A fɔ mi ngɛ Acul, nɛ ji ma ko nɛ tsɔ e he banee ngɛ yokuhi a nɔ ngɛ Guatemala ma a pusinɔ he je. Ye weku ɔ je Maya wɛtso nɛ ji Ixil ɔ mi. I tuɔ Spanish kɛ Ixil gbi ɔ. Benɛ i ji jokuɛyo ɔ, jamɛ a be ɔ, Guatemala ta nɛ a kɛ jeha 36 hwu ɔ ngɛ nɔ yae. Ixil bi babauu gbo ngɛ ta nɛ ɔ mi.

Benɛ i ye jeha eywiɛ ɔ, ye wetsɛ nɛ e ye jeha kpaago ɔ na oplɛmi nyafii ko ngɛ zugba nɛ e kɛ ngɛ fiɛe, si kake too ɔ, oplɛmi ɔ pɛ́. Oplɛmi ɔ nɛ pɛ́ ɔ ha nɛ ye hɛngmɛ yu, se aywilɛho sane ji kaa ye wetsɛ ɔ lɛɛ e gbo. Lɔ ɔ se ɔ, a kɛ mi ya sukuu ko nɛ a hyɛɛ nihi nɛ a hɛngmɛ yu a nɔ ngɛ ɔ ngɛ Guatemala ma a mi. Lejɛ ɔ nɛ i ya a ye bua mi nɛ i kase bɔ nɛ hɛ yuyuili kɛ a nine kaneɔ ní ha. Nihi nɛ a tsuɔ ní ngɛ lejɛ ɔ ngmɛ́ mi blɔ nɛ i kɛ sukuu bi kpa amɛ nɛ sɛɛ ní. I li yi mi tomi tutuutu he je nɛ a pee jã. Enɛ ɔ ha nɛ sukuu bi ɔmɛ hu kɛ mi bɔɛ. Akɛnɛ nɔ ko kɛ mi bɔɛ he je ɔ, be saa be ɔ, i pee dii. Jeha fɛɛ jeha a, a haa nɛ wa yaa we mi nyɔhiɔ enyɔ, enɛ ɔ he ɔ, i hyɛɛ blɔ kaa jamɛ a be ɔ maa su nɛ ma ya we mi nɛ́ ma ya na ye yayo. Lɛ pɛ ji nɔ nɛ e suɔ mi, nɛ́ e jeɔ mi mi jɔmi kpo kɛ tsɔɔ mi. Se aywilɛho sane ji kaa ye yayo gbo benɛ i ye jeha nyɔngma. E gbenɔ ɔ hao mi wawɛɛ ejakaa lɛ pɛ ji nɔ nɛ e suɔ mi.

Benɛ i ye jeha 11 ɔ, i kpale kɛ ya Acul ngɛ he nɛ a fɔ mi ngɛ ɔ nɛ i kɛ ye nyɛminyumu nɛ e ji ye tsɛ bi ɔ kɛ e weku ɔ ya hi si. A ha mi ye he lo nya hiami níhi, se ke i ngɛ haoe ɔ, lɛɛ nɔ ko wui ye bua. Be komɛ ɔ, i kɛ aywilɛho biɔ Mawu ke: “Mɛni he je nɛ ye yayo gbo ɔ? Mɛni he je nɛ ye hɛngmɛ yu ɔ?” Nihi fuu deɔ mi ke Mawu lɛ ha nɛ e ba lɛ jã. Enɛ ɔ ha nɛ i naa Mawu kaa e ji nɔ ko nɛ e susuu we nɔ he, nɛ e yi dami sane. Jinɛ i ngɛ hlae nɛ ma gbe ye he, se i be níhi nɛ ma kɛ pee jã.

Akɛnɛ ye hɛngmɛ yu he je ɔ, nihi peeɔ mi nɔ́ fɛɛ nɔ́ nɛ a suɔ. Benɛ i wɛ ɔ, a tua mi abonua si abɔ. I de we nɔ ko ejakaa i susu kaa pi nɔ ko kɔmɔ ji mi. Nihi kɛ mi tu we munyu, nɛ imi hu i kɛ nɔ ko sɛɛ we ní. Daa nɛ ɔ, i peeɔ dii nɛ i haoɔ. Jehanɛ ɔ se hu ɔ, i he we nɔ ko yi.

Benɛ i ji niheyo ɔ, nyumu ko kɛ e yo nɛ a ji Yehowa Odasefohi ɔ ba ye ngɔ benɛ wa ngɛ wa hɛja jee ngɛ sukuu. Wa tsɔɔli ɔmɛ a kpɛti nɔ kake nɛ ye si fɔfɔɛ ɔ peeɔ lɛ mɔbɔ ɔ lɛ de mɛ kaa a ba slaa mi. A de mi kaa Baiblo ɔ wo si kaa be ko maa su nɛ a ma tle gbogboehi si, nɛ hɛ yuyuili hu maa hyɛ nɔ ekohu. (Yesaya 35:5; Yohane 5:28, 29) I bua jɔ nɔ́ nɛ a tsɔɔ mi ɔ he, se i nyɛ we nɛ i kɛ mɛ nɛ sɛɛ ní kpakpa ko, ejakaa i kɛ nihi pɔɛ ní sɛɛmi. E ngɛ mi kaa i nyɛ we nɛ i kɛ mɛ sɛɛɔ ní mohu lɛɛ, se a je mi mi jɔmi kpo kɛ tsɔɔ mi, nɛ a to a tsui si kɛ ha mi. A ba slaa mi, nɛ a tsɔɔ mi níhi nɛ ngɛ Baiblo ɔ mi ɔ. Nyumu nɛ ɔ kɛ e yo ɔ nyɛɛɔ si tomi ekpa (kilomita 10) kɛ guɔ yokuhi a yi mi kɛ baa he nɛ i ngɛ ɔ.

Ye nyɛminyumu ɔ de mi ke a ji nihi nɛ a be nɔ́ ko tsɔ̃, se kɛ̃ ɔ, a dlaa a he saminya. E ngɛ mi kaa a be nɔ́ ko tsɔ̃ mohu lɛɛ, se a ba keɔ mi ní. I na kaa anɔkuale Kristofohi pɛ nɛ a ma nyɛ ma je he kɛ afɔle sami su kaa kikɛ nɛ ɔ kpo.

Womihi nɛ a pee kɛ ha hɛ yuyuili ɔ ye bua mi nɛ i nyɛ nɛ i kase Baiblo ɔ. E ngɛ mi kaa i nu nɔ́ nɛ i ngɛ kasee ɔ sisi mohu lɛɛ, se ngɛ anɔkuale mi ɔ, e he wa ha mi kaa ma kplɛɛ níhi nɛ i ngɛ kasee ɔ ekomɛ a nɔ. Kaa nɔ hyɛmi nɔ́ ɔ, e he wa ha mi kaa ma nu sisi kaa Mawu susuɔ ye he, nɛ ni kpahi hu susuɔ ye he kaa bɔ nɛ Mawu peeɔ ɔ. I nu nɔ́ he je nɛ Yehowa ngmɛ blɔ nɛ́ yi wu tso níhi ngɛ nɔ yae ɔ sisi mohu lɛɛ, se e he wa ha mi kaa ma na Yehowa kaa e ji Tsɛ nɛ ngɛ suɔmi. *

Bɔɔbɔɔbɔɔ ɔ, nɔ́ nɛ i kase ngɛ Ngmami ɔ mi ɔ ye bua mi nɛ i tsake ye susumi. Kaa nɔ hyɛmi nɔ́ ɔ, i kase kaa Mawu mi mi saa lɛ ngɛ nihi nɛ a ngɛ nɔ́ nae ɔ a he. E de ngɛ e sɔmɔli nɛ a ngɛ mɛ yi mi wae ɔ a he ke: ‘Amanehlu nɛ ye ma a ngɛ nae ɔ, i na . . . i le a nɔ́ nami ɔ tsuo.’ (2 Mose 3:7) Benɛ i ba na su kpakpahi nɛ Yehowa ngɛ ɔ, lɔ ɔ wo mi he wami nɛ i jɔɔ ye wami nɔ kɛ ha lɛ. Ngɛ jeha 1998 ɔ mi ɔ, a baptisi mi kaa Yehowa Odasefo ɔmɛ a kpɛti nɔ kake.

Benɛ a baptisi mi jeha kake se ɔ, i ya sukuu ko nɛ a pee kɛ ha hɛ yuyuili ngɛ ma ko nɛ e kɛ Escuintla he kɛ we ɔ mi. Asafo mi nɔkɔtɔma ko nɛ e ngɛ wa we asafo ɔ mi ɔ na dengme nɛ i gboɔ loko i yaa asafo mi kpe ngɛ ye ma a mi ɔ. Loko ma nyɛ ma ya asafo mi kpe nɛ e kɛ i he kɛ we ɔ, e ma bi nɛ ma kuɔ yokuhi nɛ Odasefo ɔmɛ nɛ a kɛ mi ba kase ní ɔ kuɔɔ kɛ baa ye ngɔ ɔ. Asafo mi nɔkɔtɔma a nɛ ngɛ ye we asafo ɔ mi ɔ bi weku ko nɛ a ji Odasefohi nɛ a ngɛ Escuintla a ke ji a maa suɔ nɛ ma ba hi a ngɔ konɛ a ye bua mi nɛ ma ya asafo mi kpehi lo. A kplɛɛ nɔ, nɛ a ngɛ ye nɔ hyɛe kaa mɛ nitsɛmɛ a weku no kɛ ba si mwɔnɛ ɔ.

Nyɛmimɛ ngɛ asafo ɔ mi ɔ je suɔmi nitsɛnitsɛ kpo kɛ tsɔɔ mi ngɛ blɔ slɔɔtohi a nɔ. Níhi a si kpami nɛ ɔmɛ tsuo haa nɛ i náa nɔ mi mami kaa Yehowa Odasefohi ji anɔkuale Kristofohi. Ye bua jɔ kaa i piɛɛ a he.​—Yohane 13:34, 35.

Amlɔ nɛ ɔ, i nuɔ he kaa ye he ngɛ se nami, nɛ i ngɛ hɛ kɛ nɔ fɔmi hulɔ. I nyɛɔ nɛ i peeɔ ní kpakpahi fuu ngɛ ye si himi mi. I kɛ ye he wo be tsuo sɔmɔmi ní tsumi nɛ Yehowa Odasefohi ngɛ tsue ɔ mi, nɛ i tsɔɔ nihi anɔkuale nɛ ngɛ Baiblo ɔ mi ɔ. Enɛ ɔ ha nɛ i kɛ ye juɛmi ma we ye nyagba a nɔ. I ngɛ sɔmɔe kaa asafo mi nɔkɔtɔma, nɛ i daa Baiblo ɔ nɔ kɛ tuɔ magbɛ nɔ munyuhi ngɛ wa we asafo ɔ mi. I ná he blɔ hu nɛ i tu Baiblo mi munyuhi ngɛ wa kpokpa nɔ kpe ɔmɛ a sisi ngɛ nimli akpehi abɔ a hɛ mi.

Ngɛ 2010 mi ɔ, i ná he blɔ nɛ i ya Sɔmɔli A Tsɔsemi Sukuu (nɛ amlɔ nɛ ɔ a tsɛɛ lɛ ke Sukuu Kɛ Ha Matsɛ Yemi Sane Kpakpa Fiɛɛli) nɛ a pee ngɛ El Salvador ɔ eko. Sukuu nɛ ɔ dla mi konɛ ma nyɛ nɛ ma tsu ye blɔ nya ní tsumihi ngɛ asafo ɔ mi ɔ he ní saminya. Tsɔsemi nɛ ɔ nɛ ye nine su nɔ ɔ ha nɛ i na kaa ye he ngɛ se nami, nɛ Yehowa Mawu hu suɔ mi wawɛɛ. Ngɛ bɔ nɛ nɔ ko ngɛ ha tsuo se ɔ, Yehowa ma nyɛ ma tsɔse lɛ kɛ ha e ní tsumi ɔ.

Yesu de ke: “Bua jɔmi babauu ngɛ nɔ́ hami mi pe nɔ́ ngɔmi.” (Ní Tsumi 20:35) Mwɔnɛ ɔ, ma nyɛ ma de kɛ nɔ mi mami kaa i ngɛ bua jɔmi. Be ko nɛ be ɔ, jinɛ i nuɔ he kaa se nami be ye he, se amlɔ nɛ ɔ, i na kaa se nami ngɛ ye he, nɛ ma nyɛ ma ye bua ni kpahi hulɔ.