Baiblo ɔ ji Mawu Munyu. E ngɛ kaa sɛ womi nɛ Tsɛ ko nɛ e ngɛ suɔmi ngma e bimɛ. (2 Timoteo 3:16) Mawu ha nɛ a ngma nɔ́ nɛ ke wa pee ɔ wa maa sa e hɛ mi, nɔ́ heje nɛ e ngmɛ ní yayami peemi blɔ, kɛ níhi nɛ e maa pee kɛ ha adesahi hwɔɔ se ɔ ngɛ Baiblo ɔ mi. Se jami mi tsɔɔli plɛ Baiblo ɔ mi tsɔɔmi ɔmɛ a hɛ mi bu si; enɛ ɔ he ɔ, nihi babauu susu kaa a be nyɛe maa nu níhi nɛ ngɛ Baiblo ɔ mi ɔ a sisi gblegbleegble.​—Bɔfo Ɔmɛ A Nítsumi 20:29, 30.

Yehowa Mawu suɔ nɛ waa nu anɔkuale ɔ sisi. Enɛ ɔ he ɔ, e ha wɔ womi nɛ wa ma nyɛ maa nu níhi nɛ ngɛ mi ɔ a sisi.​—Kane 1 Timoteo 2:3, 4.

Ngɛ Baiblo ɔ nɛ Yehowa kɛ ha wɔ ɔ se ɔ, e kpale yeɔ bua wɔ konɛ waa nu níhi nɛ ngɛ Baiblo ɔ mi ɔ sisi. E tsɔ Yesu konɛ e ba tsɔɔ wɔ ní. (Luka 4:16-21) Yesu ye bua e tue buli ɔmɛ konɛ a nu Ngmami ɔ sisi. E tsɛ ngmamihi fuu a se.​—Kane Luka 24:27, 32, 45.

Yesu to Kristofoli asafo ɔ sisi konɛ asafo ɔ nɛ tsa nítsumi nɛ lɛ Yesu ɔ je sisi ɔ nɔ. (Mateo 28:19, 20) Mwɔnɛ ɔ, Yesu se nyɛɛli anɔkualetsɛmɛ ɔmɛ yeɔ bua nihi konɛ a nu níhi nɛ Baiblo ɔ tsɔɔ kɛ kɔ Mawu he ɔ sisi. Ke o maa suɔ nɛ o nu níhi nɛ ngɛ Baiblo ɔ mi ɔ sisi ɔ, Yehowa Odasefoli a bua maa jɔ kaa a maa ye bua mo.​—Kane Bɔfo Ɔmɛ A Nítsumi 8:30, 31.