Baiblo ɔ de ke: “Ke nɔ yeli ɔmɛ ya pee yiwutsotsɛmɛ ɔ, ma a yeɔ kɔmɔ wawɛɛ nitsɛ.”—Abɛ 29:2.

Yinɔ sane mi hyi tɔ kɛ nɔ yeli nɛ a yi mi wa, nɛ a haa nɛ a sisi bimɛ naa nɔ́ wawɛɛ. Ngɛ anɔkuale mi ɔ, pi nɔ yeli tsuo nɛ a peeɔ jã. A ti ni komɛ ngɛ nɛ eko ɔ, a suɔ nɛ a ye bua nihi. Se ke a ná blɔ nya a, a nyɛ we nɛ a tsuɔ a yi mi tomi ɔ he ní akɛnɛ nihi kɛ mɛ huaa tsɛ yemi ɔ he ɔ heje. Aloo eko ɔ, a kɛ blɔ nya nɛ a ná a yeɔ nihi awi konɛ mɛɛ a ná he se. Henry Kissinger nɛ be ko ɔ, e ji U.S. Ma Nɔkɔtɔma a de ke: “Yinɔ sane mi hyi tɔ kɛ mɔde nɛ nihi bɔ nɛ nɔ́ ko ji mi kɛ bɛ, kɛ níhi nɛ nihi ngɔ a hɛ kɛ fɔ nɔ nɛ pee yaka.”

Baiblo ɔ hu de ke: “Nɔmlɔ adesa ko be he wami ngɛ lɛ nitsɛ e wami nɔ.” (Yeremia 10:23) Akɛnɛ adesahi yi mluku heje ɔ, a be nile nɛ he hia, nɛ a susuu we níhi a he hu kɛ yɛ tsitsaa konɛ a kɛ kudɔ a ní peepeehi ngɛ a dɛhe. Ke nihi be nyɛe ma kudɔ mɛ nitsɛmɛ a ní peepee ɔ, kɛ a ma plɛ kɛ kudɔ ma kɛɛ? Anɛ o na nɔ́ heje nɛ adesa nɔ yeli nyɛ we nɛ a po nɔ́ nami se ɔ lo? Ngɛ anɔkuale mi ɔ, behi fuu ɔ, nɔ yemi yaya lɛ haa nɛ adesa naa nɔ́!

Yesu de ke: “Ke nyɛ suɔ nyɛ sibi ɔ, kɛkɛ nɔ tsuaa nɔ maa le kaa ye kaseli ji nyɛ.”—Yohane 13:35.

Jami slɔɔtoslɔɔtohi a nya dali fiɛɛɔ kaa nihi nɛ́ a suɔ a sibi konɛ a pee kake. Se anɔkuale sane ji kaa, a nyɛ we nɛ a du suɔmi nɛ mi wa kɛ wo a se nyɛɛli ɔmɛ a mi konɛ a je nihi a he juɛmi yaya kɛ je a tsui mi. Behi fuu ɔ, jami ngɔɔ mi gbami, nɔ hɛ mi hyɛmi, kɛ pɛ kɛ baa nihi a kpɛti mohu pe nɛ a maa ye bua nihi konɛ a je suɔmi kpo. Jami he ní lelɔ ko nɛ a tsɛɛ lɛ ke Hans Küng ɔ mwɔ sane ɔ nya ngɛ e womi nɛ ji Christianity and the World Religions ɔ mi ke: “Ma kudɔmi he tahi nɛ a hwu kɛ kpata nihi babauu a hɛ mi pe kulaa a, jamihi fĩ se, nɛ a wo mi he wami wawɛɛ.”

 Jehanɛ se hu ɔ, jamihi fuu a nya dali kplɛɛ nɔ kaa tɔmi ko be he kaa nihi nɛ a sɛ we gba si himi mi ɔ kɛ a sibi ma ná bɔmi, nɛ a tsɔɔ hu kaa tɔmi be he kaa nɔ ko maa je e huno aloo e yo se, nɛ tɔmi hu be nyumu kɛ nyumu aloo yo kɛ yo a bɔmi nami he. Enɛ ɔ kɛ hiɔ, hɔ jemi, hɔhi nɛ a hiɛ we blɔ ngɔmi, gba kɛ wekuhi a puɛmi kɛ haomi kpahi fuu baa.

“Nɔ tsuaa nɔ ɔ, lɛ nitsɛ e we akɔnɔ nɛ́ gblaa lɛ, nɛ́ sisiɔ lɛ ɔ nɛ kaa lɛ. Nɛ akɔnɔ ɔ, ke e ngɔ hɔ ɔ, e fɔɔ yayami, nɛ yayami hu ke e wa a, e fɔɔ gbenɔ.”—Yakobo 1:14, 15.

Akɛnɛ wɔ tsuo wa yi mluku heje ɔ, wa tɔ̃ɔ, nɛ e biɔ nɛ waa hwu kɛ si ‘níhi nɛ wa nɔmlɔtso ɔ suɔ’ ɔ. (Efesobi 2:3) Se e yee kɛ haa wɔ kaa wa maa hwu kɛ si akɔnɔ yaya ke waa kɛ e he ka kpe. Ke wa ngmɛ blɔ nɛ akɔnɔ yaya ye wa nɔ ɔ, lɔɔ ma nyɛ maa ye wɔ awi.

Womi ngmalɔ ko nɛ a tsɛɛ lɛ ke P. D. Mehta a ngma ke: “Níhi nɛ haa nɛ wa naa nɔ́ ɔ fuu jeɔ wɔ nitsɛmɛ wa we akɔnɔhi, bua jɔmi nɛ waa suɔ kaa wa ná, wɔ nitsɛmɛ wa suɔmi nya ní nɛ wa peeɔ, wa hɛ nɛ kɔ̃ɔ̃ nihi a nɔ, kɛ biɛ nɛ wa suɔ kaa wa he ɔ.” Dã nɛ nya wa numi, tsopa yayahi kɛ nítsumi, asɔ fiɛmi, bɔmi nami, kɛ ní kpahi a he akɔnɔ ha nɛ nihi fuu nɛ a buu mɛ ngɛ a mahi a mi ɔ, a hɛ mi kpata, nɛ enɛ ɔ ngɔ haomihi kɛ ba a wekuli, a huɛmɛ, kɛ ni kpahi a nɔ. Akɛnɛ adesahi yi mluku heje ɔ, e sa nɛ waa kplɛɛ munyu nɛ Baiblo ɔ tu nɛ nyɛɛ se nɛ ɔ nɔ: “Nɔ tsuaa nɔ na kaa amlɔ nɛ ɔ, adebɔ níhi tsuo ngɛ kɛmɛe kaa nɔ́ nɛ a nu kɔɔmi nɛ a yaa fɔ.”—Romabi 8:22, The New Testament in Modern English, nɛ J. B. Phillips ngma a.

Baiblo ɔ tsɔɔ kaa Satan ji “je nɛ ɔ mi mawu,” nɛ bɔfo yayahi nɛ a ngɛ he wami nɛ a tsɛɛ mɛ kɛ daimoniohi ya piɛɛ e he.—2 Korintobi 4:4; Kpojemi 12:9.

Daimonio ɔmɛ hu a hɛ dɔ wawɛɛ kɛ ngɛ nihi kudɔe, nɛ a ngɛ nihi sisie kaa bɔnɛ Satan peeɔ ɔ. Bɔfo Paulo de ke: “Pi he lo kɛ muɔ nɛ waa kɛ ngɛ ta hwue ɔ. He nyɛli nɛ waa kɛ mɛ ngɛ ta hwue ɔ ji nɔ yeli, kɛ nihi nɛ hɛɛ blɔ nyahi, mumi yayami kpetekpleenyɛhi nɛ ngɛ je nɛ ɔ mi diblii ɔ mi, kɛ mumihi nɛ ngɛ kɔɔhiɔ mi nɛ peeɔ yiwutso níhi.”—Efesobi 6:12.

E ngɛ kaa ke daimonio ɔmɛ ngɛ nihi haoe ɔ, daimonio ɔmɛ a bua jɔɔ mohu lɛɛ, se pi lɔɔ ji nɔ́ titli nɛ a kɛ ma a hɛ mi. A suɔ kaa a ma je nihi kɛ je Yehowa Mawu, nɛ ji Hiɔwe No ɔ he. (La 83:18) Ní komɛ nɛ daimonio ɔmɛ guu nɔ nɛ a kɛ kudɔɔ nihi ji, dodoe mi hyɛmi, kunya tsumi, nyuami, kɛ klami. Enɛ ɔ heje nɛ Yehowa deɔ wɔ kaa waa yu wa he ngɛ o slaa nɛ ɔmɛ a he ɔ nɛ. E poɔ nihi nɛ a teɔ si kɛ woɔ Satan kɛ e daimonio ɔmɛ ɔ a he piɛ.—Yakobo 4:7.

Maa pee jeha akpe enyɔ nɛ e be ɔ, Baiblo ɔ gba kɛ fɔ si ke: “O hɛ nɛ hi nɔ kaa nyagbe ligbi ɔmɛ a mi ɔ, je mi maa wa.”

Benɛ Baiblo ɔ ngɛ nɔ́ nɛ ma ha nɛ je ɔ mi maa wa a he munyu tue ɔ, e de ke: ‘Nihi ma hla kaa a ma fo mɛ nitsɛmɛ pɛ a nɔ mi; a maa pee a he sika suɔli, fiali, he woli, nihi maa pee a ní kaa nɔ́ nɛ pi adesahi kulaa ji mɛ, nihi nɛ mɔbɔ nami ko be a mi, nihi a biɛ puɛli, nihi nɛ peeɔ basabasa nɛ a li zo, awi yeli, kɛ nihi nɛ sume nɔ́ kpakpa. Nimli maa pee a he nɔ se blɔ tsɔɔli, nihi nɛ bui nɔ́, he nɔ woli, kɛ nihi nɛ suɔ je mi akɔnɔ pe bɔnɛ a suɔ Mawu.’ Ngɛ anɔkuale mi ɔ, nɔ́ titli heje nɛ wa ngɛ nɔ́ nae ɔ ji, wa ngɛ “nyagbe ligbi ɔmɛ a mi.”—2 Timoteo 3:1-4.

Ngɛ níhi nɛ wa susu a he ɔ nya a, anɛ o na nɔ́ heje nɛ adesahi nɛ a hɛɛ juɛmi kpakpa a po nyɛ we nɛ a po nɔ́ nami se ɔ lo? Jije nɛ wa ma ná yemi kɛ buami kɛ je mɔ? E sa nɛ waa kɛ wa hɛ nɛ fɔ wa Bɔlɔ ɔ nɛ e wo si kaa e ma kpata “níhi nɛ Abosiami tsu ɔ” tsuo hɛ mi ɔ nɔ. (1 Yohane 3:8) Wa ma susu nɔ́ nɛ Mawu maa pee kɛ po níhi tsuo nɛ kɛ nɔ́ nami baa a se ɔ he ngɛ munyu nɛ nyɛɛ enɛ ɔ se ɔ mi.