Mawu be yo nitsɛnitsɛ nɛ e kɛ lɛ fɔ bimɛ. Lɛ ji níhi tsuo nɛ wami ngɛ a mi ɔ a Bɔlɔ. Mawu bɔ adesahi konɛ a nyɛ nɛ a kase e su ɔmɛ. Enɛ ɔ heje nɛ Mawu tsɛ kekleekle nɔmlɔ nɛ e bɔ nɛ ji Adam ɔ ke “Mawu bi ɔ” nɛ. Jã nɔuu nɛ a tsɛɛ Yesu ke “Mawu Bi,” ejakaa Mawu bɔ lɛ konɛ e nyɛ nɛ e je e Tsɛ ɔ su ɔmɛ kpo.—Kane Luka 3:38; Yohane 1:14, 49.

Mawu bɔ Yesu loko e bɔ Adam. Ngɛ anɔkuale mi ɔ, Mawu bɔ Yesu nɛ lɔɔ se ɔ, e gu Yesu nɔ kɛ pee ní kpahi tsuo. Mawu gu Yesu nɔ kɛ bɔ hiɔwe bɔfo ɔmɛ hulɔ. Enɛ ɔ heje nɛ Baiblo ɔ tsɛɛ Yesu ke Mawu “nibɔ níhi tsuo a kpɛti tɛte” ɔ nɛ.—Kane Kolosebi 1:15, 16.

Yesu hi si ngɛ hiɔwe kaa Mawu bɔfo loko a ba fɔ lɛ ngɛ Betlehem. Benɛ Mawu na kaa be nɛ e to ɔ su ɔ, e tsake Yesu wami kɛ je hiɔwe kɛ ba wo Maria fɔmi kotoku mi bɔnɛ pee nɛ a nyɛ nɛ a fɔ Yesu kaa adesa.—Kane Luka 1:30-32; Yohane 6:38; 8:23.

Mɛni heje nɛ Mawu ha nɛ a fɔ Yesu ngɛ zugba a nɔ kaa adesa a? Mɛni blɔ nya nítsumi klɛdɛɛ nɛ Yesu tsu? O ma nyɛ maa na sane bimi nɛ ɔmɛ a hetohi ngɛ Baiblo ɔ mi. Heto ɔmɛ ma ha nɛ o maa nu nɔ́ nɛ Mawu kɛ Yesu a pee kɛ ha mo ɔ sisi wawɛɛ nitsɛ.