E he hia we nɛ waa hao wa he tsɔ ngɛ he nɛ nɔ ko nɛ a fie lɛ kɛ je asafo ɔ mi ɔ maa hi ngɛ Matsɛ Yemi Asa nɔ ɔ he. Womi tɛtlɛɛ nɛ ɔ bɔ mɔde kaa e maa wo fɔli nɛ a ji Kristofoli ɔ he wami konɛ ke e maa hi ɔ, a ye bua a bimɛ nɛ a fie mɛ kɛ je asafo ɔ mi se a kɛ mɛ ngɛ we mi ɔ, bɔnɛ pee nɛ a dla a kɛ Mawu a kpɛti ekohu. Kaa bɔnɛ a tsɔɔ ngɛ Blɛfo gbi Hwɔɔmi Mɔ ɔ nɛ je kpo ngɛ November 15, 1988 ɔ, bafa 19 kɛ 20 ɔ mi ɔ, fɔli kɛ a bi nɛ e wɛ tsɔ, nɛ a kɛ lɛ ngɛ we mi, nɛ a fie lɛ kɛ je asafo ɔ mi ɔ ma nyɛ maa kase Baiblo ɔ po. Wa hyɛɛ blɔ kaa enɛ ɔ ma ha nɛ a bi ɔ ma ná he wami womi nɛ e he hia konɛ e dla e blɔ. *

Ke jokuɛ ko nɛ a fie lɛ kɛ je asafo ɔ mi kɛ e fɔli ya asafo mi kpe ngɛ Matsɛ Yemi Asa a nɔ ɔ, e sɛ nɛ e tu munyu. Akɛnɛ wa hyɛ we blɔ kaa nihi nɛ a fie mɛ nɛ́ a hi si ngɛ se ngɛ Matsɛ Yemi Asa a nɔ heje ɔ, e sɛ nɛ ke jokuɛ ko nɛ a fie lɛ kɛ je asafo ɔ mi ɔ hi si ngɛ e fɔli a kasa nya a, nɛ waa tu he munyu. Akɛnɛ fɔli ɔmɛ ngɛ a bi ɔ ye buae konɛ e dla e kɛ Yehowa a kpɛti heje ɔ, e sa nɛ fɔli ɔmɛ nɛ a bɔ mɔde nɛ a hyɛ konɛ ke a ya asafo mi kpehi ɔ, a bi ɔ nɛ e bu tue saminya. Loko fɔli ma nyɛ maa pee enɛ ɔ, ja jokuɛ ɔ hi si ngɛ a kasa nya. E sɛ nɛ a ngmɛ lɛ nɔ kake blɔ nɛ e ya hi he kpa.

Se ke jokuɛ ɔ nɛ a fie lɛ kɛ je asafo ɔ mi ɔ kɛ e fɔli be we kake mi hu nɛɛ? Anɛ lɔɔ tsɔɔ kaa jokuɛ ɔ kɛ e fɔli be nyɛe maa hi he kake ngɛ asafo mi kpehi a sisi lo? Be ko nɛ be ɔ, womi tɛtlɛɛ nɛ ɔ tsɔɔ bɔnɛ e se kaa Kristofoli kɛ a wekuno ko nɛ a fie lɛ kɛ je asafo ɔ mi nɛ a kɛ lɛ be we kake mi ɔ nɛ e ye ha. * Se e slo nɔ ko nɛ a fie lɛ nɛ e maa hi si dii ngɛ e wekuli a kasa nya ngɛ asafo mi kpehi a sisi ɔ ngɛ nɔ ko nɛ e je blɔ nɛ e kɛ e wekuno ko nɛ a fie lɛ kɛ je asafo ɔ mi ɔ maa bɔ ɔ he. Ke weku ɔ mi bimɛ nɛ a ngɛ asafo ɔ mi ɔ kɛ a wekuno nɛ a fie lɛ kɛ je asafo ɔ mi ɔ yeɔ ngɛ blɔ nɛ da nɔ, nɛ a bɔɔ mɔde kaa a kɛ Ngmami ɔ mi ga womi nɛ kɔɔ bɔnɛ e sa kaa a kɛ nihi nɛ a fie mɛ kɛ je asafo ɔ mi ɔ nɛ hi si ha a tsuɔ ní ɔ, e he hia we nɛ nɔ ko nɛ tu he munyu.—1 Kor. 5:11, 13; 2 Yoh. 11.

Ke nɔ ko nɛ a fie lɛ kɛ je asafo ɔ mi hi si ngɛ e wekuli aloo asafo ɔ mi nɔ ko kasa nya nɛ e pee we nɔ́ ko nɛ sɛ ɔ, e sɛ nɛ waa tu he munyu. E ngɛ bɔnɛ si himi ɔ maa hi ha nɛ ke wa tsɔɔ he pɔtɛɛ nɛ e sa kaa nɔ ko nɛ e hi ngɛ Matsɛ Yemi Asa a nɔ ɔ, lɔɔ ma nyɛ maa ngɔ haomi kɛ ba. Ke wekuli nɛ a ngɛ asafo ɔ mi ɔ kɛ nihi tsuo nɛ a baa asafo mi kpehi bɔɔ mɔde kaa a kɛ Baiblo mi sisi tomi mlaahi nɛ kɔɔ nihi nɛ a fie mɛ kɛ je asafo ɔ mi ɔ he ɔ ma tsu ní, nɛ nɔ ko pee we nɔ́ ko nɛ e maa tɔ̃tɔ̃ ní kpahi a nane ɔ, e he hia we nɛ waa tu munyu kɛ si bɔnɛ nihi hiɔ si ha ngɛ Kristofoli a kpehi a sisi ɔ. *