JOKUƐWI enyɔ nɛ ɔmɛ ji a he kulaa, aloo pi ja? Anɛ o le a biɛhi lo? Detsɛ ɔ ji Esau, nɛ nɔ nɛ ngɛ to ɔmɛ a nɔ hyɛe ɔ ji Yakob.

Esau kɛ Yakob ji Isak kɛ Rebeka a bimɛ nɛ a ji hawi. A tsɛ Isak suɔ Esau sane saminya, ejakaa e ya daa de nɛ e gbeɔ lo kɛ baa we mi nɛ weku ɔ yeɔ. Se Rebeka lɛɛ e suɔ Yakob sane, ejakaa e ngɛ kpoo, nɛ e he jɔ hulɔ.

A nɛ Abraham ngɛ je mi, nɛ eko ɔ, Yakob bua jɔɔ he kaa Abraham nɛ́ sɛɛ lɛ Yehowa he ní. Nyagbe mi ɔ, Abraham gbo benɛ e ye jeha 175 nɛ́ hawi ɔmɛ hu ye jeha nyɔngma kɛ enuɔ ɔ.

Benɛ Esau ye jeha 40, e ngɔ Kanaan yihi enyɔ. Enɛ ɔ hao Isak kɛ Rebeka, ejakaa yi nɛ ɔmɛ ja we Yehowa.

Ligbi ko ɔ, nɔ́ ko ba nɛ e ha Esau mi mi fu e nyɛmi Yakob wawɛɛ. E su benɛ Isak maa jɔɔ e bitɛte ɔ. Nɛ akɛnɛ Esau wa pe Yakob heje ɔ, e hyɛ blɔ kaa lɛ nɛ e maa ngɔ jɔɔmi ɔ. Se Esau jua e tɛte blɔ nya a kɛ ha Yakob momo. Jehanɛ se hu ɔ, benɛ a fɔ hawi ɔmɛ ɔ, Mawu de kaa Yakob ji nɔ nɛ ma ná jɔɔmi ɔ. Nɛ ja pɛpɛɛpɛ ji bɔnɛ e ba mi. Isak ngɔ jɔɔmi ɔ kɛ ha e bi Yakob.

Pee se benɛ Esau ba le enɛ ɔ, e mi mi fu Yakob. E mi mi fu wawɛɛ nɛ e de ke e maa gbe Yakob. Benɛ Rebeka nu munyu nɛ ɔ, e hao saminya. Lɔɔ he ɔ, e de e huno Isak ke: ‘Ke Yakob hu ya ngɔ Kanaan yi nɛ ɔmɛ eko ɔ, lɛɛ e maa pee haomi ha mi.’

Lɔɔ he ɔ, Isak tsɛ e bi Yakob nɛ e de lɛ ke: ‘Koo ngɔ Kanaan yi ɔmɛ eko. Mohu ɔ, yaa o nɛ Betuel ngɔ ngɛ Haran. Ngɔɔ e binyumu Laban biyi ɔmɛ a kpɛti nɔ kake.’

Yakob bu e tsɛ ɔ tue, nɛ amlɔ nɔuu ɔ, e hia blɔ gagaa kɛ ho e wekuli ɔmɛ a ngɔ ya ngɛ Haran.