Nɔ nɛ baa e he si ɔ wo we e he nɔ. Jamɛatsɛ ɔ susuu we kaa e nɔ kuɔ pe nihi. Nɔ tsuaa nɔ nɛ baa e he si ɔ le kaa e yi mluku, nɛ e le níhi nɛ e be nyɛe maa pee.

Benɛ Mose ná blɔ nya a, e wo we e he nɔ. Behi fuu ɔ, ke adesa ná blɔ nya nyafii ko ɔ, e kɛ we nɛ a naa kaa e woɔ e he nɔ aloo e baa e he si. Womi ngmalɔ ko nɛ e hi si ngɛ jeha 1800 jeha amɛ a mi nɛ a tsɛɛ lɛ ke Robert G. Ingersoll ɔ ngma ke: “Nihi fuu ma nyɛ maa da yi mi wami nya. Se ke o ngɛ hlae nɛ o le bɔnɛ nɔ ko ngɛ ha tutuutu ɔ, ha nɛ e ná blɔ nya nɛ o hyɛ.” Mose pee nɔ hyɛmi nɔ́ kpakpa kɛ ha wɔ ngɛ enɛ ɔ blɔ fa mi. Ngɛ mɛni blɔ nɔ?

Mose ná blɔ nya ngua, ejakaa Yehowa fã lɛ konɛ e nyɛɛ Israelbi ɔmɛ a hɛ mi. Se Mose wo we e he nɔ. Kaa nɔ hyɛmi nɔ́ ɔ, mo susu bɔnɛ e ha sane bimi ko nɛ mi wa nɛ kɔɔ gbosi ní yemi he ɔ heto ha a he nɛ o hyɛ. (4 Mose 27:1-11) Sane nɛ a bi lɛ ɔ mi wa, ejakaa heto nɛ e ma ha a maa pee mlaa nɛ a maa da nɔ kɛ tsu sane kpahi a he ní hwɔɔ se.

Kɛ Mose ha heto ha kɛɛ? Anɛ e susu kaa akɛnɛ lɛ nɛ e nyɛɛ Israelbi ɔmɛ a hɛ mi heje ɔ, e ma nyɛ maa mwɔ e yi mi kpɔ ngɛ sane ɔ he ha mɛ lo? Anɛ e maa da nyɛmi nɛ e ngɛ, níhi a si kpami nɛ e ná jehahi abɔ ɔ, aloo bɔnɛ e le Yehowa susumi ngɛ níhi a he ha a nɔ kɛ ma e juɛmi nya si lo?

Eko ɔ, he nɔ wolɔ ko maa pee jã. Se Mose pee we jã. Baiblo ɔ de wɔ ke: ‘Mose ngɔ a sane ɔ kɛ ya fɔ Yehowa hɛ mi.’ (4 Mose 27:5) Mo susu he nɛ o hyɛ! Ngɛ jeha 40 sɔuu nɛ Mose kɛ nyɛɛ Israel ma a hɛ mi ɔ tsuo se ɔ, e kɛ e he fɔɛ lɛ nitsɛ e he nɔ, mohu ɔ, e kɛ e hɛ fɔ Yehowa nɔ. Enɛ ɔ ha nɛ wa na heii kaa Mose baa e he si nitsɛnitsɛ.

Mose ji hunga ngɛ he blɔ nɛ e ná a he. Benɛ Yehowa ha Israelbi kpa komɛ hu he blɔ konɛ a sɔmɔ kaa gbali kɛ piɛɛ Mose he ɔ, Mose bua jɔ. (4 Mose 11:24-29) Benɛ Mose ngatsɛ ɔ wo Mose ga kaa e gba nítsumi ɔ eko kɛ ha ni kpahi ɔ, Mose ba e he si nɛ e kɛ ga womi ɔ tsu ní. (2 Mose 18:13-24) Benɛ e piɛ bɔɔ nɛ Mose ma gbo ɔ, e ngɛ mi kaa e ngɛ nɔmlɔ tso mi he wami mohu lɛɛ, se e bi Yehowa nɛ e hla nɔ nɛ ma ba ye e se. Benɛ Yehowa hla Yoshua a, Mose je e tsui mi nɛ e fi Yoshua se, nɛ e wo ni ɔmɛ he wami konɛ a nyɛɛ Yoshua se kɛ ho Si Womi Zugba a nɔ ya. (4 Mose 27:15-18; 5 Mose 31:3-6; 34:7) Mose susu kaa e ji he blɔ ngua nɛ e ná kaa e maa nyɛɛ Israelbi ɔmɛ a hɛ mi kɛ ja Mawu mohu, se e kɛ he blɔ nɛ e ná a yi ni kpahi awi.

Ke wa ná blɔ nya ko, aloo wa ngɛ dloomi nike ní ko ɔ, e sɛ nɛ wa kɛ wo wa he nɔ. E sa nɛ wa kai kaa ke wa ngɛ nyɛmi ko po ɔ, ja wa baa wa he si loko Yehowa kɛ wɔ ma tsu ní. (1 Samuel 15:17) Ke wa baa wa he si nitsɛnitsɛ ɔ, lɔɔ ma ha nɛ wa maa bɔ mɔde kaa waa kɛ Baiblo ɔ mi ga womi nɛ nile ngɛ mi nɛ nyɛɛ se nɛ ɔ ma tsu ní: ‘Ngɔɔ o hɛ ngɔ fɔ Yehowa nɔ kulaa. Koo ngɔ o hɛ ngɔ fɔ nɔ́ nɛ moo o susu kaa o le ɔ nɔ.’—Abɛ 3:5, 6.

Nɔ hyɛmi nɔ́ nɛ Mose pee ɔ tsɔɔ wɔ hu kaa ke wa ná he blɔ ko ɔ, e sɛ nɛ wa wo wa he nɔ.

Ke wa kase Mose he si bami ɔ, anɛ wa ma ná he se lo? Wa ma ná he se wawɛɛ nitsɛ! Ke wa baa wa he si nitsɛnitsɛ ɔ, lɔɔ ma ha nɛ nihi nɛ a bɔle wɔ ɔ bua maa jɔ wa he. Nɔ́ nɛ he hia pe kulaa ji, Yehowa Mawu hu bua maa jɔ wa he, ejakaa lɛ nitsɛ hu e baa e he si. (La 18:35) “Nihi nɛ woɔ a he nɔ ɔ, Mawu kɛ mɛ toɔ ní; se nihi nɛ baa a he si ɔ, Mawu dlooɔ mɛ.” (1 Petro 5:5) E sa nɛ enɛ ɔ nɛ wo wɔ he wami nɛ waa kase Mose he si bami ɔ!