɛ bɔmi gbagbanii hiɔ e kɛ mɛ a kpɛti.—Yak. 4:8.

⁴ Jehanɛ se hu ɔ, Yehowa wo e sɔmɔli a hɛ mi nyami kɛ gu fiɛɛmi nítsumi ɔ nɛ e kɛ wo a dɛ ɔ nɔ. (2 Kor. 4:1, 7) Fiɛɛmi nítsumi nɛ ɔ haa nɛ wa hɛ mi baa nyami.  Yehowa wo nihi nɛ a guɔ fiɛɛmi nítsumi ɔ nɔ kɛ jeɔ e yi nɛ ni kpahi hu náa he se ɔ si ke: “Nihi nɛ woɔ ye hɛ mi nyami ɔ, ma wo a hɛ mi nyami.” (1 Sam. 2:30) Yehowa woɔ e sɔmɔli a hɛ mi nyami nɛ e haa mɛ biɛ kpakpa. Nihi nɛ ngɛ asafo ɔ mi ɔ hu tuɔ a he munyu kpakpa.—Abɛ 11:16; 22:1.

⁵ Mɛni nɛ ‘nihi nɛ a ngɔɔ a hɛ kɛ fɔɔ Yehowa nɔ’ ɔ ma ná hwɔɔ se? Yehowa wo mɛ si ke: “Ma ha nɛ o nine maa su zugba a nɔ. Ke a ngɛ yayami peeli a hɛ mi kpatae ɔ, o hɛngmɛ kɛkɛ o kɛ maa hyɛ mɛ.” (La 37:34) Mawu sɔmɔli ngɛ hɛ kɛ nɔ fɔmi kaa Mawu maa wo a hɛ mi nyami nɛ a maa hi si kɛ ya neneene.—La 37:29.

6, 7. Mɛni heje nɛ nihi babauu he we yi kaa Yesu ji Mesia a?

⁶ Anɛ nɔ́ ko ngɛ nɛ ma nyɛ ma ha nɛ Yehowa be wa hɛ mi nyami woe lo? Ee. Ke wa buɔ nihi nɛ a ja we Yehowa a a munyu tue ɔ, Yehowa be wa hɛ mi nyami woe. Mo susu nɔ́ nɛ bɔfo Yohane ngma ngɛ nɔ yeli komɛ nɛ a hi si ngɛ Yesu be ɔ mi ɔ a he nɛ o hyɛ. E ngma ke: “Ma nimeli ɔmɛ a ti nihi babauu he Yesu ye, se Farisibi ɔmɛ a he ɔ, a nyɛ we nɛ a ye odase pãa, bɔnɛ pee nɛ a ko fie mɛ ngɛ kpe he ɔ. A suɔ kaa a sa nimli a hɛ mi pe nɛ a maa pee nɔ́ nɛ sa Mawu hɛ mi.” (Yoh. 12:42, 43) Jinɛ e sɛ kaa nɔ yeli nɛ ɔmɛ kɛ a juɛmi nɛ ma a hɛ mi nyami nɛ Farisibi ɔmɛ maa wo ɔ nɔ.

⁷ Ngɛ Yesu sɔmɔmi nítsumi ɔ sisije ɔ, e tsɔɔ nɔ́ heje nɛ nihi he we lɛ yi ɔ. (Kane Yohane 5:39-44.) Israelbi ɔmɛ hyɛ Mesia a blɔ jeha lafahi abɔ. Benɛ Yesu bɔni nihi ní tsɔɔmi ɔ, eko ɔ, Daniel gbami ɔ ha nɛ ni komɛ yɔse kaa Kristo ɔ bami be ɔ su. Ngɛ nyɔhiɔ komɛ nɛ sɛ hlami ɔ mi ɔ, nihi fuu susu kaa Yohane Baptisilɔ ɔ ji Mesia a nɛ. A bi ke: “Lɛ ji Kristo ɔ” lo? (Luka 3:15) Amlɔ nɛ ɔ, Mesia nɛ a hyɛ lɛ blɔ hluu ɔ ngɛ a kpɛti. Se nihi nɛ a le Mlaa a saminya a he we yi kaa lɛ ji Mesia a. Yesu tsɔɔ nɔ́ heje nɛ a pee a níhi jã a. Yesu bi mɛ ke: “Nyɛ nɛ nyɛ hlaa nɛ nihi nɛ je nyɛ yi, se nyɛ bɔɛ mɔde, konɛ nɔ nɛ lɛ nɔ kake pɛ ji Mawu ɔ nɛ wo nyɛ hɛ mi nyami ɔ, kɛ maa pee kɛɛ nɛ nyɛ ma he mi maa ye mɔ?”

8, 9. Mɛni heje nɛ ke wa suɔ nɛ adesahi nɛ a wo wa hɛ mi nyami ɔ, e maa pee wɔ kaa e he hia we nɛ Yehowa nɛ wo wa hɛ mi nyami ɔ? Mo ha enɛ ɔ he nɔ hyɛmi nɔ́.

⁸ Bɔnɛ pee nɛ waa na kaa ke wa suɔ nɛ adesahi nɛ a wo wa hɛ mi nyami ɔ, Mawu be wa hɛ mi nyami woe ɔ, nyɛ ha nɛ waa kɛ hɛ mi nyami nɛ to kane he nɛ waa hyɛ. Kanehi sɔuu ji hiɔwe. Anɛ o kai be ko nɛ o hyɛ hiɔwe gbɔkuɛ benɛ je mi tsɔ, nɛ o na dodoehi akpehi abɔ ɔ lo? ‘Dodoehi a hɛ mi ngɛ nyami nɛ a ngɛ fɛu.’ (1 Kor. 15:40, 41) Se ke o ngɛ he ko nɛ kanehi fuu ngɛ lejɛ ɔ, o nɛ dodoehi saminya. Nɔ́ heje ji kaa kanehi nɛ ngɛ he nɛ o ngɛ ɔ ha we nɛ dodoe ɔmɛ nɛ kpɛ saminya ha mo! Anɛ enɛ ɔ tsɔɔ kaa kane ɔmɛ a la a nya wa, nɛ a ngɛ fɛu pe dodoe ɔmɛ a la a lo? Dɛbi! Nɔ́ heje nɛ o nɛ dodoe ɔmɛ kpakpa ko ɔ ji, kanehi nɛ a ngɛ he nɛ o ngɛ ɔ su o he haa, enɛ ɔ he nɛ o nyɛ we nɛ o na dodoe ɔmɛ a la a kpakpa ko ɔ nɛ. Ke wa ngɛ hlae nɛ waa na bɔnɛ dodoe ɔmɛ kpɛɔ ha nyɔ mi ɔ, e sa nɛ waa ya he ko nɛ kane be.

⁹ Jã nɔuu kɛ̃ nɛ ke wa suɔ nɛ adesahi nɛ a wo wa hɛ mi nyami ɔ, lɔɔ ma ha nɛ e maa pee wɔ kaa e he hia we nɛ Yehowa nɛ wo wa hɛ mi nyami. Nihi babauu bui Matsɛ Yemi sɛ gbi ɔ tue, ejakaa a ngɛ níhi nɛ a huɛmɛ loo a wekuli ma de ngɛ a he ɔ gbeye yee. Mawu sɔmɔli komɛ po ma nyɛ maa ye gbeye ngɛ nɔ́ nɛ ni kpahi ma susu ngɛ a he ɔ he? Ngɔɔ lɛ kaa a  ha niheyo ko zugba kpɔ ko kaa e fiɛɛ ngɛ mi. Nihi nɛ a ngɛ lejɛ ɔ le lɛ wawɛɛ, se a li lɛ kaa e ji Yehowa Odasefono. Anɛ e maa ye gbeye kaa e ma ya fiɛɛ ngɛ lejɛ ɔ lo? Nɛ ke a yeɔ nɔ ko he fɛu ngɛ Mawu jami mi otihi nɛ e kɛ ma e hɛ mi ɔ he hu nɛɛ? Anɛ jamɛatsɛ ɔ ma ha nɛ nihi nɛ a hɛ dɔɛ ngɛ Mawu jami mi níhi a he ɔ nɛ a tsake e juɛmi lo? Aloo eko ɔ, Kristofono ko pee yayami ko nɛ hɛdɔ ngɛ he. Anɛ e maa laa e tɔmi ɔ nɔ akɛnɛ e ngɛ gbeye yee kaa he blɔ nɛ e ngɛ ngɛ asafo ɔ mi ɔ maa je e dɛ, aloo akɛnɛ lɔɔ ma ha nɛ zo maa gbe lɛ ngɛ nihi nɛ a suɔ lɛ ɔ a hɛ mi ɔ heje lo? Ke nɔ ko tɔ̃ nɛ e suɔ nɛ e dla huɛ bɔmi nɛ ngɛ e kɛ Yehowa a kpɛti ɔ, e sa nɛ e “tsɛ asafo ɔ mi nikɔtɔma amɛ” konɛ a ye bua lɛ.—Kane  Yakobo 5:14-16.

10. (a) Ke wa peeɔ yeyeeye tsɔ ngɛ níhi nɛ nihi ma susu ngɛ wa he ɔ a he ɔ, mɛni maa ba? (b) Mɛni e sa nɛ wa kai ngɛ he si bami he?

¹⁰ Eko ɔ, wa ma susu kaa wa ngɛ wa hɛ mi yae ngɛ Mawu jami mi, se nyɛmi ko pɔɔ wɔ ga womi. Ke wa baa wa he si ɔ, wa maa bu e ga womi ɔ tue nɛ wa ma ná he se, se ke wa woɔ wa he nɔ lɛɛ wa be e ga womi ɔ tue bue. Aloo ngɔɔ lɛ kaa o kɛ o nyɛmi Odasefono ko bla kɛ ngɛ nítsumi ko tsue. Anɛ o maa suɔ nɛ nihi nɛ a je o yi ngɛ nítsumi kpakpa nɛ nyɛ bla kɛ tsu ɔ he lo? Ke o ya je si fɔfɔɛ nɛ ɔmɛ eko mi ɔ, mo kai kaa “nɔ nɛ baa e he si ɔ, a maa wo e hɛ mi nyami.”—Abɛ 29:23.

11. Ke nihi je wa yi ɔ, kɛ e sa kaa waa pee wa ní ngɛ he ha kɛɛ, nɛ mɛni heje?

¹¹ E sa nɛ asafo mi nikɔtɔmahi kɛ nihi nɛ a ngɛ mɔde bɔe konɛ a kɛ sɔmɔmi he blɔhi nɛ wo a dɛ ɔ nɛ a hyɛ saminya nɛ a ko hla adesahi a hɛ mi nyami. (1 Tim. 3:1; 1 Tes. 2:6) Ke nyɛminyumu ko tsu nɔ́ ko he ní saminya nɛ a je e yi ɔ, kɛ e sa kaa e pee e ní ha kɛɛ? Eko ɔ, e be manye yemi kaimi nɔ́ ko mae kɛ ha lɛ nitsɛ e he kaa bɔnɛ Matsɛ Saul pee ɔ. (1 Sam. 15:12) Se anɛ e yɔse kaa Yehowa dloomi nya nɛ e nyɛ tsu nítsumi nɛ a kɛ wo e dɛ ɔ he ní ɔ lo? Anɛ e yɔse hu kaa loko e ma nyɛ ma tsu nítsumi ko nɛ a kɛ maa wo e dɛ hwɔɔ se ɔ he ní saminya a, ja Mawu jɔɔ lɛ nɛ e ye bua lɛ lo? (1 Pet. 4:11) Bɔnɛ wa peeɔ wa ní ha ngɛ yi je mi he ɔ, ma nyɛ maa tsɔɔ nɔ nɛ wa suɔ kaa e wo wa hɛ mi nyami.—Abɛ 27:21.

12. Mɛni ha nɛ Yudabi komɛ bui Yesu tue ɔ?

¹² Akɔnɔ yayahi hu ji nɔ́ kpa ko nɛ ma ha nɛ Mawu be wa hɛ mi nyami woe. Akɔnɔ yayahi ma nyɛ ma ha nɛ wa be anɔkuale ɔ tue bue kulaa. (Kane Yohane 8:43-47.) Yesu de Yudabi komɛ ke, nɔ́ heje nɛ a bui e munyu ɔ tue ji kaa a ‘suɔ nɛ a pee a tsɛ nɛ ji Abosiami ɔ suɔmi nya ní.’

13, 14. (a) Mɛni níhi a mi hlali de ngɛ bɔnɛ wa buɔ munyu tue ha a he? (b) Mɛni nɔ wa daa kɛ leɔ nɔ nɛ e sa kaa waa bu lɛ tue?

¹³ Níhi nɛ peeɔ wɔ akɔnɔ ɔ haa nɛ wa tsiɔ wa tue ngɛ ní komɛ a he. (2 Pet. 3:5) Yehowa bɔ wɔ bɔnɛ wa ma nyɛ maa tsi wa tue ngɛ níhi nɛ wa sume ɔ a he. Amlɔ nɛ ɔ, moo pee dii nɛ o hyɛ níhi a pɛmi abɔ nɛ o maa nu. Eko ɔ, o nu níhi a pɛmi komɛ a he nɛ kekle ɔ, o nui. Mɛni heje? E ngɛ mi kaa wa tue ma nyɛ maa nu níhi a pɛmi slɔɔtoslɔɔtohi mohu lɛɛ, se wa juɛmi ma nyɛ maa hi nɔ́ kake pɛ nɔ. Níhi a mi hlali tsɔɔ kaa ke nihi ngɛ munyu tue nɛ wa ngɛ mɛ tue bue ɔ, e yee kaa wa maa nu nihi fuu a munyu si kake. Enɛ ɔ tsɔɔ kaa ke nihi enyɔ kɛ mo ngɛ munyu tue ngɛ be kake mi ɔ, nɔ kake tue pɛ nɛ o ma nyɛ maa bu. Mo nitsɛ nɛ o maa hla nɔ nɛ o suɔ kaa o maa bu lɛ tue. Yudabi ɔmɛ nɛ a suɔ kaa a maa  pee a tsɛ nɛ ji Abosiami ɔ suɔmi nya ní ɔ, bui Yesu tue.

¹⁴ ‘Ní leli’ kɛ ‘kuasiahi’ tsuo ngɛ hlae nɛ waa bu mɛ tue. (Abɛ 9:1-5, 13-17) Enɛ ɔ he ɔ, e sa nɛ waa hla a kpɛti ni nɛmɛ nɛ wa maa bu mɛ tue. Mɛnɔ tue wa maa bu? Heto ɔ daa si ngɛ nɔ nɛ suɔmi nya ní nɛ wa suɔ kaa waa pee ɔ nɔ. Yesu to ɔmɛ nuɔ e gbi nɛ a nyɛɛɔ e se. (Yoh. 10:16, 27) A “le anɔkuale ɔ.” (Yoh. 18:37) “A li nɔ kpa gbi.” (Yoh. 10:5) Mawu woɔ he si bali nɛ ɔmɛ a hɛ mi nyami.—Abɛ 3:13, 16; 8:1, 18.

15. Ngɛ mɛni blɔ nɔ nɛ Paulo nɔ́ nami ɔ ha nɛ Efesobi ɔmɛ a ‘hɛ mi ba nyami’?

¹⁵ Ke wa fi si nɛ wa pee Yehowa suɔmi nya ní ɔ, wa maa ye bua ni kpahi konɛ Mawu nɛ wo a hɛ mi nyami. Paulo ngma ya ha asafo nɛ ngɛ Efeso ɔ ke: “I kpa nyɛ pɛɛ, nyɛ ko ye nyɛ tsui kaa i ngɛ nɔ́ nae ngɛ nyɛ he. I ngɛ nɔ́ nae konɛ nyɛɛ lɛɛ nyɛ hɛ mi nɛ ba nyami.” (Efe. 3:13) Ngɛ mɛni blɔ nɔ nɛ Paulo nɔ́ nami ɔ ha nɛ Efesobi ɔmɛ a ‘hɛ mi ba nyami’ ɔ? Paulo tsui si nɛ e to nɛ e ya nɔ sɔmɔ Efesobi ɔmɛ ngɛ haomihi nɛ e kɛ kpe ɔ tsuo se ɔ, ha nɛ Efesobi ɔmɛ na kaa akɛnɛ a ji Kristofoli ɔ, e he hia wawɛɛ nɛ a sɔmɔ Mawu. Kaa Paulo kɔni mi jɔ ngɛ haomihi nɛ e kɛ kpe ɔ a he ɔ, anɛ Efesobi ɔmɛ ko na kaa huɛ bɔmi nɛ ngɛ a kɛ Yehowa a kpɛti, sɔmɔmi nítsumi nɛ a ngɛ tsue, kɛ hɛ kɛ nɔ fɔmi nɛ a ngɛ ɔ he hia lo? Paulo tsui si nɛ e to ɔ ha nɛ nyɛmimɛ ɔmɛ na kaa ke a suɔ nɛ a pee Kristo kaseli ɔ, lɛɛ e sa nɛ a kɛ níhi nɛ sã afɔle.

16. Mɛni haomi Paulo kɛ kpe ngɛ Listra ma a mi?

¹⁶ Paulo pee kã nɛ e to e tsui si. Mo susu bɔnɛ enɛ ɔ sa nyɛmimɛ ɔmɛ a he ha a he nɛ o hyɛ. Bɔfo Ɔmɛ A Nítsumi 14:19, 20 ɔ bɔ amaniɛ ke: “Yudabi komɛ je Antiokia ngɛ Pisidia, kɛ Ikoniom kɛ ba lejɛ ɔ ba wo ni ɔmɛ a yi mi, nɛ a fia Paulo tɛ; a sã lɛ si kɛ je [Listra] ma a mi, nɛ a susu kaa e gbo. Se benɛ nihi nɛ he Nyɔmtsɛ ɔ ye ɔ ba bɔle lɛ kɛ kpe ɔ, e te si, nɛ e ho ma a mi ya. E nɔ jena a, e kɛ Barnaba pue nɔ kɛ ho Derbe ya.” Mo susu he nɛ o hyɛ! A fiaa Paulo tɛ nɛ e piɛ nguɛnya nɛ e gbo. E nɔ jena a, e kpale nyɛɛ si tomi 60 kɛ ho Derbe ya.

17, 18. (a) Kɛ Timoteo plɛ kɛ le haomi nɛ Paulo kɛ kpe ngɛ Listra a ha kɛɛ? (b) Mɛni blɔ nɔ nɛ Paulo tsui si tomi ɔ ye bua Timoteo ngɛ?

¹⁷ Anɛ Timoteo hu piɛɛ “nihi nɛ he Nyɔmtsɛ ɔ ye” nɛ a ba ye bua Paulo ɔ he lo? Baiblo ɔ mi womi nɛ ji Bɔfo Ɔmɛ A Nítsumi ɔ mɛ nɔ mi jã, se eko ɔ, e piɛɛ a he. Mo susu nɔ́ nɛ Paulo ngma ngɛ sɛ womi enyɔne nɛ e ngma ya ha Timoteo ɔ  mi ɔ he nɛ o hyɛ. E ngma ke: ‘Moo lɛɛ, ní nɛ i tsɔɔ, bɔnɛ i baa ye je mi ha a, o le. O le níhi nɛ ba ye nɔ ngɛ Antiokia [a fiee lɛ kɛ je ma a mi], Ikonium [a ka lɛ tɛ fiaami], kɛ Listra [a fiaa lɛ tɛ]; o le bɔnɛ a tua mi wawɛɛ ngɛ lejɛ ɔmɛ; se Nyɔmtsɛ ɔ je mi kɛ je ní ɔmɛ tsuo a mi.’—2 Tim. 3:10, 11; Níts. 13:50; 14:5, 19.

¹⁸ Timoteo “le” haomi nɛ ɔmɛ nɛ Paulo kɛ kpe ɔ, nɛ e na bɔnɛ Paulo to e tsui si ha. Enɛ ɔ ná Timoteo nɔ he wami wawɛɛ. Benɛ Paulo ya Listra a, e na kaa Timoteo ji Kristofono nɛ peeɔ nɔ hyɛmi nɔ́ kpakpa, nɛ “nyɛmimɛ ɔmɛ tsuo nɛ ngɛ Listra, kɛ Ikoniom ɔ yeɔ Timoteo he odase kpakpa.” (Níts. 16:1, 2) Pee se ɔ, Timoteo he su kɛ ha blɔ nya nítsumi nɛ mi jiɔ tsumi.—Filip. 2:19, 20; 1 Tim. 1:3.

19. Ke wa toɔ wa tsui si ɔ, kɛ ni kpahi náa he se ha kɛɛ?

¹⁹ Ke wa fi si ngɛ Mawu suɔmi nya ní peemi mi ɔ, ni kpahi ma nyɛ ma ná he se, titli ɔ, nihewi kɛ yihewi nɛ mɛ hu a maa wa ba pee Yehowa sɔmɔli kpakpahi ɔ. Tsa pi bɔnɛ waa kɛ nihi tuɔ munyu ngɛ fiɛɛmi nítsumi ɔ mi ha a pɛ nɛ nihewi kɛ yihewi kaseɔ, mohu ɔ, ke waa kɛ haomi kpe ɔ, bɔnɛ wa peeɔ wa ní ha a hu a kaseɔ. Paulo ya nɔ nɛ e ‘to e tsui si ngɛ nɔ́ tsuaa nɔ́ mi, konɛ nihi tsuo nɛ a maa ye anɔkuale ɔ, a he a yi wami nɛ a nine nɛ su hɛ mi nyami nɛ ngɛ kɛ yaa neneene ɔ nɔ.’—2 Tim. 2:10.

20. Mɛni heje nɛ e sa nɛ waa bɔ mɔde daa konɛ Mawu nɛ wo wa hɛ mi nyami ɔ?

²⁰ Anɛ e sɛ nɛ waa ya nɔ nɛ waa ‘bɔ mɔde konɛ Mawu nɛ wo wa hɛ mi nyami’ lo? (Yoh. 5:44; 7:18) E sa nɛ waa bɔ mɔde nɛ waa pee jã! (Kane Romabi 2:6, 7.) Yehowa ma ha nihi nɛ a ‘bɔɔ mɔde kaa lɛ Yehowa a nɛ wo a hɛ mi nyami ɔ neneene wami.’ Jehanɛ se hu ɔ, ke ‘wa toɔ wa tsui si kɛ peeɔ kpakpa daa’ a, lɔɔ woɔ ni kpahi he wami nɛ a yaa nɔ nɛ a fiɔ si konɛ a ná neneene wami. Enɛ ɔ he ɔ, moo bɔ mɔde wawɛɛ konɛ Mawu nɛ wo o hɛ mi nyami.