1. Mɛni wɔ hu wa suɔ nɛ waa le kaa bɔfo ɔmɛ?

BENƐ e piɛ bɔɔ nɛ Yesu zugba a nɔ sɔmɔmi nítsumi ɔ maa ba nyagbe ɔ, e kaseli ɔmɛ suɔ nɛ a le nɔ́ nɛ maa ba hwɔɔ se. Enɛ ɔ he ɔ, benɛ e piɛ bɔɔ nɛ e ma gbo ɔ, e kaseli ɔmɛ a kpɛti nihi eywiɛ bi lɛ ke: “Mɛni be ní nɛ ɔmɛ tsuo maa ba mi? Mɛni okadi maa tsɔɔ o bami be [kaa o ba nɛ o ngɛ, NW] kɛ je nɛ ɔ nyagbe be?” (Mat. 24:3; Mar. 13:3) Yesu ha mɛ heto kɛ gu gbamihi fuu nɛ e gba nɛ a ngma ngɛ Mateo yi 24 kɛ 25 ɔ nɔ. Yesu tsɔɔ níhi fuu nɛ maa ba nɛ sa kadimi. Níhi nɛ e tsɔɔ ɔ a he ngɛ se nami kɛ ha wɔ, ejakaa wɔ hu wa suɔ nɛ waa le níhi nɛ maa ba hwɔɔ se.

2. (a) Mɛni sisi wa bɔ mɔde kaa wa maa nu fitsofitso ngɛ jehahi nɛ be ɔ a mi? (b) Mɛni sane bimi etɛ a he wa ma susu?

² Jehahi babauu ji nɛ ɔ, Yehowa sɔmɔli kɛ hɛdɔ ngɛ gbamihi nɛ Yesu gba kɛ kɔ nyagbe ligbi ɔmɛ a he ɔ he ní kasee. A suɔ kaa a maa nu Yesu gbami ɔ sisi fitsofitso konɛ a le be nɛ e maa ba mi. Ngɛ munyu nɛ ɔ nɛ wa ngɛ kasee ɔ mi ɔ, wa ma susu sane bimi etɛ nɛ nyɛɛ se nɛ ɔmɛ a he. Sane bimi nɛ ɔmɛ eko tsuaa eko je sisi kɛ munyu nɛ ji, “mɛni be.” Mɛni be nɛ ‘amanehlu ngua’ a maa je sisi? Mɛni be Yesu maa kojo “jijɔ ɔmɛ” kɛ “apletsi ɔmɛ”? Mɛni be nɛ Yesu “maa ba”?​—Mat. 24:21; 25:31-33.

3. Be ko nɛ be ɔ, kɛ wa susu ngɛ amanehlu ngua a he ha kɛɛ?

³ Be ko nɛ be ɔ, wa susu kaa amanehlu ngua a je sisi ngɛ jeha 1914 ɔ mi, benɛ a hwu Je Mi Ta I ɔ. Wa susu kaa Yehowa “po ligbi ɔmɛ a nɔ kpiti” ngɛ jeha 1918 ɔ mi benɛ ta a ba nyagbe ɔ, konɛ nihi nɛ a pɔ mɛ nu ɔ, a kpɛti nihi nɛ a ngɛ zugba a nɔ ɔ nɛ a nyɛ nɛ a fiɛɛ kɛ kpa je ɔ mi tsuo. (Mat. 24:21, 22) Wa hyɛ blɔ kaa ke a gbe fiɛɛmi nítsumi ɔ nya a, a ma kpata Satan je ɔ hɛ mi. Enɛ ɔ he ɔ, wa susu kaa amanehlu ngua a maa ba ngɛ blɔ etɛ nɔ. Wa susu kaa e maa je sisi ngɛ jeha 1914 ɔ mi, nɛ e mi ma ba po ngɛ jeha 1918 ɔ mi, nɛ e maa ba nyagbe ngɛ Harmagedon mi.

4. Mɛni wa yɔse nɛ lɔɔ ha nɛ wa nu Yesu gbami nɛ kɔɔ nyagbe ligbi ɔmɛ a he ɔ sisi fitsofitso?

 ⁴ Se benɛ wa hyɛ Yesu gbami ɔ mi fitsofitso ɔ, wa yɔse kaa gbami nɛ Yesu gba kɛ kɔ nyagbe ligbi ɔmɛ a he ɔ maa ba mi ngɛ blɔ enyɔ nɔ. (Mat. 24:4-22) Kekle nɔ́ ɔ ba mi ngɛ Yudea ngɛ kaseli ɔmɛ a be ɔ mi, nɛ enyɔne ɔ maa ba mi ngɛ wa be nɛ ɔ mi ngɛ je kɛ wɛ. Enɛ ɔ ha nɛ wa nu níhi fuu a sisi fitsofitso. *

5. (a) Mɛni je sisi ngɛ jeha 1914 ɔ mi? (b) Mɛni blɔ nɔ kɔɔmi be nɛ ɔ ngɛ kaa nɔ́ nɛ ba ngɛ kaseli ɔmɛ a be ɔ mi ɔ?

⁵ Wa yɔse hu kaa amanehlu ngua a kekle fã a ji sisi ngɛ jeha 1914 ɔ mi. Mɛni heje? Ejakaa Baiblo gbami tsɔɔ kaa pi tahi nɛ je mahi maa hwu ɔ nɛ e kɛ amanehlu ngua a maa ba, se mohu lakpa jami hɛ mi kpatami nɛ e kɛ amanehlu ngua a maa ba. Lɔɔ he ɔ, níhi nɛ ya nɔ ngɛ jeha 1914 ɔ mi ɔ pi amanehlu ngua a sisije, se mohu e ji “kɔɔmi sisije.” (Mat. 24:8) “Kɔɔmi” nɛ ɔ ngɛ kaa nɔ́ nɛ ya nɔ ngɛ Yerusalem kɛ Yudea kɛ je jeha 33 M.B. kɛ ya si 66 M.B. ɔ mi ɔ.

6. Kɛ wa ma plɛ kɛ le kaa amanehlu ngua a je sisi kɛɛ?

⁶ Kɛ wa ma plɛ kɛ le kaa amanehlu ngua a je sisi kɛɛ? Yesu gba kɛ fɔ si ke: ‘Nyɛ maa na ma doku ní hiemi nɔ́ nɛ gbalɔ Daniel tu he munyu ɔ nɛ maa si ngɛ he klɔuklɔu ɔ. (Ní kanelɔ ɔ nɛ kɔ se!) Kɛkɛ ɔ, ni nɛmɛ nɛ ngɛ Yudea a, a tu fo kɛ ya yo ɔmɛ a nɔ.’ (Mat. 24:15, 16) Kekleekle ɔ, gbami nɛ ɔ ba mi ngɛ jeha 66 M.B. benɛ Roma ta buli ɔmɛ ya tua Yerusalem kɛ Yerusalem sɔlemi we ɔ. Roma ta buli ɔmɛ ji “ní hiemi nɔ́” aloo níhi nɛ a sume kulaa nɛ́ “maa si ngɛ he klɔuklɔu ɔ,” nɛ ji he nɛ Yudabi ɔmɛ buu kaa e ngɛ klɔuklɔu ɔ nɛ. Gbami nɛ ɔ maa bami ekohu ngɛ blɔ nɛ kle pe kekle nɔ́ ɔ nɔ. Je Ma Amɛ A Kake Peemi ɔ ji “ní hiemi nɔ́” ɔ nɛ. Nihi nɛ a ngɛ jamihi nɛ a tsɛɛ a he ke Kristofoli ɔ mi ɔ buu jamɛ a  jami ɔ kaa “he klɔuklɔu.” Je Ma Amɛ A Kake Peemi ɔ ma tua jamihi nɛ a tsɛɔ a he ke Kristofoli kɛ jami kpahi nɛ a piɛɛ Babilon Ngua a he ɔ kaa bɔnɛ a gba kɛ fɔ si ngɛ Kpojemi 17:16-18 ɔ. Tuami nɛ ɔ nɛ a ma tua Babilon Ngua a ji nɔ́ nɛ maa je amanehlu ngua a sisi.

7. (a) Mɛni blɔ nɔ a gu kɛ he ni komɛ a ‘yi wami’ ngɛ kaseli ɔmɛ a be ɔ mi? (b) Mɛni maa ba hwɔɔ se?

⁷ Yesu gba kɛ fɔ si ke: “A maa po jamɛ a ligbi ɔmɛ a nɔ kpiti.” Nɔ́ nɛ ɔ ba mi kekleekle ngɛ jeha 66 M.B. ɔ mi, be nɛ Roma ta buli ɔmɛ “po” Yerusalem ma a tuami ɔ nɔ ɔ. Lɔɔ se ɔ, Kristofoli nɛ a pɔ mɛ nu nɛ a ngɛ Yerusalem kɛ Yudea a je ma a mi konɛ a ‘yi nɛ ná wami.’ (Kane Mateo 24:22; Mal. 3:17) Mɛni maa ba ngɛ amanehlu ngua a mi? Yehowa maa “po” tuami nɛ Je Ma Amɛ A Kake Peemi ɔ ma tua lakpa jami ɔ nɔ kpiti konɛ a ko kpata anɔkuale jami hɛ mi. Enɛ ɔ ma ha nɛ Mawu ma he e webi a yi wami.

8. (a) Mɛni níhi maa ya nɔ ngɛ amanehlu ngua a fã nɛ sɛ hlami ɔ se? (b) Eko ɔ, mɛni be nɛ a maa ngɔ nimli 144,000 a kpɛti nyagbe nɔ ɔ kɛ ho hiɔwe ya? (Hyɛ nyagbe ningma.)

 ⁸ Ke amanehlu ngua a fã nɛ sɛ hlami ɔ ba nyagbe ɔ, mɛni maa ba? Yesu tsɔɔ kaa be ma pue mi loko Harmagedon maa je sisi. Mɛni níhi maa ya nɔ ngɛ jamɛ a be ɔ mi? Heto ɔ ngɛ Ezekiel 38:14-16 kɛ Mateo 24:29-31 ɔ. (Kane.) * Lɔɔ se ɔ, Harmagedon, nɛ ji amanehlu ngua a nyagbe fã a maa ba. Enɛ ɔ ngɛ kaa nɔ́ nɛ ba ngɛ jeha 70 M.B. benɛ a kpata Yerusalem ma a hɛ mi ɔ. (Mal. 4:1) Harmagedon maa pee nɔ́ ko nɛ “a nɛ eko hyɛ kɛ je be nɛ a bɔ je ɔ.” (Mat. 24:21) Harmagedon se ɔ, Kristo Jeha Akpe Nɔ Yemi ɔ maa je sisi.

9. Kɛ Yesu gbami nɛ kɔɔ amanehlu ngua a he ɔ ha nɛ o nuɔ he ha kɛɛ?

⁹ Gbami nɛ kɔɔ amanehlu ngua a he ɔ woɔ wɔ he wami. Mɛni heje? Ejakaa e maa nɔ mi kɛ haa wɔ kaa, ngɛ haomi  saisaa nɛ Yehowa webi kɛ maa kpe ɔ tsuo se ɔ, Yehowa maa baa mɛ tsuo a yi ngɛ amanehlu ngua a mi. (Kpoj. 7:9, 14) Ngɛ Harmagedon mi ɔ, Yehowa maa tsɔɔ kaa lɛ nɛ e sa kaa e ye je mluku ɔ nɔ, nɛ e ma tsɔ e biɛ klɔuklɔu ɔ hu he.​—La 83:18; Eze. 38:23.

10. Be ko nɛ be ɔ, mɛni be wa susu kaa a bɔni jijɔ ɔmɛ kɛ apletsi ɔmɛ kojomi?

¹⁰ Nyɛ ha nɛ wa susu Yesu gbami ɔ fã kpa ko hu he nɛ waa hyɛ. E ji nɔ́ hetomi nɔ́ nɛ kɔɔ benɛ a maa kojo jijɔ ɔmɛ kɛ apletsi ɔmɛ ɔ he. (Mat. 25:31-46) Be ko nɛ be ɔ, wa susu kaa kɛ je jeha 1914 kɛ ma nɛ ɔ, Yesu ngɛ nihi kojoe kaa a ji jijɔhi aloo apletsihi. Wa susu kaa nihi nɛ a bui Matsɛ Yemi sɛ gbi ɔ tue nɛ a gbo loko amanehlu ngua a je sisi ɔ ji apletsihi, nɛ a be mɛ si tlee.

11. Mɛni heje nɛ nihi nɛ a maa kojo mɛ kaa jijɔhi kɛ apletsihi ɔ ji sisi ngɛ jeha 1914 ɔ mi ɔ?

¹¹ Ngɛ jeha 1995 ɔ mi ɔ, Hwɔɔmi Mɔ ko tsɔɔ Mateo 25:31 ngɛ blɔ ehe nɔ. A de ngɛ jamɛ a ngmami ɔ mi ke: “Ligbi ɔ nɛ Nɔmlɔ Bi ɔ maa ba kaa matsɛ, nɛ bɔfo ɔmɛ tsuo maa piɛ e he kɛ ba a, jamɛ a be ɔ mi ɔ, e maa hi e matsɛ sɛ saminyayoo ɔ nɔ.” Hwɔɔmi Mɔ ɔ tsɔɔ kaa Yesu ba pee Mawu Matsɛ Yemi ɔ nya matsɛ ngɛ jeha 1914 ɔ mi. Se ngɛ jamɛ a be ɔ mi ɔ, e ba pee we ‘je ma amɛ tsuo’ a Kojolɔ. (Mat. 25:32; kɛ to Daniel 7:13 ɔ he.) Se nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ kale Yesu kaa e ji Kojolɔ. (Kane Mateo 25:31-34, 41, 46.) Akɛnɛ Yesu pee we je ma amɛ tsuo a Kojolɔ ngɛ jeha 1914 ɔ mi heje ɔ, e be nyɛe ma bɔni nihi kojomi kaa a ji jijɔhi aloo apletsihi ngɛ jamɛ a jeha a mi. * Lɛɛ mɛni be Yesu ma bɔni je ma amɛ kojomi mɔ?

12. (a) Kekleekle be nɛ Yesu maa kojo je ma amɛ tsuo ɔ ji mɛni be? (b) Mɛni ji níhi nɛ a tu he munyu ngɛ Mateo 24:30, 31 kɛ Mateo 25:31-33, 46 nɛ maa ya nɔ?

 ¹² Yesu gbami nɛ kɔɔ nyagbe ligbi ɔmɛ a he ɔ tsɔɔ kaa e maa kojo je ma amɛ tsuo ngɛ lakpa jami hɛ mi kpatami ɔ se. Enɛ ɔ ji kekleekle be nɛ e maa pee jã. Kaa bɔnɛ a tsɔɔ mi ngɛ  kuku 8 ɔ mi ɔ, a ngma níhi nɛ maa ya nɔ ngɛ jamɛ a be ɔ mi ɔ ekomɛ ngɛ Mateo 24:30, 31 ɔ. Ke o hyɛ kuku nɛ ɔmɛ a mi saminya a, o maa na kaa Yesu gbami ɔ ngɛ kaa nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ nɔuu. Kaa nɔ hyɛmi nɔ́ ɔ, Nɔmlɔ Bi ɔ maa ba kaa matsɛ, nɛ bɔfo ɔmɛ tsuo maa piɛ e he kɛ ba; a ma bua je ma amɛ tsuo a nya ngɛ e hɛ mi; nihi nɛ e maa bu mɛ kaa a ji jijɔhi ɔ ma ‘wo a yi nɔ,’ ejakaa a ma ná “neneene wami.” * Nihi nɛ a maa bu mɛ kaa a ji apletsihi ɔ “maa wo yana,” ejakaa a ma kpata a hɛ mi.​—Mat. 25:31-33, 46.

13. (a) Mɛni be Yesu maa kojo nihi kaa a ji jijɔhi aloo apletsihi? (b) Kɛ e sa kaa sisi numi nɛ ɔ nɛ wa ná a nɛ sa wa fiɛɛmi nítsumi ɔ he ha kɛɛ?

¹³ Lɛɛ kɛ wa maa ma nya si ha kɛɛ? Ke Yesu ba ngɛ amanehlu ngua a mi ɔ, e maa kojo je ma amɛ tsuo kaa a ji jijɔhi loo apletsihi. Lɔɔ se ɔ, ngɛ Harmagedon nɛ ji amanehlu ngua a nyagbe fã a mi ɔ, a ma kpata nihi nɛ a ngɛ kaa apletsihi ɔ a hɛ mi. Kɛ e sa kaa sisi numi nɛ ɔ nɛ wa ná a nɛ sa wa fiɛɛmi nítsumi ɔ he ha kɛɛ? E maa ye bua wɔ konɛ waa na kaa fiɛɛmi nítsumi ɔ he hia wawɛɛ. Loko amanehlu ngua a maa je sisi ɔ, loloolo ɔ, be ngɛ kɛ ha nihi konɛ a kɛ tsake a susumi nɛ a bɔni agbo tokofii nɛ e kɛ nɔ “yaa wami mi” ɔ nɔ nyɛɛmi. (Mat. 7:13, 14) Ngɛ anɔkuale mi ɔ, eko ɔ, nihi maa pee a ní kaa jijɔhi aloo apletsihi amlɔ nɛ ɔ. Se e sa nɛ wa kai kaa nyagbe kojomi  nɛ a maa kojo nihi kaa a ji jijɔhi aloo apletsihi ɔ maa ba ngɛ amanehlu ngua a mi. Enɛ ɔ he ɔ, e he hia nɛ waa fiɛɛ Matsɛ Yemi sɛ gbi ɔ kɛ tsɔɔ nihi babauu konɛ a nyɛ nɛ a bu tue.

14, 15. Mɛni ngmamihi eywiɛ nɛ tsɔɔ kaa Kristo maa ba kaa Kojolɔ hwɔɔ se?

¹⁴ Anɛ Yesu gbami ɔ he nɛ wa susu ɔ tsɔɔ kaa e sa nɛ wa tsake sisi numi nɛ wa ná ngɛ níhi nɛ maa ya nɔ nɛ Yesu tu he munyu ɔ he lo? Gbami ɔ nitsɛ ha sane bimi nɛ ɔ heto. Nyɛ ha nɛ waa hyɛ.

¹⁵ Ngɛ Yesu gbami ɔ nɛ a ngma ngɛ Mateo 24:29–25:46 fã ko mi ɔ, e tu níhi nɛ maa ya nɔ ngɛ nyagbe ligbi ɔmɛ kɛ amanehlu ngua a mi ɔ he munyu titli. Ngmamihi kakaaka kpaanyɔ tsɔɔ kaa Yesu de ke e “ma,” aloo e maa ba. * Yesu tu amanehlu ngua a he munyu ke: ‘A maa na Nɔmlɔ Bi ɔ nɛ ma ngɛ bɔku ɔmɛ a mi.’ ‘Nyɛ li ligbi ɔ nɛ nyɛ Nyɔmtsɛ ɔ ma.’ ‘Nɔmlɔ Bi ɔ maa ba tlukaa be mi nɛ nyɛ hɛ be nɔ.’ Ngɛ Yesu nɔ́ hetomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ mi ɔ, e de ke: ‘Nɔmlɔ Bi ɔ maa ba kaa matsɛ.’ (Mat. 24:30, 42, 44; 25:31) Ngmami eywiɛ nɛ ɔmɛ tsuo tsɔɔ kaa Kristo maa ba kaa Kojolɔ hwɔɔ se. Mɛni ngmami eywiɛ kpahi nɛ tsɔɔ kaa Yesu de ke e “ma,” aloo e maa ba?

16. Mɛni ngmami kpahi hu a mi nɛ a tu Yesu bami ɔ he munyu ngɛ?

¹⁶ Yesu de kɛ kɔ tsɔlɔ anɔkualetsɛ kɛ ní lelɔ ɔ he ke: ‘Tsɔlɔ nɛ ke e nyɔmtsɛ ɔ ba we mi, nɛ e ma ba na kaa e ngɛ jã pee ɔ, a gbaa lɛ.’ Yesu de ngɛ nɔ́ hetomi nɔ́ nɛ kɔɔ yihewi ɔmɛ a he ɔ mi ke: ‘Se benɛ a ho hemi ya a, ayɛflo huno ɔ ba.’ Yesu de ngɛ nɔ́ hetomi nɔ́ nɛ kɔɔ sika a he ɔ mi ke: ‘E ngɛ mi hluu ɔ, tsɔli ɔmɛ a nyɔmtsɛ ɔ ba.’ Ngɛ jamɛ a nɔ́ hetomi nɔ́ ɔ nɔuu mi ɔ, nyɔmtsɛ ɔ de ke: ‘Ke i ba a, ma ba he ye ní kɛ hekpa.’ (Mat. 24:46; 25:10, 19, 27) Mɛni be Yesu ba kaa bɔnɛ a tsɔɔ ngɛ kuku nɛ ɔmɛ a mi ɔ?

17. Be ko nɛ be ɔ, mɛni wa de ngɛ Yesu bami nɛ a tu he munyu ngɛ Mateo 24:46 he?

¹⁷ Be ko nɛ be ɔ, wa de ngɛ wa womi ɔmɛ a mi kaa ngmami eywiɛ nɛ ɔmɛ kɔɔ bami nɛ Yesu ba ngɛ jeha 1918 ɔ mi ɔ he. Kaa nɔ hyɛmi nɔ́ ɔ,  mo susu nɔ́ nɛ Yesu de kɛ kɔ “tsɔlɔ anɔkualetsɛ kɛ ní lelɔ ɔ” he ɔ he nɛ o hyɛ. (Kane Mateo 24:45-47.) Wa nu sisi kaa Yesu ‘bami’ nɛ a tu he munyu ngɛ kuku 46 tsɔɔ kaa Yesu ba hyɛ nihi nɛ a pɔ mɛ nu ɔ a mɔde bɔmi ngɛ Mawu jami mi ngɛ jeha 1918 ɔ mi. Ngɛ jeha 1919 ɔ mi ɔ, e ngɔ e tsɔli kpa amɛ tsuo kɛ wo tsɔlɔ ɔ dɛ konɛ e hyɛ a nɔ. (Mal. 3:1) Sisi numi nɛ ɔ wa ba ná a tsɔɔ kaa e sa nɛ wa tsake sisi numi nɛ wa hɛɛ momo ngɛ ní komɛ nɛ Yesu gba kɛ fɔ si kaa a maa ba a he. Mɛni heje?

18. Níhi tsuo nɛ Yesu de ngɛ e gbami ɔ mi ɔ ha nɛ wa nu e bami ɔ sisi ngɛ mɛni blɔ nɔ?

¹⁸ Ngɛ kukuhi nɛ sɛ Mateo 24:46 hlami ɔ mi ɔ, wa na kaa be tsuaa be nɛ a ma de ke Yesu “ma” a, e tsɔɔ bami nɛ e maa ba nɛ e ma ba kojo je ma amɛ nɛ e ma kpata a hɛ mi ngɛ amanehlu ngua a mi. (Mat. 24:30, 42, 44) Jehanɛ se hu ɔ, kaa bɔnɛ wa na ngɛ  kuku 12 ɔ mi ɔ, Yesu ‘bami’ nɛ a tu he munyu ngɛ Mateo 25:31 ɔ hu kɔɔ be nɛ e ma ba kojo je ma amɛ hwɔɔ se ɔ he. Enɛ ɔ he ɔ, e da blɔ kaa wa ma de ke Mateo 24:46, 47 ɔ kɔɔ hwɔɔ se be nɛ Yesu maa ba, nɛ e ma ba ngɔ níhi tsuo nɛ e ngɛ ɔ kɛ wo tsɔlɔ anɔkualetsɛ ɔ dɛ ngɛ amanehlu ngua a mi ɔ he. * Ngɛ anɔkuale mi ɔ, níhi tsuo nɛ Yesu de ngɛ e gbami ɔ mi ɔ tsɔɔ kaa e bami nɛ a tu he munyu ngɛ ngmamihi kakaaka kpaanyɔ nɛ ɔmɛ a mi ɔ kɔɔ kojomi nɛ e ma ba kojo ngɛ amanehlu ngua a mi hwɔɔ se ɔ he.

19. Mɛni ní hehi wa kase ngɛ munyu nɛ ɔ mi, nɛ mɛni sane bimihi a he nɛ wa ma susu ngɛ munyu nɛ nyɛɛ se ɔ mi?

¹⁹ Mɛni ji níhi nɛ wa kase? Ngɛ nikasemi nɛ ɔ sisije ɔ, wa bi sanehi etɛ, nɛ eko tsuaa eko je sisi kɛ munyu nɛ ji, “mɛni be.” Kekleekle ɔ, wa na kaa amanehlu ngua a ji sisi ngɛ jeha 1914 ɔ mi, se mohu e maa je sisi ke Je Ma Amɛ A Kake Peemi ɔ tua Babilon Ngua a. Nɔ́ nɛ ji enyɔ ɔ, wa na kaa pi jeha 1914 ɔ mi nɛ Yesu bɔni nihi kojomi kaa a ji jijɔhi aloo apletsihi, mohu ɔ, e maa je kojomi ɔ sisi ngɛ amanehlu ngua a mi. Nyagbe ɔ, wa na kaa Yesu bɛ nɛ e ba ngɔ níhi nɛ e ngɛ ɔ tsuo kɛ wo tsɔlɔ anɔkualetsɛ ɔ dɛ ngɛ jeha 1919 ɔ mi, mohu ɔ, e maa pee jã ngɛ amanehlu ngua a mi. Lɔɔ he ɔ, sane bimi etɛ nɛ wa susu a he ɔ tsuo maa ba ngɛ amanehlu ngua a mi. Anɛ e sa kaa níhi a sisi numi ehe nɛ ɔ nɛ wa ná a nɛ sa bɔnɛ wa nu nɔ́ hetomi nɔ́ nɛ kɔɔ tsɔlɔ anɔkualetsɛ ɔ he ɔ he lo? Jehanɛ se hu ɔ, kɛ e saa bɔnɛ wa nu nɔ́ hetomi ní kpahi nɛ Yesu kɛ tsu ní nɛ maa ba mi ngɛ nyagbe be ɔ mi ɔ he ha kɛɛ? Wa ma susu sane bimihi nɛ a he hia nɛ ɔ a he ngɛ munyu nɛ nyɛɛ se ɔ mi.