Nyɛmimɛ Nyumuhi kɛ Yihi nɛ wa suɔ:

Ngɛ jeha lafa kpaagone ɔ mi loko a fɔ Kristo ɔ, a je nina ko nɛ ngɛ nyakpɛ kɛ tsɔɔ gbalɔ Ezekiel. E na hiɔwe lɛ gojoo ko nɛ Je Mluku ɔ Nɔ Yelɔ ɔ ngɛ kudɔe. Nɔ́ nɛ ngɛ nyakpɛ ngɛ hiɔwe lɛ nɛ ɔ he ji bɔ nɛ e plɛɔ kɛ nyɛɛɔ ha a. Ke e ngɛ e blɔ tsakee po ɔ, e hɛɛ fo kaa oslabai la. E ma nyɛ ma tsake e blɔ nɛ́ e he hia we kaa e pee blɛuu, aloo e plɛ e he!​—Eze. 1:4, 9, 12, 14, 16-27.

Nina nɛ ɔ kaiɔ wɔ kaa be fɛɛ be ɔ, Yehowa blɔ nya tomi ɔ fã nɛ ngɛ hiɔwe ɔ ngɛ hɛ mi yae. Nɛ e blɔ nya tomi ɔ fã nɛ ngɛ zugba a nɔ hu nɛɛ? Níhi nɛ ya nɔ ngɛ sɔmɔmi jeha nɛ be ɔ mi ɔ tsɔɔ heii kaa Yehowa ha nɛ e we bi nɛ a pee kake kɛ ngɛ lɛ sɔmɔe ngɛ zugba a nɔ ɔ ngɛ a hɛ mi yae wawɛɛ nitsɛ!

Ngɛ United States ɔ, Bethel weku ɔ be deka kulaa, ejakaa a to blɔ nya konɛ a hia kɛ je Brooklyn kɛ ho asafo ɔ yi ehe nɛ a ma ngɛ Warwick, New York ɔ ya. A ti ni komɛ ho he kpahi ya, nɛ ni komɛ hu ya pee blɔ gbali. Bethel weku mi bimɛ kpahi nɛ a ngɛ sɔmɔe ngɛ ma kpahi a nɔ ɔ hu be deka kulaa. A ngɛ tsuhi mae ngɛ asafo ɔ ní tsumi kɔni komɛ, nɛ a ngɛ tsu momohi dlae. A bla asafo ní tsumi kɔni ɔmɛ ekomɛ, nɛ ekomɛ hia kɛ ya he kpahi. Nɛ mo nɛɛ? Ke o yɛ he ko po ɔ, atsinyɛ jemi ko be he kaa o ya hɛ mi ngɛ blɔ kpahi a nɔ.

Bɔ nɛ Mawu we bi nɛ a ngɛ je kɛ wɛ ɔ kɛ Yehowa asafo ɔ ngɛ nyɛɛe ha, nɛ́ a kɛ hɛdɔ ngɛ ní tsue ɔ taa Blɔ Tsɔɔmi Ajla Toli ɔmɛ a tsui he wawɛɛ, nɛ e woɔ mɛ he wami. Nihi fuu ya ngɛ sɔmɔe ngɛ hehi nɛ hiami babauu ngɛ. Ni kpahi hu a sɔmɔmi ní tsumi ɔ ba pee nɔ́ ehe kɛ ha mɛ, ejakaa a ngɛ gbi ehe kasee. Nihi fuu gu blɔ ehehi a nɔ kɛ ngɛ odase yee. Nihi babauu hu gu blɔ slɔɔtohi a nɔ kɛ bli a sɔmɔmi ní tsumi ɔ mi. Anɔkuale Kristofohi tsuo, nɛ nihi nɛ a wa ngɛ jeha mi, kɛ nihi a gbɔjɔ ngɛ nɔmlɔ tso mi hu piɛɛ he ɔ kɛ anɔkuale yemi ngɛ wami he fo ɔ tue. A ngɛ a hɛ mi yae ngɛ Yehowa sɔmɔmi ní tsumi ɔ mi, nɛ a gu lɔ ɔ nɔ kɛ ngɛ Satan he bo kpae kaa lakpatsɛ ji lɛ!​—1 Kor. 9:24.

Nyɛ ná nɔmi mami kaa Yehowa na mumi nɛ nyɛ je kpo ɔ. (Heb. 6:10) Nyɛ tsui mi nɛ nyɛ je kɛ pee enɛ ɔ ha nɛ wa kai Abraham kɛ Sara. Benɛ Abraham ye jeha 70 kɛ se ɔ, e hia kɛ je Kaldea bi ɔmɛ a ma nɛ ji Ur ɔ kɛ ho tsitsaa Kanaan ya. E ya hi lejɛ ɔ jeha lafa ngɛ bo tsuhi a mi. Tsui mi nɛ e kɛ e yo ɔ a je kɛ pee enɛ ɔ sa kadimi wawɛɛ!​—1 Mose 11:31; Níts. 7:2, 3.

Anɛ mo hu o ngɛ su nɛ ɔ kpo jee lo? Nyɛ tsuo nyɛ ngɛ nyɛ tsui si toe ngɛ haomi be nɛ ɔmɛ a mi, nɛ nyɛ ngɛ nɔ́ nɛ Yesu de wɔ ke waa pee ɔ  pee. E de ke: ‘Nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Nyɛɛ baptisi mɛ ngɔ wo Tsɛ ɔ, kɛ Bi ɔ, kɛ mumi klɔuklɔu ɔ a biɛ mi.’​—Mat. 28:19.

Munyu nɛ ji “nyɛɛ ya” nɛ Yesu kɛ tsu ní ɔ tsɔɔ kaa e sɛ nɛ waa hi he kake, mohu ɔ, e sa nɛ waa hia wa nane. Ke wa hyɛ ní nɛ Kristo se nyɛɛli kɛ kã tsu ngɛ jeha nɛ be ɔ mi ɔ, wa bua jɔɔ wawɛɛ! E ngɛ heii kaa Yehowa kɛ kɔni si wami ngɛ Matsɛ Yemi sane kpakpa a nɛ wa ngɛ fiɛɛe ngɛ je kɛ wɛ ɔ nɔ jɔɔe.​—Mar. 13:10.

Nihi fuu ngɛ sɛ gbi ɔ tue bue. Jeha nɛ be ɔ, fiɛɛli a yibɔ ya su 8,340,847, nɛ waa kɛ nihi 10,115,264 kase Baiblo ɔ nyɔhiɔ fɛɛ nyɔhiɔ. Atsinyɛ jemi ko be he kaa Mawu hiɔwe lɛ ɔ ngɛ e hɛ mi yae, nɛ jã nɔuu nɛ wɔ hu wa ngɛ wa hɛ mi yae! Nyɛɛ ya nɔ nɛ nyɛ tsu ní tsumi kpakpa nɛ nyɛ ngɛ tsue ngɛ be bɔɔ nɛ piɛ nɛ ɔ mi loko Yehowa nɛ fɔ yi wami hemi agbo ɔ mi.

Wa jeha ngmami kɛ ha jeha 2017 ɔ sa wawɛɛ nitsɛ. Lɔ ɔ ji: ‘Ngɔɔ o hɛ kɛ fɔ Yehowa nɔ nɛ o pee kpakpa’! (La 37:3) Ke o bu munyu nɛ ɔ tue, nɛ o pee kpakpa ngɛ Yehowa sɔmɔmi klɔuu ɔ mi ɔ, lɔ ɔ maa tsɔɔ kaa o ngɛ hɛ kɛ nɔ fɔmi ngɛ e mi. Wa kpa mo pɛɛ nɛ o kai be fɛɛ be kaa a si we mo. Yesu maa ye munyu nɛ e tu ɔ nɔ daa. E de ke: “Hyɛ, i kɛ nyɛ maa hi si daa kɛ yaa su je mi nyagbe.”​—Mat. 28:20.

Mo ná nɔ mi mami kaa Yehowa maa ya nɔ maa jɔɔ mo ngɛ anɔkuale yemi nɛ o kɛ ngɛ lɛ sɔmɔe ɔ he je. Ke bɔbɔyoo nɛ o tsuɔ jio, babauu nɛ o tsuɔ jio, nɔ́ nɛ Yehowa suɔ ji kaa, o maa je o tsui mi nɛ o kɛ juɛmi kpakpa ma tsu nɔ́ nɛ o ma nyɛ. Nike ní kaa jã a taa e tsui he nɛ e náa he bua jɔmi. (2 Kor. 9:6, 7) Enɛ ɔ he je ɔ, moo ya nɔ nɛ o hɛ mo kɛ su o Tsɛ nɛ ngɛ suɔmi ɔ he kɛ gu sɔlemi nɛ o maa sɔle daa, Mawu Munyu ɔ nɛ o maa kase, Kristofohi a kpehi nɛ o maa ya, kɛ fiɛɛmi ní tsumi ɔ nɛ o kɛ kã ma tsu ɔ nɔ.

Kɛ yaa si benɛ “be bɔɔ” nɛ a ha Abosiami, nɛ e ji atua tsɔlɔ yiwutsotsɛ ɔ, maa su ɔ, e fia e pɛɛ si kaa e maa gu blɔ tsuaa blɔ nɔ konɛ e ha nɛ wa kpa Yehowa anɔkuale yemi. (Kpoj. 12:12) Moo hɛ mo kɛ su Yehowa he, nɛ bɔ fɛɛ bɔ nɛ ji ɔ, Abosiami nine maa nyɛ si. (La 16:8) Wa suɔ nɛ nyɛɛ le kaa wa suɔ nyɛ wawɛɛ, nɛ wa bua jɔ yemi kɛ buami nɛ nyɛɛ kɛ haa ngɛ Matsɛ Yemi ɔ he ngɛ nyagbe be nɛ ɔmɛ a mi ɔ he.

Nyɛ nyɛmimɛ,

Yehowa Odasefohi a Blɔ Tsɔɔmi Ajla Toli