“Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.”—Daniel 2:44.

Mawu Matsɛ Yemi ɔ ji hiɔwe nɔ yemi. Yesu Kristo nɛ ji Matsɛ Yemi ɔ nya Matsɛ ɔ ma je adesahi a nɔ yemihi tsuo kɛ je, nɛ e maa hyɛ konɛ a pee Mawu suɔmi nya ní ngɛ hiɔwe kɛ zugba a nɔ tsuo. (Mateo 6:9, 10) Adesa nɔ yemi ko ba be Mawu Matsɛ Yemi ɔ nane mi dae, ejakaa e ji wa “Nyɔmtsɛ, kɛ wa kpɔlɔ Yesu Kristo matsɛ yemi” nɛ́ maa hi si kɛ ya neneene. E ma ha nɛ tue mi jɔmi maa hi si daa.—2 Petro 1:11.

“Satan nitsɛ nyɛɔ tsakeɔ e he peeɔ bɔfo nɛ ngɛ kpɛe kaa la! Lɔɔ he ɔ, ke Satan tsɔli tsake a he pee kaa Mawu nɛ peeɔ kpakpa a tsɔli ɔ, nɔ́ nɛ ɔ be nyakpɛ kulaa. A nyagbe ɔ maa ba ha mɛ bɔnɛ sa mɛ kaa yiwutsotsɛmɛ.”—2 Korintobi 11:14, 15.

A ma kpa lakpa jami he bo kaa e ji Abosiami nítsutsui, nɛ a ma kpata lakpa jamihi a hɛ pɛsɛpɛsɛ kɛ je zugba a nɔ. Ninyɛ kɛ muɔ si puemi nɛ jami kɛ baa a tsuo se maa po. Enɛ ɔ ma ha nɛ nihi tsuo nɛ a suɔ “anɔkuale Mawu hɛ kalɔ” ɔ ma ja lɛ ngɛ “hemi kɛ yemi kake” mi ngɛ “mumi kɛ anɔkuale mi.” Enɛ ɔ maa ngɔ tue mi jɔmi kɛ kake peemi kɛ ba.—1 Tesalonikabi 1:9; Efesobi 4:5; Yohane 4:23.

“Mawu nitsɛ kɛ mɛ maa hi si, nɛ e maa pee a Mawu. Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”—Kpojemi 21:3, 4.

 Yehowa Mawu maa gu e Bi Yesu nɛ e ba gbo ngɛ wa he ɔ nɔ kɛ pee enɛ ɔ. (Yohane 3:16) Ngɛ Yesu blɔ tsɔɔmi sisi ɔ, adesahi maa ye mluku ekohu. Jamɛ a be ɔ mi ɔ, nɔ ko be nɔ́ nae hu, ejakaa “Mawu nitsɛ kɛ mɛ maa hi si,” nɛ e “ma tsu a hɛ mi vo nyu tsuo.” E be kɛe kulaa nɛ mluku nɛ adesahi yi kɛ nɔ́ nɛ adesahi ngɛ nae ɔ se maa po; “nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.”—La 37:29.

‘Yesu Kristo nu sinɔ ngua a, jamɛ a blema sinɔ ɔ nɛ a tsɛ lɛ Abosiami, loo Satan ɔ, nɛ e kɛ kɔsɔkɔsɔ ɔ fi lɛ, konɛ e hi si jeha akpe. Kɛkɛ nɛ e hɛ lɛ ngɔ fɔ muɔ voo ɔ mi, nɛ e nga sinya ngɔ wo e yi, nɛ e sɔu muɔ ɔ nya, konɛ e hi lejɛ ɔ jeha akpe. Jamɛ a be ɔ, e be nyɛe maa sisi je ma amɛ hu.’—Kpojemi 20:2, 3.

Ní yayahi tsuo a se maa po ke a fi Satan kɛ e daimonio ɔmɛ nɛ a sake mɛ ngɔ fɔ “muɔ voo” ɔ mi, aloo a kpɔ a he wami ngɛ a dɛ. A be nyɛe ma hao adesahi hu. Moo hyɛ bɔnɛ wa he maa jɔ wɔ ha ke wa ngɛ je ko nɛ Satan kɛ e mumi yayami ɔmɛ be mi ɔ mi!

“Nyagbe ligbi ɔmɛ” maa ba nyagbe kɛ nɔ nɛ Yesu tsɛɛ ke ‘amanehlu ngua’ a. Yesu de ke: “Ejakaa jamɛ a be ɔ, haomi ngua maa ba nɛ a nɛ eko hyɛ kɛ je be nɛ a bɔ je ɔ, kɛ ba si mwɔnɛ ɔ ligbi nɛ ɔ. Lɔɔ se hu, nɔ́ ko kaa jã be bae gblegbleegble.”—Mateo 24:21.

Amanehlu ɔ mi maa wa kɛ sisi numi kaa níhi nɛ a nɛ eko hyɛ maa ba. Ní nɛ ɔmɛ maa ba nyagbe ngɛ ‘Mawu Ope ɔ ligbi ngua a nɔ ta’ nɛ a tsɛɛ ke “Harmagedon” ɔ mi.—Kpojemi 16:14, 16.

Nihi nɛ a ngɛ he tsuaa he nɛ a suɔ nɔ́ nɛ da a, ngɛ blɔ hyɛe kaa je yaya nɛ ɔ nɛ e ba nyagbe. Mo susu jɔɔmihi nɛ a ma ná ngɛ Mawu Matsɛ Yemi ɔ mi ɔ a kpɛti bɔɔ ko pɛ a he nɛ o hyɛ.

A maa baa “nimli asafo” ko yi kɛ ya tue mi jɔmi je ehe ko mi: Mawu Munyu ɔ de ke a maa baa “nimli asafo” ko nɛ nɔ ko be nyɛe maa kane a yi kɛ gblee “haomi kpetekpleenyɛ” ɔ mi kɛ sɛ dami je ehe ɔ mi. (Kpojemi 7:9, 10, 14; 2 Petro 3:13) Nimli nɛ ɔmɛ maa tsɔɔ kaa Yesu Kristo, nɛ ji “Mawu To Bi ɔ nɛ woɔ je ɔ he yayami kɛ yaa” a lɛ he a yi wami.—Yohane 1:29.

Wa ma ná tsɔsemi nɛ Mawu ma ha wɔ ɔ he se wawɛɛ: Ngɛ je ehe ɔ mi ɔ, ‘zugba a tsuo maa le Yehowa kaa bɔnɛ wo hyi tɔ kɛ nyu ɔ.’ (Yesaya 11:9) Ní komɛ nɛ piɛɛ níhi nɛ Mawu maa tsɔɔ wɔ ɔ a he ji, bɔnɛ waa kɛ nihi tsuo maa hi si ngɛ tue mi jɔmi mi konɛ waa hyɛ níhi nɛ a ngɛ zugba a nɔ ɔ a nɔ saminya ha. Mawu wo si ke: ‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔnɛ nyɛɛ ba nyɛ je mi ha, konɛ e hi ha nyɛ nitsɛmɛ.’—Yesaya 48:17.

A ma tle wa suɔli nɛ a gbo ɔmɛ a si kɛ je yɔkɔ ɔmɛ a mi: Be nɛ Yesu ngɛ zugba a nɔ ɔ, e tle e huɛ Lazaro si kɛ je gbeje. (Yohane 11:1, 5, 38-44) Jã nɛ e pee ɔ tsɔɔ nɔ́ nɛ e maa pee kɛ ha adesahi ngɛ je kɛ wɛ ngɛ Mawu Matsɛ Yemi blɔ nya tomi ɔ sisi.—Yohane 5:28, 29.

Tue mi jɔmi kɛ dami ní peemi maa hi si kɛ ya neneene: Ngɛ Kristo nɔ yemi ɔ sisi ɔ, mlaa kuami ní peepeehi a se maa po. Mɛni blɔ nɔ wa gu kɛ le enɛ ɔ? Wa le enɛ ɔ, ejakaa Yesu le nɔ́ nɛ ngɛ adesa tsui mi, nɛ e maa da lɔɔ nɔ kɛ kojo konɛ e le dali kɛ yayami peeli. E be nihi nɛ a sume kaa ma tsake kɛ je a blɔ yayami ɔmɛ a nɔ ɔ blɔ ngmɛe nɛ a hi Mawu je ehe ɔ mi.—La 37:9, 10; Yesaya 11:3, 4; 65:20; Mateo 9:4.

Gbamihi fuu nɛ ngɛ Baiblo ɔ mi nɛ tsɔɔ jɔɔmihi nɛ adesahi ma ná hwɔɔ se ɔ, a kpɛti bɔɔ ko pɛ a he nɛ wa susu nɛ ɔ nɛ. Ke Mawu Matsɛ Yemi ɔ ngɛ je ɔ nɔ ye ɔ, adesahi maa hi si ngɛ “kplɔkɔtɔ, kɛ tue mi jɔmi mi.” (La 37:11, 29) Níhi tsuo nɛ haa nɛ adesahi naa nɔ́ ɔ se maa po. Mawu nitsɛ ma enɛ ɔ nɔ mi. E de ke: ‘Hyɛ, i ngɛ níhi tsuo pee ehe! Anɔkuale munyu nɛ sa kaa a he ye ji nɛ ɔ nɛ.’—Kpojemi 21:5.